Куыд пайда кӕнӕм брошюрӕйӕ «Хорз хабар Хуыцауӕй»
Ног брошюрӕ, цӕмӕй адӕммӕ ногӕй цӕуӕм ӕмӕ-иу семӕ Библи ахуыр кӕнын райдайӕм
1. Облӕстон конгрессы «Хъахъхъӕн дӕ зӕрдӕ!» цавӕр ног брошюрӕ райстам?
1 Тынг ӕхсызгон нын уыди, облӕстон конгрессы «Хъахъхъӕн дӕ зӕрдӕ!» ног брошюрӕ «Хорз хабар Хуыцауӕй» куы райстам, уӕд. Уый нын баххуыс кӕндзӕн, цӕмӕй адӕммӕ ногӕй цӕуӕм ӕмӕ-иу семӕ Библи ахуыр кӕнын райдайӕм. Ацы брошюрӕйы ис цыбыр сӕргӕндтӕ, ӕмӕ уый фӕрцы нӕ бон уыдзӕн адӕймагимӕ къӕсӕргӕрон Библи ахуыр кӕнын. Цӕмӕй ног ахуыргӕнинӕгтӕн ӕнцондӕр уа, уый тыххӕй дзы фылдӕр ӕргом здӕхт цӕуы, Библийы цы хорз хабар ис, уымӕ, чырыстӕттӕ цавӕр хъуамӕ уой, уымӕ нӕ, фӕлӕ (Хъуыд. 15:35).
2. Брошюрӕ «Хорз хабар Хуыцауӕй» цӕмӕн рауагътой?
2 Цӕмӕн ӕй рауагътой? Ӕгас зӕххыл дӕр ӕфсымӕртӕ фыстой, зӕгъгӕ, хорз уаид, адӕмы рӕстдзинад базонынмӕ чи сразӕнгард кӕнид, ахӕм хуымӕтӕг публикаци нӕм куы уаид, цӕмӕй уый фӕстӕ семӕ ӕндӕр исты ахуыр кӕнӕн уа. Чингуытӕ кӕсын чи нӕ уарзы, уыдонӕй бирӕтӕ ӕхсызгонӕй сразы уыдзысты Библи брошюрӕйы фӕрцы ахуыр кӕныныл. Стӕй ма брошюрӕ ӕнцондӕр ратӕлмац кӕнӕн у фылдӕр ӕвзӕгтӕм.
3. Ацы брошюрӕ иннӕ публикацитӕй цӕмӕй хицӕн кӕны?
3 Куыд конд у. Нӕ публикацитӕй бирӕтӕ афтӕ фыст сты, ӕмӕ сӕ адӕймаг куы фӕкӕсы, уӕд рӕстдзинад йӕхӕдӕг ӕнцонтӕй бамбары. Фӕлӕ ацы брошюрӕ афтӕ конд у, цӕмӕй йӕ адӕймагӕн чидӕр ӕмбарын кӕна. Уымӕ гӕсгӕ хорз уаид, искӕмӕн ӕй куы дӕттӕм, уӕд-иу йемӕ иу-дыууӕ абзацыл иумӕ куы аныхас кӕниккам. Абзацтӕ цыбыр кӕй сты, уымӕ гӕсгӕ сӕ равзарӕн ис къӕсӕргӕрон кӕнӕ адӕймаг кӕм кусы, уым. Хорз уаид ахуыр 1 сӕргондӕй райдайын, фӕлӕ нӕ бон у ахуыр кӕнын райдайын кӕцыфӕнды сӕргондӕй дӕр.
4. Ацы брошюрӕ нын куыд ӕххуыс кӕны, цӕмӕй адӕймагимӕ Библи ахуыр кӕнӕм?
4 Нӕ публикацитӕй сӕ фылдӕры фарстатӕн дзуаппытӕ вӕййы абзацты. Фӕлӕ ацы брошюрӕйы фарстатӕн сӕ дзуапп ссарӕн ис Библийы. Бирӕты фӕфӕнды Библи ахуыр кӕнын, фӕлӕ сӕ нӕ литературӕйӕ пайда кӕнын нӕ фӕфӕнды. Уымӕ гӕсгӕ ацы брошюрӕйы Библийы стихтӕ ӕрмӕстдӕр амынд сты ӕмӕ сӕ хъӕуы Библийӕ кӕсын. Уый фӕрцы ахуыргӕнинӕгтӕ ӕмбардзысты, цы ахуыр кӕнынц, уый Хуыцауӕй кӕй у (Ис. 54:13).
5. Алы ахуырмӕ дӕр нӕхи хорз цӕмӕн хъуамӕ цӕттӕ кӕнӕм?
5 Брошюрӕ стихтӕ се ’ппӕт не ’мбарын кӕны. Цӕуылнӕ? Афтӕ конд у, цӕмӕй-иу адӕймаг фарстатӕ дӕтта ӕмӕ-иу ын сӕ хъусынгӕнӕг ӕмбарын кӕна. Уымӕ гӕсгӕ алы ахуырмӕ дӕр хъӕудзӕн хорз цӕттӕ кӕнын. Рох кӕнын нӕ хъӕуы: ӕгӕр бирӕ-иу ма дзурӕм. Мах Фыстадыл зӕрдиагӕй фӕдзурӕм. Фӕлӕ нӕ къухы фылдӕр бафтдзӕн, адӕймаджы-иу куы разӕнгард кӕнӕм, цӕмӕй, стих йӕхӕдӕг куыд ӕмбары, уый-иу нын радзура. Фарстатӕ дӕтгӕйӕ уӕздан куы уӕм, уӕд ӕй сахуыр кӕндзыстӕм алы стихыл дӕр лӕмбынӕг хъуыды кӕнын (Хъуыд. 17:2).
6. Нӕ бон куыд у брошюрӕйӕ пайда кӕнын а) адӕм Хуыцауыл ӕмӕ Библийыл кӕм не ’ууӕндынц, ахӕм ран хъусын кӕнгӕйӕ? ӕ) хӕдзарӕй-хӕдзармӕ хъусын кӕнгӕйӕ? б) адӕмӕн Библи ахуыр кӕныны тыххӕй комкоммӕ дзургӕйӕ? в) адӕймагмӕ-иу ногӕй куы цӕуӕм, уӕд?
6 Иннӕ публикацитау, ацы брошюрӕ дӕр адӕймагӕн дӕттӕн ис, уыцы мӕй ӕндӕр литературӕ куы парахат кӕнӕм, уӕд дӕр. Брошюрӕйы фӕрцы бирӕтӕн ӕнцон уыдзӕн адӕмӕн Библи ахуыр кӕныны тыххӕй комкоммӕ дзурын, цӕмӕй къӕсӕргӕрон ахуыр кӕнын райдайой. Облӕстон конгрессы куыд фехъуыстам, афтӕмӕй нын «ацы брошюрӕ тынг баххуыс кӕндзӕн, цӕмӕй нӕ зӕрдӕмӕ цӕуа адӕммӕ ногӕй цӕуын!» (Кӕс рамкӕтӕ 5–7 фӕрстыл.)
7. Ног брошюрӕйы фӕрцы нӕ бон куыд у искӕимӕ Библи ахуыр кӕнын?
7 Библийы ахуыр куыд уадзӕм. Райдианы уал бакӕсӕн ис, абзацы размӕ ставдӕй фыст фарстатӕй иу. Стӕй-иу бакӕс уыцы абзац ӕмӕ, зулфыст чи у, уыцы стих кӕнӕ стихтӕ. Адӕймагмӕ-иу ратт, стих бамбарынӕн ын чи баххуыс кӕндзӕн, ахӕм фарстатӕ, ӕрмӕст-иу сӕ дӕтт уӕзданӕй. Уый фӕстӕ, цалынмӕ ног фарстамӕ нӕ рахизат, уӕдмӕ-иу адӕймагмӕ ратт, райдианы кӕй бакастыстут, уыцы фарста, цӕмӕй сбӕлвырд кӕнай, кӕй йӕ бамбӕрста. Фыццаг рӕстӕг, чи зоны, хуыздӕр уыдзӕн, иу фарста йеддӕмӕ-иу куы нӕ равзариккат. Фӕстӕдӕр уӕ бон уыдзӕн фылдӕр равзарын, суанг ма ӕнӕхъӕн сӕргонд дӕр.
8. Стих бакӕсыны размӕ-иу цы хъуамӕ зӕгъӕм ӕмӕ цӕмӕн?
8 «Бакӕс» фыст кӕм ис, уыцы стихтӕ дзуапп фӕдӕттынц, ставдӕй фыст чи у, уыцы фарстайӕн. Стих бакӕсыны размӕ афтӕ нӕ дзурдзыстӕм: «Апостол Павел ныффыста» кӕнӕ «Ӕркӕс-ма, Йеремийы пехуымпарадмӕ», уымӕн ӕмӕ уӕд адӕймагмӕ афтӕ кӕсдзӕн, ӕмӕ йын кӕйдӕр ныхӕстӕ кӕсӕм. Хуыздӕр уыдзӕн зӕгъын: «Хуыцауы Ныхас дзуры» кӕнӕ «Ӕркӕс-ма, Библийы уый фӕдыл цы пехуымпарад ис, уымӕ».
9. Ахуыры рӕстӕг, амынд стихтӕ се ’ппӕт дӕр хъӕудзӕн кӕсын?
9 Амынд стихтӕ-иу иууылдӕр хъуамӕ бакӕсӕм ӕви «бакӕс» фыст кӕм ис, ӕрмӕст уыдон? Уый у уавӕртӕй кӕнгӕ. Иу стих дӕр дзы ӕнӕуи фыст нӕу. Алкӕцыйы дӕр дзы ис ахсджиаг хъуыды. Фӕлӕ хатт ахуыргӕнинагӕн бирӕ рӕстӕг нӕ вӕййы кӕнӕ йӕм ныхас кӕнын нӕ фӕцӕуы йе та, чи зоны, хорз кӕсын нӕ зоны. Уымӕ гӕсгӕ нӕ бон уыдзӕн, «бакӕс» фыст кӕм ис, ӕрмӕстдӕр уыцы стихтӕ кӕсын.
10. Кӕд ис адӕймагимӕ ӕндӕр публикаци ахуыр кӕнӕн?
10 Ӕндӕр публикаци ахуыр кӕнӕн кӕд ис. Адӕймагимӕ цалдӕр хатты Библийы ахуыр куы ауадзӕм ӕмӕ куы бамбарӕм, уыцы хъуыддагӕн кӕй аргъ кӕны, уӕд нӕ бон у ӕндӕр публикаци ахуыр кӕнын райдайын кӕнӕ та дарддӕр ацы брошюрӕ ахуыр кӕнын. Хъусынгӕнджытӕ хъуамӕ ууыл лӕмбынӕг ахъуыды кӕной. Ӕндӕр публикаци ахуыр кӕнын куы райдайӕм, уӕд ӕнӕмӕнг хъуамӕ фыццаг сӕрӕй райдайӕм? Уый кӕнгӕ у, кӕимӕ ахуыр кӕнӕм, уымӕй. Фӕлӕ нӕ ахуыргӕнинӕгтӕй бирӕтӕн стыр пайда уыдзӕн, цы фарстатыл аныхас кодтам, уыдон ногӕй бӕлвырддӕр куы равзарӕм.
11. Ацы ног брошюрӕйӕ цӕмӕн хъуамӕ пайда кӕнӕм?
11 Ацы дунейы адӕймаг хорз хабар стӕм хатт фехъусы. Фӕлӕ мах хъусын кӕнӕм ӕппӕты хуыздӕр хабар – Хуыцауы Паддзахад бартӕ йӕ къухмӕ кӕй райста ӕмӕ тагъд кӕй скӕндзӕн, рӕстгӕнджытӕ кӕм цӕрдзысты, ахӕм ног дуне! (Матф. 24:14; 2 Пет. 3:13). Уыцы хъуыддаг нӕхицӕн стыр кадыл нымайӕм. Ныфс нӕ ис, ацы хабар чи фехъусы, уыдонӕй бирӕтӕ кӕй сразы уыдзысты Библийы ныхӕстимӕ: «Куыд рӕсугъд сты хӕхтыл, хорз хабар чи хӕссы ӕмӕ фарны хабар чи хъусын кӕны, хуыздӕр цыдӕр кӕй уыдзӕн, уый тыххӕй хорз хабар чи хӕссы, уый къӕхтӕ, ирвӕзындзинады тыххӕй чи хъусын кӕны ӕмӕ Сионӕн чи дзуры: „Дӕ Хуыцау сси паддзах!“» (Ис. 52:7). Уӕдӕ ацы ног брошюрӕйы руаджы Хуыцауы хорз хабар хӕссӕм, нӕ территорийы рӕстдзинад базонынмӕ чи бӕллы, уыдонмӕ!
[Рамкӕ 5 фарсыл]
Хуыцауыл ӕмӕ Библийыл кӕм не ’ууӕндынц, уым
● Хъусынгӕнджытӕ бафиппайдтой, иуӕй-иу рӕтты адӕм «Хуыцау» кӕнӕ «Библи» куы фехъусынц, уӕд сӕ дарддӕр ныхас кӕнын кӕй нал фӕфӕнды. Ахӕм рӕтты хуыздӕр уаид, нӕ ныхас-иу куы райдаиккам, адӕм цӕуыл тыхсынц, уымӕй, зӕгъӕм, хорз хицауад нӕ кӕй хъӕуы, бинонтӕн цы баххуыс кӕндзӕн, цӕмӕй амондджын уой кӕнӕ нӕм фидӕны цы ’нхъӕлмӕ кӕсы. Брошюрӕйӕ «Хорз хабар Хуыцауӕй» спайда кӕнӕн уыдзӕн, адӕймагимӕ цалдӕр хатты куы аныхас кӕнӕм, уӕд, цӕмӕй йын бамбарын кӕнӕм, Хуыцауыл ӕмӕ Библийыл ӕууӕндӕн цӕмӕн ис, уый.
[Рамкӕ 6 фарсыл]
Хӕдзарӕй-хӕдзармӕ хъусын кӕнгӕйӕ
● «Ӕз дӕм ӕрбацыдтӕн, цӕмӕй дын равдисон, Хуыцау адӕмӕн цы фидӕн ӕрцӕттӕ кодта, уый. Чи зоны, ды дӕр хъуыды кодтай, искуы нӕ Хуыцау нӕ хъизӕмӕрттӕй фервӕзын кӕндзӕн, зӕгъгӕ? [Бауадз ӕй йӕ хъуыды зӕгъын.] Ацы брошюрӕйӕ базондзынӕ, Библийы ацы фарстайӕн дзуапп кӕм фыст ис, уый. [Брошюрӕ йӕм ратт ӕмӕ йын бакӕс 1 сӕргонды 1 абзац ӕмӕ Йереми 29:11.] Ацы стихмӕ гӕсгӕ нын Хуыцау хуыздӕр фидӕн не ’рцӕттӕ кодта? [Бауадз ӕй йӕ хъуыды зӕгъын.] Дӕ бон у ацы брошюрӕ дӕхицӕн ныууадзын. Иннӕ хатт куы ӕрбацӕуон, уӕд аныхас кӕндзыстӕм 2 абзацыл ӕмӕ Библийы ссардзыстӕм дзуапп ахӕм фарстайӕн: „Хуыцау адӕмы сӕ хъизӕмӕрттӕй куыд фервӕзын кӕндзӕн?“» Кӕд адӕймаджы ’вдӕла, уӕд дӕ бон уыдзӕн 2 абзац дӕр ӕмӕ дзы Библийӕ цы ӕртӕ стихы ис, уыдон бакӕсын ӕмӕ сыл аныхас кӕнын. Зӕгъ ын, иннӕ хатт ӕм кӕй ӕрбацӕудзынӕ, цӕмӕй ацы сӕргондӕй дыккаг фарстайыл аныхас кӕнат.
● «Бирӕтӕ Хуыцаумӕ арӕхдӕр фӕкувынц зындзинӕдты рӕстӕг. Ды дӕр фӕкувыс? [Бауадз ӕй йӕ хъуыды зӕгъын.] Куыд дӕм кӕсы, Хуыцау алы куывд дӕр хъусы ӕви нӕ? [Бауадз ӕй йӕ хъуыды зӕгъын.] Ацы брошюрӕйы фӕрцы базондзынӕ, ацы фарстатӕн Библийы дзуапп кӕм фыст ис, уый. [Брошюрӕ йӕм ратт ӕмӕ иумӕ аныхас кӕнут 12 сӕргонды 1 абзацыл ӕмӕ «бакӕс» фыст кӕм ис, уыцы стихтыл.] Диссаг нӕу, Хуыцау нын нӕ куывдтытӕ кӕй хъусы, уый? Фӕлӕ цӕмӕй нӕ куывдтытӕ Хуыцауы зӕрдӕмӕ цӕуой, уый тыххӕй йӕ хуыздӕр базонын хъӕуы. [Бакӕн 2 сӕргонд ӕмӕ йын дӕлсӕргӕндтӕ равдис.] Кӕд дӕ фӕнды, уӕд дын ацы брошюрӕ ныууадздзынӕн ӕмӕ иннӕ хатт базондзыстӕм, Библи ацы фарстаты тыххӕй цы дзуры, уый».
● «Абон адӕм тыхсынц, ацы дуне цы бауыдзӕн, ууыл. Куыд дӕм кӕсы, искуы уавӕртӕ фӕхуыздӕр уыдзысты? [Бауадз ӕй йӕ хъуыды зӕгъын.] Бирӕтӕ тынг бадис кӕнынц, куы базонынц, Библийы кӕй ис, ныфс нын чи дӕтты, ахӕм хабар. Иуӕй-иу фарстатӕн ам ис Библийӕ дзуапп». Адӕймагмӕ брошюрӕ ратт ӕмӕ йын зӕгъ, цӕмӕй равзара, фӕстаг фарсыл цы фарстатӕ ис, уыдонӕй йӕ дзуапп базонын тынгдӕр кӕцыйӕн фӕнды, уый. Уый фӕстӕ сӕргонд бакӕн ӕмӕ ахуыр куыд фӕцӕуы, уый йын равдис. Зӕгъ, иннӕ хатт ӕм кӕй ӕрбацӕудзынӕ, цӕмӕй уыцы сӕргондӕй ӕндӕр фарстайыл аныхас кӕнат.
[Рамкӕ 7 фарсыл]
Библи ахуыр кӕныны тыххӕй-иу комкоммӕ зӕгъ
● «Мах адӕмӕн дзурӕм Библи ахуыр кӕныны тыххӕй. Ацы брошюрӕйы цы 15 сӕргонды ис, уыдоны фӕрцы дӕ бон у ахсджиаг фарстатӕн дӕ Библийы дзуапп ссарын. [Равдис ын брошюрӕйы фыццаг ӕмӕ фӕстаг фӕрстӕ.] Бирӕтӕн зын вӕййы, Библийы цы фыст ис, уый бамбарын. Дӕуӕн та? [Бауадз ӕй йӕ хъуыды зӕгъын.] Ацы брошюрӕйы фӕрцы ис Библи хуыздӕр бамбарӕн. [3 сӕргонды 3 фарстайы фыццаг абзацыл аныхас кӕн ӕмӕ бакӕс Раргомад 21:4, 5. Кӕд гӕнӕн уа, уӕд аныхас кӕн иннӕ абзацыл ӕмӕ «бакӕс» фыст кӕм ис, уыцы стихтыл дӕр.] Кӕд дӕ фӕнды, уӕд брошюрӕ дӕхицӕн уадз. Дӕ бон у ацы брошюрӕйы ӕххуысӕй Библи ахуыр кӕнын бафӕлварын ӕмӕ кӕд дӕ зӕрдӕмӕ фӕцӕуа, уӕд дӕ бон у дарддӕр дӕр ахуыр кӕнын. Иннӕ хатт дӕм ӕрбацӕудзынӕн ӕмӕ 1 сӕргондыл аныхас кӕндзыстӕм. Куыд уыныс, афтӕмӕй иу сыф йеддӕмӕ нӕу».
[Рамкӕ 7 фарсыл]
Адӕймагмӕ дыккаг хатт куы бацӕуай
● «Ӕхсызгон мын у, кӕй та фембӕлдыстӕм. Ацы брошюрӕйы фӕрцы Библийӕ дзуапп базонӕн ис бирӕ ахсджиаг фарстатӕн. [Брошюрӕ йӕм ратт ӕмӕ йын зӕгъ, цӕмӕй фӕстаг фарсмӕ ӕркӕса.] Кӕцы фарстайӕн дӕ фӕнды дзуапп базонын? [Бауадз ӕй йӕ хъуыды зӕгъын. Стӕй бакӕн, кӕй равзӕрста, уыцы сӕргонд.] Ӕркӕс-ма, ацы брошюрӕйы ӕххуысӕй куыд ис Библийы дзуапп ссарӕн». Аныхас кӕнут иу-дыууӕ абзацыл ӕмӕ «бакӕс» фыст кӕм ис, уыцы стихтыл. Куыд уынӕм, афтӕмӕй адӕймагимӕ Библи ахуыр кӕнын райдайын зын нӕу! Адӕймагӕн брошюрӕ ныууадз ӕмӕ иннӕ хатмӕ баныхас кӕн. Сӕргонд ӕнӕхъӕнӕй куы фӕуат, уӕд дӕ бон у, адӕймаг кӕй равзара, уыцы сӕргондыл аныхас кӕнын кӕнӕ брошюрӕ райдианӕй ахуыр кӕнын райдайын.