Удӕнцой ссар ӕмӕ иннӕтӕн дӕр удӕнцой хӕсс

Ахӕм зын уавӕры нын стыр удӕнцойы хос вӕййынц нӕ бинонтӕ, не ’мбӕлттӕ ӕмӕ не ’мчырыстӕттӕ.

Ӕмбалы фӕлмӕн ныхас у ӕвдадзы хосау – адӕймаджы ӕрсабыр кӕны ӕмӕ дзы ног хъарутӕ бауадзы (Ӕмб. 16:24; 18:24; 25:11). Фӕлӕ ӕцӕг чырыстӕттӕ ӕрмӕст ууыл нӕ хъуыды кӕнынц, цӕмӕй сӕхӕдӕг ссарой удӕнцой. Фӕнды сӕ, цӕмӕй сын Хуыцау «цы удӕнцой дӕтты, уымӕй уыдонӕн дӕр сӕ бон уа иннӕтӕн цыфӕнды зындзинады дӕр удӕнцой дӕттын» (2 Кор. 1:4; Лук. 6:31). Зӕгъӕм, Мексикӕйы иу облӕстон цӕстдарӕг, Антонио, уый йӕхиуыл бавзӕрста.

Дохтыртӕ Антониомӕ ссардтой туджы рак (лимфомӕ), ӕмӕ уый тыххӕй йӕ ныфс асаст. Фӕлӕ йын кӕд зын уыд, уӕддӕр архайдта, цӕмӕй йӕхимӕ бынтондӕр ма ныхъхъуыстаид. Куыд? Уый тыххӕй-иу Паддзахады зарджытӕ бахъуыды кӕныныл архайдта ӕмӕ-иу сӕ хъӕрӕй зарыд, цӕмӕй йӕ бон уыдаид сӕ ныхӕстыл хъуыды кӕнын. Стӕй ма йын стыр удӕнцой хаста, хъӕрӕй кӕй куывта ӕмӕ-иу Библи дӕр хъӕрӕй кӕй касти, уый.

Фӕлӕ Антонио куыд зӕгъы, афтӕмӕй йын стыр удӕнцой хастой йе ’мчырыстӕттӕ дӕр. Уый дзуры: «Ӕз ӕмӕ мӕ бинойнаг тынг тыхст куы уыдыстӕм, уӕд нӕ хӕстӕджытӕй иумӕ бадзырдтам, уый лӕггад кӕны ӕмбырды хистӕр нӕлгоймагӕй. Хӕдзармӕ йӕ фӕхуыдтам, цӕмӕй немӕ иумӕ Хуыцаумӕ скуывтаид. Ӕмӕ нын уый стыр удӕнцой ӕрхаста ӕмӕ нӕ зӕрдӕ ӕрсабыр ис. Зӕгъӕн ис, ӕмӕ нӕ хиуӕтты, стӕй не ’фсымӕртӕ ӕмӕ нӕ хоты ӕххуысы фӕрцы цыбыр рӕстӕгмӕ нӕхимӕ ӕрцыдыстӕм». Уыцы ӕфсымӕрӕн тынг ӕхсызгон у, йӕ уарзондзинад хъуыддагӕй чи равдисы ӕмӕ зын сахат йӕ фарсмӕ чи ӕрбалӕууы, ахӕм ӕмбӕлттӕ йын кӕй ис.

Зын рӕстӕджы ма нын стыр ӕххуыс у Хуыцауы сыгъдӕг тых дӕр. Апостол Петр Хуыцауы сыгъдӕг тых схуыдта «лӕвар» (Хъуыд. 2:38). Уыцы тыхӕй н. э. 33 азы Фӕндзайӕм боны сӕрст ӕрцыдысты бирӕ чырыстӕттӕ. Фӕлӕ кӕд Петр сӕрст чырыстӕтты кой кодта, уӕддӕр Хуыцау уыцы «лӕварӕй» мах дӕр хайджын кӕны. Хуыцауы сыгъдӕг тыхӕн кӕрон нӕй. Уӕдӕ хорз уаид, Хуыцаумӕ куы кувиккам, цӕмӕй нын уыцы тых рӕдауӕй дӕтта (Ис. 40:28–31).

ТЫХСТ УАВӔРЫ ЧИ ИС, УЫДОНЫ ФАРСМӔ-ИУ БАЛӔУУ

Апостол Павел бирӕ зындзинӕдтӕ бавзӕрста, суанг ма-иу ын мӕлӕтӕй дӕр уыд тӕссаг (2 Кор. 1:8–10). Фӕлӕ уӕддӕр Павел йӕ цардӕн афтӕ нӕ тарст, ӕмӕ ӕндӕр мацӕуыл хъуыды кодтаид. Уый фидарӕй зыдта, Хуыцау ын кӕй ӕххуыс кӕны, ӕмӕ йын уый хаста стыр удӕнцой. Павел ныффыста: «Табу нӕ Хицау Йесо Чырыстийы Хуыцау ӕмӕ Фыдӕн, тӕригъӕдгӕнаг Фыдӕн ӕмӕ удӕнцойдӕттӕг Хуыцауӕн. Уый нын удӕнцой дӕтты не ’ппӕт зындзинӕдты дӕр» (2 Кор. 1:3, 4). Павел-иу йӕхицӕн тӕригъӕд кӕнынмӕ нӕ фӕци. Фӕлӕ зындзинӕдтӕ ӕвзаргӕйӕ сахуыр иннӕты зын ӕмбарын, ӕмӕ уый фӕрцы йӕ бон ноджы хуыздӕр уыд иннӕтӕн сӕ тыхст уавӕры сӕ ныфсыл ныфс ӕфтауын.

Антонио йӕ низӕй куы сдзӕбӕх, уӕд та ногӕй цӕуӕг цӕстдарӕгӕй лӕггад кӕнын райдыдта. Уый-иу раздӕр дӕр тыхсти йе ’фсымӕртыл, фӕлӕ уыцы хабӕртты фӕстӕ йӕ бинойнагимӕ уӕлдай тынгдӕр райдыдтой архайын, цӕмӕй-иу рынчынты бабӕрӕг кӕной ӕмӕ-иу сӕ ныфс бауадзой. Зӕгъӕм, уӕззау низӕй рынчын чи уыд, иу ахӕм ӕфсымӕры куы бабӕрӕг кодтой, уӕд сын загъта, ӕмбырдтӕм цӕуын ӕй кӕй нал фӕнды. Антонио дзуры: «Афтӕ нӕй зӕгъӕн, ӕмӕ уыцы ӕфсымӕр Йегъовӕйы кӕнӕ хотӕ ӕмӕ ӕфсымӕрты нӕ уарзта. Фӕлӕ йӕ йӕ низ уыйонг ӕркодта, ӕмӕ афтӕ хъуыды кӕнын райдыдта, ницӕмӕнуал бӕззын, зӕгъгӕ».

Антонио цы сарӕзта, цӕмӕй уыцы ӕфсымӕры ныфсыл ныфс бафтыдтаид? Иубон ӕфсымӕртӕ ӕмӕ хотӕ иумӕ куы бадтысты, уӕд ын загъта, цӕмӕй се ’ппӕты номӕй дӕр скува. Кӕд ӕфсымӕр йӕхи уый аккагыл нӕ нымадта, уӕддӕр сразы ис. Антонио афтӕ загъта: «Уыцы ӕфсымӕр тынг рӕсугъд акуывта. Бадты фӕстӕ, цыма ӕндӕр адӕймаг сси, афтӕ тынг фӕивта. Ногӕй та йӕхицӕн аргъ кӕнын райдыдта».

Кӕй зӕгъын ӕй хъӕуы, махӕй алчидӕр бавзӕрста цавӕрдӕр зындзинӕдтӕ, чи – гыццыл зындзинӕдтӕ, чи та – стыр. Фӕлӕ, Павел куыд загъта, афтӕмӕй уый фӕрцы нӕ бон у иннӕтӕн бахъуаджы сахат сӕ ныфсыл ныфс бафтауын. Цӕй уӕдӕ не ’мчырыстӕтты зын ӕмбарӕм ӕмӕ сын удӕнцойы хос уӕм, Йегъовӕ нын куыд у, афтӕ.