Yeroo Manaa Gara Manaa Tajaajiltan Gargaartuu Gaarii Ta’aa
1. Hojii lallabaarratti warra kaanii wajjin tajaajiluun faayidaa maalii qaba?
1 Yesus yeroo tokko bartootasaa 70 akka lallabaniif, ‘lama lama godhee isaan ergee’ ture. (Luq. 10:1) Qophiin kun, bartoonnisaa yeroo lallabanitti akka wal gargaaraniifi akka wal jajjabeessan isaan gargaaree akka ture homaa hin shakkisiisu. Nutoo babal’istoota kaanii wajjin yeroo tajaajillu gargaarsa gochuu kan dandeenyu akkamitti?
2. Namni nuu wajjin tajaajilaa jiru yeroo nama haasofsiisu dhaggeeffachuu kan qabnu akkamitti? Maaliif?
2 Dhaggeeffachuudhaan: Namni isinii wajjin tajaajilaa jiru yeroo namoota haasofsiisu xiyyeeffannaadhaan dhaggeeffadhaa. (Yaq. 1:19) Yeroo caqasni dubbifamu Macaafa Qulqulluu keessan baasaatii hordofaa. Namni dubbachaa jiru, nama isinii wajjin tajaajilaa jirus ta’e nama haasofsiistan sana, nama dubbachaa jiru sana ilaalaa. Maree sana xiyyeeffannaadhaan hordofuun keessan, namni haasofsiistan sunis akka isin dhaggeeffatu isa kakaasuu danda’a.
3. Namni nuu wajjin tajaajilu akka dubbannu kan barbaadu yoom ta’uu danda’a?
3 Yoom Dubbachuu Akka Qabnu Hubachuudhaan: Namni wajjin tajaajillu yeroo namoota haasofsiisu maree sana innumti akka itti fufu heyyamuudhaan akka isa kabajnu argisiisuu dandeenya. (Rom. 12:10) Maree sana gidduu seenuurraa of qusachuu qabna. Namni wajjin tajaajillu sun wanti inni dubbatu yoo isa jalaa bade ykn namni haasofsiisnu mormii ykn gaaffii yoo kaaseefi namni nuu wajjin jiru sun akka isa gargaarru yoo nu gaafate, mataduree kan biraa kaasuu mannaa wanta inni dubbaterratti yaada dabalataa kennuuf yaalii gochuu qabna. (Fak. 16:23; Lal. 3:1, 7) Dubbachuun kan nu barbaachisu taanaan, wanti dubbannu maree godhamaa jiru kan deggerru ta’uu qaba.—1 Qor. 14:8.
4. Tajaajila keenyarratti gammadoofi bu’a qabeeyyii ta’uuf kan nu gargaaru maalidha?
4 Bartoonni cimdii 35 ta’anii ergaman yeroo lallabasaanii xumuran “guddaa gammadaa deebi’anii dhufan.” (Luq. 10:17) Nuyis namoota manaa gara manaa nuu wajjin tajaajilan yeroo gargaarrutti, kan dhaggeeffannuufi yoom dubbachuu akka qabnu kan hubannu taanaan, tajaajila keenyarratti gammadoofi bu’a qabeeyyii ta’uu dandeenya.