«Байхъус, ӕмӕ дӕ зонындзинӕдтыл бафта»
1 Фӕсномыг ныхӕсты чиныджы ӕвдыст у, зонд куыд дзуры, уый: «Байхъус мӕм, уымӕн ӕмӕ ӕз цы дзурон, уый у ӕппӕты ахсджиагдӕр, ӕмӕ мӕ дзыхы ныхас у рӕстдзинад. Мӕнмӕ ис уынаффӕ ӕмӕ зонд... Байхъусут мӕнмӕ; амондджын сты, мӕ фӕндӕгтыл мын чи цӕуы, уыдон. Уымӕн ӕмӕ мӕн чи ссара, уый ӕцӕгдӕр ссардзӕн цард, ӕмӕ йыл Иегъовӕ хӕрзаудӕн кӕндзӕн» (Фӕс. н. 8:6, 14, 32, 35). Ацы ныхӕстӕ хорз ӕвдисынц, облӕстон конгрессы «Хуыцауы Ныхас амонджытӕ» цы амындтӕ райсдзыстӕм, уый.
2 Конгрессы программӕ арӕзт ӕрцыд, ӕгас зӕххыл дӕр ӕфсымӕртӕ ӕмӕ хотӕн цы домӕнтӕ ис, уыдонмӕ гӕсгӕ. Царды Хуыцауы амындтӕ ӕмӕ уынаффӕтӕй куы пайда кӕнӕм, уӕд уыдзыстӕм амондджын, Иегъовӕимӕ нын дарддӕр дӕр хорз ахастытӕ уыдзӕн ӕмӕ ӕнусон цардмӕ кӕнӕг фӕндагыл цӕудзыстӕм. Ӕцӕгӕйдӕр махӕн ахсджиаг у, цӕмӕй «байхъусӕм, ӕмӕ нӕ зонындзинӕдтыл бафта» (Фӕс. н. 1:5).
3 Программӕйы размӕ. Цӕмӕй нын программӕ тынгдӕр фӕахъаз уа, уый тыххӕй хъуамӕ программӕйы райдианмӕ нӕ бынӕттӕ бацахсӕм ӕмӕ нӕ хъуыдытӕ программӕмӕ саразӕм. Уый тыххӕй нӕ хъӕуы нӕхи хорз бацӕттӕ кӕнын. Сӕйраджыдӕр нӕ хъӕуы нӕ хъуыддӕгтӕ рагацау райдайын. Конгрессы размӕ изӕры афоныл схуысс. Райсомӕй раджы сыст, цӕмӕй, кӕимӕ цӕуай, уыдонӕй алкӕмӕндӕр уа рӕстӕг йӕхи бацӕттӕ кӕнынӕн ӕмӕ исты ахӕрынӕн. Конгресс кӕм цӕуа, уырдӕм рагацау ацу, цӕмӕй дӕхицӕн бынат бацахсай ӕмӕ ма дӕ цы хъуыддӕгтӕ хъӕуа, уыдон программӕйы райдианы онг бакӕнай. Дуӕрттӕ байгом кӕндзысты 8 сахатыл, программӕ та ӕртӕ боны дӕр райдайдзӕн 9 сахатыл ӕмӕ 30 минутыл.
4 Конгрестӕ сӕйраджыдӕр «ӕмбырдты» Иегъовӕйӕн кад кӕнынӕн кӕй сты арӕзт, уымӕ гӕсгӕ программӕйы алы хай дӕр хъуамӕ райдайа афтӕ, Хуыцауӕн кад куыд хӕсса (Пс. 25:12). Уымӕ гӕсгӕ цалынмӕ фыццаг зарӕг райдайа, уӕдмӕ хъуамӕ нӕ бынӕтты сбадӕм. Уымӕ нӕ разӕнгард кӕны Библи: «Алцыдӕр хъуамӕ уа ӕфсармимӕ ӕмӕ ӕгъдауыл» (1 Кор. 14:40). Уый нӕ алкӕмӕн дӕр цӕуыл дзурӕг у? Музыкӕ цӕгъдын куы райдайа, стӕй сӕрдариуӕггӕнӕг ӕфсымӕр сценӕмӕ куы рацӕуа ӕмӕ куы сбада, уӕд хъуамӕ дӕ бынат бацахсай. Афтӕмӕй дӕ бон суыдзӕн, алы хай дӕр цы зарӕгӕй райдайа, уый зӕрдӕбынӕй зарын ӕмӕ уымӕй Иегъовӕйӕн кад хӕссын (Пс. 149:1).
5 Программӕйы рӕстӕджы. Ездрӕ «йӕ зӕрдӕ радта Иегъовӕйы закъон ахуыр кӕнынмӕ ӕмӕ йӕ ӕххӕст кӕнынмӕ» (Езд. 7:10). Куыд у нӕ бон нӕ зӕрдӕтӕ Иегъовӕйӕ амындтӕ райсынмӕ радтын? Дӕ программӕмӕ куы ӕркӕсай ӕмӕ куы фенай программӕйы алыхуызон хӕйттӕ ӕмӕ раныхӕсты сӕргӕндтӕ, уӕд ахъуыды кӕн: ацы программӕйы уылты мын Иегъовӕ цы зӕгъынмӕ хъавы? Куыд у мӕ бон ацы зонындзинӕдтӕй спайда кӕнын, цӕмӕй мӕхицӕн дӕр ӕмӕ мӕ бинонтӕн дӕр баххуыс кӕной? (Ис. 30:21; Еф. 5:17). Конгрессы рӕстӕджы дӕр уыцы фарстытыл хъуыды кӕн. Спайда кӕнын дӕ цы хъуыдытӕй фӕнда, уыдон цыбыртӕй фысс. Рахицӕн кӕн рӕстӕг, цӕмӕй сыл алы бон дӕр программӕйы фӕстӕ ӕрныхас кӕнат. Уыдӕттӕ дын баххуыс кӕндзысты, цы базыдтай, уый бахъуыды кӕнынӕн ӕмӕ дзы царды пайда кӕнынӕн.
6 Цалдӕр сахаты лӕмбынӕг хъусын ӕнцон нӕу. Цы нын баххуыс кӕндзӕн, цӕмӕй нӕ хъуыдытӕ ма дзӕгъӕл кӕной? Уымӕн дын баххуыс кӕндзысты дӕ цӕстытӕ, уымӕн ӕмӕ арӕхдӕр адӕймаг цӕмӕ кӕса, хъуыды дӕр ууыл фӕкӕны (Матф. 6:22). Уымӕ гӕсгӕ бацархай, цӕмӕй алы хъӕлӕбамӕ дӕр кӕнӕ фезмӕлдмӕ дӕр ма фӕкӕс-фӕкӕс кӕнай. Комкоммӕ кӕс, ныхасы цы ӕфсымӕр рацӕуа, уымӕ. Стих куы кӕса, уӕд ӕй дӕ Библийы ссар, ӕмӕ цалынмӕ стихыл дзура, уӕдмӕ дӕ Библи ма сӕхгӕн.
7 Чырыстон уарзондзинад нӕ разӕнгард кӕндзӕн, цӕмӕй иннӕты программӕмӕ хъусын ма хъыгдарӕм (1 Кор. 13:5). Программӕйы рӕстӕг у хъусынӕн, дзурынӕн нӕ, фӕлӕ (Екк. 3:7). Уымӕ гӕсгӕ ӕнӕхъуаджы макӕимӕ ныхас кӕн ӕмӕ ма ракӕс-бакӕс кӕн. Уазӕгдонмӕ рагацау ацу, цӕмӕй дӕ уый фӕстӕ ма бахъӕуа цӕуын. Кӕд дӕ де ’нӕниздзинад нӕ хъыгдары, уӕд программӕйы рӕстӕджы ма хӕр ӕмӕ ма нуаз, банхъӕлмӕ кӕс хӕрынӕн нысангонд рӕстӕгмӕ. Дзыппыхӕсгӕ телефонтӕ, пейджертӕ, видеокамерӕтӕ ӕмӕ фотоаппараттӕ чи ӕрбахӕсса, уыдон сӕ хъуамӕ афтӕ пайда кӕной, цӕмӕй иннӕты ма хъыгдарой. Ныййарджытӕ хъуамӕ бацархайой, цӕмӕй ӕнӕхъӕн бинонтӕй дӕр, уыимӕ ӕрыгӕттӕ дӕр, иумӕ сбадой ӕмӕ сӕ сывӕллӕттӕм сӕ хъус дарой (Фӕс. н. 29:15).
8 Дӕсгай азты дӕргъы конгрестӕм чи цӕуы, иу ахӕм хистӕр нӕлгоймаг фарон загъта: «Афтӕ мӕм фӕкаст, цыма ацы конгресс иннӕтӕй диссагдӕр уыд иу хъуыддаджы тыххӕй. Зӕгъӕн ис, ӕмӕ хъусджытӕ иууылдӕр, суанг ма сывӕллӕттӕ дӕр, программӕ цыбыртӕй сӕхимӕ фыстой. Уымӕ кӕсын уыд тынг ӕхсызгон. Ныхасы-иу чи рацыд, уыцы ӕфсымӕр-иу куы загъта, цӕмӕй сӕ Библитӕ бакӕной ӕмӕ цавӕрдӕр скъуыддзаг бакӕсой, уӕд-иу афтӕ бакодтой». Ӕфсымӕртӕ ӕмӕ хотӕ афтӕ лӕмбынӕг кӕй хъусынц, уый у раппӕлинаг. Уый ӕрмӕст махӕн ӕмӕ иннӕ делегаттӕн нӕу ахъаз, фӕлӕ фыццаджыдӕр кад хӕссы нӕ Кадджын Зондамонӕгӕн, Иегъовӕ Хуыцауӕн (Ис. 30:20, НТ).