Dandeettii Tajaajila Irratti Qabnu Fooyyeffachuu—Dandeettii Barruulee Raabsuu Guddifachuu

Barbaachisaa Kan Taʼe Maaliifi? Namoonni barruulee keenya dubbisuu jaallatan hedduun nuu wajjin Macaafa Qulqulluu qayyabachuuf fedhii hin qaban. Amantii qabanitti kan gammadan ykn qayyabachuuf yeroo akka hin qabne isaanitti dhagaʼama taʼa. Haa taʼu malee, barruulee keenya dubbisuu isaanii yommuu itti fufan, fedhiin isaan Dubbii Waaqayyootiif qaban guddachaa deemuu dandaʼa. (1 Phe. 2:2) Mata dureen taʼe tokko xiyyeeffannaa isaanii harkisuu ykn haalli isaanii jijjiiramuu dandaʼa. Utuu wal irraa hin kutin isaan gaafachuun keenya nuu wajjin haasaʼuun akka isaanitti salphatu gochuu, akkasumas wanta fedhii isaanii harkisus taʼe wanta isaan yaaddessu beekuuf nu gargaaruu dandaʼa. Yeroo booda immoo qayyabannaa Macaafa Qulqulluu jalqabuu dandaʼu.

Kana Gochuu Kan Dandeenyu Akkamitti?

Barruulee Masaraa Eegumsaa fi Dammaqaa! jiʼa jiʼaan baʼan isaaniif geessuuf sagantaa baafadhaa. Barruulee kennitaniif irraa mata duree isaan hawwatu irratti mariʼachuuf ykn barreeffama jiʼa sanatti raabsamu isaaniif kennuuf yeroo kan biraa dhaqxanii isaan gaafachuu dandeessu. Yaada barbaachisaa taʼe hunda yaadannoo keessan irratti qabadhaa.—Tajaajila Mootummaa Amajjii 2014, ful. 3 ilaali.
Deddeebii gaaffii gochuu keessan dura yeroo hunda qophaaʼa. Barruulee qofa isaaf kennitanii deemuu mannaa, fedha nama haasofsiistan sanaa guddisuu akka dandeessaniif isaa wajjin mariʼachuudhaan gidduu keessanitti michummaan akka uumamu godhaa.
Carraa argattanitti fayyadamuudhaan qayyabannaa jalqabsiisuuf yaalaa. Namni barruulee kennitaniif tokko dhimma tokko ilaalchisee wanta Macaafni Qulqulluun jedhu yoo isin gaafate, barreeffama qayyabannaadhaaf gargaaruu fi gaaffii isaatiif deebii kennu isaaf geessuudhaan irratti mariʼadhaa. Deemuu keessan dura, gaaffii kan biraa dhimma irratti mariʼattanii wajjin wal qabate gaafachuudhaan guyyaa kan biraa irratti mariʼadhaa. Utuu wal irraa hin kutin, akkasumas mala taʼetti fayyadamuudhaan Macaafa Qulqulluu ykn barreeffama qayyabannaadhaaf gargaarutti fayyadamtanii nama tokkoo wajjin yeroo gabaabaadhaaf illee yoo mariʼattan qayyabannaa geggeessaa jirtu jechuu dha. Nama haasofsiistan tokkoof birooshura Misiraachoo jedhamu kennuudhaan daqiiqaa muraasaaf isa qayyabsiistanii beektuu? Viidiyoowwan Macaafa Qulqulluu Qayyabachuu Kan Qabnu Maaliifi? akkasumas, Qayyabannaan Macaafa Qulqulluu Akkamitti Geggeeffama? jedhaman itti argisiistanii beektuu? Namni sun kanaan dura qayyabachuuf fedha kan hin qabne taʼus haalli isaa yeroo booda jijjiiramuu dandaʼa. Kanaaf, irra deebitanii isa gaafachuun keessan gaarii taʼuu dandaʼa.

Jiʼa Kanatti Akkas Gochuuf Yaali:

Namoota maamila barruulee keessanii taʼuu dandaʼan barreessaatii qabadhaa. Barruulee jiʼa sanatti raabsamaa jiran isaaniif kennaa, akkasumas maxxansa itti aanus akka isaaniif fiddan itti himaa.