Tibbi Ayyaana Yaadannoo—Yeroo Sochii Tajaajilaa Keenyaa Itti Guddisnudha
1 Sabni Israa’el durii waggaa waggaatti yeroo murtaa’eef ‘guyyoota ayyaanawwan Waaqayyoo’ ni kabaju turan. (Lew. 23:2) Gaarummaa Waaqasaaniirratti xiinxaluuf yeroo ramaduunsaanii gammachuu guddaa argamsiiseera; akkasumas waaqeffannaa dhugaatiif inaaffaa akka qabaataniif isaan kakaaseera.—2 Sen. 30:21–31:2.
2 Yeroo ammaattis, waggaa waggaadhaan tibba Ayyaana Yaadannoo hojii ti’ookraasii gammachiisaa ta’erratti ni hirmaanna. Yeroon kun, yeroo kennaa guddaa Yihowaan nu kennerratti gadi fageenyaan itti xinxalludha. Kennaa guddaan kun Ilmasaa Isa tokkichadha. (Yoh. 3:16; 1 Phe. 1:18, 19) Jaalala Yihowaaniifi ilmisaa nutti argisiisanirratti xiinxaluun keenya, Isa galateeffachuufi fedhiisaa raawwachuuf nu kakaasa.—2 Qor. 5:14, 15.
3 Waggaa kanatti, Ayyaanni Yaadannoo kan kabajamu, Kamisa, Bitootessa 24 erga aduun lixxee booda ta’a. Ji’oottan Bitootessaa, Eblaafi Caamsaatti hirmaannaa tajaajila keenyaa guddisuu kan dandeenyu akkamitti?
4 Namoota Hedduuf Dhugaa Ba’uu: Tajaajila dirreerratti ennaa hirmaattan namoota baay’eedhaaf dhugaa ba’uuf hanga dandeessan hunda godhaa. Waggaa tajaajilaa kanatti naannoowwan tajaajilaa utuu guutummaatti hin hojjetamin hafan hojjechuuf sagantaa baasuu ni dandeessa. Yeroo namoonni hedduun manasaaniitti argaman, jechuunis gara galgalaa manaa gara manaa tajaajiluuf karoora baasuu dandeessaa? Miseensonni qayyabannaa kitaabaa keessanii qayyabannaa dura tajaajila ba’uu yoo barbaadan, ilaaltuun olaanaa qayyabannaa kitaabaa tajaajilaaf walga’ii gabaabaa gochuufi naannoo tajaajilaa dhihoo sana jirutti hojjechuuf qophii gochuu danda’a ta’a.
5 Karaan namoota hedduudhaaf dhugaa ba’uun itti danda’amu garabiraan, bakka namoonni baay’inaan argamanitti dhugaa ba’uudha. Obboleettiin biyya Jaappaan tokko, hojii guyyaa guutuu kan qabdu ta’uyyuu, qajeelchaa gargaaraa taatee tajaajiluu barbaadde. Jaarsi gumii tokko, gara hojii deemuushee dura naannoo dhaaba baaburaa karaarratti tajaajiluu akka dandeessu yaada dhiheesseef. Sodaasheefi arrabsoo namoonni baaburaan deddeebi’an ishee arrabsan jala erga dabartee booda, namoota baaburaan deddeebi’an, warra dhaaba baaburaa keessatti hojjetaniifi namoota naannoo sanatti suuqii qaban dabalatee maamiltoota barruu 40 ta’aan argachuu dandeesseetti. Ji’a tokko keessatti giddu galeessaan barruulee 235 raabsiteetti. Guyyaa hundumaa, daqiiqaa muraasaaf yaadawwan Macaafa Qulqulluurratti hundaa’an namootaaf hiruusheetiin, qayyabannaawwan Macaafa Qulqulluu ja’a jalqabsiisuu dandeesseetti.
6 Carraawwan Itti Lallabuu Dandeenyu: Babal’istoonni barattoota ta’an baay’een, waggaa keessatti yeroon boqonnaa itti argatan jira. Yeroon kun qajeelchaa gargaaraa ta’anii tajaajiluuf carraa gaarii banaaf. Akkasumas dargaggoonni Kiristiyaana ta’an, mana barumsaatti lallabuudhaan sochii tajaajilasaanii guddisuu danda’u. Tarii, ijoolleen kutaa keetii waa’ee amantii kee baruuf fedhii qabaachuusaanii ennaa beektu si dinqisiisa ta’a. Marii kutaa keessatti godhamuun ykn ogbarruu mana barumsaatti barreessituun maaliif dhugaa ba’uuf itti hin fayyadamtu? Warri tokko tokkommoo, vidiyoo Dhugaa Baatota Yihowaatiin qophaa’aniin fayyadamuudhaan lallabaniiru. Kaanimmoo, hiriyoota kutaa tokko keessatti wajjin barataniif qayyabannaa jalqabaniifi mataasaanii murteessanii akka cuuphamaniif isaan gargaaraniiru. Kun carraawwan gaarii ‘maqaa Waaqayyoo jajachuu’ itti dandeenyudha.—Far. 148:12, 13.
7 Sochii guyyaa guyyaatti gootutti, namootaa wajjin waa’ee Waaqa keenya isa dinqisiisaafi abdiiwwan inni kenne dubbachuuf karaawwan adda addaa yaali. Obboleessi guyyaa hundumaa baaburaan adeemu tokko, yeroo mijaa’aa ta’utti namoota isaa wajjin deddeebi’aniif dhugaa ba’a ture. Fakkeenyaaf, dhaabbata baaburaatti baabura itti aanu yommuu eeggatu guyyaa hundaa dargaggeessa tokkoof daqiiqaa shaniif lallabaa ture. Kanaafuu, dargaggeessichi hiriyaasaa waliin hojjetuu wajjin qayyabannaa Macaafa Qulqulluu jalqabuuf walii galan. Qayyabannaan Macaafa Qulqulluu kun kan geggeeffamu yeroo baaburaan deemanittidha. Yeroo muraasa booda, dubartiin mareesaanii dhaggeeffachaa turan tokko, Macaafa Qulqulluu qayyabachuu akka barbaadan obboleessa kanatti himan. Yeroo baaburichaan deeman hundaatti dubartiin kun ni qayyabatu turan. Karaa kanaan obboleessi kun yeroo baaburaan deemuutti namoota kudhan qayyabachiisuu danda’eera.
8 Dullumaan ykn dhibee fayyaatiin sochiin ati gootu muraasa yoo ta’ehoo? Ammas taanaan karaawwan galata Yihowaadhaaf qabdu itti guddistu jiru ta’a. Bilbilaan lallabuu yaaltee beektaa? Kun si rakkisa taanaan ilaaltuu olaanaa qayyabannaa kitaabaa keetti himi. Tarii, babal’istoota mala kanatti fayyadamanii wajjin akka hojjettuuf qophii gochuu danda’a. Walii wajjin hojjechuun keessan, walirraa barachuufi lallaba bu’a qabeessa ta’e kennuuf isin gargaara. Yaadni bilbilaan lallabuuf isin gargaaru, Tajaajila Mootummaa Hagayya 1993 ful. 3rratti argama.
9 Warri haaraan Ayyaana Yaadannoorratti argamuunsaanii, galata Yihowaadhaaf dhiheessan akka guddisan isaan kakaasu danda’a. Muxxannoowwan gaarii tajaajilarratti argatte itti himuudhaan, akkasumas waa’ee Macaafa Qulqulluu barsiisuufi mormii amantaasaaniirratti ka’uuf deebii kennuu akka danda’an suuta suutaan isaan leenjisuudhaan, karaa idilee ta’een tajaajilarratti hirmaachuuf sodaa qaban akka mo’an gargaaruu dandeessa. (1 Phe. 3:15) Namni ati qayyabachiistu babal’isaa ta’uuf fedhii yoo qabaate, sassaabaa ilaaltuu olaanaa wajjin irratti mari’adhaa. Innis, baratichi gumii wajjin ta’ee dhugaa ba’uuf ga’eessa ta’uusaa murteessuuf baratichaa wajjin haasa’uuf qophii godha. Warri haaraan tarkaanfii fudhatanii olaantummaa Yihowaa deeggaruuf isa cina yeroo dhaabatan, Yihowaan baay’ee akka gammadu beekamaadha.—Fak. 27:11.
10 Qajeelchaa Gargaaraa Ta’uu Ni Dandeessaa? Sa’aatiin 50ni qajeelchaa gargaaraarraa barbaadamu kan itti yaadamuu qabudha. (Mat. 5:37) Kana jechuun torbanitti giddu galeessaan sa’aatii 12 tajaajilarratti dabarsuuf yeroo ramaduu si barbaachisa jechuudha. Sagantaan qajeelchaa gargaaraa akka fakkeenyaatti ful. 5rratti ba’e siif mijaa’aadhaa? Kanaanachimmoo, Bitootessatti, Eblatti ykn Caamsaatti qajeelchaa gargaaraa ta’uuf sagantaa mataa keetii baasuu dandeessaa? Tajaajila kee guddisuuf carraaqqii gootu Yihowaan akka sii eebbisu gaafadhu.—Fak. 16:3.
11 Tibba Ayyaana Yaadannootti, carraaqqii addaa Yihowaa galateeffachuuf gootu jaarsoliiniifi tajaajiltoonni gumii guutummaatti si deeggaru. Tarii garri caalaansaanii qajeelchaa gargaaraa ta’anii tajaajilu ta’a. Jaarsoliin hanga danda’aame gara galgalaa, guyyoota hojiittis sa’aatii galgalaa, Sambadduraafi Dilbata walga’iin tajaajila dirree akkuma barbaachisummaasaatti akka jiraatu qophii godhu. Walga’ichi eessatti, yoom akka godhamuufi eenyu akka geggeessu murteessuuf, obboloota qajeelchaa ta’anii yeroo hundumaa walga’icharratti argaman ykn warra walga’iichaa geggeessuuf yaadanii wajjin haasa’uu qabu. Jaarsoliin, guyyaafi sa’aatii ati tajaajiluuf yaadde sanatti namni sii wajjin tajaajilu akka jiraatu gochuuf yaalu. Karaa kanaan karoorri ba’uufi hojii gaariin hojjetamuu danda’a.—Fak. 20:18.
12 Hanga Dandeessan Godhaa: Haalli kee qajeelchaa gargaaraa ta’uuf kan siif hin heyyamne yoo ta’e, Yihowaan ‘akka humna keenyaatti malee, humna keenya gararraatti’ akka nurraa hin eegne dagachuu hin qabdu. (2 Qor. 8:12) Akka Yihowaa galateeffannu kan nu godhan wantoonni baay’een jiru. Daawit: “Ani yeroo hundumaa maqaa Waaqayyoo nan eebbisa, jajuun isaas takkaa afaan koo keessaa hin bu’u” kan jedhe sababii malee miti. (Far. 34:1) Tibba Ayyaana Yaadannoo kanatti murtoon keenyas kana haa ta’u.
[Gaaffiiwwan Qayyabannaa]
1. ‘Guyyoonni ayyaanaa,’ Israa’eloota Waaqayyoon sodaataniif bu’aa maalii argamsiisaniiru?
2, 3. Tibba Ayyaana Yaadannootti sochii hafuuraa keenya guddisuun sirrii kan ta’e maaliifi? Ayyaanni Yaadannoo yoom kabajama?
4, 5. (a) Obboloota tokko tokko namoota hedduudhaaf dhugaa ba’uuf kan isaan gargaare maalidha? (b) Atoo naannoo keetti wanti bu’a qabeessa ta’ee argatte maalidha?
6. Dargaggoonni sochii karaa hafuuraa godhan guddisuu kan danda’an akkamitti?
7. (a) Obboleessi tokko warra kaaniif lallabuuf carraawwan argateetti kan fayyadame akkamitti? (b) Atoo muuxannoo argatte qabdaa?
8. Warri dullooman ykn dhibee fayyaa qaban sochii tajaajilasaanii guddisuuf mala kamitti fayyadamuu danda’u?
9. Qayyabattoonni Macaafa Qulqulluu, gumii wajjin tajaajilarratti hirmaachuuf ga’oo akka ta’an gargaaruu kan dandeenyu akkamitti?
10. (a) Sagantaa gaarii baasuun qajeelchaa gargaaraa ta’uuf kan nu gargaaru akkamitti? (b) Waggaa darbe tibba Ayyaana Yaadannootti qajeelchaa gargaaraa taatee tajaajiluu dandeessee turtee? Yoo ta’e akkamitti?
11. Jaarsoliiniifi tajaajiltoonni gumii obboloota qajeelchaa gargaaraa ta’anii tajaajilan deeggaru kan danda’an akkamitti?
12. Yeroo hundaa Yihowaa galateeffachuuf kan nu kakaasuu maalidha?
[Fakkii fuula 3rra jiru]
Sochii Tajaajilaa Kee Akkamitti Guddisuu Dandeessa?
◼ Naannoowwan hin hojjetamne hojjedhu
◼ Yeroo namoonni manasaaniitti argaman lallabi
◼ Bakka namoonni baay’een argamanitti lallabi
◼ Mana barumsaatti ykn bakka hojiitti lallabi
◼ Bilbilaan lallabuuf carraaqqii godhi
◼ Qajeelchaa gargaaraa ta’ii tajaajili
[Chaartii fuula 5rra jiru]
Sagantaa Qajeelchaa Gargaaraa Ta’uuf Gargaaru
Sagantaa torban torbaniin tajaajilarratti sa’aatii 12 dabarsuuf gargaaru
Ganama—Wiixataa hanga Sambadduraatti
Dilbata guyyaa kan biraa kaminiyyuu iddoo buusuun ni danda’ama.
Guyyaa Yeroo Sa’aatii
Wiixata Ganama 2
Kiibxata Ganama 2
Roobii Ganama 2
Kamisa Ganama 2
Jimaata Ganama 2
Sambadduraa Ganama 2
Walumatti Sa’aatii: 12
Guyyaa Guutuu Lama
Torban keessatti guyyaa lama kamiiniyyuu filachuun ni danda’ama.
(Guyyoota filannuun kan ka’e, sagantichi ji’a keessatti walitti qabaatti sa’aatii 48 qofa fida ta’a)
Guyyaa Yeroo Sa’aatii
Roobii Guyyaa Guutuu 6
Sambadduraa Guyyaa Guutuu 6
Walumatti Sa’aatii: 12
Galgalawwan Lamaa Akkasumas Sambadduraafi Dilbata
Torban keessatti guyyaa lama kamiiniyyuu filachuun ni danda’ama
Guyyaa Yeroo Sa’aatii
Wiixata Galgala 11⁄2
Roobii Galgala 11⁄2
Sambadduraa Guyyaa Guutuu 6
Dilbata Guyyaa Walakkaa 3
Walumatti Sa’aatii: 12
Waaree Booda Sadiifi Sambadduraa
Dilbata guyyaa kamiiniyyuu bakka buusuun ni danda’ama
Guyyaa Yeroo Sa’aatii
Wiixata Waaree Booda 2
Roobii Waaree booda 2
Jimaata Waaree booda 2
Sambadduraa Guyyaa Guutuu 6
Walumatti Sa’aatii: 12
Sagantaa Tajaajilaa Koo
Yeroo ramaddetti sa’aatii meeqa akka tajaajiltu murteessi
Guyyaa Yeroo Sa’aatii
Wiixata
Kibxata
Roobii
Kamisa
Jimaata
Sambadduraa
Dilbata
Walumatti Sa’aatii: 12