“Kottaa Walii Wajjinis Maqaa Isaa Ol In Kaafnaa!”
1 Faarfatichi: “Anaa wajjin guddina Waaqayyoo odeessaa, kottaa walii wajjinis maqaa isaa ol in kaafnaa!” jedhee faarfateera. (Far. 34:3) Walga’iin koonyaa “Waaqayyoo Wajjin Deddeebi’aa” jedhu obboloota keenya warra gumiiwwan baay’eetii dhufanii wajjin maqaa Yihowaa ol kaasuuf carraa nuu kenna. Bakka bultu, haala geejjibaafi bakka hojiitii heyyama fudhachuu ilaalchisee karoora baafatteettaa? Dursinee kana hundumaaf qophii gochuun nu barbaachisa.—Fak. 21:5.
2 Guyyaa Sadanuu Argamaa: Yihowaan karaa Musee akkas jedhee ajajeera: “Saba sana, dhaga’uu fi isa sodaachuu akka baraniif . . . sassaabi.” (Kes. 31:12) Yihowaan karaa hojeetaa amanamaafi ogeessaa, walga’ii koonyaarratti sagantaa barumsaa adda ta’e nuu qopheesseera. Barumsa ‘waa’ee nuuf baasu’ waan nu barsiisuuf, qajeelfamasaa dhaggeeffachuuf walga’iicharratti argamuu barbaadna. (Isa. 48:17) Bakka hojii keetii heyyamni kan si barbaachisu yoo ta’e, fakkeenya Nahimiyaa isa nama jajjabeessu fudhachuudhaan, dura Yihowaa kadhadhuutii heyyama gaafadhu. (Nah. 1:11; 2:4) Akkasumas, miseensota maatii kee warra hin amannetti karoora walga’iichaaf baaste, hamma dandeesse dursitee isaanitti himudhaan akka isaaniif yaaddu argisiisi.
3 Bakka Walga’iichaa Yeroodhaan Ga’uu: Yeroo walga’iirratti argamnu wantoota itti yaaduu qabnu baay’eetu jira. Dursine bakka walga’iichaa ga’uun, akka hin barfanne, garaa guutuudhaan faarfannaafi kadhannaa jalqabaarratti hirmaachuu akka dandeenyutti dafnee teessoo akka qabannuuf nu gargaara. (Far. 69:30) Sagantichi jalqabamusaa daqiiqaa muraasa dura, obboleessi dura taa’aa ta’e, muuziqaan mootummichaa inni teessoo keenya akka qabannu nu yaadachiisu taphachuu akka jalqabuu beeksiisee waltajjiirra taa’a. Sagantichi karaa seera qabeessa ta’een akka jalqabamuuf dursinee hundi keenya iddoo keenya qabachuu qabna.—1 Qor. 14:33, 40.
4 Sagaleen Waaqayyoo: “Wanta hojeetaan hundumaa jaalalaan raawwadhaa” jechuudhaan nu gorsa. (1 Qor. 16:14) Balballisaa ganama sa’aatii 2:00tti ennaa banamu, obboloota keenyaaf kan yaadnu yoo ta’e, teessoo filatamaa qabachuuf figichaafi wal dhiibuurraa of qusanna. Teessuma qabuu kan dandeenyu, maatii keenyaaf ykn namoota gara walga’iichaa nu wajjin deeman qofaaf ta’a.—1 Qor. 13:5; Filp. 2:4.
5 Sa’aatii boqonnaa laaqanaatti bakka walga’iichaatii nyaata barbaacha diida deemuurra laaqana keessan fidattanii dhufuun gaaridha. Kun haasawaa nama jajjabeessu akka goonuufi sagantaan waaree bodaa jalqabamusaa dura akka bakka teessoo keenyaatti argamnuuf nu gargaara. Qodaan nyaataa keessan karaa akka hin cufneef teessoo keessan jala kaa’amuu kan danda’u ta’uu qaba. Ta’uyyuu qodaa garmalee guddaa, qodaa salphaatti cabuufi dhugaatii alkoolii fidanii dhufuun hin heyyamamu.
6 Nyaanni Hafuuraa Nuu Qophaa’era: Yoshaafaax mootichi nama ‘yaada isaatiin Waaqayyoon barbaaddachuudhaaf qopheeffatedha.’ (2 Sen. 19:3) Walga’ii koonyaa dura yaada keenya qopheessuu kan dandeenyu akkamitti? Fuulli dhumaa Dammaqaa! Caamsaa 22fi Waxabajjii 2004 nyaata hafuuraa nuu qophaa’e ibsa. Wanta Yihowaan nuu qopheesse hawwii guddaadhaan eegachaa barumsawwan sanarratti maaliif hin yaaddani? Yaada keenya qopheessuun, qajeelfamawwan kennaman akka gaariitti akka hubannuufi hojiirra akka olchinuuf gargaarsa Yihowaa kadhachuu dabalata.—Far. 25:4, 5.
7 Fayyina argachuu kan dandeenyu Sagalee Waaqayyoorraa akka ta’e waan beeknuuf, hundi keenya isarraa barachuuf hawwidhaan eegganna. (1 Phe. 2:2) Kanaafuu, walga’ii koonyaa “Waaqayyoo wajjin Deddeebi’aa” jedhurratti argamudhaan ‘walii Wajjin maqaa Yihowaa ol haa kaasnu.’—Far. 34:3.
[Gaaffiiwwan Qayyabannaa]
1. Walii wajjin maqaa Waaqayyoo ol kaasuuf carraa maalii arganna? Amma qophiidhaaf maal gochuu dandeenya?
2. Walga’ii koonyaarratti guyyaa sadanuu argamuuf yaaluu kan qabnu maaliifi? Kana gochuuf maaltu nu gargaara?
3. Walga’ichi jalqabamusaa dura ga’uuf karoora baafachuun barbaachisaa kan ta’e maaliifi?
4. Yeroo iddoo qabannu warra kaaniif akka yaadnu argisiisuu kan dandeenyu akkamitti?
5. Boqonnaa laaqanaatiif qophii akkamiitu godhame? Kunoo faayidaa kan qabu maaliifi?
6. Qajeelfama fudhachuuf deemnuuf yaada keenya qopheessuu kan dandeenyu akkmitti?
7. Fedhiin keenya maalidha? Maaliifoo?
[Ibsa fakkii fuula 3rra jiru]
Karaa Itti Maqaa Waaqayyoo Ol Kaasnu
◼ Dursinee karoora baasuu
◼ Warra kaaniif jaalala qabnu argisiisuu
◼ Qalbii keenya qopheessuu