Birooshura Yeroo Harʼaa Fedha Yihowaa Raawwachaa Kan Jiran Eenyufaʼi? Jedhamutti Fayyadamuu Kan Dandeenyu Akkamitti?
Birooshura Haaraa Namoota Macaafa Qulqulluu Qayyabachaa jiran Jaarmiyaa Yihowaa Wajjin Wal Barsiisuuf Qophaaʼe
1. Kaayyoowwan sadan birooshurri Fedha Yihowaa jedhamu itti qopheeffame caqasi.
1 Birooshura haaraa Yeroo Harʼaa Fedha Yihowaa Raawwachaa Kan Jiran Eenyufaʼi? jedhamutti fayyadamuu jalqabdaniittuu? Kaayyoon birooshura kanaa, (1) namoonni Macaafa Qulqulluu qayyabatan Dhugaa Baatota Yihowaa wajjin akka wal baran, (2) waaʼee hojii keenyaa akka baraniifi (3) jaarmiyaan keenya akkamitti akka hojjetu akka hubatan gargaaruudha. Birooshurri Fedha Yihowaa jedhamu kun, barumsa fuula tokkoo daqiiqaa shanii hanga kudhanii gidduutti qayyabannaa booda salphaatti irratti mariʼachuun dandaʼamu qabateera.
2. Akkaataa birooshurri kun itti qopheeffameefi bifawwan akkamii akka qabu ibsi.
2 Akkaataa Birooshurri Kun Itti Qopheeffame: Birooshurichi kutaa sadiitti kan qoodame siʼa taʼu, akkuma olitti ibsame tokkoon tokkoonsaanii waaʼee jaarmiyaa Yihowaa karaa addaddaatiin ibsu. Matadureen barumsawwan 28tanii, gaaffii gaaffiidhaan kan kaaʼame siʼa taʼu, matadureewwan xixiqqaan qubee fufurdaadhaan barreeffamanimmoo gaaffiiwwan sanaaf deebii kennu. Suuraawwan obbaloota biyyoota 50 olii birooshura kanarratti argaman, hojiin keenya inni addunyaa maratti hojjetamu maal akka fakkaatu kan argisiisanidha. Barumsawwan hedduun saanduqoota “Caalaatti Baradhu” jedhuufi yaadawwan nama qayyabsiistu jajjabeessuuf si gargaaran qabataniiru.
3. Birooshura Fedha Yihowaa jedhamutti fayyadamuu kan dandeenyu akkamitti?
3 Karaa Itti Fayyadamuu Dandeessan: Gaaffii mataduree barumsichaarra jiru itti argisiisuudhaan jalqabaa. Achiis, barumsicha waliin yeroo dubbistan, matadureewwan xixiqqaa qubee fufurdaadhaan barreeffamanirratti ibsa kennaa. Dhumarrattis, gaaffiiwwan irra deebii dhuma fuula sanaarratti argamanirratti mariʼadhaa. Guutummaa barumsichaa dubbisuu ykn kutaa kutaadhaan dubbistanii irratti mariʼachuu ni dandeessu. Caqasoota caqasaman keessaa isa kam utuu dubbistanii gaarii akka taʼu murteessaa. Fakkiiwwaniifi saanduqoota “Caalaatti Baradhu” jedhanirratti mariʼachuu hin dagatinaa. Yeroo baayʼee, barumsawwan sana duraa duubaan irratti mariʼachuun gaariidha. Haataʼu malee, fedhii nama sanaarratti hundaaʼuudhaan gara barumsa kan biraatti ceʼuus ni dandeessu. Fakkeenyaaf, walgaʼiin addaa, aanaa ykn koonyaa dhihaachaa jira taanaan barumsa 11ffaarratti mariʼachuu dandeessu.
4. Birooshura haaraa kana argachuukeetti kan gammadde maaliifi?
4 Nama tokkoo wajjin Macaafa Qulqulluu yeroo qayyabannu, Abbaa keenya isa samii wajjin akka wal baru isa gargaarra. Kana malees, waaʼee jaarmiyaa Yihowaa isaan barsiisuu qabna. (Fak. 6:20) Birooshura haaraa, kana gochuun akka nuuf salphatu godhu argachuu keenyatti baayʼee gammanneerra!