Hwera Abandi Kutunguura Okubaasa Kwabo

1, 2. Yehova naareeba ata abaheereza be omu nsi?

ABAZAIRE ku barikureeba abaana baabo nibazaana, nibashemererwa ahabw’okugira ngu baine okubaasa nk’okwo. Ekyo naiwe noobaasa kuba nokiikiriza. Omwana omwe naabaasa kuba aine omwoga gw’okwiruka, kandi oshangye ondiijo we arikukunda kuteera ebishushani nari kubihuuga. N’obu abaana baraabe batarikushushanisa myoga, abazaire nibaba nibenda kumanya eki abaana baabo barikubaasa kukora.

² Yehova naafayo munonga aha baana be ab’omu nsi. Naareeba abaheereza be ab’obunaku obu nk’ekyeitungo aha mahanga. (Hag. 2:7) N’ab’omuhendo ahariwe ahabw’okugira ngu baine okwikiriza kandi nibaramya we wenka. Kwonka noobaasa kuba oreebire ngu bamwe aha Bajurizi ba Yehova obunaku obu baine emyoga mingi etarikushushana. Ab’eishe-emwe abamwe nibamanya kuha gye embazo, kandi abandi nibamanya kutebeekanisa gye enshonga. Banyaanyazi-itwe abamwe nibarahuka kwega endimi ezindi n’okuzikoresa omu kubuurira, kandi abandi bataireho eby’okureeberaho birungi omu kuhuumuriza n’okuhwera abarikuba barwaire. (Rom. 16:1, 12) Mbwenu shi tikirikutushemeza kuba n’Abakristaayo nk’abo omu kibiina?

3. Ni bibuuzo ki ebi turikuza kushwijuma omu kicweka eki?

³ Kwonka ab’eishe-emwe abamwe, otwariiremu abato n’abo abaherize kubatizibwa, nibabaasa kuba batakoorekire kubaasa kwabo omu kibiina. Nitubaasa kubahwera tuta kutunguura okubaasa kwabo? Ahabw’enki twine kutooreza Yehova tukabareebamu ebirungi nk’oku arikubareeba?

YEHOVA NAAREEBA EBIRUNGI OMU BAHEEREZA BE

4, 5. Ebiri omu Abaramuzi 6:11-16 nibyoreka bita ngu Yehova naareeba okubaasa kw’abaheereza be?

⁴ Eby’okureeberaho ebiri omu Baibuli nibyoreka ngu Yehova naareeba ebirungi omu baheereza be kandi areeba n’okubaasa kwabo. Nk’eky’okureeberaho, obu Gideoni yaatooranwa kucungura abaheereza ba Ruhanga kuruga omu kubonabonesibwa kwa Abamidiani, naabaasa kuba yaatangeire, maraika ku yaamugizire ati: Yehova “ari hamwe naiwe, iwe omushaija w’amaani emanzi.” Gideoni akeehurira nk’otari w’amaani kubaasa kucungura abaheereza ba Ruhanga. Kwonka Yehova akareeba ngu Gideoni naabaasa kubacungura.​—Shoma Abaramuzi 6:11-16.

⁵ Yehova akeesiga Gideoni kucungura Israeli ahakuba akareeba aine emyoga. Maraika wa Yehova akareeba oku Gideoni yaabaire naakoresa amaani maingi arikuhuura engano. Kandi eki nakyo kikashemeza maraika. Omu bwire obwo, abahingi bakaba bahuurira aheeru engano barikwenda ngu omuyaga gugume nigutuntumura ebishushunga. Gideoni akaba ariyo naahuura engano bwesherekye omu inyuukiro rya viinyo kugira ngu Abamidiani batagireeba. Ka yaakoreise akakoryo k’obwengye! Gideoni akaba ari omushaija w’obwengye owaabaire naabaasa kwetegyereza embeera kandi akacwamu gye kwetantara akabi. Buzima, Yehova akareeba okubaasa kwe kandi yaamutendeka.

6, 7. (a) Emiteekateekyere ei Yehova yaabaire aine ahari Amosi ekaba neetaana eta n’ey’Abaisraeli abamwe? (b) Niki ekirikworeka ngu Yehova akaba atagwire kutoorana Amosi?

⁶ Nikyo kimwe, Yehova akareeba okubaasa kwa nabi Amosi n’obu baingi baraabe baabaire nibamureeba nk’ow’ahansi. Amosi akeegambaho nk’omuriisa w’entaama, kandi omusharizi w’emisikamoori eyaabaire neetwarwa nk’eby’okurya by’abooro. Yehova ku yaatooraine Amosi kucwera orubanja obugabe bw’enganda ikumi z’Abaisraeli abaabaire nibaramya ebishushani, abamwe bakateekateeka ngu Ruhanga akatoorana kubi.​—Shoma Amosi 7:14, 15.

⁷ Amosi akaba naaruga omu kyaro, kwonka akaba naamanya emigyenzo n’ebirikukwata aha butegyeki bw’obunaku obwo. Naabaasa kuba yaamanyire ebirikukwata ahari Israeli, n’ebirikukwata aha mahanga agandi arikugambirwa abashuubuzi abu yaabaire naakoragana nabo. (Amo. 1:6, 9, 11, 13; 2:8; 6:4-6) Abarikucondooza ahari Baibuli abamwe nibagira ngu Amosi akaba ari omuhandiiki murungi. Ahabw’okuba akabaasa kukoresa ebigambo byorobi kwonka ebiine amakuru. Buzima, Amosi okuba emanzi akahakanisa omunyamurwa otari muringaaniza, kikahamya ngu Yehova akaba atooraine omuntu ohikire owaayorekire ngu naabaasa, ekyabaire kitarikureebwa omu kubanza.​—Amo. 7:12, 13, 16, 17.

8. (a) Yehova akahamiza ata Daudi? (b) Ahabw’enki ebigambo ebiri omu Zaaburi 32:8 birikugumya abo abarikwetiina?

⁸ Buzima, Yehova naareeba okubaasa kw’abaheereza be. Akahamiza Omugabe Daudi ngu naija kuguma naamuha obuhabuzi, ‘omutaireho eriisho.’ (Shoma Zaaburi 32:8.) Nooreeba ahabw’enki ekyo kishemereire kutugaruramu amaani? N’obu twakuba nitwetiina, Yehova naatuhwera kukora ebirikukira aha bi turikuteekateeka ngu nitubaasa kukora. Nk’oku omuzaire arikuhwera omwana yaaba naayega kugyenda, nikwo na Yehova arikuba ayeteekateekire kutuhabura kubaasa kutunguuka omu by’omwoyo. Kandi Yehova naabaasa n’okukoresa ab’eishe-emwe bagyenzi baitu kutuhwera kutunguura okubaasa kwaitu. Mu muringo ki?

REEBA EBIRUNGI OMU BANDI

9. Nitubaasa kugyendera tuta aha kwehanangiriza kwa Paulo ngu twine ‘kweta’ aha by’abandi?

⁹ Paulo akahiga Abakristaayo ‘kweta’ aha by’ab’eishe-emwe bagyenzi baabo. (Shoma Abafilipi 2:3, 4.) Amakuru agari omu buhabuzi bwa Paulo, n’okugira ngu twine kureeba abandi nk’abarikubaasa. Omuntu yaayegomba kutunguuka nkaitwe nituhurira tuta? Eki nikituhiga kweyongyera kutunguuka. Nikyo kimwe, twareeba ebirungi omu b’eishe-emwe bagyenzi baitu, nitubahwera kweyongyera kutunguuka omu by’omwoyo.

10. Okukira munonga ni baahi abu twine kufaho?

¹⁰ Okukira munonga ni baahi abu twine kufaho? Hatariho kubanganisa, twena nituba twine kuhigwa obumwe n’obumwe. Kwonka, abato nari abaherize kubatizibwa nibaba baine kuhigwa kwejumba omu ntebeekanisa z’ekibiina. Eki nikiija kubahwera kumanya ngu baine omwanya omu kibiina. Kwonka, twaba tutaboorekire ngu baine omugasho omu kibiina, nibabaasa kuremwa kukora ekintu eki Ekigambo kya Ruhanga kirikubahiga kukora, okwongyera kutunguuka kubaasa kugira obujunaanizibwa obundi omu kibiina.​—1 Tim. 3:1.

11. (a) Omureeberezi omwe akahwera ata ow’eishe-emwe muto owaabaire aine enshoni? (b) Julien nitumwegaho ki?

¹¹ Ludovic, omureeberezi owaagasiirwe omu buhwezi nk’obwo obu yaabaire akiri muto, naagira ati: “Naayoreka ngu ninfayo aha w’eishe-emwe, naatunguuka juba.” Ludovic arikugamba ahari Julien, omutsigazi owaabaire aine enshoni, naagira ati: “Obumwe Julien akaba akora ebintu atarikufayo, kandi ogwo gukaba gutari mutwarize gwe ogwa butoosha. Nkaba nindeeba ngu aine embabazi kandi naayenda kuhwera abandi omu kibiina. Omu mwanya gw’okubangaanisa ebigyendererwa bye, omutima nkaguta aha mitwarize ye emirungi naateeraho kumuhwera.” Bwanyima y’obwire bukye, Julien akaba omuheereza, kandi hati ni payoniya ow’obutwire.

BAHWERE KUTUNGUURA OKUBAASA KWABO

12. Ni mutwarize ki omukuru ogurikwetengyesa kubaasa kuhwera omuntu kutunguura okubaasa kwe? Ha eky’okureeberaho.

¹² Hatariho kubanganisa, twaba nitwenda kuhwera abandi kutunguura okubaasa kwabo, twine kukoresa okwetegyereza. Nk’oku eky’okureeberaho kya Julien kirikworeka, nikibaasa kwetengyesa ngu tuteereho kwehuzya enshobe z’omuntu ogwo, kubaasa kureeba emitwarize ye mirungi n’emyoga ei aine. Yesu nawe akareeba Petero omu muringo nk’ogwo. N’obu obumwe Petero yaabaire areebeka nk’otahami, Yesu akagira ngu Petero akaba naija kuhama nk’eibaare.​—Yoh. 1:42, reeba obugambo obw’ahansi aha kyahandiikirwe eki.

13, 14. (a) Barunaba akooreka ata okwetegyereza arikukoragana na Mako? (b) Ow’eishe-emwe omuto akagasirwa ata ahabw’okuhwerwa nka Mako? (Reeba ekishushani aha kutandika.)

¹³ Barunaba nawe akooreka okwetegyereza arikukoragana na Yohaana owaabaire naayetwa Mako iziina ry’Abarooma. (Byak. 12:25) Obu Paulo yaabaire ari aha rugyendo rwe rw’obumiisani orw’okubanza hamwe na Barunaba, Mako akaba ari ‘omuheereza’ waabo. Kwonka ku baahikire Pamfulia, Mako yaabatsigaho kitaraariire omu bwire bugumire. Bakagyenda bonka bataine Mako barikuraba omu mwanya ogwabaire gurimu abashuma baingi. (Byak. 13:5, 13) Kwonka bwanyima, Barunaba akakireeba ngu akaba aine kugumizamu naatendeka Mako n’obu araabe obumwe yaabahungireho. (Byak. 15:37-39) Eki kikahwera Mako kutunguuka nk’omuheereza wa Yehova ohamire. Ekirikushemeza, Mako akaba ari omuri Rooma na Paulo owaabaire akomirwe, reero baatwekyera Abakristaayo b’omu kibiina kya Kolosai endamutsyo kandi na Paulo akamugambaho gye. (Kol. 4:10) Teekateeka aha ku Barunaba yaashemereirwe obu Paulo yaashaba Mako kumuhwera.​—2 Tim. 4:11.

¹⁴ Alexandre, omureeberezi musya, naijuka oku yaagasiirwe obu ow’eishe-emwe yaamuhwera. Naagira ati: “Obu naabaire nkiri muto, kikaba nikiingumira kujwekyera abandi omu kushaba. Omureeberezi omwe akanyoreka oku ndikubaasa kwetebeekanisa kandi nkaguma nyikaikaine. Omu mwanya gw’okunyehuzya, akaba akira kuunyikiriza kushaba omu nteerane z’okwetebeekanisa kuza kubuurira. Bwanyima, nkabaasa kugira obumanzi.”

15. Paulo akooreka ata ngu akaba naasiima ab’eishe-emwe?

¹⁵ Mbwenu shi twagira omutwarize murungi ogu twareeba omu w’eishe-emwe, nitumusiima? Omu Abarooma eshuura 16, Paulo akasiima ab’eishe-emwe 20 ahabw’emitwarize yaabo mirungi eyamureeteire kubakunda. (Rom. 16:3-7, 13) Nk’eky’okureeberaho, Paulo akaikiriza ngu Anderoniiko na Yuniasi bakaba baheereize Kristo kumara obwire buraingwa kumukira. Paulo akagamba n’ahari nyina wa Rufo ahabw’obuhwezi obu yaabaire yaamuhaire.

16. Okusiima abato nihabaasa kurugamu birungi ki?

¹⁶ Nihabaasa kurugamu ebirungi twasiima abandi. Nk’eky’okureeberaho, Rico omwojo muto kuruga France, akaba naahiganisibwa ishe owaabaire atari Mujurizi wa Yehova, atarikwenda ngu abatizibwe. Rico akateekateeka ngu akaba aine kutegyereza akahitsya emyaka eraamubaasise kwecweramu kuheereza gye Yehova. Kandi akaba aine n’amaganya ahabw’okugira ngu bakaba nibamushekyerera aha ishomero. Frédéric, omureeberezi owaashabirwe kwegyesa omwojo ogwo Baibuli, naagira ati: “Nkasiima Rico ahabw’okugira ngu okuhiiganisibwa okwo kukooreka ngu akaba aine obumanzi kumanyisa abandi ebi arikwikiriza.” Ebigambo ebyo bikahamya okumariirira kwe kuguma ari eky’okureeberaho kirungi, kandi kikamuhwera n’okugira omukago murungi na ishe. Rico akabatizibwa aine emyaka 12.

17. (a) Nitubaasa kuhwera tuta ab’eishe-emwe kutunguuka? (b) Omumiisani akooreka ata ngu naafayo aha b’eishe-emwe abato, kandi hakarugamu ki?

¹⁷ Twaba nitusiima abandi ahabw’okuhikiiriza gye obujunaanizibwa bwabo, nari ahabw’okuteeraho kwabo, nikibahwera kugumizamu nibaheereza Yehova baine omujinya. Sylvie,a owaabaire naaheereza aha Beseeli omuri France kumara emyaka mingi, naagira ngu banyaanyazi-itwe nabo nibabaasa kusiima ab’eishe-emwe. Akakireeba ngu abakazi nibabaasa kusiima ab’eishe-emwe ahabw’ebintu bitari bimwe na bimwe ebi barikureeba nibakora. N’ahabw’ekyo, banyaanyazi-itwe ku barikusiima ab’eishe-emwe ahabw’okuteeraho kwabo, nibaba nibongyera aha kusiima kw’ab’eishe-emwe abakuzire omu by’omwoyo. Naayongyera agira ati: “Okusiima abandi n’ekintu eki nyine kukora.” (Enf. 3:27) Jérôme, omumiisani omu kicweka kya French Guiana, ahwereire ab’eishe-emwe baingi kubaasa kuheereza nk’abamiisani. Naagira ati: “Nketegyereza ngu ku ndikusiima ab’eishe-emwe abato ahabw’ebi barikukora gye omu kubuurira, nari ahabw’okugira ngu baagarukamu gye omu nteerane, nibeyongyera kwegiramu obwesigye. Ekirikurugamu, nibongyera kukora gye.”

18. Ahabw’enki ni kirungi kukora hamwe n’ab’eishe-emwe abato?

¹⁸ Nitubaasa kuhiga ab’eishe-emwe bagyenzi baitu kutunguuka turikukwatanisa nabo. Omureeberezi naabaasa kushaba ow’eishe-emwe omuto orikumanya kukoresa gye kompyuta, kugira ebi yaiha aha jw.org ebirikubaasa kuhwera abakaikwire abari omu kibiina abataine kompyuta, reero abibatwarire. Nari mwaba nimuboneza Ekyombeko ky’Obukama, noobaasa kweta ow’eishe-emwe omuto kukora hamwe naiwe. Waateeraho kukora ebintu nk’ebyo, nikiija kukuhwera kureeba oku eminyeeto barikutwaza, kikubaasise kubasiima reero otegyereze kureeba ebiraarugyemu.​—Enf. 15:23.

YETEBEEKANISIZE EBIRO BY’OMUMAISHO

19, 20. Ahabw’enki tushemereire kuhwera abandi kutunguuka?

¹⁹ Yehova ku yaatooraine Yoshua kwebembera Abaisraeli, akaragiira Musa ‘kugumya’ Yoshua. (Shoma Eky’Ebiragiro 3:28.) Ahabw’okugira ngu abantu baingi bariyo nibatwegaitaho omu kuramya Yehova, Abakristaayo boona abakuzire omu by’omwoyo batari bareeberezi bonka, nibabaasa kuhwera ab’eishe-emwe abato n’abasya kutunguura okubaasa kwabo. N’ahabw’ekyo, baingi nibaija kweyongyera kuza omu buheereza obw’obutwire, kandi baingi nibaija kuba abarikubaasa kwegyesa abandi.​—2 Tim. 2:2.

²⁰ Yaaba turi omu kibiina nari guruupu eriyo neetunguuka kuba ekibiina, ka tuteereho kwetebeekanisiza ebiro by’omumaisho. Ekintu kikuru ekiraatuhwere n’okutooreza Yehova, orikusherura ebirungi omu baheereza be.