NKHANI YA PA TSAMBA LAKUYAMBA | THANGWE RANYI BIBLIYA NDAKUFUNIKA KULIBVESESA?
Kumbirani Thandizo Kuti Mubvesese Bibliya
Yezezerani kuti munkuzungira dziko lacirendo ulendo bwakuyamba. Imwepo munkugumana bzinthu bzense bzacirendo, ninga wanthu, cikhalidwe, cakudya na kobiri. Mpsakubveka kuti imwepo mungasuname.
Pakuwerenga Bibliya ulendo bwakuyamba, pinango imwepo mungabve bzibodzi-bodzibzi. Pakuwerengapo, mun’dzabva bzinthu bzakulewa bza dziko la kale lomwe ndacirendo kwa imwepo. Mun’dzabvambo kulewa bza wanthu wakucemeredwa Wafiristi, mun’dzabva bza cikhalidwe cacilendo ninga ‘kung’amba bzakubvala,’ mun’dzabva bza cakudya cakucemeredwa mana na kobiri yakucemeredwa drakima. (Kufuluka 16:31; Djosuwe 13:2; 2 Samuweri 3:31; Luka 15:9) Bzinthu bzensenebzi bzingakuneseni kubvesesa. Pa nkhani yakuyenda ku mbuto yomwe mumbaidziwa lini ulendo bwakuyamba, kodi mungadekedwe lini mucitambira thandizo la munthu omwe angakuuzeni bzinthu bzinango bzakulewa bza mbuto imweyo?
THANDIZO LOMWE LIKHALIPO MU NTHAWE YAKALE
Kuyambira pomwe bzinembo bzakupambulika bzidayamba kunembedwa m’magole ya 1600 AEC, padayamba kuperekedwa thandizo kwa wanthu kuti wabvesese mafala ya m’Bibliya. Nthawe imweyo, Mozeji mtsogoleri wakutoma wa mtundu wa Jirayeri, ‘adayamba kufotokoza’, bzomwe bzikhanembedwa.—Bzakutonga 1:5.
Pambuyo pa magole 1.000, wakhalipombo anyakupfunza Bzinembo. Mu 455 AEC, thimu likulu la Wajuda, kuphatanidza wana wadakonkhanisidwa pabodzi pa bwalo mu mzinda wa Jeruzalemu. Pamwepo pakhana anyakupfunzisa bzinembo omwe ‘wakhawerenga mwakukuwa [bukhu linango] lakupambulika.’ Tsono iwo walibe kundocita bzimwebzi basi. ‘Iwo wadathandiza wanthuwo kubvesesa bzomwe bzikhawerengedwabzo.’—Nehemiya 8:1-8.
Pambuyo pa magole 500, Jezu Kristu adadzacitambo basa libodzi-bodziri lakupambulika. N’cadidi kuti iye akhadziwika na wanthu ninga mpfunzisi. (Juwau 13:13) Iye adapfunzisa mathimu ya wanthu, na wanthu winango pawokha. Nthawe inango, iye adalewalewa kwa thimu likulu la wanthu acifotokoza nkhani yace yakudziwika na dzina lakuti Nkhani ya pa Phiri, ndipo ‘mathimu ya wanthuyo yadatokonyedwa yacidabwa na kapfunzisidwe kace.’ (Mateu 5:1, 2; 7:28) Mu mwezi wa Abril 33 EC, Jezu adalewalewa bza anyakupfunza wace awiri pomwe wakhayenda mu msewu wakuyenda ku midzi ya pafupi na Jeruzalemu, ‘aciwathandauzira [ayai kuwafotokozera mwakulondoza] bzinthu bzense bzakulewa bza iye m’bzinembo.’—Luka 24:13-15, 27, 32.
Anyakupfunza wa Jezu, wakhalimbo apfunzisi wa Fala la Mulungu. Nsiku inango, nduna ya ku Etiyopia ikhawerenga mbuto inango ya m’bzinembo. Nyakupfunza munango omwe akhacemeredwa Firipi, adafenderera ndunayo aciyibvunza kuti: ‘Kodi ukubvesesa bzomwe unkuwerengabzo?’ Tsono ndunayo idatawira kuti: ‘Ndingabzibvesese tani akasaya kuwoneka nyakuthumbudzulira?’ Patsogolo pace Firipi adamufotokozera thandauzo la bzomwe akhawerengabzo.—Mabasa 8:27-35.
THANDIZO LOMWE LIRIPO NSIKU ZINO
Ninga anyakupfunzisa Bibliya wa nthawe ya kale, nsiku zino Mboni za Yahova zinkucita nyongo pa basa lakupfunzisa Bibliya pa dziko lense lapansi, m’madziko yakukwana 239. (Mateu 28:19, 20) Mdzinga uli-wense, iwo ambathandiza wanthu wakupitirira mamidyau 9 kubvesesa Bibliya. Azinji mwa wanthu amwewa, wankucokera m’bzipembedzo bzomwe si bzacikristau. Mapfunziro yamweya njafovolo ndipo yangacitidwe ku mui kwa munthu ayai pa mbuto inango yakuthemera. Winango wambacita pfunziro lawo la Bibliya pa mtedwe wa m’manja ayai mwakucita kuphatisa basa skype pa komputadori.
Taphata minyendo, lewalewani na m’bodzi wa Mboni za Yahova kuti mubve bzizinji bza momwe mungagumanire phindu na makonzedwe yamweya ya pfunziro la Bibliya. Imwepo mun’dzazindikira kuti Bibliya ni bukhu lini lakunesa kulibvesesa, koma kuti iro ‘ndaphindu pakupfunzisa, pakugaza, pakulungamiza bzinthu, na pakulanga m’cirungamo,’ kuti imwepo ‘mukhale wakuthemera bwino na wakukonzeka mwakukwanira kuti mucite basa liri-lense labwino.’—2 Timotio 3:16, 17.
Onani vidiyo yakuti Thangwe Ranyi Tin’funika Kupfunza Bibliya? Pa www.jw.org/nyu
Onani vidiyo yakuti Kodi Pfunziro la Bibliya Limbacitidwa Tani? Pa www.jw.org/nyu
[Kwadru pa tsamba 7]
Gumanani Thandizo Pa Webisaite
Kodi mungafune kukhala na cidziwiso ca Bibliya? Kuti muyambe ndokoni pa webisaite ya jw.org. Webisaiteyi imbapereka cidziwiso ca m’Bibliya m’bzirewedwe bzakupitirira 700. Ndipo pinango mungakomedwe kupfunza nkhani zakutewerazi:
Mibvunzo yomwe wanthu wambacita kawiri-kawiri
▪ Kodi cakulinga ca moyo n’ciponi?
▪ Thangwe ranyi wanthu wambafa?
▪ Kodi n’ciyani cimbacitika munthu akafa?
(Wonani pomwe padanemba kuti ENSINOS BÍBLICOS > PERGUNTAS BÍBLICAS RESPONDIDAS)
Nkhani za pamoyo
▪ Kodi n’ciyani comwe mungacite mukasunama?
▪ Momwe mungalimbanire na matenda makulu
▪ Mabvuto ya kunesa kwa kobiri na mangawa
(Wonani pomwe padanemba kuti ENSINOS BÍBLICOS > PERGUNTAS BÍBLICAS RESPONDIDAS)
Thandizo kwa mabanja
▪ Bzomwe mungacite kuti muleke kumbapopotezana
▪ Kulera wana kuti wadzakhale na makhalidwe yabwino
▪ Kupfunzisa wana makhalidwe yabwino
(Onani pomwe padanemba kuti ENSINOS BÍBLICOS > CASAIS E PAIS)
Malango kwa maswaka
▪ Kodi mungalimbane tani na mafala yakupumpsa kuti mucite upombo?
▪ Bzomwe mungacite mukagopswedwa
▪ Momwe mungalimbanire na msunamo
(Wonani pomwe padanemba kuti ENSINOS BÍBLICOS > ADOLESCENTES)