Walga’ii Tajaajilaatiif Qophaa’uu Kan Dandeenyu Akkamitti?
1. Kaayyoon Walga’ii Tajaajilaa maalidha? Faayidaa guddaa irraa argachuu kan dandeenyu akkamitti?
1 Walga’iin Tajaajilaa, tajaajila keenyaan bu’aa gaarii akka argannu nu gargaaruuf kan qophaa’edha. Walga’iin kun wangeela Mootummaa lallabuu, bartoota horachuufi waa’ee firdii Waaqayyoo isa bara dhuma labsuurratti xiyyeeffata. (Mat. 28:20; Mar 13:10; 2 Phe. 3:7) Walga’ii barbaachisaa ta’e kanarraa faayidaa argachuu kan dandeenyu, akka gaariitti yoo qophoofneefi yoo irratti hirmaannedha.
2. Haasawaa dhi’aatu dhaggeeffachuuf of qopheessuu kan dandeenyu akkamitti?
2 Haasawaa: Haasawaan kun maalirraa dhihaachuu akka qabu obboleessa kutaa kana dhiheessuuf yaanni ni kennama. Barreeffama haasichi irraa dhihaatuufi caqasawwan achirra jiran dubbisuu, akkasumas barumsa kana tajaajilarratti akkamitti hojiirra oolchuu akka qabdu yaaduu dandeessa.
3. Marii gaaffiifi deebiidhaan dhihaaturratti hirmaachuuf maal gochuu qabna?
3 Marii Gaaffiifi Deebii: Kutaan kun akkuma qayyabannaan Masaraa Eegumsaa itti godhamutti yaada seensaafi xumuraa gabaabaa kennuudhaan gaggeeffama. Keeyyata hunda keessatti qabxiiwwan ijoo ta’an jala muruudhaan yaada gabaabaafi gaarii ta’e kennuuf qophaa’i.
4. Marii dhaggeeffattootaa wajjin geggeeffamuuf qophaa’uu kan dandeenyu akkamitti?
4 Marii Dhaggeeffattootaa: Kutaan kun akka haasawaatti dhihaachuu kan danda’u ta’us, obboleessi haasawicha dhiheessu darbee darbee dhaggeeffattonni yaada akka kennan afeera. Yommuu qophooftu qabxiiwwan ijoo ta’an jala murtee, akkasumas caqasoota kennaman dubbistee dhaqnaan, yommuu gaaffiin dhihaatu yaada kennuu dandeessa. Obboleessi kuticha dhiheessus hirmaattonni qabxii ijoo ta’an akka deebisan yaalii godha.
5. Hojiin argisiisa dhihaaturraa caalaatti fayyadamuuf maaltu nu gargaara?
5 Hojiin Argisiisa: Kutaawwan tokko tokkorratti qabxiin irratti mari’atame akka itti tajaajilarratti hojiirra oolchuun danda’amutti dhihaata; kutaa kanaa wajjin haala wal qabateenis hojiin argisiisni yaada naannoo tajaajilaa sanatti ka’uu danda’u argisiisu dhihaachuu danda’a. Jaarsoliin ykn babal’istoonni muuxannoo qaban ykn qajeelchitoonni hojiin argisiisa kana akka dhiheessan gaafatamuu danda’u. Kutaawwan akkasii yommuu qophooftu hojiin argisiisni kanaaf dhihaatu akkam ta’uu akka qabu irratti yaaduunkee gaariidha. Hojiin argisiisni Tajaajila Mootummaarratti ba’an yommuu dhihaatanimmoo, yaadasaa mataatti qabachuudhaan namoota addaddaa akkamitti ittiin haasofsiisuu akka dandeessu yaadi. Barreeffama ykn barruulee hojiin argisiisa kanaaf ta’u qabachuukee mirkaneeffadhu. Hojiin argisiisa kana keessaa tokko tokko qayyabannaa Waaqeffannaa Maatii galgala taasifamurratti shaakaluun gaarii ta’uu danda’a.
6. Sababni Walga’ii Tajaajilaatiif akka qophoofnu nu godhan tokko tokko maalfa’i?
6 Walga’iin Tajaajilaa caalaatti nu gammachiisuu kan danda’u, yoo qophoofneefi barumsa walga’icharraa dhihaatuuf fedhii guddaa yoo qabaannedha. Yaadawwan armaan olitti caqasaman yoo raawwanne, caalaatti wal jajjabeessuuf nu gargaara. (Rom. 1:11, 12) Walga’ii Tajaajilaatiif yeroo fudhannee yoo qophoofne, hojii nuu kenname raawwachuuf caalaatti nu hidhachiisa.—2 Xim. 3:17.