Bzinthu Bzakucita Kubvesera—Kodi Tingabziphatisire Tani Basa?
1. Kuthumizira pa mabukhu yakucita kunembedwa, kodi ni bzinthu bzinango bziponi bzakuthandiza bzomwe tinabzo?
1 Wazinji wambakomedwa kuphatisa basa jw.org ayai bzinthu bzakucita kubvesera kuti awerenge mafala yakukondwesa na yakulondoza ya cadidi. (Mpal. 12:10) Tsono, kodi imwepo mumbaphatisa basa bzinthu bzakucita kubvesera bza mu jw.org? Bzimwebzi bzimbatithandiza kubva nkhani zizinji za pa webisaite yathu. Kodi tingagumane phindu liponi na bzinthu bzakucita kubvesera?
2. Kodi tingaphatise tani basa bzinthu bzakucita kubvesera pa pfunziro lathu la patekha ayai la banja?
2 Pa Pfunziro Lathu la Patekha ayai la Banja: Kubvesera ma audio ya Bibliya, marevista, ayai mabukhu pomwe tinkucita ulendo ayai tinkuphata mabasa yathu ya nsiku na nsiku bzin’dzatithandiza kuphatisa bwino basa nthawe yathu. (Wayef. 5:15, 16) Pa kunamata kwathu ninga banja tingasankhule nkhani zakusiyana-siyana kuti tibvesere ticimbatewera kuwerengedwako m’bukhu lathu. Kuphatisa basa bzinthu bzakucita kubveserabzi pa pfunziro la patekha n’kwakuthandiza kwene-kwene maka-maka penu tin’kufuna kuti kuwerenga kwathu kuyende patsogolo ayai penu tin’kupfunza cirewedwe cipsa.
3. Mbani mu gawo lathu omwe angagumane phindu na bzinthu bzakucita kubvesera?
3 Mu Utumiki: Wanthu wa mu gawo lathu womwe walibe nthawe kuti awerenge iwo angakomedwe na bzinthu bzakucita kubveserabzi. Ayai tingagumane wale womwe ambalewalewa cirewedwe cinango na wale omwe angakomedwe akabva bzipsa bza Umambo mu ‘cirewedwe cawo cakubadwa naco.’ (Mab. 2:6-8) M’madziko manango, kutetekera ni cinthu cakufunika kwene-kwene ninga mwambo wawo. Mwa ciratizo, mwambo wa wanthu wa ku Hmong ambacita kufotokoza nkhani zawo kuna wana na matswaka ndipo iwo ambakwanisa kukoya bwino-bwino bzense bzomwe wankuuzidwabzo. Wanthu wa ku África ninga mwambo wawo ambakomedwa kupfunza mwa kucita kufotokozeredwa ninga nkhani m’mbuto mwa kucita kuwerenga.
4. Kodi ni mibvunzo iponi yomwe tingabzibvunze pa nkhani yakuthandiza wanthu mu gawo lathu?
4 Kodi mu gawo lanu, bzingakhale bza phindu kubvesa mweneciro nyumba bzinthu bzakucita kubvesera mu cirewedwe cace? Kodi munthu angagumane phindu na mabukhu yakucita kubvesera yomwe tingamutumizire mwakuphatisa basa e-mail ayai mwakuphatisa basa njira zinango? Kodi tingacose mabukhu yathu yakucita kubvesera pa jw.org ticiyaikha mu CD ndipo ticipasa mweneciro nyumba womwe ankufunisisa kudziwa bzizinji, pinango ticimupasa pabodzi na mabukhu yakudindidwa yomwe yana nkhani zimwezo? Bukhu lipulumira la mu mtcini wanzeru, mabroxura, tumatsamba ayai marevista yomwe timbapasa wanthu mu utumiki tinganembe bzimwebzi pa relatoriyo yathu. Bzinthu bzakucita kubvesera bzimbakonzedwa kuti tibziphatise basa pa pfunziro lathu la pa tekha na kuti tibziphatise basa pa kubzala mbeu za cadidi ca Umambo.—1 Wak. 3:6.