Ni Baahi Abarikukora Ebi Yehova Akunda Obunaku Obu?
1. Ni ryari obu turikwija kutandika kwega akatabo Ni Baahi Abarikukora Ebi Yehova Akunda Obunaku Obu? kandi nitwija kugasirwa tuta?
1 Saabiiti erikutandika Okitoba 28, Akatabo Ni Baahi Abarikukora Ebi Yehova Akunda Obunaku Obu? niko karikwija kukoresibwa omu Kwega Baibuli okw’Ekibiina. Akatabo aka kakashohozibwa aha Ruteerane Oruhango, orwabaire rwine omutwe “Rinda Omutima Gwawe!” katebeekanisiibwe kuhwera abeegi ba Baibuli kumanya gye ekibiina kya Yehova. Okwega akatabo aka tikirikwija kutuhwera kwongyera kusiima okuba omu kibiina kya Yehova kwonka, kureka nikiija kutuhwera kumanya gye oku turaakakorese omu kubuurira.—Zab. 48:13.
2. Akatabo aka nikaija kukoresibwa kata omu kwega Baibuli okw’ekibiina?
2 Oku Karikwija Kukoresibwa omu Kwega: Oraabe nayebembera okwega oku aine kureeba ngu amashomo goona gaatwara obwire burikwingana. Naija kwanjura buri eishomo aha mashomo 28, arikushoma omutwe gw’eishomo oguri omu muringo gw’ekibuuzo. Reero, naija kushaba omushomi kushoma ekicweka ekirikwanjura eishomo. Orikwebembera okwega okwo naija kubuuza abamuhurikiize ekibuuzo ky’ekicweka eki atebeekanise. Bwanyima buri kicweka ekirikutandika n’ebigambo ebiri omu nyuguta ezikwatsire kishomwe kandi mukihikaniseho ebiteekateeko. Bwanyima y’okushoma ekicweka, orikwebembera okwega naija kushaba abamuhurikiize kugamba oku ekicweka ekyashoomwa kirikugarukamu omutwe gw’eishomo. Akatabo aka karimu ebishushani bingi ebirikubaasa kugambwaho. Ebyahandiikirwe ebirikwihayo gye enshonga enkuru biine kushomwa obwire bwababaasisa. Aha muheru gw’eishomo, orikwebembera okwega naija kubuuza ebibuuzo eby’okweijutsya ebiri aha muheru gw’orupapura atakagiire aha eishomo erindi. Haaba hariho akabokisi “Manya Ebirikukiraho” naija kushaba orikushoma ebicweka kukashoma, reero ashabe abamuhurikiize kugamba oku omwegi wa Baibuli arikwija kugasirwa yaagyendera aha buhabuzi obu. Orikwebembera okwega, obwire bw’amubaasisa aha kuhendera, naija kukoresa omutwe gwa buri eishomo omu kweijutsya. Kwonka tikirikumanyisa ngu obuhabuzi obu nibwo bwine kukuratirwa omu kwega Baibuli n’abeegi omu katabo aka.
3. Nitubaasa kugasirwa tuta omu bwijwire omu kwega akatabo aka?
3 Kubaasa kugasirwa gye omu kwega oku, oine kwija otebeekanise gye. Teeraho kwejumba omu kugarukamu. Mwaba nimuhikaanisa ebiteekateeko, teeraho kureeba oku birikubaasa kugasira abeegi ba Baibuli. Okwega akatabo aka akasya nikiija kutubaasisa kuhwera abandi kutwegaitaho omu kukora ebi Ruhanga akunda kibabaasise kugira amatsiko g’okugumaho ebiro byoona.—1 Yoh. 2:17.