Oruteerane Oruhango rw’Ebiro Bishatu orw’Abajurizi ba Yehova orw’Omu 2008
1. (a) Ahabw’enki obuhabuzi obu Paulo yaahaire Abakristaayo Abaheburaayo buri bukuru okukira munonga omu bunaku obu? (Shoma Abaheburaayo 10:24, 25) (b) Ni mugisha ki ogu turi haihi kugira okuta obuhabuzi bwa Paulo omu nkora?
1 Entumwa Paulo akeehanangiriza Abakristaayo Abaheburaayo okuteeranira hamwe n’okugumyana, ‘n’okweyongyera kukora batyo’ nk’oku baabaire barikureeba ngu ekiro ekyo kiri haihi n’okuhika. (Heb. 10:24, 25) Obuhame nibweyongyera kworeka ngu “ekiro” ekyo eki Paulo yaagambireho kiri haihi kuhika! Twine ekihika ky’okuteeranira hamwe n’ab’eishe-emwe okwegyesibwa omu by’omwoyo kugira ngu tutungye obuhabuzi kubaasa kuraba omu biro eby’emperu ebi ebirikweyongyera kuba ‘eby’akabi.’ (2 Tim. 3:1) Omugisha nk’ogwo nitwija kugutunga omu nteerane empango ez’ebiro bishatu ez’omu 2008.
2. (a) Ahabw’enki ni kikuru okubaho ebiro byona bishatu eby’oruteerane? (b) Tushemereire kutandika tuta okurwetebeekanisiza?
2 Baho Ebiro Bishatu Byona: Nitukuhiga okurubamu ebiro bishatu byona. Titurikwija kufeerwa okwegyesibwa okuraabe omu ruteerane orwo, twaba “tutarikureka kuteeranira hamwe.” (Heb. 10:25) Tandika kurwetebeekanisiza bukiri kare nk’oku kirikubaasika. Noija kwetenga kumanyisa ou orikukorera bukiri kare kugira ngu akore empindahinduka kyaba nikyetengyesa. Abaana baawe ku baraabe nibaija kuba bari aha ishomero omu bunaku bw’oruteerane, manyisa abashomesa baabo aha ntebeekanisa yaanyu. Bamanyise ngu okuza omu ruteerane oruhango orwo n’ekintu eki murikukora butoosha omu kuramya kwanyu. Noobaasa kugira obwesigye ngu Yehova naija kukuha omugisha omu kuteeraho kwawe kwebembeza Obukama.—Mat. 6:33.
3. Ni mu miringo ki ei turikubaasa kworekamu okufayo aha bandi?
3 Hwera Abandi Okurwijamu: Paulo kandi akashaba ab’eishe-emwe bataahi be ‘okuteekateeka aha ku baakwezirikisana.’ (Heb. 10:24) Aha b’eishe-emwe abu murikuza hamwe omu ruteerane rw’Okushoma Ekitabo okw’Ekibiina, harimu abarikwetenga obuhwezi kwija omu ruteerane oruhango? Noobaasa kuhwera abu orikukwegyesa Baibuli okubaho naiwe omu ruteerane oru nangwa n’obu ryakuba eizooba rimwe ryonka? Waaba noogambira ab’omu ka yaanyu abatari baikiriza aha ntebeekanisa zaawe ez’oruteerane, bashabe nabo kurwijamu. Okuteeraho kwawe okurikworeka rukundo nikubaasa kurugamu ebirungi bingi obundi n’ebi otarikuteekateekaho.
4. Nitubaasa kutunga tuta amakuru agarikukwata aha biro by’enteerane empango n’emyanya ei ziraabemu?
4 Okutunga Ebirikurukwataho: Ofiisi y’eitaagi neetunga amasimu maingi buri mwaka ag’abarikubuuza obu enteerane empango ezi ziraabeho n’ei ziraabe. Haihi amasimu ago goona nigaruga omu b’eishe-emwe abaamanyisiibwe aha nteerane ezi.
5. N’enki eki tushemereire kukora twaba nitwenda kumanya ebirikukwata aha buraaro omu ruteerane orutari oru ekibiina kyaitu kirikwija kuzamu?
5 Ku oraabe noija kuza omu ruteerane orutari oru ekibiina kyanyu kiraije kuzamu, noobaasa kumanya ebirikukwata aha buraaro orikuhandikira ab’aha ofiisi erikukora aha by’enteerane empango orikukoresa endagiriro eri enyima ahari foomu erikwetwa Special Needs Room Request. Zaafoomu ezi niziza kwohererezibwa abahandiiki b’ebibiina. Okubaasa kugarukwamu, hamya ngu ebaruha waagita omu bahaasa, eriho sitampu n’endagiriro yaawe.
6. Ni kwijutsibwa ki okurikukwata ahari foomu erikwetwa Special Needs Room Request?
6 Ebyetengo eby’Omutaano: Omubuurizi yaashaba kuhwerwa kutunga oburaaro, Akakiiko k’Obuheereza ak’Ekibiina kashemereire kucwamu yaaba omubuurizi ogwo ahikire kwijuza foomu erikwetwa Special Needs Room Request. Omuhandiiki w’ekibiina atakooherereize foomu egyo aha barikukora aha by’Oburaaro aha ruteerane oruhango, ashemereire kubanza yaashoma obuhabuzi oburi ahari foomu egyo hamwe n’oburi omu baruha erikwohererezibwa obukiiko bw’abareeberezi bwona eya Desemba 14, 2007.
7. Nitubaasa kugyendera tuta aha ntebeekanisa ezikozirwe aha bikwatiraine n’oburaaro?
7 Okukwata Oburaaro omu Hoteeri: Waaba nooyenda ngu abarikukora aha by’Oburaaro bakuhwere kutunga hoteeri nungi bahandiikire hakirikuburayo obwire. Yoreka empiiha ezi oyeteekateekire kushashura buri izooba; ebiro ebi oraamaremu kandi oyorekye yaaba nooyenda kuriirayo kyamushana, kyakiro na kyantsya, yaaba nooyenda n’ekitanda nari oburaaro bwonka.
8. (a) Ni mu miringo ki ei turikubaasa kuhimbisamu Yehova turi omu ruteerane oruhango? (b) Ahabw’emicwe mirungi ey’ab’eishe-emwe, ni bigambo ki ebyagambirwe abarikukora omuri zaahoteeri?
8 Ebikorwa Birungi: Okworobera ekiragiro kya Yehova eky’okuteeranira hamwe okumuramya ‘nikitugasira.’ Kwonka okukira munonga, nikutuha omugisha gw’okuhimbisa eiziina rya Yehova. (Isa. 48:17) ‘Ebikorwa byaitu birungi nibireebwa butunu’ abantu baingi aha nteerane empango, kandi kireetaire abamwe kubigambaho. (1 Tim. 5:25) Omu rurembo rumwe ei enteerane zaitu empango zitwire niziba kumara emyaka mingi, omukuru wa hoteeri akagira ati: “Ni bingi ebirikugambwa aha Bajurizi ba Yehova omu rurembo oru hamwe n’eki enteerane zaanyu zirikumanyisa ahariitwe. Nitumanya oku abantu baanyu barikuboneza omwanya ogu murikuteeraniramu omu rurembo oru, kandi nitureeba nimuboneza emyanya erikwemerezibwamu ebiiruka. Nikitushemeza okuba naimwe omu bwire bw’enteerane ezi. Twine amatsiko ngu nitwija kuguma twine enkorengana nungi naimwe n’omu bwire oburikwija.” Bwanyima y’okugamba aha buremeezi obu barikutunga n’abantu abandi, mukuru wa hoteeri akasiima ab’eishe-emwe ahabw’okukwatanisa n’aba hoteeri hamwe n’ahabw’okugumisiriza kwabo. Akagira ati: “Kuri nikibaasika abagyenyi baitu boona bakaba nk’abajurizi ba Yehova!” Emitwarize y’ab’eishe-emwe bataahi baitu eyaatumire ebigambo ebi byagambwa hamwe n’ebindi ebirikugambwa buzima neeshemeza Ruhanga waitu, Yehova!
9. Matayo 4:4 nirworeka ruta obukuru bw’okutaho omutima kuhurikiza buri kicweka kya puroguramu?
9 Yesu akagira ngu amagara gaitu nigabaisibwaho okuhurira ‘ekigambo kyona ekirikuruga omu kanwa ka Yehova.’ (Mat. 4:4) Omu nteerane zaitu empango eza buri mwaka, Yehova naatuha ‘eby’okurya eby’omwoyo omu bunaku obuhikire’ ebitebeekanisiibwe ‘omwambari omwesigwa kandi ow’obwengye.’ (Mat. 24:45) Ni bingi ebirikukorwa omu kutebeekanisa n’okutuha eby’okurya ebi eby’omwoyo. Ka tworekye okusiima kwaitu ahabwa Yehova kutufaho omu muringo gwa rukundo, turikubaho kandi turikutaho omutima kuhurikiza buri kicweka kya puroguramu y’oruteerane.
[Akabokisi aha rupapura 3]
Eshaaha za Puroguramu:
Orwakataano n’Orwamukaaga
3:20 ez’akasheeshe - 10:55 ez’omwabazyo.
Sande
3:20 ez’akasheeshe - 10:00 ez’omwabazyo.