Namoota Hamma Ta’e Fedhii Argisiisan Hunda Deebi’aa Gaafadhaa
1 Yeroo ammaatti baay’een keenya mana dhugaatti argamuu kan dandeenye, namni tokko ergaa Mootummichaatiif fedhii argisiisne hubatee obsaan deddeebii gaaffii waan nuu godheefidha. Deddeebii gaaffiin fedhii keenya guddisu kun si’a baay’ee godhamee ta’uu danda’a. Haaluma wal fakkaatuun, nutis namoota hamma ta’e fedhii argisiisan hundaaf deddeebii gaaffii gochuu qabna. Deddeebii gaaffii gochuun hojii ‘bartoota taasisuu’ nuu kenname keessaa isa tokkodha.—Mat. 28:19, 20.
2 Fedhiisaanii Hubadhaa: Namni tokko barreeffama kan hin fudhanne ta’ullee, fuullisaa, sagaleensaa ykn jechoota filachuunsaa ergaa Mootummichaatiif hamma ta’e dinqisiifannaa akka qabu kan argisiisu ta’uu danda’a. Deddeebii gaaffii kan goonus kanarratti hundaa’uudhaanidha. Obboleessi tokko utuu barreeffama hin kennin, nama tokkoof walitti aansuudhaan torban shaniif deddeebii gaaffii godhe. Deddeebii gaaffii isa ja’affaarratti namichi barreeffama fudhate, sana boodas qayyabannaan Macaafa Qulqulluu ni jalqabame.
3 Nama fedhii qabu tokko yoo argattan, yaadannoo baduu hin dandeenyerratti barreessuudhaan yeruma sana, tariimmoo guyyoota muraasa booda deebi’aa gaafadhaa. “Inni hamaan” wanta garaa namichaa keessatti facaafame akka butu carraa hin kenninaafii. (Mat. 13:19) Yeroo murtaa’e tokkotti deebitanii dhaquuf beellama erga qabattanii booda dhaquuf carraaqqii godhaa.—Mat. 5:37.
4 Yeroo Karaarratti Tajaajillu: Karaarratti ykn karaa alidilee ta’een utuu tajaajiltanii namoota fedhii qaban deddeebitanii gaafachuuf carraaqqii ni gootuu? Xumura maree keessanirratti akkas jechuu dandeessu: “Maree goonetti baay’ee gammadeera. Yeroo lammataatiif akka mari’annuuf eessatti wal arguu dandeenya?” Babal’istoonni tokko tokko, akka barbaachisummaasaatti teessoosaanii nama fedhii argisiiseef kennuu ykn teessoo nama sanaa fudhachuu barbaadu ta’a. Namoonni, naannoo tokkotti yeroo baay’ee utuu karaarratti tajaajiltanii kan isin ilaalan yoo ta’e, bilbilasaanii ykn teessoosaanii isinii kennuuf hin sodaatan. Teessoosaanii isinii kennuu yoo didanillee, guyyaa garabiraatti yoo isaan argattan fedhiisaanii kakaasuu dandeessu.
5 Biqiltuun bishaan obaafneefi kunuunsine yommuu lalisu arguun keenya baay’ee nu gammachiisa. Haaluma wal fakkaatuun, deddeebii gaaffii gochuufi namoonni karaa hafuuraa akka guddatan gargaaruu keenyaan gammachuu kana caalu arganna. (1 Qor. 3:6) Namoota hamma tokko fedhii argisiisan hunda deebitanii gaafachuuf galma baafadhaa.