Qayyabannaa Maatii Gochuuf—Sagantaa Maatii Qabaadhaa
1 Akka warra Kiristiyaanaa tokkootti, kennaa guddaan ijoollee keessaniif kennuu dandeessan, jaalala Yihowaadhaaf qabdan isaanis akka qabaatan gochuudha. Kana gochuu kan dandeessan, torban torbanitti qayyabannaa maatii Macaafa Qulqulluu gochuuf ‘yeroo mana keessa teessanitti’ ta’uu danda’a. (Kes. 6:5-7) Hiriyaa gaa’elaa hin amanne yoo qabaatte, maatii amantiidhaan qoqqoodame keessa yoo jiraatte, ykn kophaa kee ijoollee kan guddistu ta’uyyuu, yeroo hundumaa qayyabannaa maatii walirraa hin cinnegochuudhaan ijoolleen kee gara keettis ta’e gara Yihowaatti akka dhihaataniif isaan gargaaruu dandeessa.
2 Qayyabannaa Maatii Jalqabuu: Tarkaanfiin inni jalqabaa maatiidhaan qayyabachuu amaleeffachuudha. Qayyabannaa maatii keessan yoom gochuu akka qabdan murteessuuf, maatiidhaan maaliif irratti hin mari’attan? (Fak. 15:22) Ijoollee xixinnoo yoo qabaattan, barumsa tokko qoqqooduudhaan torban keessatti al baay’ee qayyabachuuf filattu ta’a. Sagantaa maatii keetiif ta’u filadhu. Qayyabannaa maatii keessaniif sa’aatii murtaa’aa ta’e ramadaa; sagantaa baafame hordofuuf murteessaa.
3 Qayyabannaan keessan maalirratti kan hundaa’e ta’a? Maatiiwwan tokko tokko Qayyabannaa Kitaabaa Gumii ykn Masaraa Eegumsaa yeroo itti aanutti godhamuuf qophii godhu. Kaanimmoo barreeffamawwan keessumaa dargaggootaaf qophaa’an qayyabatu. Abbaan ilma tokkoofi intala tokko qabu tokko akkas jedheera: “Ijoolleen keenya qayyabannaa keenya isa torbanii hawwiidhaan akka eegan kan isaan godhu, seenaawwan kitaaba, Kitaaba Koo Isan Seenaa Macaafa Qulqulluu Ittiin Baradhu jedhamurratti argaman do’iidhaan kan hojjennu ta’u keenyadha. Wanti inni guddaan, keeyyatawwan baay’ee qayyabachuu keenya utuu hin ta’in, dhiibbaa qayyabannichi geessisuufi beekumsa argamsiisudha.”
4 Torban Torbaniin Qayyabadhaa: Qayyabannaan maatii utuu walirraa hin citin kan godhamuufi miseensota maatii hundaaf gammachuu kan argamsiisu ta’uu qaba. Haallawwan rakkisaa ta’an yeroo nu mudatanitti guyyaasaafi sa’aatiisaa akkuma barbaachisutti jijjiiruun ni danda’ama. Al tokko tokkommoo mataduree qayyabannus haalli nu jijjiirsisu jiraachuu ni danda’a. Haata’u malee jijjiiramni barbaachisaan godhamu, sagantaa qayyabannaa maatiif baasnerratti jijjiirama yeroo dheeraa fiduu hin qabu. Sa’aatii qayyabannaa itti godhamurratti dirqama jijjiirama gochuun barbaachisee yoo ta’e, miseensonni maatii hundi sa’aatii kamirratti akka godhamu akka beekaniif, bakka isaan salphaatti arguu danda’anitti maxxansuun barbaachisaadha. Sagantaa qayyabannaa maatii yeroo hundumaaf gochuuf carraaqqiin godhamu akkasii kan galata namaaf argamsiisudha! “Adabaa fi barsiisa gooftaatiin ijoollee keessan guddisaa” ennaa deemtan, jaalala ijoollee keessaniifi Abbaa keessan isa samiif qabdan argisiiftu.—Efe. 6:4.