Зӕдтӕ дӕ цардмӕ исты бар дарынц?

Кеннет ӕмӕ Филоменӕ цӕрынц Кюрасаойы. Иу хуыцаубон фӕссихор ацыдысты, Библи кӕимӕ ахуыр кодтой, уыцы лӕг ӕмӕ усы бабӕрӕг кӕнынмӕ.

Кеннет загъта: «Куы бацыдыстӕм, уӕд сӕ дуар уыди ӕхгӕд ӕмӕ сӕ машинӕ дӕр уым нӕ уыди. Фӕлӕ мӕ цӕмӕдӕр бафӕндыд усмӕ телефонӕй бадзурын».

Сылгоймаг ын телефонӕй загъта, йӕ лӕг куысты кӕй ис. Фӕлӕ йӕ куы базыдта, Кеннет ӕмӕ Филоменӕ сӕ хӕдзары раз кӕй сты, уӕд сын дуар бакодта ӕмӕ сӕ мидӕмӕ бахуыдта.

Уыдон уайтагъд бафиппайдтой, сылгоймаг кӕугӕ кӕй кодта. Кеннет Библи ахуыры размӕ куы скуывта, уӕд та сылгоймаг кӕуын райдыдта. Кеннет ӕмӕ йӕ Филоменӕ уӕзданӕй бафарстой, мыййаг, исты ӕрцыди, зӕгъгӕ.

Сылгоймаг сын загъта, йӕхи марынмӕ кӕй хъавыд ӕмӕ йӕ лӕгмӕ писмо кӕй фыста, фӕлӕ йӕм Кеннет телефонӕй куы ӕрбадзырдта, уӕд ӕй уый кӕй баурӕдта. Радзырдта сын, депрессийӕ рынчын кӕй у, ӕмӕ йын уыдон дӕр Библийӕ, чи йӕ бафидар кодтаид, ахӕм стихтӕ бакастысты. Уый фӕрцы удӕгасӕй баззад.

Кеннет загъта: «Мах Йегъовӕйӕ бузныг стӕм, уыцы тыхст сылгоймагӕн баххуыс кӕныны фадат нын кӕй уыд, уый тыххӕй. Сӕйраджыдӕр та уый тыххӕй, ӕмӕ нӕ телефонӕй бадзурынмӕ кӕй сразӕнгард кодта, чи зоны, йӕ зӕды уылты йе та сыгъдӕг тыхы уылты!»a

Цымӕ раст уыд, Кеннет ӕмӕ Филоменӕ афтӕ кӕй хъуыды кодтой, ӕмӕ сӕ Хуыцау сразӕнгард кодта йӕ зӕды кӕнӕ йӕ сыгъдӕг тыхы уылты? Ӕви йӕм Кеннет телефонӕй кӕй бадзырдта, уый ӕнӕуи афтӕ рауад?

Уый фӕдыл нӕ бон бӕлвырдӕй ницы у зӕгъын. Фӕлӕ йӕ зонӕм, Хуыцау йӕ зӕдты уылты адӕмӕн кӕй ӕххуыс кӕны, цӕмӕй йӕ базоной. Зӕгъӕм, Библийы фыст ис, Хуыцауы зӕд хорз хабар хъусынгӕнӕг Филиппы кӕй арвыста, Фыстад бамбарын кӕй фӕндыд, уыцы ефиопаг хицаумӕ (Хъуыддӕгтӕ 8:26–31).

Алыхуызон динтӕ дзурынц, зӕгъгӕ, уӕларвон удгоймӕгтӕ ис, ӕмӕ дзы иуӕй-иутӕ Хуыцауы фӕндон ӕххӕст кӕнынц, иннӕтӕ та адӕмы хъахъхъӕнынц. Бирӕты уырны, зӕдтӕ кӕй ис ӕмӕ сын сӕ цардмӕ цыдӕр бар кӕй дарынц. Фӕлӕ бирӕты та ӕппындӕр нӕ уырны, зӕдтӕ кӕй ис, уый.

Цымӕ зӕдтӕ ӕцӕгдӕр ис? Кӕд о, уӕд куыд фӕзындысты? Дӕ цардмӕ исты бар дарынц? Ӕркӕсӕм-ма бӕлвырдгӕнӕнтӕм.