Йереми

29 Мӕнӕ цы фыстӕг арвыста пехуымпар Йереми Иерусалимӕй, уацары чи уыд, уыдоны ’хсӕн ма хистӕр лӕгтӕй чи баззад, уыдонмӕ, стӕй сауджынтӕм, пехуымпартӕм ӕмӕ, Навуходоносор Иерусалимӕй Вавилонмӕ уацары кӕй акодта, уыцы адӕммӕ се ’ппӕтмӕ дӕр+. 2 Ныффыста йӕ, паддзах Йехони+, паддзахы мад+, паддзахы фӕсдзӕуинтӕ, Иудӕйы ӕмӕ Иерусалимы кънйӕзтӕ+, ӕрмгуыстгӕнджытӕ ӕмӕ, фидӕрттӕ чи арӕзта, уыдон+ Иерусалимӕй куы рацыдысты, уый фӕстӕ. 3 Фыстӕг ахастой Шафаны+ фырт Елеасӕ ӕмӕ Хелкийы фырт Гемари, Иудӕйы паддзах Седеки+ Вавилонмӕ Вавилоны паддзах Навуходоносормӕ кӕй арвыста, уыдон. Фыст дзы уыд:

4 «Афтӕ зӕгъы ӕфсӕдты хицау Йегъовӕ, Израилы Хуыцау, Иерусалимӕй Вавилонмӕ уацары+ кӕй акӕнын кодта, уыцы адӕмӕн: 5 хӕдзӕрттӕ аразут ӕмӕ дзы цӕрут, дыргъдӕттӕ скӕнут ӕмӕ сын сӕ дыргъ хӕрут+. 6 Устытӕ курут, ӕмӕ уын фырттӕ ӕмӕ чызджытӕ гуырӕд+. Уӕ фырттӕн устытӕ хӕссут ӕмӕ уӕ чызджыты чындзы ӕрвитут, цӕмӕй уыдонӕн дӕр фырттӕ ӕмӕ чызджытӕ гуыра. Ӕмӕ уыцы ран фылдӕрӕй-фылдӕр кӕнут, къаддӕр ма кӕнут. 7 Тырнут, цӕмӕй уӕ уацары цы горӕтмӕ акӕнын кодтон, уыцы горӕты уа фарн. Ӕмӕ Йегъовӕмӕ кувут уыцы горӕты тыххӕй, уымӕн ӕмӕ уым фарн куы уа, уӕд сымахмӕ дӕр фарн уыдзӕн+. 8 Афтӕ зӕгъы ӕфсӕдты хицау Йегъовӕ, Израилы Хуыцау: „Уе ’хсӕн цы пехуымпартӕ ӕмӕ дӕсныфӕрсджытӕ ис, уыдонӕн уӕхи сайын ма уадзут+ ӕмӕ уын сӕ фынтӕ куы дзурой, уӕд сӕм ма хъусут+, 9 уымӕн ӕмӕ Йегъовӕ афтӕ зӕгъы: „Мӕнг ныхӕстӕ уын кӕнынц мӕ номӕй. Ӕз сӕ нӕ арвыстон“»+.

10 «Афтӕ зӕгъы Йегъовӕ: „Вавилоны ӕвдай азы куы фӕуат, уӕд уӕм ме ’ргом раздахдзынӕн+ ӕмӕ уын зӕрдӕ цӕмӕй бавӕрдтон, уый сӕххӕст кӕндзынӕн – фӕстӕмӕ уӕ ардӕм ӕркӕндзынӕн“+.

11 „Ӕз ӕй хорз зонын, сымах тыххӕй мӕ зӕрды цы ис, уый+,– зӕгъы Йегъовӕ.– Мӕнӕн мӕ зӕрды ис сымах бӕллӕхы+ хай бакӕнын нӕ, фӕлӕ фарнӕй схайджын кӕнын, цӕмӕй уын уа фидӕн ӕмӕ ныфс+. 12 Дзурдзыстут мӕм, ӕрбацӕудзыстут ӕмӕ мӕм кувдзыстут, ӕмӕ уӕ ӕз фехъусдзынӕн“+.

13 „Агурдзыстут мӕ ӕмӕ мӕ ссардзыстут+, уымӕн ӕмӕ мӕ агурдзыстут ӕппӕт зӕрдӕйӕ+. 14 Ӕмӕ уын мӕхи ссарын бауадздзынӕн“+,– зӕгъы Йегъовӕ. „Уацары уӕ чи ис,– уе ’ппӕты дӕр ӕрӕмбырд кӕндзынӕн. Цы адӕмты ’хсӕн уӕ ныххӕлиу кодтон, уыдоны ’хсӕнӕй уӕ ракӕндзынӕн+, цы бӕстӕтыл уӕ ныппырх кодтон, уырдыгӕй уӕ ӕркӕндзынӕн,– зӕгъы Йегъовӕ.– Фӕстӕмӕ уӕ ӕркӕндзынӕн, уацары уӕ кӕцӕй акӕнын кодтон, уырдӕм“+.

15 Фӕлӕ сымах зӕгъут: „Йегъовӕ нын Вавилоны радта пехуымпартӕ“.

16 Афтӕ зӕгъы Йегъовӕ, Давиды паддзахбадӕныл чи бады, уыцы паддзахӕн+ ӕмӕ ацы горӕты чи цӕры, уыцы адӕмӕн се ’ппӕтӕн дӕр, уе ’фсымӕртӕн, уемӕ уацары кӕй нӕ акодтой, уыдонӕн+: 17 „Афтӕ зӕгъы ӕфсӕдты хицау Йегъовӕ: „Сӕ фӕдыл сын бафтаудзынӕн хъама+, ӕххормагдзинад+ ӕмӕ фыдниз+. Чи сӕвзӕр ӕмӕ хӕрынӕн чи нал бӕззы, ахӕм легъуийы хуызӕн сӕ скӕндзынӕн“+.

18 „Сӕ фӕдыл сын бафтаудзынӕн хъама, ӕххормагдзинад ӕмӕ фыдниз – ахӕм бӕллӕх сыл ӕруадздзынӕн, ӕмӕ, зӕххыл цыдӕриддӕр паддзахӕдтӕ ис, уыдоны тас бацӕудзӕн+. Цы адӕмты ’хсӕн сӕ ныххӕлиу кӕндзынӕн, ӕппӕт уыцы адӕмты ’хсӕн сӕ ӕлгъыстаг ӕмӕ диссагӕн дзуринаг фӕкӕндзынӕн, чи-иу сӕ фена, уый-иу ныхситт кӕндзӕн, фӕхудинаг сӕ кӕндзынӕн+, 19 уымӕн ӕмӕ нӕ хъуыстой, цы-иу сын дзырдтон, уымӕ,– зӕгъы Йегъовӕ.– Мӕ ныхӕстӕ-иу сын арвыстон мӕ лӕггадгӕнджытӕн, мӕ пехуымпартӕн,– раджы-иу сыстадтӕн ӕмӕ-иу сын сӕ арвыстон“+.

„Фӕлӕ сӕм сымах нӕ хъуыстат“+,– зӕгъы Йегъовӕ.

20 Сымах та, уацары чи ис+, Иерусалимӕй Вавилонмӕ кӕй арвыстон+, уыдон, уе ’ппӕт дӕр байхъусут, Йегъовӕ цы зӕгъы, уымӕ. 21 Афтӕ зӕгъы ӕфсӕдты хицау Йегъовӕ, Израилы Хуыцау, Колайы фырт Ахавы тыххӕй ӕмӕ Маасейӕйы фырт Седекийы тыххӕй – мӕ номӕй уын мӕнг ныхӕстӕ чи кӕны, уыдоны+ тыххӕй: „Вавилоны паддзах Навуходоносоры къухмӕ сӕ ратдзынӕн, ӕмӕ сӕ уӕ цӕстыты раз амардзӕн“+. 22 Ӕмӕ уыцы хабары фӕстӕ, Иудӕйы адӕмӕй Вавилоны уацары чи ис, уыдонмӕ фӕзындзӕн ахӕм ӕлгъыст: „Вавилоны паддзах артыл кӕй сфизонӕг кодта+, уыцы Седеки ӕмӕ Ахавы ми дын бакӕнӕд Йегъовӕ!“+ 23 Афтӕ та сын бакӕндзынӕн, Израилы ӕнӕзонд митӕ кӕй кӕнынц+, кӕйдӕр устытимӕ кӕй хӕтынц+ ӕмӕ сын ӕз цы нӕ загътон, уыдӕттӕ кӕй дзурынц, мӕ номӕй мӕнг ныхӕстӕ кӕй кӕнынц, уый тыххӕй+.

„Ӕз уый зонын ӕмӕ уымӕн ӕвдисӕн дӕн“+,– зӕгъы Йегъовӕ“».

24 Нехеламаг Шемайӕйӕн+ та зӕгъ: 25 «Афтӕ зӕгъы ӕфсӕдты хицау Йегъовӕ, Израилы Хуыцау: „Иерусалимы чи ис, уыцы адӕммӕ, стӕй сауджын Софонимӕ+, Маасейӕйы фыртмӕ, ӕмӕ иннӕ сауджынтӕм дӕр дӕхи номӕй фыстӕджытӕ кӕй арвыстай+ ӕмӕ дзы афтӕ кӕй ныффыстай: 26 „Йегъовӕ дӕ сауджын Иодайы бӕсты сауджынӕй сӕвӕрдта, цӕмӕй Йегъовӕйы хӕдзары хистӕр цӕстдарӕг уай+ ӕмӕ-иу цӕмӕй, йӕ сӕрызонд кӕмӕн фӕцӕуа, уыдоны+ ӕмӕ, йӕхи пехуымпарау чи дара, уыдоны ӕрцахсай ӕмӕ-иу сӕ хъӕдын хъадаманты* бакӕнай+. 27 Ӕмӕ уӕд анафофаг+ Йеремийы, уе ’хсӕн йӕхи пехуымпарау чи дары, уый цӕуылнӕ бафхӕрыс?+ 28 Ныр нӕм мӕнӕ Вавилонмӕ фыстӕг ӕрӕрвыста ӕмӕ дзы фыссы: „Уацары нырма бирӕ фӕуыдзыстут. Хӕдзӕрттӕ аразут ӕмӕ дзы цӕрут, дыргъдӕттӕ скӕнут ӕмӕ сын сӕ дыргъ хӕрут...“»+.

29 Ацы фыстӕг сауджын Софони+ бакаст пехуымпар Йеремийӕн.

30 Ӕмӕ уӕд Йегъовӕ Йеремийӕн загъта: 31 «Уацары чи ис, уыцы адӕммӕ+ ахӕм ныхас арвит: „Афтӕ зӕгъы Йегъовӕ нехеламаг Шемайӕйы тыххӕй: „Шемайӕйы ӕз нӕ арвыстон, афтӕмӕй та уын мӕ номӕй дзырдта ӕмӕ архайдта, цӕмӕй мӕнг ныхӕстыл баууӕндыдаиккат+. 32 Гъе уый тыххӕй афтӕ зӕгъы Йегъовӕ: „Ӕз ме ’ргом раздахдзынӕн нехеламаг Шемайӕмӕ+ ӕмӕ йӕ байзӕддӕгтӕм“+.

„Йӕ байзӕддӕгтӕй иу дӕр ацы адӕмы ’хсӕн нӕ цӕрдзӕн+, ӕмӕ, ӕз мӕ адӕмӕн цы хорздзинад сараздзынӕн, уый нӕ фендзӕн+,– зӕгъы Йегъовӕ,– уымӕн ӕмӕ йӕ ныхӕстӕй уый рацыд Йегъовӕйы ныхмӕ“»+.