Библи цы публикацийы фӕрцы фӕахуыр кӕнӕм, уый ахуыр кӕнынмӕ цӕттӕ чи нӕу, уыдонӕн ӕххуыс кӕнӕм
1. Библи цы публикацийы фӕрцы фӕахуыр кӕнӕм, уый ахуыр кӕнынмӕ алчи цӕттӕ цӕуылнӕ вӕййы? Бамбарын ӕй кӕн.
1 Цӕмӕй адӕймаг Йегъовӕйы лӕггадгӕнӕг суа, уый тыххӕй хъуамӕ зона, Библи цы дзуры, уый. Фӕлӕ иуӕй-иутӕ чырыстон диныл хӕст не сты ӕмӕ Библи Хуыцауы Ныхасыл нӕ нымайынц. Чидӕртӕ та Хуыцауыл не ’ууӕндынц ӕмӕ Библийӕн дӕр нӕ аргъ кӕнынц. Цавӕр кусӕнгарзӕй ис спайда кӕнӕн, цӕмӕй, Библи цы публикацийы фӕрцы фӕахуыр кӕнӕм, уый ахуыр кӕнынмӕ цӕттӕ чи нӕу, уыдонӕн баххуыс кӕнӕм? Дӕлдӕр цы уынаффӕтӕ ис, уыдон арӕзт сты, иу-20 бӕстӕйӕ хъусынгӕнджытӕ цы загътой, ууыл.
2. Адӕймаг нын куы зӕгъа, Хуыцауыл кӕй не ’ууӕнды, уӕд нӕ цы базонын хъӕуы ӕмӕ цӕмӕн?
2 Хуыцауыл чи не ’ууӕнды. Адӕймаг куы зӕгъа, Хуыцауыл кӕй не ’ууӕнды, уӕд хорз уыдзӕн базонын, цӕуылнӕ йыл ӕууӕнды, уый. Мыййаг, эволюцийыл ӕууӕнды? Ӕви Хуыцауыл нал ӕууӕнды, ацы дунейы рӕстдзинад кӕй нӕй кӕнӕ динтӕ цӕстмӕ митӕ кӕй кӕнынц, уый тыххӕй? Ӕви цы бӕстӕйы цард, уым Хуыцауыл не ’ууӕндынц? Чи зоны, Хуыцау кӕй ис, уый ныхмӕ нӕ дзуры, фӕлӕ никуы хъуыды кодта, ӕууӕндын ыл кӕй хъӕуы, ууыл. Цӕмӕй адӕймаг йӕ хъуыды зӕгъа, уый тыххӕй хъусынгӕнджытӕй бирӕтӕ бафӕрсынц: «Алы хатт дӕр афтӕ хъуыды кодтай?». Стӕй йӕм байхъусынц ӕмӕ йын йӕ ныхас ӕрдӕгыл нӕ аскъуынынц. Адӕймаг Хуыцауыл цӕуылнӕ ӕууӕнды, уый куы бамбарӕм, уӕд зондзыстӕм, цы йын зӕгъӕм ӕмӕ йын цавӕр публикаци раттӕм, уый (Ӕмб. 18:13).
3. Адӕймагӕн йӕхицӕн ӕмӕ, цӕуыл ӕууӕнды, уымӕн кӕй аргъ кӕнӕм, уый куыд равдисӕн ис?
3 Дзуапп дӕтгӕйӕ лӕмбынӕг уӕм, цӕмӕй адӕймагмӕ афтӕ ма фӕкӕса, ӕмӕ цы хъуыды кӕны, уый ныхмӕ дзурӕм. Иугонд Штатты филиалӕй ныффыстой: «Адӕм цӕуыл ӕууӕнддзысты, уый сӕхӕдӕг кӕй скъуыддзаг кӕнынц, уымӕн аргъ кӕнын тынг ахсджиаг у. Сӕ ныхмӕ бӕлвырдгӕнӕнтӕ агурыны бӕсты хуыздӕр уыдзӕн, ахӕм фарстатӕ сӕм куы дӕттӕм, цӕмӕй ахъуыды кӕной ӕмӕ цавӕрдӕр хатдзӕгтӕм ӕрцӕуой». Иу облӕстон цӕстдарӕг адӕймагмӕ куы байхъусы, уӕд ӕй дзуапп раттыны размӕ бафӕрсы: «Ууыл никуы ахъуыды кодтай, ӕмӕ..?»
4. Нӕ бон куыд у буддисттӕн ӕххуыс кӕнын?
4 Буддисттӕй бирӕтӕ нӕ зонынц, Хуыцау чи у, уый. Ахӕм адӕмимӕ ныхас кӕнгӕйӕ Великобританийы иуӕй-иу хъусынгӕнджытӕ пайда кӕнынц брошюрӕйӕ «Прочный мир и счастье. Как их найти». Фыццаг абзацтӕ куы равзарынц, уӕд аныхас кӕнынц темӕйыл «Существует ли Всевышний Бог и Создатель?», уый фӕстӕ та темӕ «Полезное руководство для всего человечества». Фӕстӕдӕр сӕ бон вӕййы рахизын, Библийы ахуырӕдтӕ бӕстондӕр ӕвзӕрст кӕм цӕуынц, уыцы публикацимӕ. Уый тыххӕй адӕймагӕн фӕзӕгъынц: «Кӕд Хуыцауыл не ’ууӕндыс, уӕддӕр Библи ахуыр кӕнын пайда у, уымӕн ӕмӕ дзы ис, царды чи ӕххуыс кӕны, бирӕ ахӕм уынаффӕтӕ». Иугонд Штатты, китайӕгтӕн чи хъусын кӕны, иу ахӕм пионер загъта: «Нӕ территорийы адӕм кӕсын уарзынц. Цалынмӕ сӕм дыккаг хатт бацӕуӕм, уӕдмӕ арӕх публикаци ӕнӕхъӕнӕй дӕр бакӕсынц. Фӕлӕ не ’мбарынц, Библи ахуыр кӕнын цӕмӕн хъӕуы, уый. Уымӕ гӕсгӕ фыццаг бацыды рӕстӕг уарзын брошюрӕйӕ „Хорз хабар“ пайда кӕнын, уымӕн ӕмӕ дзы цы фыст ис, уый ныхас кӕнынмӕ разӕнгард кӕны». Иугонд Штатты китайаг ӕмбырдтӕ чи бӕрӕг кӕны, иу ахӕм районон цӕстдарӕг ныффыста, уый гӕнӕн кӕй ис, цӕмӕй фыццаг хатт ныхас кӕнгӕйӕ дӕр спайда кӕнӕм, Библи цы публикацийы фӕрцы фӕахуыр кӕнӕм, уымӕй. Фӕлӕ хуыздӕр уыдзӕн, цӕмӕй, Хуыцауы тыххӕй ныхас кӕм цӕуы, ахуыр уымӕй ма райдайӕм, фӕлӕ ныхас Библийыл кӕм цӕуы, уымӕй.
5. Фӕразон цӕмӕн хъуамӕ уӕм?
5 Цӕмӕй адӕймаг Хуыцауыл баууӕнда, уый тыххӕй рӕстӕг кӕй хъӕуы, уымӕ гӕсгӕ хъуамӕ фӕразон уӕм. Адӕймагимӕ цалдӕр хатты куы аныхас кӕнӕм, уӕддӕр, гӕнӕн ис ма сразы уа, Хуыцау кӕй ис, ууыл. Чи зоны, рӕстӕг куы рацӕуа, уӕд ууыл сразы уа кӕнӕ зӕгъа, кӕй бамбӕрста, адӕм Хуыцауыл цӕмӕн баууӕндынц, уый.
6. Иуӕй-иуты цӕуылнӕ фӕфӕнды, Библийы цы фыст ис, уый зонын?
6 Библийы цы фыст ис, уый зонын кӕй нӕ фӕнды кӕнӕ йыл чи не ’ууӕнды. Фӕлӕ Хуыцау кӕй ис, уый чи зоны, уыцы адӕймаджы Библийы ахуырӕдтӕ базонын гӕнӕн ис ма фӕнда, уымӕн ӕмӕ Библи Хуыцауы Ныхасыл нӕ нымайы. Чи зоны, чырыстон бӕстӕйы нӕ цӕры ӕмӕ уым Библи нымайынц ӕрмӕст чырыстӕтты чиныгыл. Кӕнӕ чырыстон бӕстӕйы цӕры, фӕлӕ йӕ Хуыцау нӕ уырны ӕмӕ нӕ хъуыды кӕны, Библи кӕсын ын пайда кӕй уыдзӕн, ууыл. Куыд баххуыс кӕнӕм ахӕм адӕймагӕн, цӕмӕй Библийӕн аргъ кӕнын райдайа ӕмӕ йӕ ахуыр кӕнын дӕр бафӕнда?
7. Арӕх хорз цы вӕййы, цӕмӕй адӕймаджы бафӕнда, Библийы цы фыст ис, уый базонын?
7 Грецийы филиалӕй ныффыстой: «Библийы цы фыст ис, уый зонын кӕй нӕ фӕнды, цӕмӕй уыдонӕн баххуыс кӕнӕм, уымӕн ӕппӕты хуыздӕр у Библи сын бакӕнын ӕмӕ равдисын, ныхас дзы цӕуыл цӕуы, уый. Хъусынгӕнджытӕй бирӕтӕ бафиппайдтой, Библийы цы хабар фыст ис, уый адӕмы зӕрдӕтӕм тынгдӕр кӕй бахъары, сӕхи ныхӕстӕй сын цы зӕгъиккой, уымӕй (Дзут. 4:12). Бирӕтӕ Хуыцауы ном Библийы куы фенынц, уӕд сӕ бафӕнды Библи хуыздӕр базонын». Индийы филиалӕй та ныффыстой: «Индуисттӕй бирӕты зӕрдӕмӕ фӕцӕуынц цард ӕмӕ мӕлӕты тыххӕй ахуырӕдтӕ. Стӕй ма Библи зӕрдӕ кӕй ӕвӕры, адӕм кастӕтыл кӕм нал дихтӕ кӕндзысты, ахӕм дуне кӕй уыдзӕн, уый дӕр». Хъусынгӕнджытӕ сӕ территорийы зындзинӕдты кой куы скӕнынц, уӕд сын фадат фӕзыны, цӕмӕй Библийы равдисой, Хуыцауы Паддзахад сын кӕрон кӕй скӕндзӕн, уый.
8. Чырыстон динты тыххӕй Библимӕ ӕвзӕр цӕстӕй чи кӕсы, уыдонӕн цы зӕгъӕн ис?
8 Чырыстон динты тыххӕй адӕймаг Библимӕ ӕвзӕр цӕстӕй куы кӕса, уӕд ын бамбарын кӕнӕн ис, уыдон Библи ӕмӕ йӕ ахуырӕдтӕ кӕй зыгъуыммӕ кӕнынц. Индийы филиалӕй ныффыстой: «Иуӕй-иу хатт адӕмӕн бамбарын кӕнын фӕхъӕуы, Хуыцау Библи аргъуанты бӕрны кӕй нӕ бакодта». Ӕфсымӕртӕ ма ныффыстой, индуистты зӕрдӕ ма кӕй бацагайы нӕ брошюрӕтӕй иу. Уым дзырд цӕуы, аргъуантӕ кӕй архайдтой Хуыцауы Ныхасы цыдӕртӕ фӕивын ӕмӕ йӕ фесафын. Бразилийы та иу пионер фӕзӕгъы: «Хорз нӕ уаид, Библийы цы фыст ис, уый хуыздӕр базонын? Бирӕтӕ йӕ ӕнӕуи ахуыр кӕнын райдайынц, ӕмӕ нӕ фӕтӕрсынц, цавӕрдӕр динмӕ цӕуын сӕ кӕй хъӕудзӕн, уымӕй. Цы базондзынӕ, уый дӕм диссаг дӕр фӕкӕсдзӕн».
9. Библийы цы фыст ис, уый искӕй базонын куы нӕ фӕнда, уӕддӕр дӕ ныфс цӕуылнӕ хъуамӕ асӕтта?
9 Йегъовӕ уыны алы адӕймаджы зӕрдӕ дӕр (1 Сам. 16:7; Ӕмб. 21:2). Ӕмӕ йӕхимӕ ӕрбакӕны, йӕ зӕрдӕ рӕстдзинады ’рдӕм здӕхт кӕмӕн у, уыдоны (Иоан. 6:44). Ахӕм адӕймӕгтӕй бирӕты Хуыцауы тыххӕй никуы ахуыр кодтой кӕнӕ Библийӕ гыццыл цыдӕртӕ йеддӕмӕ ницы зыдтой. Кӕй хъусын кӕнӕм, уый фӕрцы сын фадат ис, цӕмӕй, «рӕстдзинад цы у, уый бӕлвырдӕй базоной ӕмӕ фервӕзой» (1 Тим. 2:4). Уымӕ гӕсгӕ, Библийы цы фыст ис, уый базонын искӕй куы нӕ фӕнда, уӕддӕр дӕ ныфс ма асӕттӕд! Цӕмӕй йӕ фылдӕр базонын бафӕнда, уый тыххӕй пайда кӕн ӕндӕр публикацитӕй дӕр. Чи зоны, фӕстӕдӕр дӕ бон суа, Библи цы публикацийы фӕрцы фӕахуыр кӕнӕм, уымӕй адӕймагимӕ ахуыр кӕнын райдайын.
[Рамкӕ 4 фарсыл]
Адӕймаг афтӕ куы зӕгъа: «Ӕз Хуыцауыл не ’ууӕндын», уӕд дӕ бон у:
• Цӕуылнӕ йӕ уырны, уый базоныны тыххӕй йӕ бафӕрс: «Алы хатт дӕр афтӕ хъуыды кодтай?».
• Кӕд буддист у, уӕд спайда кӕн брошюрӕйӕ «Прочный мир и счастье. Как их найти», 9–12 фӕрстӕ.
• Кӕд эволюцийыл ӕууӕнды, уӕд спайда кӕнӕн ис:
Парахат кӕй кӕнӕм, уыцы брошюрӕты рубрикӕйӕ «Случайность или замысел?».
Видеофильмӕй «Чудеса творения прославляют Бога».
Брошюрӕтӕй «Как найти удовлетворение в жизни», 4 хай, «Была ли жизнь создана?», «У истоков жизни. Пять вопросов, которые требуют ответа».
• Кӕд Хуыцауыл ӕнӕрӕстдзинад ӕмӕ хъизӕмӕртты тыххӕй нал ӕууӕнды, уӕд спайда кӕнӕн ис:
Чиныгӕй «Существует ли заботливый Творец?», 10 сӕр.
Брошюрӕйӕ «Цымӕ ныл Хуыцау ӕцӕг ӕнувыд у?», 6 сӕр.
• Хуыцау кӕй ис, адӕймаг ууыл куы баууӕнда, уӕд дӕ бон у, Библи цы публикацийы фӕрцы фӕахуыр кӕнӕм, уымӕ рахизын. Чи зоны, хуыздӕр уыдзӕн, адӕймаджы чи цымыдис кӕны, уыцы темӕйӕ райдайын, фыццаг фарсӕй нӕ, фӕлӕ.
[Рамкӕ 5 фарсыл]
Адӕймаг афтӕ куы зӕгъа: «Ӕз Библийыл не ’ууӕндын», уӕд дӕ бон у:
• Аныхас кӕн чиныг «Творец»-ы 7 ӕмӕ 8 сӕртыл.
• Дзуттӕгтимӕ ныхас кӕнгӕйӕ спайда кӕн брошюрӕйӕ «Что может наполнить нашу жизнь счастьем?», 4 ӕмӕ 5 уроктӕ.
• Аныхас кӕн, Библийы уагӕвӕрдтӕ цы пайда сты, ууыл. Библи царды пайда кӕй у, уый тыххӕй дзырд цӕуы ацы публикациты:
Парахат кӕй кӕнӕм, уыцы брошюрӕйы рубрикӕйы «Помощь семье».
Видеофильмы «Библия – сила, изменяющая нашу жизнь».
Брошюрӕты «Хорз хабар Хуыцауӕй», 9 ӕмӕ 11 сӕргӕндтӕ ӕмӕ «Как найти удовлетворение в жизни», 2 хай.
Буддисттимӕ ныхас кӕнгӕйӕ пайда кӕн брошюрӕйӕ «Путь к миру и счастью», 3–7 фӕрстӕ.
Пысылмӕттимӕ ныхас кӕнгӕйӕ пайда кӕн брошюрӕйӕ «Настоящая вера – ключ к счастью», 3 хай.
Библийыл кӕм не ’ууӕндынц, уым хъусын кӕнгӕйӕ хорз уаид, цалдӕр хатты куы аныхас кӕнай, ӕрмӕст уӕд зӕгъын, уыцы зондджын хъуыдытӕ цы чиныгӕй сты, уый.
• Бамбарын кӕн, Библийы пехуымпарӕдтӕ куыд сӕххӕст сты, уый. Спайда кӕнӕн ис ахӕм публикацитӕй:
Видеофильмӕй «Библия: точность истории, достоверность пророчеств».
Чиныгӕй «Творец», 7 сӕр.
• Адӕймаджы Библийы ахуырӕдты тыххӕй фылдӕр базонын куы бафӕнда, уӕд рахизӕн ис, бӕстондӕр сӕ кӕм ӕмбарын кӕнынц, уыцы публикацимӕ.
[Рамкӕ 6 фарсыл]
Адӕймаг афтӕ куы зӕгъа: «Ӕз Хуыцауыл не ’ууӕндын», уӕд ын зӕгъӕн ис:
• «Кӕд гӕнӕн ис, уӕд дын цыбыртӕй радзурдзынӕн, ӕз Сфӕлдисӕгыл цӕй фӕрцы баууӕндыдтӕн, уый тыххӕй». Стӕй йын радзур, чиныджы «Рассуждение», 357–362 фӕрстыл цы хъуыдытӕ ис, уыдон кӕнӕ йын зӕгъ, иннӕ хатт ын кӕй ӕрбахӕсдзынӕ, дӕ зӕрдӕ дын чи бацагайдта, уыцы публикаци.
• «Кӕд Хуыцау ис, уӕд, дӕумӕ гӕсгӕ, цыхуызӕн хъуамӕ уа?» Бирӕтӕ фӕзӕгъынц, сӕ зӕрдӕмӕ кӕй фӕцӕуид уарзӕгой, рӕстдзинад кӕмӕ ис, фӕлмӕнзӕрдӕ чи у ӕмӕ хъулон митӕ чи нӕ кӕны, ахӕм Хуыцау. Стӕй йын Библийы равдис, Хуыцаумӕ уыцы миниуджытӕ кӕй сты.
Адӕймаг афтӕ куы зӕгъа: «Ӕз Библийыл не ’ууӕндын», уӕд ын зӕгъӕн ис:
• «Бирӕтӕ фӕзӕгъынц афтӕ. Иуӕй-иуты хъуыдымӕ гӕсгӕ Библи наукӕмӕ гӕсгӕ раст нӕу кӕнӕ зӕронд чиныг у. Искуы Библи кастӕ? [Бауадз ӕй йӕ хъуыды зӕгъын. Стӕй йын равдис брошюрӕйы „Хорз хабар“ 3 сӕргонд ӕмӕ йын ӕй ратт.] Бирӕтӕ Библийыл не ’ууӕндынц, уымӕн ӕмӕ йын динтӕ йӕ ахуырӕдтӕ сзыгъуыммӕ кодтой. Нӕ бон у иннӕ хатт аныхас кӕнын, 4 ӕмӕ 5 фӕрстыл цы цӕвиттонтӕ ис, уыдонӕй искӕцыйыл».
• «Бирӕтӕ ма фӕзӕгъынц афтӕ. Фӕнды мӕ, Библийӕ дын равдисон, мӕ зӕрдӕмӕ тынг цы ныхӕстӕ фӕцыдысты, уыдон. [Бакӕс, Библи наукӕмӕ гӕсгӕ раст кӕй у, уый цы стихтӕ бӕлвырд кӕнынц, уыдон, Иов 26:7 кӕнӕ Исай 40:22.] Библийы ма ис хорз уынаффӕтӕ бинонтӕн дӕр. Иннӕ хатт дын дзы искӕцы бакӕсдзынӕн».
• «Бузныг, дӕ хъуыды мын кӕй загътай. Фӕлӕ Хуыцау адӕмӕн чиныг куы ныффыстаид, уӕд дӕ дзы цы фӕндыдаид бакӕсын?» Йӕ дзуапмӕ гӕсгӕ йын Библийӕ стихтӕ бакӕс.