Koresa Enyanjura Eraareetere Abantu Kwenda Kwega Ahari Yehova
1. Nitwega ki aha ku Abakristaayo ba ira baabaire bakoresa enyanjura ezirikuhikaana n’abu barikubuurira?
1 Abakristaayo ba ira bakaba babuurira amakuru marungi abantu b’enganda n’endimi zitarikushushana. (Kol. 1:23) Bakaba bakoresa enyanjura ezirikuhikaana n’abu barikubuurira n’obu baraabe baabaire babuurira abantu boona aha Bukama bwa Ruhanga. Nk’eky’okureeberaho, obu Petero yaabaire naabuurira Abayudaaya abaabaire nibaikiririza omu Byahandiikirwe, akatandika arikujuriza ebi nabi Yoeli yaagambire. (Byak. 2:14-17) Kwonka obu Paulo yaabaire naabuurira Abagriika nk’oku kirikworekwa omu Byakozirwe 17:22-31 akakoresa enyanjura y’omutaano. Obunaku obu, abantu omu bicweka ebimwe nibaikiririza omu Baibuli, kandi nitubaasa kugigambaho butunu twaba nitubuurira enju aha nju. Kwonka nikyetengyesa okukoresa obwengye twaba nitubuurira abatarikwikiririza omu Baibuli, ediini nari abari omu diini etarikwikiririza omuri Kristo.
2. Nitubaasa kukoresa tuta ebitabo ebirikuba nibigabwa, kuhwera abo abarikwikiririza omu Baibuli n’abo abatarikugiikiririzamu?
2 Koresa Gye Ebitabo Ebirikuba Nibigabwa: Ebitabo by’okugaba omu mwaka gw’obuheereza ogu nibiija kuba nibihindurwa bwanyima ya buri meezi abiri kandi birikutwariramu magaziini, bwaturakiti na burocuwa. Abu turikubuurira n’obu baakuba batarikwikiririza mu Baibuli, nabwo nitubaasa kugaaniira nabo turikukoresa ekicweka kimwe aha biri omu bitabo ebyo eki barikubaasa kukunda. Nitubaasa kutashomera omuntu ekyahandiikirwe nari kugamba ahari Baibuli aha murundi gw’okubanza kumubuurira, kwonka yaayenda kumanya ebirikukiraho tushemereire kugarukayo twine ekigyendererwa ky’okumuhwera kwikiririza omu Muhangi n’Ekigambo kye. Kwonka twabuurira abarikwikiririza omu Baibuli, nitubaasa kukoresa enyanjura n’ebitabo ebirikuhikaana n’abantu nk’abo. Nitubaasa kubaha akatabo Eki Baibuli Erikwegyesa nari Hurikiza Ruhanga nari Hurikiza Ruhanga Obone Kugumaho Ebiro Byona, n’obu bwakuba butari bwo obu turikugaba omu kwezi okwo. Ekikuru n’okukoresa enyanjura eraareetere abantu kwenda kwega ahari Yehova.
3. Ahabw’enki emitima y’abantu abu turibuurira erikubaasa kugyeragyeranisibwa n’eitaka?
3 Tebeekanisa Emitima: Emitima y’abantu neegyeragyeranisibwa n’eitaka. (Luk. 8:15) Nk’oku eitaka erimwe ririkuba riine kutebeekanisibwa munonga kugira ngu embibo zimeremu, nikyo kimwe n’emitima y’abantu abamwe abu turikubuurira. Ababuurizi b’omu kyasha ky’okubanza bakabaasa kubuurira abantu b’emiringo etari emwe, kandi ekyo kikabareetera okushemererwa n’okumarwa. (Byak. 13:48, 52) Naitwe nitubaasa kutunga okushemererwa nk’okwo twakoresa enyanjura zitari zimwe.