Минас кӕнӕм Йегъовӕйы «фынгыл» ӕмӕ цин кӕнӕм
1. Йегъовӕ йӕ адӕмы уырнындзинадыл куыд тыхсы?
1 Йегъовӕ йӕ лӕггадгӕнджыты уырнындзинадыл тынг тыхсы. Ацы дунейы адӕм «ӕххормаг» ӕййафынц, махӕн та хӕринаг ис парахатӕй (Ис. 65:13). Йегъовӕ нӕ ӕфсады облӕстон конгрессты уылты дӕр. Дӕхи цӕттӕ кӕныс, цӕмӕй облӕстон конгрессы, «Хуыцауы сыгъдӕг уд нын амоны фӕндаг», иу бон дӕр ма фӕцух кӕнай? Йегъовӕ нын ӕрцӕттӕ кодта хӕрзад хӕринаг.
2. Конгрессы размӕ нӕ хъуыддӕгтӕ рагацау куыд спълан кӕнӕм?
2 Рагацау пълан кӕнӕм. «Алцыдӕр бӕстон чи кӕны, уымӕн йӕ фӕндтӕй ис пайда» (Ӕмб. 21:5). Уӕдӕ цӕмӕй конгрессы иу бон дӕр ма фӕцух кӕнай, уый тыххӕй дӕ кӕд дӕхи куыстӕй ракурын хъӕудзӕн, уӕд ма фӕстиат кӕн ӕмӕ дӕ хицауимӕ аныхас кӕн. Кӕд дӕ конгрессы рӕстӕг цӕрӕнбынат хъӕудзӕн, уӕд ууыл дӕр рагацау ахъуыды кӕн. Искуыдӕм цӕуыны бӕсты, хуыздӕр уаид, дӕ хотӕ ӕмӕ де ’фсымӕртимӕ сихор куы бахӕрис. Дӕ хъуыддӕгтӕ афтӕ спълан кӕн, алы бон дӕр конгресмӕ рагацау куыд ӕрбацӕуай, цӕмӕй-иу зарӕг ӕмӕ куывды размӕ дӕхицӕн бынат ссарай.
3. Конгрессы рӕстӕг ныл цавӕр уӕлӕдарӕс хъуамӕ уа?
3 Мах фӕнды, цӕмӕй нӕ уӕлӕдарӕс хӕдӕфсарм ӕмӕ аив уа (1 Тим. 2:9, 10). Облӕстон конгрессы рӕстӕг нын хорз фадат вӕййы хъусын кӕнынӕн. Нӕ аив уӕлӕдарӕсӕй ӕмӕ нӕ плакеткӕтӕй иннӕтӕй хицӕн кӕндзыстӕм ӕмӕ ныл адӕм сӕ цӕст ӕрӕвӕрдзысты.
4. Цӕмӕй конгресс бинонтӕй алкӕмӕн дӕр пайда ӕрхӕсса, уый тыххӕй цы бакӕнӕн ис?
4 Лӕмбынӕг хъусӕм. Йегъовӕ нын цы хӕрзад хӕринӕгтӕ ӕрцӕттӕ кодта, уыдонӕй иугыццыл дӕр нӕхи ма фӕцух кӕнӕм! (Ӕмб. 22:17, 18). Раныхӕсты рӕстӕг нӕ Библитӕ куы гом кӕнӕм ӕмӕ хъуыдытӕ цыбыртӕй куы фыссӕм, уӕд программӕмӕ лӕмбынӕг хъусдзыстӕм. Стӕй изӕры нӕ фыстытӕм гӕсгӕ нӕ бон уыдзӕн конгрессы ахсджиаг хъуыдытыл иннӕтимӕ аныхас кӕнын. Фӕстаг рӕстӕг фӕсивӕдӕй чидӕртӕ конгрессы фӕныхас кӕнынц кӕнӕ та сӕ кӕрӕдзимӕ телефонӕй писмотӕ фервитынц. Кӕд нын сывӕллӕттӕ ис, гыццылтӕ сты ӕви стыр, уӕддӕр хуыздӕр уыдзӕн, се ’мгӕрттимӕ нӕ, фӕлӕ нӕ фарсмӕ куы бадой.
5. Конгрессы рӕстӕг нӕ циныл цин куыд бафтауӕм?
5 Бацин-иу кӕнӕм не ’мчырыстӕттыл. Хӕринаг бирӕ хӕрзаддӕр вӕййы, не ’мбӕлттимӕ йӕ куы фӕхӕрӕм, уӕд (Ӕмб. 15:17). Афтӕ вӕййы, не ’мчырыстӕттимӕ конгрессы куы ӕрӕмбырд вӕййӕм, уӕд дӕр. Куыд ӕхсызгон вӕййы, хотӕ ӕмӕ ӕфсымӕртимӕ куы базонгӕ вӕййӕм ӕмӕ семӕ куы фӕныхас кӕнӕм! (Пс. 133:1). Цалынмӕ музыкӕ нӕ райдайа, уӕдмӕ ӕфсымӕр куы зӕгъа, уӕ бынӕттӕ бацахсут, зӕгъгӕ, уӕд хъуамӕ ныхас кӕнын фӕуадзӕм ӕмӕ нӕ бынӕтты сбадӕм.
6. Радзур, дӕхиуыл чи ӕрцыд, ахӕм хабар.
6 Хъусын кӕнынӕн алы фадатӕй дӕр пайда кӕнӕм. Конгрессы рӕстӕг нын диссаджы фадат вӕййы хорз хабар радзурынӕн. Конгрессы фӕстӕ уынджы куы фӕцӕуӕм, уӕд нӕ адӕм арӕх бафӕрсынц, нӕ плакеткӕты цы фыст ис, уымӕй. Уый фӕрцы нӕ бон вӕййы семӕ Хуыцауы тыххӕй аныхас кӕнын. Ахӕм адӕмы-иу конгресмӕ фӕхуыдтой, ӕмӕ сӕ иуӕй-иутӕ цӕугӕ дӕр ӕрбакодтой.
7. Облӕстон конгресмӕ цӕмӕн хъӕуы ӕрбацӕуын?
7 Конгресстӕ бацӕттӕ кӕнынӕн бахъӕуы тынг бирӕ рӕстӕг: бацагурынц бынӕттӕ, алыхуызон отделты куыст спълан кӕнынц ӕмӕ раныхӕстӕ бацӕттӕ кӕнынц. Уыцы стыр фыдӕбон ууыл дзурӕг у, Йегъовӕ йӕ адӕмы тынг кӕй уарзы. Цӕй уӕдӕ не ’ппӕт дӕр конгресмӕ ӕрбацӕуӕм ӕмӕ хорз фӕминас кӕнӕм! Афтӕмӕй ацы дунейы адӕмӕй уӕлдай «фырцинӕй зардзыстӕм» (Ис. 65:14).
[Рамкӕ 4 фарсыл]
Зӕрдылдаринӕгтӕ облӕстон конгрессы фӕдыл
◼ Программӕйы рӕстӕг. Программӕ алы бон дӕр райдайдзӕн 9.20. Дуӕрттӕ гом уыдзысты 8.00 сахатӕй. Музыкӕ куы райхъуыса, уӕд-иу нӕ бынӕтты сбадӕм, цӕмӕй программӕ ӕнӕкъуылымпыйӕ райдайа. Сабаты программӕ фӕуыдзӕн 16.55, хуыцаубоны та – 16.00.
◼ Машинӕты лӕууӕндӕттӕ. Конгресстӕ кӕм фӕцӕуынц, уым вӕййы, машинӕтӕ кӕм фӕхъахъхъӕнынц, ахӕм лӕууӕндӕттӕ. Чи куыд цӕуа, афтӕ йӕ машинӕ афтид бынаты ӕвӕрдзӕн, ӕхца фидын нӕ хъӕудзӕн. Лӕууӕндонмӕ машинӕ батӕрӕн уыдзӕн, конгрессы плакеткӕ кӕуыл уа, уыдонӕн. Инвалидтӕн машинӕ ӕвӕрынӕн цы бынат рахицӕн кӕндзысты, уым слӕууыны бар уыдзӕн, йӕ машинӕйыл инвалиды нысан кӕмӕн ис, ӕрмӕстдӕр уыдонӕн.
◼ Бадӕн бынӕттӕ. Бынӕттӕ бацахсӕн ис, демӕ иу машинӕйыл чи ӕрцыд кӕнӕ та кӕимӕ цӕрыс, ӕрмӕстдӕр уыдонӕн.
◼ Сихор. Курӕг уӕ стӕм, хӕринаг-иу уемӕ рахӕссут, цӕмӕй уӕ сихорафон хӕринаг ӕлхӕнынмӕ цӕуын ма хъӕуа. Ис ӕрбахӕссӕн, бандоны бын чи бацӕуа, ахӕм къухыхӕсгӕ холодильник. Конгресмӕ нӕй хӕссӕн авгӕй конд мигӕнӕнтӕ ӕмӕ хъӕбӕр нозт.
◼ Мысайнӕгтӕ. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй – ныппарӕн сӕ ис ӕппӕтдунеон хъуыддагӕн цы асыкк ис, уым, нӕхи Паддзахады залы кӕнӕ та конгрессы.
◼ Ӕнӕнхъӕлӕджы исты куы ’рцӕуа. Конгрессы «Фыццаг ӕххуысы» чи фӕлӕггад кӕны, уыдон дзырдтой, гыццыл ницӕй тыххӕй дӕр-иу сӕм дзыппыхӕсгӕ телефонтӕй кӕй бадзырдтой. Конгрессы рӕстӕг искӕуыл исты куы ’рцӕуа, уӕд хъӕуы уагдартӕй искӕмӕн зӕгъын. Уый уайтагъд фӕхабар кӕндзӕн «Фыццаг ӕххуысмӕ». Уым чи лӕггад кӕны, уыдон дын баххуыс кӕндзысты ӕмӕ куы бахъӕуа, уӕд та 03 дӕр адзурдзысты.
◼ Сывӕллӕттӕн коляскӕтӕ ӕмӕ гыццыл бандӕттӕ хӕссӕн нӕй, конгресс кӕм цӕуа, уырдӕм. Фӕлӕ ӕрбахӕссӕн ис сывӕллӕттӕн гыццыл бандӕттӕ, кӕд иннӕты нӕ хъыгдардзысты, уӕд.
◼ Духитӕ ӕмӕ одеколонтӕ. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам, ӕмӕ нӕхиуыл куы нӕ пырх кӕниккам тынг тӕфгӕнаг духитӕ, цӕмӕй, йӕ улӕфӕнтӕй рынчын чи у, уыдоны ма хъыгдарой (1 Кор. 10:24).
◼ Фылдӕр базонын кӕй фӕнды. Конгрессы бонты нын фадат куы фӕзына хъусын кӕнынӕн ӕмӕ, фылдӕр базонын кӕй фӕнды, ахӕм адӕймагыл куы фембӕлӕм, уӕд хъӕуы спайда кӕнын бланкӕй «Пожалуйста, посети этого человека», зӕгъгӕ (S-43-U). Хъусынгӕнджытӕм хъуамӕ конгрессы рӕстӕджы иу кӕнӕ дыууӕ ахӕм бланкы уа. Уыцы бланктӕ ма хъуамӕ уой конгрессы сӕрдары бюройы дӕр. Дзаг бланктӕ раттӕн уыдзӕн конгрессы сӕрдары бюромӕ кӕнӕ та уый фӕстӕ де ’мбырды секретармӕ (Кӕс 2005 азы февралы «Нӕ хъусын кӕныны хъуыддаг», 6 ф.).
◼ Цӕрӕнбынат. Фатеры цӕрыны тыххӕй курдиат дӕтгӕйӕ, уӕ хорзӕхӕй, уӕ зӕрдыл дарут: 1) алы хатт дӕр пайда кӕнут бланкӕй СО-5; 2) цӕрӕнбынаты хайад дын фатерты тыххӕй бланк СО-4 куы радта, уӕд ӕй ӕндӕр искӕмӕн дӕттӕн нӕй; 3) уӕ хорзӕхӕй, уӕ зӕрдыл дарут, цӕрӕнбынат лӕвӕрд кӕй цӕуы ӕрмӕст конгрессы бонтӕн; 4) хъуамӕ дӕ хъус дарай дӕ сывӕллӕттӕм ӕмӕ сӕ иунӕгӕй ма уадзай; 5) нӕ хотӕ ӕмӕ нӕ не ’фсымӕртӕ кӕй суазӕг кодтой, уымӕй бузныг уӕм, ӕмӕ ма рох кӕнӕм Хъуыддӕгты 20:35 цы фыст ис, уый; 6) кӕд дӕ фатер нал хъӕуы, уӕд ӕнӕмӕнг фехъусын кӕн цӕрӕнбынаты хайадмӕ.