Barreeffamoota Macaafa Qulqulluurratti Hundaa’anii Qophaa’anitti Akka Gaariitti Fayyadamaa
1 “Bara 1965 kaasee barreeffamoota keessan dubbisaan ture. Yommuun dubbisu Macaafa Qulqulluu wajjin wal ilaalchiseen dubbisa; yaanni barreeffamoota keessanirratti ba’e hundinuu Macaafa Qulqulluu wajjin wal sima. Yeroo hundumaa waa’ee Waaqayyoofi waa’ee Yesus dhugaasaa beekuuf nan hawwan ture; gaaffiiwwan kootiif barreeffamoota keessaniifi Macaafa Qulqulluurraa deebii argachaan jira jechuu nan danda’a.” Yaada kana namicha tokkotu waajjira damee Dhugaa Baatota Yihowaatti barreesse. Xalayaa kanarratti Macaafa Qulqulluu qayyabachuu akka barbaadus ibsee ture.
2 Akkuma namicha dinqisiifataa kanaatti, addunyaarratti namoonni miliyoonaan lakkaa’aman barreeffamoota “hojjetaan amanamaaniifi ogeessi” qopheesseefi Macaafa Qulqulluu qayyabachuuf gargaaran ni dinqisiifatu. (Mat. 24:45) Namoonni garaa qajeelaa qaban ‘dhugaa beekuu bira akka ga’an’ gargaaruuf, waggaa waggaadhaan barreeffamoonni hedduun ni qophaa’u. (1 Xim. 2:4) Barreeffamoota keenyatti malaan fayyadamuu kan dandeenyu akkamitti?
3 Barreeffamoota Hin Balleessinaa: Yeroo baay’ee gidduutti, barreeffama itti fayyadamnu caalaa kuusuu dandeenya. Barreeffamoota bu’a qabeessa ta’an kana akka hin balleessine maal gochuu dandeenya? Barreeffamoota raabsuuf yeroo fudhannu hubannaa qabaachuun barbaachisaadha. Barreeffamoota hedduu fudhachuu mannaa, tokko ykn lama fudhanne erga raabsinee booda dabalachuu wayya. Kana gochuun keenya, barreeffamoota argannu hedduu mana keenyatti kuusuurraa nu eega. Akkasumas, barreeffamoota hin raabsamne hedduu yoo qabaanne, barreeffamoota ajajnu hir’isuun keenya gaariidha.
4 Barreeffamoota Kuufaman: Barreeffamoonni gumii keessa jiran garmalee yoo baay’atan, qindeessaan barreeffamaa gumiiwwan naannoo sanaa barreeffama dabalataa yoo barbaadan gaafachuu danda’a. Babal’istoonni, miseensota maatiisaanii warra hin amanneef, qayyabattootasaaniitiifi warra kaaniif barreeffamoota turan raabsuu danda’u. Namoonni haaraan gumii dhufuu jalqabanis barreeffamoota turan kana argachuu barbaadu ta’a.
5 Barreeffamoonni keenya kaayyoosaanii galmaan akka ga’an barbaanna; innis namoonni fedhii qaban waa’ee kaayyoo Yihowaa isa dinqisiisaa caalaatti akka beekan gochuudha. Yesus dinqiidhaan namoota hedduu erga nyaachisee booda nyaata hafe akkuma hin ganne hundaa, kaayyoon keenyas barreeffamoota bu’a qabeessa Macaafa Qulqulluurratti hundaa’anii nuuf dhihaatan kanatti guutummaatti fayyadamuudha. (Yoh. 6:11-13) Barreeffamoonni keenya akkasumaan kan kuufaman yoo ta’e, ergaa lubbu baraarsaan isaan keessatti argamu yaada garaa namoota qajeeloo tuquu hin danda’u. Kanaafuu, tajaajilaaf barreeffamoota yeroo fudhannu hamma raabsuu dandeenyu fudhachuufi warra kaaniin akka gargaarutti itti fayyadamuu qabna.—Filp. 4:5.
[Gaaffiiwwan Qayyabannaa]
1, 2. Namoota baay’eetti waa’ee barreeffamoota keenyaa maaltu itti dhaga’ama? Kunoo gaaffii akkamii kaasa?
3. Barreeffamoota keenya balleessuurraa of eeguu kan dandeenyu akkamitti?
4. Gumii keessa barreeffamoonni garmalee kuufaman yoo jiraatan maal gochuutu danda’ama?
5. Dinqisiifannaa barreeffamoota keenyaaf qabnu akkamitti argisiisuu dandeenya?