СӔЙРАГ ТЕМӔ | БИБЛИ БАМБАРЫН ДӔ БОН У
Цӕмӕн хъӕуы Библи ӕмбарын?
«Библи у, тынг бирӕ адӕм кӕй зонынц, ахӕм дины чиныг. Фӕлӕ йӕ ныффыстой ӕндӕрбӕстӕгтӕ, ӕмӕ китайӕгтӕм ницы бар дары» (ЛИН, КИТАЙ).
«Ӕз дӕн индус, ӕмӕ мӕхи дины чиныг дӕр мӕ бон бамбарын куы нӕу, уӕд Сыгъдӕг Библи куыд хъуамӕ бамбарон?» (АМИТ, ИНДИ).
«Библийӕн аргъ кӕнын, рагон чиныг кӕй у, уый тыххӕй. Стӕй фехъуыстон, ӕмӕ тынг зындгонд чиныг у. Фӕлӕ йӕ мӕхӕдӕг никуы федтон» (ЮМИКО, ЯПОНИ).
Библи нымад чиныг у ӕгас дунейы дӕр. Фӕлӕ дзы цы фыст ис, уый тыххӕй бирӕтӕ гыццыл цыдӕртӕ йеддӕмӕ кӕнӕ та ӕппындӕр ницы зонынц. Уый фидарӕй зӕгъӕн ис Азийы цӕрджытӕй милуантӕй, фӕлӕ ма афтӕ зӕгъӕн ис, Библи парахат кӕм у, уыцы бӕстӕты цӕрджытӕй бирӕтӕй дӕр.
Фӕлӕ дӕм чи зоны сӕвзӕра ахӕм фарста: «Библи ӕмбарын мӕ цӕмӕн хъӕуы?» Ацы чиныг хуыздӕр куы базонай, уӕд...
удӕнцой ссардзынӕ ӕмӕ амондджын уыдзынӕ.
бинонты царды зындзинӕдты сӕрты хизын сахуыр уыдзынӕ.
къаддӕр мӕт кӕндзынӕ.
иннӕтимӕ хуыздӕр цӕрдзынӕ.
де ’хца ӕмбаргӕйӕ хардз кӕндзынӕ.
Зӕгъӕм, иу сылгоймаджы Японийӕ, Ёсикойы, тынг цымыдис кодта, Библийы цы фыст ис, уый ӕмӕ йӕ йӕхӕдӕг кӕсын райдыдта. Цавӕр хатдзӕгмӕ ӕрцыди? Мӕнӕ цы зӕгъы: «Библийы фӕрцы бамбӕрстон, цӕмӕн цӕрын, уый ӕмӕ мын фидӕнӕй ныфс фӕзынд. Мӕ зӕрдӕмӕ рухс кӕлын райдыдта». Уӕлдӕр кӕй кой кодтам, уыцы Амит йӕхӕдӕг Библи иртасын райдыдта. Уый дзуры: «Мӕ дисӕн кӕрон дӕр нал уыди. Уыйбӕрц хорз хъуыдытӕ дзы кӕй ис, уый ӕнхъӕл нӕ уыдтӕн!»
Библи цӕхгӕр фӕивта милуанты цард. Хорз уаид, рӕстӕг куы ссарис, цӕмӕй, Библийы цы фыст ис, уый базонай. Уӕд ӕй дӕхӕдӕг фендзынӕ, дӕуӕн дӕр стыр ӕххуыс куыд фӕуыдзӕн.