EBIBUUZO KURUGA OMU BASHOMI

Yesu akagambira Abasadukaayo ngu abarizooka “tibarishwera, kandi tibarihingirwa.” (Luka 20:34-36) Mbwenu shi akaba naagamba aha baraazoorwe kutuura omu nsi?

Ekibuuzo eki ni kikuru na munonga ahari abo abafeereirwe abakazi baabo nari abashaija baabo. Abantu nk’abo nibabaasa kuba baine ekihika ky’okugaruka kushwerana n’abakundwa baabo abaraazoorwe, omu nsi ensya. Omushaija omwe owaafeereirwe omukazi akagira ati: “Nyowe n’omukazi wangye tituracwiremu kuhendera obushwere bwaitu. Tukaba twine ekyetengo ky’okuguma nituramya hamwe nk’omushaija n’omukazi ebiro byona. Na hati nikwo ndikuteekateeka.” Mbwenu shi hariho enshonga ehikire eine kutureetera kuteekateeka ngu abaraazookye nibaija kushwera nari kushwerwa? Titurikumanya.

Kumara emyaka mingi, ebitabo byaitu bitwire nibigira ngu ebigambo bya Yesu ebirikukwata aha kuzooka n’okushwera nibigamba aha kuzooka okuraabeho omu nsi, kandi ngu abo abaraazoorwe kutunga amagara agatahwaho omu nsi tibaraashwere.a (Mat. 22:29, 30; Mak. 12:24, 25; Luk. 20:34-36) N’obu turaabe tutarikubaasa kukigamba butunu, ebigambo bya Yesu nibibaasa kuba nibikwata aha baraazoorwe kutuura omu iguru? Ka tushwijume ebigambo bya Yesu.

Yetegyereze abu Yesu yaabaire naagambira. (Shoma Luka 20:27-33.) Abasadukaayo abaabaire batarikwikiriza ngu nihaija kubaho okuzooka, bakateeraho kutega Yesu barikumubuuza ekibuuzo ekirikukwata aha kuzooka n’obushwere bw’empungurano obw’enyineemwe.b Yesu akabagarukamu ati: “Abaana b’obusingye obu bashwera kandi bahingirwa; kwonka abarikuteekateekwa ku bashemereire kuhika omu busingye obwo n’aha kuzooka kw’abafu, tibarishwera, kandi tibarihingirwa. Tibaribaasa kufa bwa kabiri, ahakuba baryashusha nka baamaraika; kandi n’abaana b’okuzooka.”​—Luk. 20:34-36.

Ahabw’enki ebitabo byaitu bitwire nibyoreka ngu Yesu naabaasa kuba yaabaire naagamba ahari abo abaraazoorwe kutuura omu nsi? Ekyo kiri kityo ahabw’enshonga ibiri. Ey’okubanza, Abasadukaayo nibabaasa kuba baabaire nibateekateeka aha kuzooka kw’abo abaraatuure omu nsi. N’ahabw’ekyo, Yesu naabaasa kuba yaabagarukiremu arikwihirira ahari ekyo. Eya kabiri, Yesu akahendera okugaaniira okwo arikugamba aha baheereza ba Ruhanga aba ira nka Abrahamu, Isaaka, na Yakobo abaraazoorwe kutuura omu nsi.​—Luk. 20:37, 38.

Kwonka, nikibaasika kugira ngu Yesu akaba naagamba aha kuzooka okw’abo abaraatuure omu iguru. Nitubaasa kwihirira ahari ki kuhamya ekyo? Ka tushwijume ebigambo bimwe ebi Yesu yaagambire.

‘Abarikuteekateekwa ku bashemereire okuzooka kw’abafu.’ Abashukirweho amajuta abeesigwa nibabarwa ‘nk’abashemereire obukama bwa Ruhanga.’ (2 Tes. 1:5, 11) Nibabarwa nk’abaine amagara agahikiriire ahabw’ekitambo, n’ahabw’ekyo tibarikufa nk’abasiisi. (Rom. 5:1, 18; 8:1) Abo nibeetwa ‘ab’omugisha kandi abarikwera’ kandi nibatooranwa kuzooka kuza kutuura omu iguru. (Kush. 20:5, 6) Okutaana n’ekyo, abo abaraazoorwe kutuura omu nsi barimu “n’abatahikiriire.” (Byak. 24:15) Mbwenu shi nibabaasa kubarwa ‘nk’abashemereire’ kuzooka?

“Tibaribaasa kufa bwa kabiri.” Envunuura za Baibuli ezindi ebigambo ebyo nizibivunuura ziti: “Tibarikubaasa kufa bundi” nari “okufa tikubaineho bushoboorozi.” Abashukirweho amajuta abarikufa bari abeesigwa, nibazoorwa baza omu iguru reero baheebwa okutafa n’amagara agatarikubaasa kucwekyerezibwa. (1 Kor. 15:53, 54) Okufa nikuba kutakiine bushoboorozi aharibo.c

Kurugiirira aha byagambwaho, nitubaasa kuhendera tuta? Obu Yesu yaagira ngu abarizooka tibarishwera, naabaasa kuba yaabaire naagamba ahari abo abarikuzoorwa kutuura omu iguru. Ku kiraabe nikwo kiri, ebigambo bye nibitumanyisa enshonga nyingi aharibo. Tibarikushwera nari kushwerwa, tibarikubaasa kufa, kandi bari nka baamaraika. Enyetegyereza egi neereetaho ebibuuzo.

Eky’okubanza, Abasadukaayo ku baraabe baabaire nibateekateeka aha kuzooka kw’abo abaraatuure omu nsi, ahabw’enki Yesu yaagambire aha kuzooka kw’abaraatuure omu iguru? Yesu butoosha akaba atagarukamu abarikumuhakanisa nk’oku barikuteekateeka. Nk’eky’okureeberaho, Abayudaaya abaamushabire akamanyiso, akabagira ati: “Musheenye hekalu egi; naanye ndyagiimutsya omu biro bishatu.” Yesu naabaasa kuba yaamanyire ngu bakaba nibateekateeka aha kyombeko kya hekalu, “kwonka We akaba naagamba ahari hekalu ey’omubiri gwe.” (Yoh. 2:18-21) Obundi Yesu naabaasa kuba yaareebire ngu tikirikwetengyesa kugarukamu Abasadukaayo abaabaire bataine kigyendererwa ky’okwenda kumanya, kandi batarikwikiriza ngu hariho okuzooka nari baamaraika. (Enf. 23:9; Mat. 7:6; Byak. 23:8) Naabaasa kuba yaabaire naayenda kumanyisa abeegi be ebirikukwata aha kuzooka kw’abo abaraatuure omu iguru. Bakaba bari abeesigwa kandi baine amatsiko g’okuzooka kuza omu iguru.

Ekya kabiri, Ahabw’enki Yesu yaahendeire okugaaniira kwe arikugamba ahari Abrahamu, Isaaka, na Yakobo, abarikwija kuzooka kutuura omu nsi? (Shoma Matayo 22:31, 32.) Yetegyereze ngu Yesu akatandika arikugira ngu “ebirikukwata aha by’okuzooka kw’abafu,” arikugamba aha baheereza ba Ruhanga abo. Ebigambo ebyo nibibaasa kworeka ngu akaba naayenda kuhindura, akagamba aha kuzooka okw’omuringo ogundi. Bwanyima, Yesu arikwihirira aha bi Musa yaahandiikire ebi Abasadukaayo baabaire nibagira ngu nibaikiriza, akakoresa ebigambo ebi Yehova yaagambiire Musa aha rushaka orurikwaka, kuha obuhame ngu okuzooka kw’abo abaraatuure omu nsi n’ekigyendererwa kya Ruhanga ekirikwija kuhikiirira.​—Kur. 3:1-6.

Ekya kashatu, obu Yesu yaagira ngu abarizooka tibarishwera ku araabe yaabaire naamanyisa abarikuzooka kutuura omu iguru, mbwenu shi abo abaraazoorwe kutuura omu nsi nibaija kushwera? Ekigambo kya Ruhanga tikirikugarukamu butunu ekibuuzo ekyo. Yesu ku araabe yaabaire naagamba aha kuzooka kw’abo abarikuza kutuura omu iguru, ebigambo bye tibirikworeka yaaba abo abaraazoorwe kutuura omu nsi ensya, baraashwere.

Kwonka hati eki turikumanya kiri ngu Ekigambo kya Ruhanga nikigira ngu okufa nikwo kurikutaanisa omushaija n’omukazi we. N’ahabw’ekyo, ofeereirwe omukazi we nari omushaija we, tihaine ekishemereire kumushinja yaacwamu kugaruka kushwera nari kushwerwa. Ekyo n’ekya buri omwe kwecweramu, kandi tihaine oshemereire kucwera omuntu nk’ogwo orubanja yaacwamu atyo.​—Rom. 7:2, 3; 1 Kor. 7:39.

Buzima, nitubaasa kuba twine ebibuuzo bingi ebirikukwata aha biraabeho omu nsi ensya. Omu mwanya gw’okuteebereza eby’okugarukamu by’ebibuuzo ebyo, twine kutegyereza tukareeba ekiraabeho. Kwonka nitubaasa kuhamya ngu abantu abeesigwa nibaija kushemererwa, ahakuba Yehova naija kuhaazya ebyetengo byabo byona omu muringo ogurikukirayo oburungi.​—Zab. 145:16.