Kuwonjezera Luso Lathu mu Utumiki—Kulalikira Pogwiritsa Ntchito Intakomu Kapena M’madera a Chitetezo Chokhwima

N’chifukwa Chiyani Kuchita Zimenezi N’kofunika? Kulalikira pogwiritsa ntchito intakomu kapena kulalikira kudera lomwe nyumba zake ndi za mipanda, kungakhale kovuta. Ndiye kodi tingatani kuti zimenezi zisatilepheretse kugwira ntchito yolalikira modzipereka? Muzikumbukira kuti pali anthu ena amene tingawalalikire uthenga wabwino pogwiritsa ntchito intakomu, foni kapena kalata basi. (Aroma 10:14) Ofalitsa ena agwiritsapo ntchito njirazi ndipo aona kuti ndi zothandiza kwambiri. (Onani Yearbook ya 2011, tsamba 65-66, ndi Yearbook ya 2000, tsamba 54, ndime 3.) Tiyeni tikambirane mmene tingachitire zimenezi.

Kodi Tingachite Bwanji Zimenezi?

Konzekerani ulaliki wachidule n’kuulemba penapake kuti mukangowerenga polankhula ndi munthu kudzera pa intakomu kapena pa foni. Zimenezi zingathandize kuti mukalankhule mopanda mantha. Poyamba fotokozani cholinga chanu. Ndi bwino kutchula dzina la munthuyo ngati mukulidziwa. Pomaliza muuzeni kuti mumusiyira kapena mudzamubweretsera kapepala kapena magazini kuti adzamve zambiri.
Khalani ansangala. Polankhula muzimwetulira komanso kugwiritsa ntchito manja ngakhale kuti simukulankhula ndi munthuyo pamasom’pamaso.
Muzilankhula momasuka ndipo muzimupatsa mpata kuti nayenso alankhule. Lankhulani momveka ndipo musatsitse kapena kukweza mawu kwambiri. Musamalankhule mothamanga, komabe sikuti muzingoimaima.
Khalani ozindikira. Kumipanda ina kumakhala maintakomu a nyumba zosiyanasiyana. Mwina mungasankhe kulankhula ndi anthu a m’nyumba zitatu m’malo moyesa kulankhula ndi onse. Mukatero mungachite bwino kulemba nyumba zomwe mwalankhula ndi eniakezo kuti ulendo wina mudzapitirize zinazo. Zimenezi zingathandize kuti musakhale pamalopo kwa nthawi yaitali, zomwe zingachititse kuti eni ake ayambe kukukayikirani.

Tayesani Kuchita Izi Mwezi Uno:

Pa kulambira kwa pabanja yesererani ulaliki wogwiritsa ntchito foni kapena intakomu ndipo amene akuyesererawo asayang’anizane.