Hojiin Lallabaa, Karaa Hafuuraa Nu Cimsa
1. Hojiin lallabaa bu’aa akkamii nuu argamsiisa?
1 Hojii lallabaarratti si’aayinaan hirmaachuun, karaa hafuuraa nu cimsuufi gammachuu keenya nuu dabaluu danda’a. Dhugaadha, sababiin tajaajilarratti hirmaannuuf inni guddaan Yihowaa gammachiisuufidha. Ta’us, abboommii “dubbicha lallabi” jedhuuf ajajamuun keenya, eebba Yihowaafi bu’aa kan biraa nuuf argamsiisa. (2 Xim. 4:2; Isa. 48:17, 18) Hojiin lallabaa, nu cimsuufi nu gammachiisuu kan danda’u attamitti?
2. Tajaajilli kan nu cimsu karaawwan kamiini?
2 Jajjabinaafi Eebba Arganna: Hojiin lallabaa, rakkina yeroo ammaa mannaa, eebbawwan Mootummichaarratti akka xiyyeeffannu nu jajjabeessa. (2 Qor. 4:18) Barumsa Macaafa Qulqulluu warra kaaniif ibsuun keenya, abdii Yihowaarratti amantii qabnu nuu cimsa; dinqisiifannaa dhugaadhaaf qabnus nuu jabeessa. (Isa. 65:13, 14) Namoonni kaan karaa hafuuraa akka guddataniifi ‘kan biyya lafaa akka hin taane’ yommuu gargaarru, ejjennoon biyya lafaa kanarraa adda ta’uuf qabnu ni cima.—Yoh. 17:14, 16; Rom. 12:2.
3. Tajaajilli amala Kiristiyaanummaa horachuuf kan nu gargaaru akkamitti?
3 Tajaajilarratti hirmaachuun, amala Kiristiyaanummaa horachuuf nu gargaara. Fakkeenyaaf ‘karaa hundumaa namoota hundumaa biratti waan fakkaatu ta’uuf’ carraaqqii gochuun keenya, caalaatti amala gadi of deebisuu horachuuf nu gargaara. (1 Qor. 9:19-23) Yommuu “namoota akka hoolota tiksee hin qabneetti bututanii, gataman” barsiifnu, gara laafinaafi namootaaf na’uu baranna. (Mat. 9:36) Namoonni utuma nu mormaniifi tajaajila keenyaaf dantaa dhabanii hojii keenyatti yoo itti fufne jabina baranna. Of kenninee namoota yoo gargaarre gammachuun keenya ni dabala.—HoE. 20:35.
4. Tajaajilakeetiif ilaalcha akkamii qabda?
4 Tajaajila Waaqa isa kophaasaa waaqeffatamuu qabuuf ulfina fidu dhiheessuun eebba guddaa mitii? Tajaajilli nu cimsa. Warra ‘hojii wangeelaa raawwachuurratti’ guutummaatti hirmaataniifis eebbawwan hedduu argamsiisa.—HoE. 20:24.