Mmene Mungacitile Ulaliki Pogwilitsila Nchito Thebulo Kapena Shelufu ya Zofalitsa

Ulaliki wogwilitsa nchito thebulo kapena shelufu ndi njila ina imene ikuthandiza kwambili anthu a mitima yabwino kulandila coonadi. (Yoh. 6:44) Akulu akulimbikitsidwa kupanga makonzedwe a ulaliki wapoyela pa malo amene pamadutsa anthu ambili m’gawo la mpingo wao. Popeza mathebulo kapena mashelufu a zofalitsa saikidwa pamalo amodzi mpaka kalekale, palibe cifukwa copemphela cilolezo kwa olamulila. Ndani ali oyenelela kucita ulalikiwu? Ndi ofalitsa amene ali ndi luso la kuzindikila, khalidwe labwino ndiponso luso la kulankhula bwino. Pansipa pali zimene ofalitsa ayenela kucita ndi zimene sayenela kucita kuti ulaliki umenewu uwayendele bwino.

Zoyenela kucita:

Khalani waubwenzi, ndipo muzilandila ndi kuthandiza anthu amene abwela. Ofalitsa ena amamwetulila ndi kupatsa anthu moni mwaubwenzi. Ngati ena akuyang’ana pa thebulo kapena shelufu, mungakambe kuti : “Mungatengepo buku limene mwakonda.”
Musaime pafupi kapena patali kwambili ndi thebulo kapena shelufu. M’madela ena, ofalitsa amaona kuti kukhala pafupi ndi thebulo la zofalitsa kulibwino. Koma ofalitsa ena amaona kuti njila imeneyi imalepheletsa anthu kuima pamene pali mathebulo kapena mashelufu. Munthu akafika pa thebulo la zofalitsa, yambani kulankhula naye, mwina mungafunse kuti: “Kodi munadzifunsapo funso limeneli?”
Ngati n’kotheka, gwilitsilani nchito Baibulo nthawi zonse.
Ngati munthu watenga cimodzi mwa zofalitsa zimene timagwilitsila nchito pophunzila Baibulo ndi anthu monga buku la Zimene Baibo Imaphunzitsa, m’fotokozeleni pulogalamu yophunzila Baibulo. Mungamuonetse vidiyo yakuti, N’cifukwa Ciani Muyenela Kuphunzila Baibulo? pa foni kapena cida cokhala ndi intaneti.
Ngati Munthu ndi wacidwi, mungamufunse kumene akhala ndi kutenga nambala yake ya foni. Ngati munthuyo sakhala m’gawo lanu, lembani fomu yakuti Kaonaneni ndi wacidwi uyu (S-43) ndi kuipeleka kwa Kalembela wa mpingo mwamsanga.