Baibuli Neebaasa Kukuhwera Waaba Oine Endwara Etarikukira Juba?

Eki Baibuli erikugarukamu

Eego. Ruhanga naafayo aha baheereza be abarwaire. Kyahika aha baheereza ba Ruhanga abeesigwa Baibuli neegira eti: ‘[Yehova naija] kumweyegamiza, arembeire aha kitanda kye, niiwe orikwija kumwarira arwaire.’ (Zaaburi 41:3) Ku oraabe oine endwara etarikukira juba, ebintu bishatu ebiri ahaifo nibibaasa kukuhwera kugyemera:

1. Shaba kutunga amaani g’okugumisiriza. Noobaasa kutunga “obusingye bwa Ruhanga oburengire okwetegyereza kw’omuntu weena,” kukuhwera kwemera oburemeezi obu oine.​—Abafilipi 4:6, 7.

2. Gira emiteekateekyere mirungi. Baibuli neegira eti: ‘Omutima ogushemereirwe n’omubazi murungi, kwonka omutima ogucuramiriirwe nigureetera omuntu kuhwa aha magufa.’ (Enfumu 17:22) Teeraho kuba omuntu orikushemererwa, obu eki kirikutuubya aha naku yaawe, kandi kikakuhwera n’okugira amagara marungiho.

3. Hamya amatsiko gaawe aha biro by’omumaisho. Amatsiko gahami nigabaasa kukuhwera kuguma oshemereirwe n’obu waaba oine endwara etarikukira juba. (Abarooma 12:12) Baibuli neegamba aha bwire obu hatarikwija kubaho omuntu orikugira ati: ‘Ndwaire.’ (Isaaya 33:24) Omu bwire obwo Ruhanga naija kukiza endwara eziremire abanyasaayansi ab’ebiro ebi. Nk’eky’okureeberaho, Baibuli neegamba aha kugaruka kugira amagara marungi eti: “Omubiri gwe gugarukye gube muto nk’ogw’omwana, agire amaani nk’agu yaabaire aine omu butsigazi bwe.”​—Yobu 33:25.

Yetegyereze eki: N’obu oraabe noomanya ngu Ruhanga naahwera, nabwo Abajurizi ba Yehova nibateeraho kusherura obujanjabi kubaasa kukira endwara. (Mako 2:17) Kwonka, titurikugyemesereza omuntu weena kwikiriza obujanjabi obumwe, nitumanya ngu buri omwe aine kwecweramu aha kikwatiraine n’enshonga z’eby’obujanjabi.