Minjaala Ykn Gaariitti Fayyadamanii Lallabuun Kan Dandaʼamu Akkamitti?

Minjaala ykn gaariitti fayyadamanii lallabuun, namoonni garaa qajeelaa qaban hedduun dhugaa akka fudhatan gochuu irratti buʼaa gaarii argamsiisaa jira. (Yoh. 6:44) Kanaafuu, jaarsoliin gumii naannoo tajaajilaa isaanii keessatti, karaa namoonni baayʼinaan irra deddeebiʼanitti mala kanatti fayyadamanii tajaajiluun akka dandaʼamuuf haala akka mijeessan jajjabeeffamaniiru. Gaariin kun bakkaa bakkatti kan sosochoʼu waan taʼeef, abbootii taayitaa irraa heyyama gaafachuun hin barbaachisu. Mala tajaajilaa kana irratti hirmaachuuf ulaagaa isaa kan guutan eenyu faʼi? Babalʼistoonni murtoo gaarii gochuu, haala kabaja qabuun namatti dhihaachuu fi sirriitti namaa wajjin mariachuu dandaʼan irratti hirmaachuu dandaʼu. Babalʼistoonni gama kanaan milkaaʼina argachuu akka dandaʼaniif, wanti isaan gochuu qabanii fi gochuu hin qabne armaan gaditti caqasameera.

Wanta gochuu qabdan:

Namoonni karaa irra darban isinitti dhihaachuun akka isaanitti salphatu godhaa, isaan simadhaa, akkasumas gargaarsa isaaniif godhaa. Babalʼistoonni tokko tokko fuula ifaa fi miira hoʼaadhaan nagaa gaafatu. Namni tokko utuma darbaa jiruu gara gaariiwwan sanaa yoo ilaale, “yoo barbaadde tokko fudhachuu dandeessa” isaan jechuu dandeessu.
Gaarii ykn minjaala sana irraa xinnoo achi siqaatii dhaabadhaa. Iddoowwan tokko tokkotti babalʼistoonni gaarii ykn minjaala sana irraa tarkaanfii muraasa achi siqanii dhaabachuun buʼa qabeessa taʼee argataniiru. Warri kaan immoo malli kun namoonni dhaabatanii fudhachuu akka sodaatan akka godhu waan isaanitti dhagaʼameef, caalaatti irraa fagaatanii dhaabachuudhaan hamma namni tokko gaarii ykn minjaala sana bira dhufee dhaabatutti eegu. Namni tokko gara gaarii ykn Minjaala sanaa yommuu dhufu, maree isaa wajjin eegaluuf yaalii godhaa. Tarii “waaʼee gaaffii kanaa kanaan dura yaaddee beektaa?” jechuudhaan jalqabuu dandeessu taʼa.
Hamma isinii dandaʼametti yeroo hundumaa Macaafa Qulqulluutti fayyadamaa.
Nama barreeffamoota keenya qayyabannaadhaaf gargaaran, kanneen akka kitaaba Barumsa Macaafa qulqulluu fudhatu hundaaf Macaafa Qulqulluu qayyabachuuf qophiin akka jiru ibsaafii. Viidiyoo, Macaafa Qulqulluu Qayyabachuu Kan Qabnu Maaliifi? jedhamu meeshaa elektrooniksii keessan irraa itti argisiisaa.
Haalli isaa mijataa taanaan teessoo namoota haasofsiistanii fudhachuu hin irraanfatinaa. Namni sun kan jiraatu naannoo tajaajilaa keessan keessa miti taanaan, foormii Hordofaa Gargaaraa (S-43) jedhamu guutuudhaan hatattamaan barreessaa gumii keessaniitti kennaa.

Wanta gochuu hin qabne:

Aaruu, akkas taʼuu qaba jechuu, nama dirqisiisuu ykn gaarii ykn minjaala sana bira akka nama eegumsa irra jiruutti dhaabachuu.
Malli tajaajilaa kun mala barreeffama raabsuuf gargaaru qofa akka taʼetti ilaaluu. Tajaajila yommuu baanu, kaayyoon keenya qayyabannaa Macaafa Qulqulluu jalqabsiisuu waan taʼeef, namoonni nuu wajjin maree akka jalqaban gochuuf yaaluu qabna.
Minjaalli ykn gaariin sun akka hin mulʼanne dura dhaabachuu ykn nama isin faana tajaajila baʼee wajjin maree xiyyeeffannaa keessan guutummaatti fudhatu taasisuu. Dhimma dhuunfaa keessaniif dirqama bilbila bilbiluun yoo isin babraachise, gaarii ykn minjaala sana irraa achi siquun keessan gaarii dha.
Namoota mormii kaasanii wajjin falmii keessa seenuu. Namni mormii kaase tokko miidhaa geessisuu yoo barbaade dhiisanii iddoo gara biraa deemuun barbaachisaa taʼuu dandaʼa.