Облӕстон конгресс – стыр цины рӕстӕг
1. Рагон Израилы бӕрӕгбӕттӕн ӕмӕ нӕ рӕстӕджы облӕстон конгресстӕн иумӕйагӕй цы ис?
1 Иосиф ӕмӕ Марийӕ алы аз дӕр сӕ сывӕллӕттимӕ цыдысты Иерусалиммӕ, бӕрӕгбӕттӕм. Уыцы бӕрӕгбӕтты рӕстӕг-иу Хуыцауы лӕггадгӕнджытӕй ферох сты сӕ зындзинӕдтӕ ӕмӕ-иу се ’ргом сарӕзтой, ахсджиагдӕр цы уыд, уымӕ – сӕ уырнындзинадимӕ баст хъуыддӕгтӕм. Бӕрӕгбӕтты руаджы сӕ бон уыди лӕмбынӕгдӕр ахъуыды кӕнын ӕмӕ фӕныхас кӕнын Йегъовӕйы хорздзинӕдтыл ӕмӕ йӕ Закъоныл. Махӕн дӕр нӕ облӕстон конгрессты замманай фадат уыдзӕн, цӕмӕй Йегъовӕйӕн зӕрдиагӕй балӕггад кӕнӕм.
2. Облӕстон конгресмӕ нӕхи рагацау куыд бацӕттӕ кӕнӕм?
2 Рагацау цӕттӕ кӕнӕм. Чырыстийы бинонты-иу Назаретӕй Иерусалиммӕ ӕмӕ фӕстӕмӕ хъуыди 200 километры бӕрц цӕуын. Кӕд ӕй бӕлвырд нӕ зонӕм, Йесойӕн цал хо ӕмӕ ’фсымӕры уыд, уӕддӕр зын бамбарӕн нӕу, Иосиф ӕмӕ Марийӕйы бирӕ фыдӕбон кӕнын кӕй хъуыди ӕмӕ-иу рагацау бирӕ цыдӕртӕ кӕй хъуамӕ спълан кодтаиккой. Ды та дӕ хъуыддӕгтӕ афтӕ спълан кодтай, цӕмӕй конгрессы алы бонмӕ дӕр ацӕуай? Чи зоны дӕ уый тыххӕй бахъӕуа отпуск райсын, куысты хицауимӕ кӕнӕ сывӕллӕтты ахуыргӕнӕгимӕ аныхас кӕнын. Кӕд хъӕуы, уӕд рагацау батыхстӕ, кӕм цӕрдзыстут, ууыл? Дӕ бон у, ӕмбырды фӕкӕсын кӕмӕ хъӕуы, уыдонӕй искӕмӕн баххуыс кӕнын, цӕмӕй конгресмӕ ӕрбацӕуой? (1 Иоан. 3:17, 18).
3. Дзуттаг бӕрӕгбӕтты рӕстӕг-иу Хуыцауы адӕмӕн цавӕр фадат уыди?
3 Кӕрӕдзийыл фӕцин кӕнӕм. Раджы заман-иу дзуттӕгтӕ сӕ бӕрӕгбӕтты куы ӕрымбырд сты, уӕд-иу кӕрӕдзийыл зӕрдиагӕй фӕцин кодтой. Ӕвӕццӕгӕн, Чырыстийы бинонтӕ дӕр ӕхсызгонӕй ӕнхъӕлмӕ кастысты, сӕ рагон ӕрдхӕрдтимӕ кӕд фембӕлдзысты, уыцы рӕстӕгмӕ. Стӕй сӕ куыннӕ фӕндыдаид, дзуттӕгты ’хсӕн ӕмӕ сын иннӕ адӕмтӕй сӕ дин чи райста, уыдоны ’хсӕн дӕр ног ӕмбӕлттӕ ссарын. Иннӕ адӕмыхӕттытӕй чи уыд, уыдонимӕ-иу, ӕвӕццӕгӕн, базонгӕ сты бӕрӕгбоны, науӕд Иерусалиммӕ кӕнӕ уырдыгӕй цӕугӕйӕ.
4. Цӕмӕй бӕрӕг уыдзӕн, нӕ хотӕ ӕмӕ не ’фсымӕртӕн кӕй аргъ кӕнӕм, уый?
4 Облӕстон конгрессты цы раныхӕстӕ вӕййы, уыдон нӕ бон уаид чингуыты ӕмӕ журналты дӕр бакӕсын. Фӕлӕ ӕууӕнкджын ӕмӕ зондджын цагъар конгресстӕ уый тыххӕй спълан кӕны, цӕмӕй кӕрӕдзийы ныфсыл ныфс бафтауӕм (Дзут. 10:24, 25). Уӕдӕ-иу конгресмӕ алы бон дӕр раздӕр ӕрбацӕуӕм, цӕмӕй нӕ кӕрӕдзийыл фӕцин кӕнӕм. Уый фӕстӕ ’фсымӕр афтӕ куы зӕгъа, ныртӕккӕ музыкӕ райхъуысдзӕн, зӕгъгӕ, уӕд нӕ бон уыдзӕн нӕ бынӕтты сбадын. Сихорӕй хӕринаг ӕлхӕнынмӕ цӕуыны бӕсты хуыздӕр уаид немӕ иугыццыл исты куы ӕрбахӕссиккам, цӕмӕй нӕ бон уа фӕныхӕстӕ кӕнын. Мах хъуамӕ аргъ кӕнӕм, уырнындзинады фӕрцы иу бинонтау кӕимӕ стӕм, ахӕм хотӕ ӕмӕ ’фсымӕртӕ нын кӕй ис. Уыцы хотӕ ӕмӕ ’фсымӕртӕ сты Йегъовӕйы лӕвар (Мих. 2:12).
5. Конгресс нын фылдӕр пайда кӕд ӕрхӕсдзӕн?
5 Конгрессты фылдӕр базонӕм. Йӕ гыццылӕй фӕстӕмӕ Йесо архайдта, цӕмӕй-иу бӕрӕгбӕтты рӕстӕг йӕ уӕларвон Фыды тыххӕй фылдӕр базыдтаид (Лук. 2:41–49). Нӕ бинонтӕн та цы баххуыс кӕндзӕн, цӕмӕй нын конгресс фылдӕр пайда ӕрхӕсса? Программӕйы рӕстӕг-иу нӕ бынӕтты бадӕм ӕмӕ-иу ма ныхас кӕнӕм. Нӕ хъус-иу дарӕм, цӕмӕй нӕ телефон кӕнӕ ӕндӕр исты ахӕм нӕхи дӕр ӕмӕ иннӕты дӕр ма хъыгдара. Ныхасы чи рацӕуы, уыцы ӕфсымӕрмӕ-иу кӕсӕм ӕмӕ-иу сӕйраг хъуыдытӕ цыбыртӕй фыссӕм. Уӕ сывӕллӕттимӕ-иу бадут, цӕмӕй уынат, уыдон дӕр хъусынц ӕви нӕ. Изӕрӕй та-иу аныхас кӕнут, уӕ зӕрдӕмӕ цы хъуыдытӕ фӕцыдысты, уыдоныл.
6. Нӕ уӕлӕдарӕс ӕмӕ не ’ддаг бакаст цавӕр хъуамӕ уой?
6 Нӕ уӕлӕдарӕс ӕмӕ не ’ддаг бакаст. Йесойы бинонтӕ ӕмӕ-иу иннӕ дзуттӕгтӕ бӕрӕгбонмӕ ӕмӕ фӕстӕмӕ куы цыдысты, уӕд-иу фӕсарӕйнаг базаргӕнджытӕ ӕнцонтӕй базыдтой, чи сты, уый, уымӕн ӕмӕ-иу «сӕ уӕлӕдарӕсы фӕдджитыл кодтой хаутӕ, хауты сӕрмӕ та-иу ауагътой ӕрвхуыз бӕттӕн» (Ным. 15:37–41). Кӕд абон Йегъовӕйы Ӕвдисӕнтыл, иннӕтӕй сӕ чи хицӕн кӕны, ахӕм уӕлӕдарӕс нӕ вӕййы, уӕддӕр сӕ зонынц, сыгъдӕг, аив ӕмӕ ӕфсармыл дзурӕг дзаума чи дары, ахӕм адӕмӕй. Конгресмӕ ӕмӕ фӕстӕмӕ цӕугӕйӕ хъуамӕ нӕ хъус уӕлдай лӕмбынӕг дарӕм, куыд конд вӕййӕм, уымӕ. Кӕд конгрессы фӕстӕ нӕ дзаумӕттӕ раивӕм, уӕддӕр нӕ уӕлӕдарӕс хъуамӕ Йегъовӕйӕн кад хӕсса, стӕй-иу нӕ плакеткӕтӕ дӕр дарӕм. Афтӕмӕй, Йегъовӕйӕн чи нӕ лӕггад кӕны, уыдонӕй бӕрӕг дардзыстӕм ӕмӕ уый адӕм ӕнӕбафиппайгӕ нӕ фӕуыдзысты.
7. Конгрессы ӕххуыс кӕнын цӕмӕн хъӕуы?
7 Чи баххуыс кӕндзӕн? Цӕмӕй конгресс, куыд ӕмбӕлы афтӕ ацӕуа, уый тыххӕй бирӕ ӕххуысгӕнджытӕ фӕхъӕуы. Дӕуӕн та дӕ бон у баххуыс кӕнын? (Пс. 110:3). Конгрессы истӕмӕй куы фӕкӕсӕм, уӕд уымӕй Хуыцауӕн балӕггад кӕнӕм, стӕй нӕ куыст иннӕтыл дӕр хорзырдӕм фӕзыны. Иухатт, конгресс цы бынаты цыди, уый хицауӕн йӕ зӕрдӕмӕ афтӕ тынг фӕцыд нӕ хотӕ ӕмӕ не ’фсымӕрты куыст, ӕмӕ ныффыста: «Зӕрдиагӕй мӕ фӕнды бузныг зӕгъын. Ацы залы адӕм бирӕ алыхуызон хъуыддӕгты фӕдыл ӕрӕмбырд вӕййынц, фӕлӕ дзы уӕ конгрессы хуызӕн иу дӕр нӕ уыд. Фехъуыстон-иу, Йегъовӕйы Ӕвдисӕнтӕ иннӕ адӕмы хуызӕн кӕй не сты, рагӕй фӕстӕмӕ сын хорз ном кӕй ис, ӕмӕ-иу сӕ фӕстӕ сӕ бынат, цы вӕййы, уымӕй сыгъдӕгдӕр кӕй ныууадзынц. Уӕ фӕрцы ацы бынат бирӕ рӕсугъддӕр сси. Сымах хуызӕн уӕздан адӕм нырма никуы федтам».
8. Конгресс кӕм цӕудзӕн, уыцы горӕты нын цавӕр фадӕттӕ уыдзӕн хъусын кӕнынӕн?
8 Хорз фадат хъусын кӕнынӕн. Конгресс кӕм цӕудзӕн, уыцы горӕты цӕрӕг адӕм сӕ цӕст куыннӕ ӕрӕвӕрдзысты, аив уӕлӕдарӕс ӕмӕ плакеткӕтӕ конд кӕуыл ис, уыцы адӕмыл. Афтӕмӕй нын хорз фадат фӕуыдзӕн, цӕмӕй сын конгрессы тыххӕй радзурӕм. Программӕйы фӕстӕ иу цыппар аздзыд лӕппу йӕ ныййарджытимӕ кафемӕ бацыд. Сывӕллон йемӕ ’рбахаста, конгрессы цы ног чиныг райстой, уый ӕмӕ йӕ, уым чи куыста, уыцы сылгоймагӕн равдыста. Уый руаджы лӕппуйы ныййарджытӕ сылгоймаджы фӕхуыдтой конгресмӕ.
9. Чырыстийы бинонтау махӕн дӕр нӕ бон куыд у равдисын, Йегъовӕйы тыххӕй нӕ фылдӕр базонын кӕй фӕнды?
9 Раджы заманты, дзуттаг адӕмӕй Йегъовӕйы тыххӕй фылдӕр базонын кӕй фӕндыд, уыдон-иу бӕрӕгбӕттӕм зӕрдиагӕй ӕнхъӕлмӕ кастысты (Дык. з. 16:15). Чырыстийы бинонтӕн дӕр зын нӕ уыд сӕхи истӕмӕй фӕцух кӕнын, цӕмӕй уыцы бӕрӕгбӕттӕм цыдаиккой ӕмӕ сӕ уырнындзинад фидар кодтаиккой. Мах дӕр нӕ облӕстон конгресстӕн стыр аргъ кӕнӕм ӕмӕ сӕ нымайӕм нӕ фӕлмӕнзӕрдӕ уӕларвон Фыд Йегъовӕйы лӕварыл (Иак. 1:17). Уӕдӕ абон райдайӕм нӕхи цӕттӕ кӕнын уыцы цины рӕстӕгмӕ!
[Рамкӕ 6, 7 фарсыл]
Зӕрдылдаринӕгтӕ облӕстон конгрессы фӕдыл
◼ Программӕйы рӕстӕг. Программӕ алы бон дӕр райдайдзӕн 9.20. Дуӕрттӕ гом уыдзысты 8.00 сахатӕй. Музыкӕ куы райхъуыса, уӕд-иу нӕ бынӕтты сбадӕм, цӕмӕй программӕ ӕнӕкъуылымпыйӕ райдайа. Сабаты программӕ фӕуыдзӕн 16.55, хуыцаубоны та – 16.00.
◼ Машинӕты лӕууӕндӕттӕ. Конгресстӕ кӕм фӕцӕуынц, уым гӕнӕн уӕвгӕйӕ уыдзӕн, машинӕтӕ кӕм ӕвӕрдзысты, ахӕм бынӕттӕ. Чи куыд цӕуа, афтӕ йӕ машинӕ афтид бынаты ӕвӕрдзӕн; ӕхца фидын дзы нӕ хъӕудзӕн. Инвалидтӕн цы бынӕттӕ рахицӕн кӕндзысты, уым слӕууыны бар уыдзӕн, йӕ машинӕйыл инвалиды нысан кӕмӕн ис, ӕрмӕстдӕр уыдонӕн. Лӕууӕндӕтты бирӕ бынӕттӕ кӕй нӕ вӕййы, уымӕ гӕсгӕ, хорз уаид, алы машинӕйы дӕр цас цӕуы, уыйбӕрц адӕм-иу сыл куы ӕрбацӕуид.
◼ Бадӕн бынӕттӕ. Бынӕттӕ бацахсӕн ис, демӕ иу машинӕйыл чи ӕрбацыд, кӕимӕ цӕрыс ӕмӕ Библи кӕимӕ ахуыр кӕныс, ӕрмӕстдӕр уыдонӕн (1 Кор. 13:5).
◼ Сихор. Курӕг уӕ стӕм, хӕринаг-иу уемӕ рахӕссут, цӕмӕй уӕ сихорафон дуканимӕ цӕуын ма бахъӕуа. Ис ӕрбахӕссӕн, бандоны бын чи бацӕуа, ӕрмӕст ахӕм къухыхӕсгӕ холодильник. Конгресмӕ нӕй хӕссӕн авгӕй конд мигӕнӕнтӕ.
◼ Мысайнӕгтӕ. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй. Ныппарӕн сӕ ис ӕппӕтдунеон хъуыддагӕн цы асыкк ис, уым – нӕхи Паддзахады залы кӕнӕ та конгрессы.
◼ Ӕнӕнхъӕлӕджы исты куы ’рцӕуа. Конгрессы рӕстӕг исчи куы бавзӕр уа, уӕд хъӕуы уагдартӕй искӕмӕн зӕгъын. Уый уайтагъд фӕхабар кӕндзӕн «Фыццаг ӕххуысмӕ». Уым чи лӕггад кӕны, уыдон дын баххуыс кӕндзысты ӕмӕ куы бахъӕуа, уӕд та 03 дӕр адзурдзысты. Афтӕ куы архайӕм, уӕд «Фыццаг ӕххуысмӕ» гыццыл ницӕй тыххӕй дӕр дзыппыхӕсгӕ телефонтӕй ничи дзурдзӕн.
◼ Къахы дарӕс. Алы аз дӕр къахы дарӕсы тыххӕй исты бӕллӕхтӕ ӕрцӕуы. Хуыздӕр уаид хуымӕтӕг, ӕмӕ нын ӕлхъивгӕ чи нӕ кӕны, ахӕм дзабыртӕ скӕнын, цӕмӕй асинтыл ӕмӕ решеткӕйӕ ’мбӕрзт рӕтты цӕуын тӕссаг ма уа.
◼ Программӕйы запись. Программӕ рафыссыны тыххӕй конгрессы аппаратурӕмӕ ницы ис иу кӕнӕн. Уӕ хъус-иу дарут, цӕмӕй макӕй хъыгдарат.
◼ Сывӕллӕттӕн коляскӕтӕ ӕмӕ гыццыл тухгӕ бандӕттӕ. Конгресмӕ ахӕм дзауматӕ нӕй хӕссӕн. Фӕлӕ ныййарджыты бон у сӕ сывӕллонӕн ӕрбахӕссын, сӕ фарсмӕ бандоныл чи бацӕудзӕн, ахӕм гыццыл бандон.
◼ Духитӕ ӕмӕ одеколонтӕ. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам ӕмӕ нӕхиуыл куы нӕ пырх кӕниккам тынг тӕфгӕнаг духитӕ, цӕмӕй, йӕ улӕфӕнтӕй рынчын чи у, уыдоны ма хъыгдарой (1 Кор. 10:24).
◼ Фылдӕр базонын кӕй фӕнды. Конгрессы бонты куы хъусын кӕнӕм ӕмӕ, фылдӕр базонын кӕй фӕнды, ахӕм адӕймагыл куы фембӕлӕм, уӕд хъӕуы спайда кӕнын бланкӕй «Пожалуйста, посети этого человека», зӕгъгӕ (S-43-U). Хъусынгӕнджытӕм хъуамӕ конгрессы рӕстӕджы иу кӕнӕ дыууӕ ахӕм бланкы уа. Дзаг бланктӕ раттӕн уыдзӕн, литературӕйы хайады чи лӕггад кӕны, уыцы ’фсымӕртӕм кӕнӕ та де ’мбырды секретармӕ (Кӕс 2009 азы ноябры «Нӕ хъусын кӕныны хъуыддаг», 4 ф.).
◼ Улӕфӕн бынӕттӕ. Кафеты кӕнӕ ӕндӕр ахӕм бынӕтты нӕ уаг ӕмӕ не ’гъдауӕй Йегъовӕйы ном кадджын кӕнӕм.
◼ Гостиницӕтӕ. 1) Цы хъӕуы, уымӕй фылдӕр къомнӕттӕ-иу ма ныззаказ кӕнӕм, стӕй-иу нӕ хъус дарӕм, цӕмӕй дзы, цас ӕмбӕлы, уымӕй фылдӕр адӕм ма цӕра. 2) Кӕд, рагацау цы къомнӕт ныззаказ кодтам, уый нӕ нал хъӕуы, уӕд уый тыххӕй уайтагъд хъӕуы гостиницӕмӕ фӕхабар кӕнын. 3) Нӕ дзаумӕттӕн-иу тележкӕ райсӕм, цӕттӕ нын куы уой, ӕрмӕстдӕр, уӕд. Куы дзы спайда кӕнӕм, уӕд та-иу ӕй йӕ бынатмӕ фӕхӕццӕ кӕнӕм, цӕмӕй йӕ иннӕтӕ дӕр райсой. 4) Кӕд бар нӕй, уӕд-иу къомнӕтты хӕринаг ма кӕнӕм. 5) Гостиницӕйы чи ’рлӕууы, уыдонӕн райсомӕй цы хӕринаг ӕмбӕлы, уымӕй фылдӕр-иу ма домӕм. 6) Гостиницӕйы кусджытимӕ ныхас кӕнгӕйӕ-иу бӕрӕг уӕд, Хуыцауы лӕггадгӕнджытӕ кӕй стӕм, уый. Уыдонӕн бирӕ куыст вӕййы, ӕмӕ нӕ фӕбузныг уыдзысты, фӕразон ӕмӕ ӕрхъуыдыджын куы уӕм, уӕд. 7) Цы цӕрӕнбынӕтты хыгъд нын раттынц, уым фыст вӕййы, гостиницӕйы къомнӕты аргъ иу бонӕн. Кӕд дын уыцы аргъӕй фылдӕр фидын кӕнынц, уӕд-иу фидынмӕ ма фӕтагъд кӕн, фӕлӕ-иу уайтагъд фӕхабар кӕн, конгрессы цӕрӕнбынаты хайадмӕ. 8) Гостиницӕйы истӕмӕй куы фӕтыхсай, уӕд-иу ӕй цӕрӕнбынаты хайадӕн фехъусын кӕн.
◼ Хи хӕдзӕрттӕ ӕмӕ фатертӕ. Уӕ хорзӕхӕй, фатеры цӕрыны тыххӕй курдиат дӕтгӕйӕ уӕ зӕрдыл дарут: 1) алы хатт дӕр пайда кӕнут бланкӕй «Заявка на размещение лиц с особыми потребностями» (СО-5); 2) цӕрӕнбынаты хайады дын фатерты тыххӕй бланк СО-4 куы раттой, уӕд ӕй ӕндӕр искӕмӕн дӕттӕн нӕй; 3) уӕ хорзӕхӕй, уӕ зӕрдыл дарут, цӕрӕнбынат лӕвӕрд кӕй цӕуы ӕрмӕст конгрессы бонтӕн; 4) дӕ хъус дар дӕ сывӕллӕттӕм ӕмӕ сӕ иунӕгӕй ма уадз; 5) нӕ хотӕ ӕмӕ нӕ не ’фсымӕртӕ кӕй суазӕг кодтой, уымӕй бузныг уӕм, ӕмӕ ма рох кӕнӕм, Хъуыддӕгты 20:35 цы фыст ис, уый; 6) кӕд дӕ фатер нал хъӕуы, уӕд ӕй ӕнӕмӕнг фехъусын кӕн цӕрӕнбынаты хайадӕн.
◼ Ӕххуыс конгрессы рӕстӕг. Конгресс нын ноджы стырдӕр циндзинад ӕрхӕсдзӕн, исты хъуыддаджы куы баххуыс кӕнӕм, уӕд (Ап. хъ. 20:35). Истӕмӕй фӕкӕсын кӕй фӕнды, уыдоны бон у бацӕуын конгрессы хайадмӕ, «Ӕххуысгӕнджытӕ», зӕгъгӕ. 16 азӕй къаддӕр кӕуыл цӕуы, уыцы сывӕллӕтты бон дӕр у ӕххуыс кӕнын, ӕрмӕст сӕм сӕ ныййарджытӕй кӕнӕ хистӕртӕй исчи сӕ хъус куы дара, уӕд.