Dandeettii Tajaajila Irratti Qabnu Fooyyeffachuu—Intarkoomiitti Fayyadamuudhaan Lallabuu

Barbaachisaa Kan Taʼe Maaliifi?: Intarkoomii ykn bilbila balbala irraatti fayyadamanii lallabuun nama sodaachisuu dandaʼa. Sodaan akkasii hinaaffaa nuti hojii gaariidhaaf qabnu akka nu jalaa hin hirʼisne gochuu kan dandeenyu akkamitti? Namoota tokko tokko argatanii misiraachoo Mootummichaa itti himuun kan dandaʼamu mala kanatti fayyadamuudhaan qofa taʼuu akka dandaʼu hin dagatinaa. (Rom. 10:14) Muuxannoowwan akka argisiisanitti, mala kanatti fayyadamuudhaan karaa buʼa-qabeessa taʼeen lallabuun ni dandaʼama. (Kitaaba Waggaa 2011, ful. 65-66 fi Kitaaba Waggaa 2000, ful. 54, key. 3 (Ingiliffa) ilaali.) Karaawwan kana gochuun itti dandaʼamuu fi armaan gaditti caqasaman ilaali.

Kana Gochuu Kan Dandeenyu Akkamitti?

Kallattiidhaan nama intarkoomiitti fayyadamtanii haasofsiisaa jirtaniif dubbisuu akka dandeessaniif akkaataa dhiheenyaa gabaabaa taʼe qophaaʼuudhaan barreeffadhaa. Akkas gochuun keessan ija jabina isiniif dabala. Yommuu jalqabdan sababa nama sana itti haasofsiistan isaaf ibsaa. Meeshaan sun isinitti ni mulʼisa yoo taʼe yommuu nama sana haasofsiistan maqaa isaatti fayyadamaa. Tiraaktii ykn barruu odeeffannoo dabalataa argachuuf isa gargaaru akka isaaf kennitan itti himuudhaan (ykn balbala isaa dura isaaf kaaʼuudhaan) maree keessan xumuraa.
Ilaalcha gaarii qabaadhaa. Akka waan nama sana dura dhaabattanii isa faana haasaʼaa jirtaniitti fuula ifaa taʼee fi sochii qaamaa argisiisaa.
Of hin dhiphisinaa, akkasumas bifa mareetiin waliin dubbadhaa. Haala ifaa taʼee fi sagalee sirriitti dhagaʼamuun dubbadhaa. Haasaa keessan iddoo hin taanetti hin kukkutinaa, akkasumas yommuu dubbattan hin ariifatinaa.
Murtoo gaarii godhaa. Gamoowwan gurguddoo keessa intarkoomii hedduun jiraachuu dandaʼa. Tarii sadan arfan tokko bilbiltanii haasofsiisuu dandeessu taʼa. Intarkoomii hunda bilbillee namoota haasofsiisuuf yommuu yaallu tarii namoonni achi keessa jiraatan naʼuu waan dandaʼaniif yommuu isa tokko haasofsiistanii xumurtan, yaadannoo qabadhaatii bakka sanaa deemaa.

Jiʼa Kanatti Akkas Gochuuf Yaali:

Yeroo waaqeffannaa maatii keessaniitti, utuu wal hin ilaalin ykn wal irraa garagalaatii akka nama intarkoomiitti fayyadamuudhaan lallabaa jiruutti waliin shaakalaa.