Oprograma Yeliongiyo Epe Mewaneno
1, 2. Omapiluluko patyi maalingwa momaliongiyo okupolelela mu Kupupu yo 2009?
1 Mokuenda kuo simano 21-27 ya Tyikukutu yo 2008, kualingwa eiviso limue liahambukiswa omawaneno aeho ovanthu va Huku. “Okupolelela mu 1 ya Kupupu yo 2009, Elilongeso Liomukanda Mewaneno malilingwa kumue Neliongiyo Liovilinga, Nosikola Yovilinga Via Huku. Elilongeso Liomukanda Mewaneno, pahe maliihanua okuti Elilongeso Liombimbiliya Mewaneno.”
2 O Programa Pala Eliongiyo Olio Lia Kese Simano: Eliongiyo olio, malilingwa mo ola 1 nono minutu 45 okukutikinyamo oviimbo, nomalikuambelo. Eliongiyo malihimbika notyiimbo, nelikuambelo (5 min.), akulandula Elilongeso Liombimbiliya Mewaneno (25 min.). Amulingi Osikola Yovilinga Via Huku (30 min.). Konyima yomaliongiyo oo, imbei otyiimbo (5 min.) amuhimbika Eliongiyo Liovilinga (35 min.). Eliongiyo limanuhuke notyiimbo, nelikuambelo (5 min.). Pala okukukuatesako okupongiya omaliongiyo oo, o programa pala Elilongeso Liombimbiliya Mewaneno, Nosikola Yovilinga Via Huku, Neliongiyo Liovilinga, maiya kese hanyi Movilinga Vietu Viouhamba.
3. Oñgeni Elilongeso Liombimbiliya Mewaneno maliendeswa?
3 Elilongeso Liombimbiliya Mewaneno: Eliongiyo olio malilingwa ngetyi tyilingwa Elilongeso Liomutala Womulavi. Katyasukisile okupitulula etyi muelilongesa mono simano mbokualamba. Mahi, popiapo vala onondaka mbumue pala okuhimbika eliongiyo. Otyo matyivatela ovateheleli aveho okuava omakumbululo ahasete. Omukulu weuaneno ukahi komutue, maholovona ovakulu vewaneno mavaendesa eliongiyo olio kese simano.
4. Omonkhalelo patyi Eliongiyo Liovilinga malipiluluka?
4 Eliongiyo Liovilinga: Eliongiyo Liovilinga kamalipiluluka, mahi, malikala no nonthele ononthutu. Omaiviso maalingwa mono minutu ononthano. Omuvo oo mautuuka pala okulinga omaiviso esukisa, nokutanga omikanda vimue vio filiyale. Omaiviso konthele yokuenda movilinga viokuivisa, nokusukukisa ondyuo yomaliongiyo, nolelatoliu yonombongo, nomikanda omikuavo mutumikiswa no filiyale, katyesukisile okuetanga kotrimbuna, mahi, epakei pekuadru yomaiviso opo ovakuatate veetange. Aveho mavalingi ononthele Meliongiyo Liovilinga, vena okulipongiya nawa, nokulandula onondonga vapewa, nokuhalambesa omuvo waitua.
5. Mokueenda kuosimano mutaleluapo, omaliongiyo omewaneno maalingwa ñgeni?
5 Tyina Mutaleluapo Nomukulu Omutalelipo Womauaneno: O programa ya kese simano yomukulu omutalelipo womauaneno, kamaipiluluka. Muvali, Osikola Yovilinga Via Huku, Neliongiyo Liovilinga, mavilingwa notyiimbo. Iya konyima, omukulu omutalelipo weuaneno alingi elongomona lio nominutu 30. Ngetyi muhole okulingale mokueenda kuosimano mutaleluapo, monthiki onkhuavo kokangulohi, lingei Elilongeso Liombimbiliya Mewaneno, konyima amuimbi otyiimbo iya omukulu omutalelipo weuaneno alingi elongomona. Eliongiyo malimanuhuka notyiimbo, nelikuambelo.
6. Omukulu weuaneno wo grupu, una otyilinga patyi?
6 Omaliongiyo Okuenda Movilinga Viokuivisa: Ovakulu veuaneno vo grupu, mavaholovonua novakulu aveho vewaneno opo vaendese omaliongiyo okuenda movilinga viokuivisa, nokuvatela aveho vekahi mo grupu. Tyina omukuatesiko wovakulu vewaneno aholovonua pala okuendesa eliongiyo olio, una okuihanua okuti “omukuatesiko wovakulu weuaneno wo grupu.”
7. Oityi tupondola okukevelela meliongiyo lietu epe mewaneno?
7 Ngetyi tyahonekwa apa, matukala nomphitilo yokulilongesa onondonga mambutuvatela okupameka oupanga wetu na Jeova. Otyo matyitukuatesako okukala ovaivisi, novalongesi ovanongo, vafuapo pala okuundapa vali nombili movilinga viokuivisa.—Efé. 4:13, 14; 2 Tim. 3:17.
8. Oñgeni okulipongiya nawa keumbo matyivatela onthue muene, navakuetu?
8 Okulilongesa nawa keumbo pala omaliongiyo oo, matyitukuatesako okutehelela nawa ononthele mbavilapo mambupopiwa mokueenda lia kese eliongiyo. Atuho matukala nomphitilo yokuava omakumbululo, iya otyo matyituvatela opo tulipameke pokati. (Rom. 1:11, 12; Heb. 10:24) Atuho tukalei nehando “liokuundapesa nawa ondaka yotyili,” opo aveho ‘vetyimone okuti tukahi nokuenda nokomutue.’—1 Tim. 4:15; 2 Tim. 2:15.
9. Olipi etokolo lietu, iya omokonda yatyi?
9 Tuahambukua unene nepiluluko olio lialingwa nomaliongiyo etu omewaneno. Atuho onthue tutualeiko okuundapesa nawa ehongolelo olio tupewa “nomupika wekolelo nokualunguka,” nokulinga oupanga Nomunthita wetu Omunene, putyina etufuisapo pala ononkhumbi ononene mbukahi popepi.—Mat. 24:21, 45; Heb. 13:20, 21; Rev. 7:14.