Dandeettii Tajaajilarratti Qabnu Fooyyeffachuu—Hiriyaa Tajaajilaa Gaarii Taʼuu

Barbaachisaa Kan Taʼe Maaliifi? Yesus hiriyaa tajaajilaa qabaachuun faayidaa akka qabu hubatee ture. Kanaaf duuka buutonnisaa 72n isa dura deemuudhaan akka lallaban ennaa erge lama lama godhee isaan erge. (Luq. 10:1) Babalʼisaan tokko tajaajilarratti haalli rakkisaan yoo isa mudate ykn gaaffii gaafatameef deebii deebisuu qabu yoo irraanfate, hiriyaan tajaajilaasaa isa gargaaruu dandaʼa. (Lal. 4:9, 10) Obboleessi isa faana tajaajilaa jiru lallabaa wangeelaa milkaaʼina qabu akka taʼuuf muuxannoosaa isaaf hiruufi darbee darbee yaada isaaf kennuu dandaʼa. (Fak. 27:17) Akkasumas, mana tokkoo isa kan biraatti ennaa ceʼan yaada isa jajjabeessu wajjin mariʼachuu dandaʼa.—Filp. 4:8.

Kana Gochuu Kan Dandeenyu Akkamitti?

Hiriyaan tajaajilaakee ennaa lallabu xiyyeeffannaadhaan dhaggeeffadhu. (Yaq. 1:19) Yommuu inni caqasa Macaafa Qulqulluu tokko dubbisu atis baasii hordofi. Akkas gochuunkee yoo gargaarsi isa barbaachise isa gargaaruuf si dandeessisa.
Haalasaa ilaaluudhaan gargaarsi yoo isa barbaachise yoom isa gargaaruu akka qabdu murteessi. (Fak. 25:11) Nama tokkoo wajjin Macaafa Qulqulluu qayyabsiisaa jirta yoo taʼe darbee darbee yaada kennuunkee gaariidha. Haataʼu malee, manaa gara manaa ennaa tajaajiltu hiriyaan tajaajilaakee dabareesaarratti akka ati gidduu seentu filachuu dhiisuu dandaʼa. Dhugaadha, babalʼisaa haaraa yoo taʼe ykn gaaffii gaafatameef ykn mormii kaʼeef deebii akkamii kennuu akka qabu yoo irraanfate, akka isa gargaartu si gaafachuu dandaʼa taʼa. Haataʼu malee, hiriyaa tajaajilaakee faana manaa gara manaa yommuu tajaajiltu, deddeebii gaaffii yommuu gootu, ykn qayyabannaa Macaafa Qulqulluu yommuu geggeessitu, gidduu seenuudhaan dubbiisaa addaan hin kutin ykn mataduree kan biraa hin kaasin.
Muuxannookee isaaf hiri. Hiriyaa tajaajilaakeetiif yaada tajaajilarratti milkaaʼina akka argatu isa gochuu dandaʼu siʼa tokko tokko isaaf hiruu ni dandeessa taanaan akkas gochuurraa duubatti hin jedhin. (Fak. 3:27) Haala mijataa taʼe ennaa argattu, akkas isaan jechuudhaan jalqabuu dandeessa: “akkam ture?” ykn “yaada tokko siif kennuu?” ykn “utuu ana taʼee akkasin godha.” Namoonni tokko tokko darbee darbee yommuu yaadni isaanii kennamu kan fudhatan taʼus, yeroo hunda akkas gochuun garuu akkasaan mufatan gochuu akka dandaʼu yaadadhu.

JIʼa Kanatti Akkas Gochuuf Yaali:

Nama tokkoo wajjin tajaajilarratti erga hirmaattee booda, wanta inni dubbate ykn godhe keessaa hiriyaa tajaajilaa gaarii akka inni taʼu kan isa godhe maal akka taʼe itti himi.