Gumanani Phindu na Mareferentsiya ya m’Bibliya

Mareferentsiya yomwe yambagumanika mu Baibulo la Dziko Latsopano la Malemba Opatulika yambalatiza kubverana komwe kulipo pakati pa mbali zakusiyana-siyana za m’Bibliya na mavesi manango ya m’Bibliya yomwe yambafotokoza bzinthu bzakuthumizirika pakulewa bza nkhani ibodzi-bodziyo. Kuti mugumane mareferentsiya yamweya, cakuyamba nyang’anani kaletra kang’ono komwe kali kutsogolo kwa fala. M’Bibliya lakucita kudindidwa, nyang’anani kaletra kamweka pakati ayai m’maponta kuti mukwanise kugumana mavesi yomwe yakubverana na nkhani yomwe mukuwerengayo. Mu jw.org ayai mu aplikativo ya JW Library^® tinyani pa kaletrapo kuti mukwanise kuwona mavesi ya m’mareferentsiya.

Mareferentsiya ya m’Bibliya yangakuthandizeni kugumana bzinthu bzomwe bziri m’nyantsibzi na bzinango bzizinji:

Mavesi yomwe yakufotokoza nkhani ibodzi-bodzi: Referentsiyayo imbakuyendesani pa vesi linango la m’Bibliya lomwe limbafotokoza nkhani ibodzi-bodziyo. Mwa ciratizo, onani 2 Samuyeli 24:1 na 1 Nkhani 21:1.

Mafala ya m’vesi: Referentsiyayo imbalatiza komwe kwacokera mafala manango. Mwa ciratizo, onani Mateu 4:4 na Deuteronomiyo 8:3.

Kukwanisika kwa profesiya: Referentsiyayo imbalatiza profesiya ya m’Bibliya na kukwanisika kwace. Mwa ciratizo, onani Mateu 21:5 na Zakariya 9:9.