Ӕртӕ боны – стыр цины рӕстӕг

1. Облӕстон конгрессӕй цӕмӕ ӕнхъӕлмӕ кӕсӕм?

¹ Хӕйрӕджы «хурсыгъд» дунейы Йегъовӕйы лӕггадгӕнджытӕ сты зӕрдӕрухс, Йегъовӕ сын сӕ циныл цин кӕй ӕфтауы, уый фӕрцы (Ис. 58:11). Йегъовӕ нын алы аз дӕр облӕстон конгрессты не уӕнгты ног тыхтӕ бауадзы. Облӕстон конгресс кӕй ӕрхӕстӕг кӕны, уымӕ гӕсгӕ цы хъуамӕ саразӕм, цӕмӕй нӕхи бацӕттӕ кӕнӕм ӕмӕ нӕ уырнындзинад бафидар уа? (Ӕмб. 21:5).

2. Рагацау цӕуыл хъуамӕ ахъуыды кӕнӕм?

² Уӕ хъуыддӕгтӕ ӕмӕ уӕ куыст афтӕ спълан кодтат, цӕмӕй конгрессы ӕртӕ бонӕй иу дӕр ма рауадзат? Ахъуыды кодтат, алы бон дӕр уӕ конгресмӕ цӕуынӕн фӕндагыл цас рӕстӕг бахъӕудзӕн, ууыл, цӕмӕй афоныл ӕрбацӕуат ӕмӕ программӕйы райдианы размӕ уӕхицӕн бынӕттӕ бацахсат? Кӕй зӕгъын ӕй хъӕуы, мах нӕ фӕнды, Йегъовӕ нын цы диссаджы куывд ӕрцӕттӕ кодта, уымӕй исты ауадзын! (Ис. 65:13, 14). Кӕм цӕрдзыстут ӕмӕ цӕуыл цӕудзыстут, ууыл дӕр, мыййаг, ахъуыды кодтат?

3. Цӕмӕй конгрессы программӕ нӕхицӕн дӕр ӕмӕ нӕ бинонтӕн пайда ӕрхӕсса, уымӕн нын цы баххуыс кӕндзӕн?

³ Цы нын баххуыс кӕндзӕн, цӕмӕй программӕйы рӕстӕг нӕ хъуыдытӕ ма дзӕгъӕл кӕной? Конгрессы бонты-иу алы ӕхсӕв дӕр дзӕбӕх баулӕфӕм. Раныхӕстӕ-иу кӕмӕн уа, уыдонмӕ-иу кӕсӕм. Алы стих дӕр-иу нӕ Библийы ссарӕм. Нӕ зӕрдӕмӕ-иу дзы цы хъуыдытӕ фӕцӕуа, уыдон-иу цыбыртӕй афыссӕм. Бинонтӕ кӕрӕдзийы фарсмӕ куы бадой, уӕд сӕ сывӕллӕттӕн ӕххуыс кӕндзысты, цӕмӕй программӕмӕ лӕмбынӕг хъусой (Ӕмб. 29:15). Хорз уаид, алы изӕр дӕр-иу уӕ бинонтимӕ куы аныхас кӕниккат, уӕ зӕрдӕмӕ дзы цы хъуыдытӕ фӕцыд, ууыл. Цӕмӕй конгрессы фӕстӕ дӕр уӕ бинонты циныл цин ӕфта, уый тыххӕй-иу бинонты ахуыры изӕр рахицӕн кӕнут рӕстӕг, ӕмӕ-иу аныхас кӕнут, конгрессы программӕйӕ уӕ бинонтӕм цы хъуыдытӕ хауы, ууыл.

4. Не ’мбырды иннӕты циныл цин ӕфтауын нӕ бон куыд у?

⁴ Иннӕты циныл цин ӕфтауӕм. Мах фӕнды, цӕмӕй иннӕты циныл дӕр цин бафта. Мыййаг, уе ’мбырды ис, конгресмӕ ацӕуынӕн баххуыс кӕнын кӕмӕн хъӕуы, ахӕм хъусынгӕнджытӕ? Дӕ бон сын у баххуыс кӕнын? (1 Иоан. 3:17, 18). Хистӕр нӕлгоймӕгтӕ, уӕлдайдӕр та уацамындон къордты цӕстдарджытӕ, хъуамӕ сӕ хъус дарой, цӕмӕй, ӕххуыс кӕй хъӕуы, уыдон рохуаты ма аззайой.

5. Хуынды гӕххӕттытӕ куыд уардзыстӕм? (Кӕс, уӕлдӕр цы рамкӕ ис, уый.)

⁵ Ацы аз дӕр та адӕмы хондзыстӕм конгресмӕ. Алы ӕмбырд дӕр хъуамӕ йӕ хуынды гӕххӕттытӕ иууылдӕр байуара. Фӕлӕ кӕд уӕ бинонтӕм хуынды гӕххӕттытӕ баззайа, уӕд-иу сӕ уемӕ конгресмӕ рахӕссут, цӕмӕй нын фадат куы фӕзына, уӕд сӕ адӕмӕн уарӕм. Фылдӕр амындтӕ райсдзыстӕм майрӕмбоны конгрессы. Уӕ бинонтӕн хуынды гӕххӕттытӕ иууылдӕр сӕ бон байуарын куы не суа, уӕд-иу сӕ конгрессы фыццаг бон уагдартӕм раттут. Хуынды гӕххӕттытӕй иу уӕхицӕн ныууадзут – бахъӕудзӕн уӕ хуыцаубон фӕстаг раныхасы рӕстӕг.

6. Конгрессы нӕ бон куыд у иннӕтыл хъуыды кӕнын?

⁶ Иннӕтыл хъуыды кӕнӕм. Абон бирӕтӕ сты «хиуарзон» ӕмӕ иннӕтыл нӕ хъуыды кӕнынц. Фӕлӕ не ’мчырыстӕтты ’хсӕн куы вӕййӕм ӕмӕ ныл кӕй хъуыды кӕнынц, уый куы фӕуынӕм, уӕд нын уый тынг ӕхсызгон вӕййы (2 Тим. 3:2). Конгресс кӕм вӕййы, уырдӕм уадзын райдайынц райсомӕй 8 сахатыл, ӕмӕ-иу мидӕмӕ бацӕудзыстӕм сабырӕй ӕмӕ ӕнӕхъӕлӕбайӕ. Иннӕтыл кӕй хъуыды кӕнӕм, уый равдисдзыстӕм, бынӕттӕ-иу куы ӕрцахсӕм, кӕимӕ цӕрӕм, иу машинӕйыл кӕимӕ ӕрбацыдыстӕм кӕнӕ Библи кӕимӕ ахуыр кӕнӕм, ӕрмӕстдӕр уыдонӕн. Сӕрдариуӕггӕнӕг ӕфсымӕр куы зӕгъа, ныртӕккӕ райхъуысдзӕн музыкӕ ӕмӕ уӕ бынӕттӕ ӕрцахсут, зӕгъгӕ, уӕд ӕм байхъусдзыстӕм, ӕмӕ нӕ бынӕтты сбаддзыстӕм. Стӕй хорз уыдзӕн, нӕ телефонтӕ куы ахуыссын кӕниккам, цӕмӕй иннӕты ма хъыгдарӕм. Иннӕтыл кӕй хъуыды кӕнӕм, уый ма равдисдзыстӕм, программӕйы рӕстӕг куы нӕ ныхас кӕнӕм, СМС-тӕ куы нӕ фыссӕм, куы нӕ хӕрӕм кӕнӕ ӕнӕхъуаджы куы нӕ рацу-бацу кӕнӕм, уӕд.

7. Конгрессы рӕстӕг нӕ бон куыд у нӕ кӕрӕдзийыл цин кӕнын?

⁷ Кӕрӕдзийыл-иу бацин кӕнӕм. Конгрессты рӕстӕг нын вӕййы диссаджы фадат, цӕмӕй не ’хсӕн цы иудзинад ӕмӕ уарзондзинад ис, уый равдисӕм (Пс. 133:1–3). Хорз нӕ уаид, «нӕ зӕрдӕтӕ уӕрӕх [куы] байгом кӕниккам» ӕмӕ-иу иннӕ ӕмбырдтӕй нӕ хотӕ ӕмӕ не ’фсымӕртыл куы бацин кӕниккам? (2 Кор. 6:13). Дӕ бон у дӕ разы ахӕм нысан сӕвӕрын, цӕмӕй-иу конгрессы алы бон дӕр, ӕппынкъаддӕр, иу адӕймагимӕ кӕнӕ иу бинонтимӕ базонгӕ уай? Уый бакӕнӕн ис сихор афон. Цӕмӕй-иу нӕ бон семӕ аныхас кӕнын суа, уый тыххӕй-иу хуыздӕр уаид немӕ иу гыццыл хӕринаг куы ӕрбахӕссиккам ӕмӕ-иу сихорӕй хӕринӕгтӕ ӕлхӕнынмӕ кӕнӕ та-иу хӕрынмӕ кафемӕ куы нӕ ацӕуиккам. Афтӕмӕй нын фӕзындзӕн ног ӕнувыд ӕмбӕлттӕ.

8. Конгрессы рӕстӕг нӕ бон цӕмӕй у баххуыс кӕнын, ӕмӕ уый тыххӕй цы ис саразӕн?

⁸ Куыд ӕхсызгон вӕййы нӕ хотӕ ӕмӕ не ’фсымӕртимӕ исты хъуыддӕгтӕ иумӕ кӕнын! Дӕ бон у конгрессы рӕстӕджы искӕцы хайады балӕггад кӕнын? Кӕнӕ дӕ бон у де ’мбырдимӕ, конгресс кӕм уа, уыцы бынат бафснайын? (Пс. 110:3). Кӕд дын нырма ницы бахӕс кодтой, уӕд дӕ бон у Ӕххуысгӕнджыты хайадмӕ бацӕуын. Ӕххуысгӕнджытӕ фылдӕр куы вӕййынц, уӕд куыст дӕр рӕвдздӕр ӕмӕ хъӕлдзӕгдӕр ацӕуы.

9. Конгрессы рӕстӕг нӕ уӕлдай тынгдӕр цӕмӕн хъӕуы кӕсын нӕ уагахастмӕ, стӕй нӕ конд ӕмӕ не ’ддаг бакастмӕ?

⁹ Нӕ уагахаст хъуамӕ уа фӕзминаг. Конгресдзаутӕ кӕй стӕм, уый хъуамӕ бӕрӕг уа ӕрмӕст программӕйы рӕстӕг нӕ, фӕлӕ программӕйы размӕ дӕр ӕмӕ йӕ фӕстӕ дӕр. Конгресс кӕм цӕуа, уыцы горӕты цӕрджытӕ хъуамӕ уыной, иннӕтӕй кӕй хицӕн кӕнӕм, уый (1 Пет. 2:12). Нӕ конд ӕмӕ не ’ддаг бакаст Йегъовӕйӕн хъуамӕ кад хӕссой алы ран дӕр – конгрессы, уынджы ӕмӕ кӕм ӕрлӕууыдыстӕм, уым (1 Тим. 2:9, 10). Нӕ плакеткӕтӕ нӕ уӕлӕ куы уой, уӕд адӕм уындзысты, Йегъовӕйы Ӕвдисӕнтӕ кӕй стӕм, уый, ӕмӕ нын уыдзӕн фадат, цӕмӕй сын конгрессы тыххӕй кӕнӕ нӕ Хуыцауы тыххӕй радзурӕм.

10. Нӕ бон цы у саразын, цӕмӕй гостиницӕты, ӕмдзӕрӕнты ӕмӕ кафеты кусджытӕ нӕ конгресмӕ хорз цӕстӕй ракӕсой?

¹⁰ Нӕ бон цы у саразын, цӕмӕй нӕм гостиницӕты, ӕмдзӕрӕнты ӕмӕ кафеты кусджытӕ хорз цӕстӕй ракӕсой? Цас нӕ хъӕуы, уымӕй фылдӕр номертӕ-иу ма ныззаказ кӕнӕм, науӕд иннӕ конгресдзаутӕм бынӕттӕ нал ӕрхаудзӕн, йе та гостиницӕтӕ се ’фтиагӕй фӕцух уыдзысты. Гостиницӕмӕ куы бацӕуӕм кӕнӕ фӕстӕмӕ уырдыгӕй куы цӕуӕм, ӕмӕ нын куы зӕгъой, иу гыццыл анхъӕлмӕ кӕсут, зӕгъгӕ, уӕд-иу фӕразондзинад ӕмӕ уӕздандзинад равдисӕм (Кол. 4:6). Нӕ бон ма у иу гыццыл ӕхца ныууадзын кафеты официанттӕн ӕмӕ гостиницӕйы кусджытӕн – нӕ дзаумӕттӕ нын чи хӕсса, нӕ номер нын чи ӕфснайа ӕмӕ нын ӕндӕр лӕггӕдтӕ чи кӕна, уыдонӕн.

11. Нӕ хорз уагахаст адӕмыл кӕй бандавы, уый цавӕр хабӕрттӕ ӕвдисынц?

¹¹ Конгрессы рӕстӕг нӕ хорз уагахаст адӕмыл куыд бандавы? Нӕ конгресс кӕм цыд, иу ахӕм агъуысты менеджер иу газеты ныффыста: «Уыцы адӕм сты тынг уӕздан. Ӕхсызгон нын вӕййы, алы аз дӕр нӕм кӕй ӕрцӕуынц, уый». Иннӕ хабар та уыд ахӕм: фарон иу лӕг иу гостиницӕйы йе ’хцадон фесӕфта. Уыцы гостиницӕйы та цард бирӕ хотӕ ӕмӕ ӕфсымӕртӕ. Ӕмӕ йын йе ’хцадон гостиницӕйы менеджермӕ куы фӕхӕццӕ кодтой, уӕд менеджер ӕхцадоны хицауӕн загъта: «Хорз у, ӕмӕ Йегъовӕйы Ӕвдисӕнтӕн конгресс ис, ӕмӕ гостиницӕ Ӕвдисӕнтӕй йедзаг у, ӕндӕра де ’хцадон нал ссардтаис».

12. Конгресс кӕй ӕрхӕццӕ кӕны, уымӕ гӕсгӕ нӕ нысан цы у ӕмӕ цӕмӕн?

¹² Ацы азы облӕстон конгресмӕ бирӕ нал баззад. Ӕфсымӕртӕн бирӕ рӕстӕг ӕмӕ хъарутӕ ацыд, цӕмӕй программӕ дӕр ӕмӕ бынат дӕр бацӕттӕ кӕной. Уӕдӕ нӕ разы нысан сӕвӕрӕм, цӕмӕй иу бон дӕр ма рауадзӕм, ӕмӕ мах дӕр фӕхайджын уӕм, Йегъовӕ ӕмӕ нын йӕ организаци цы бацӕттӕ кодтой, уымӕй. Не ’рхъуыдыдзинадӕй ӕмӕ нӕ хорз уагахастӕй иннӕты циныл цин бафтауӕм. Афтӕмӕй ды дӕр ӕмӕ иннӕтӕ дӕр зӕгъдзысты, фарон конгрессы тыххӕй иу сылгоймаг куыд загъта, афтӕ: «Мӕ царды амӕй диссагдӕр никуы ницы федтон!»

[Хицӕнгонд текст 4 фарсыл]

Ацы аз дӕр та ӕгас дунейы облӕстон конгресмӕ хуынды гӕххӕттытӕ уардзыстӕм

[Хицӕнгонд текст 6 фарсыл]

Нӕ конд ӕмӕ не ’ддаг бакаст Йегъовӕйӕн хъуамӕ кад хӕссой конгрессы, кӕм ӕрлӕууыдыстӕм, уым ӕмӕ кафеты

[Хицӕнгонд текст 7 фарсыл]

Бацархайӕм, цӕмӕй не ’рхъуыдыдзинадӕй ӕмӕ нӕ хорз уагахастӕй иннӕты циныл цин бафтауӕм

[Рамкӕ 4–7 фӕрстыл]

2011 азы облӕстон конгрессы фӕдыл зӕрдылдаринӕгтӕ

◼ Программӕйы рӕстӕг. Программӕ алы бон дӕр райдайдзӕн 9.20. Фӕлӕ дуӕрттӕ гом уыдзысты 8.00 сахатӕй. Музыкӕ куы райхъуыса, уӕд-иу нӕ бынӕтты сбадӕм, цӕмӕй программӕ ӕнӕкъуылымпыйӕ райдайа. Майрӕмбоны ӕмӕ сабаты программӕ фӕуыдзӕн 16.55, хуыцаубоны та – 15.40.

◼ Машинӕты лӕууӕндӕттӕ. Конгресстӕ кӕм фӕцӕуынц, уым вӕййы, машинӕтӕ кӕм фӕхъахъхъӕнынц, ахӕм лӕууӕндӕттӕ. Чи куыд цӕуа, афтӕ йӕ машинӕ афтид бынаты ӕвӕрдзӕн, ӕхца фидын дзы нӕ хъӕудзӕн. Инвалидтӕн машинӕ ӕвӕрынӕн цы бынат рахицӕн кӕндзысты, уым слӕууыны бар уыдзӕн, йӕ машинӕйыл инвалиды нысан кӕмӕн ис, ӕрмӕстдӕр уыдонӕн. Лӕууӕндӕтты бирӕ бынат кӕй нӕ вӕййы, уымӕ гӕсгӕ хорз уаид, алы машинӕйы дӕр цас цӕуы, уыйбӕрц адӕм-иу сыл куы ӕрбацӕуид.

◼ Бадӕн бынӕттӕ. Бынӕттӕ бацахсӕн ис, кӕимӕ цӕрыс, демӕ иу машинӕйыл чи ӕрбацыд кӕнӕ та Библи кӕимӕ ахуыр кӕныс, ӕрмӕстдӕр уыдонӕн (1 Кор. 13:5).

◼ Сихор. Курӕг уӕ стӕм, хӕринаг-иу уемӕ рахӕссут, цӕмӕй уӕ сихорафон хӕринаг ӕлхӕнынмӕ цӕуын ма хъӕуа. Ис ӕрбахӕссӕн, бандоны бын чи бацӕуа, ӕрмӕст ахӕм къухыхӕсгӕ холодильник. Конгресмӕ нӕй хӕссӕн авгын мигӕнӕнтӕ.

◼ Мысайнӕгтӕ. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй. Ныппарӕн сӕ ис, нӕхи Паддзахады залы ӕппӕтдунеон хъуыддагӕн цы асыкк ис, уым, кӕнӕ та, конгрессы цы ассыччытӕ вӕййы, уыдонӕй искӕцыйы.

◼ Ӕнӕнхъӕлӕджы исты куы ’рцӕуа. Конгрессы рӕстӕг искӕуыл исты куы ’рцӕуа, уӕд хъӕуы уагдартӕй искӕмӕн зӕгъын. Уый уайтагъд фӕхабар кӕндзӕн «Фыццаг ӕххуысмӕ». Уым чи лӕггад кӕны, уыдон дын баххуыс кӕндзысты ӕмӕ куы бахъӕуа, уӕд та 03 дӕр адзурдзысты. Афтӕмӕй, конгрессы «Фыццаг ӕххуысы» чи фӕлӕггад кӕны, уыдонмӕ гыццыл ницӕй тыххӕй дӕр дзыппыхӕсгӕ телефонтӕй нӕ дзурдзыстӕм.

◼ Хостӕ. Кӕд ӕдзух исты хостӕ фӕнуазыс, уӕд, хорз уаид, демӕ сӕ конгресмӕ куы рахӕссис, уымӕн ӕмӕ дзы хостӕ нӕ фӕдӕттынц.

◼ Къахыдарӕс. Алы аз дӕр къахыдарӕсы тыххӕй исты бӕллӕхтӕ ӕрцӕуы. Хуыздӕр уаид ахӕм дзабыртӕ скӕнын, цӕмӕй схизӕнтыл, асинтыл ӕмӕ решеткӕйӕ ’мбӕрзт рӕтты цӕуын тӕссаг ма уа.

◼ Сывӕллӕтты коляскӕтӕ ӕмӕ гыццыл тухгӕ бандӕттӕ. Нӕй сӕ хӕссӕн, конгресс кӕм цӕуа, уырдӕм. Фӕлӕ ныййарджытӕн сӕ бон у сӕ сывӕллонӕн ӕрбахӕссын, сӕ фарсмӕ бандоныл чи бацӕудзӕн, ахӕм гыццыл бандон.

◼ Парфюмери. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам ӕмӕ нӕхиуыл куы нӕ пырх кӕниккам тынг тӕфгӕнаг духитӕ, одеколонтӕ, дезодоранттӕ цӕмӕй, аллергийӕ кӕнӕ ӕндӕр низтӕ кӕмӕн ис, уыдоны ма хъыгдарой (1 Кор. 10:24).

◼ Фылдӕр базонын кӕй фӕнды. Конгрессы бонты куы фембӕлӕм, Библи хуыздӕр базонын кӕй фӕнды, ахӕм адӕймагыл, уӕд хъӕуы спайда кӕнын бланкӕй «Пожалуйста, посети этого человека», зӕгъгӕ (S-43). Хъусынгӕнджытӕм хъуамӕ конгрессы рӕстӕджы иу кӕнӕ дыууӕ ахӕм бланкы уа. Дзаг бланктӕ раттӕн уыдзӕн конгрессы литературӕйы хайадмӕ кӕнӕ та уый фӕстӕ де ’мбырды секретармӕ. (Кӕс 2009 азы ноябры «Нӕ хъусын кӕныны хъуыддаг», 4 ф.)

◼ Кафетӕ. Кафеты нӕ уаг ӕмӕ не ’гъдауӕй Йегъовӕйы ном кадджын кӕнӕм.

◼ Гостиницӕтӕ.

1. Цы хъӕуы, уымӕй фылдӕр номыртӕ-иу ма ныззаказ кӕнӕм, стӕй-иу нӕ хъус дарӕм, цӕмӕй дзы, цас ӕмбӕлы, уымӕй фылдӕр адӕм ма цӕра.

2. Кӕд, рагацау цы номыр ныззаказ кодтам, уый нӕ нал хъӕуы, уӕд уый тыххӕй уайтагъд хъӕуы гостиницӕмӕ фӕхабар кӕнын (Матф 5:37).

3. Нӕ дзаумӕттӕн-иу тележкӕ райсӕм, цӕттӕ нын куы уой, ӕрмӕстдӕр, уӕд. Куы дзы спайда кӕнӕм, уӕд та-иу ӕй йӕ бынатмӕ фӕхӕццӕ кӕнӕм, цӕмӕй йӕ иннӕтӕ дӕр райсой.

4. Хӕринаг-иу кӕнӕм, бар кӕм ис, ӕрмӕстдӕр уым.

5. Гостиницӕйы чи ’рлӕууы, уыдонӕн аходӕн, къофи ӕмӕ их цас ӕмбӕлы, уымӕй фылдӕр ма домӕм.

6. Гостиницӕйы кусджытимӕ ныхас кӕнгӕйӕ-иу бӕрӕг уӕд, Хуыцауы лӕггадгӕнджытӕ кӕй стӕм, уый. Уыдонӕн бирӕ куыст вӕййы, ӕмӕ нӕ фӕбузныг уыдзысты, фӕразон ӕмӕ ӕрхъуыдыджын куы уӕм, уӕд.

7. Цы цӕрӕнбынӕтты хыгъд нын раттынц, уым фыст вӕййы, гостиницӕйы номыры аргъ иу бонӕн. Кӕд дын уыцы аргъӕй фылдӕр фидын кӕнынц, уӕд-иу фидынмӕ ма фӕтагъд кӕн, фӕлӕ-иу уайтагъд фӕхабар кӕн, конгрессы цӕрӕнбынаты хайадмӕ.

8. Гостиницӕйы истӕмӕй куы фӕтыхсай, уӕд-иу ӕй цӕрӕнбынаты хайадӕн фехъусын кӕн.

9. Гостиницӕйы регистраци чи скӕна ӕмӕ кредитон картӕйӕ чи пайда кӕна, уыдоны хъус нӕ фӕнды иу хъуыддагмӕ ӕрдарын. Гостиницӕты арӕх кредитон картӕйӕ раздӕр сисынц ӕхца номыры тыххӕй, афтӕ ма, кӕд, мыййаг, исты зиан ӕрхӕссӕм, уымӕн ӕмӕ ӕндӕр хъуыддӕгтӕн. Уӕ бон уыцы ӕхца нӕ уыдзӕн райсӕн, цалынмӕ уӕ ацыдӕй цалдӕр боны нӕ рацӕуа, уӕдмӕ.

◼ Ӕххуыс конгрессы рӕстӕг. Конгресс нын ноджы стырдӕр циндзинад ӕрхӕсдзӕн, ӕфсымӕртӕн исты хъуыддаджы куы баххуыс кӕнӕм, уӕд (Хъуыд. 20:35). Истӕмӕй фӕкӕсын кӕй фӕнды, уыдоны бон у бацӕуын конгрессы хайадмӕ, «Ӕххуысгӕнджытӕ», зӕгъгӕ. Сывӕллӕтты бон дӕр у ӕххуыс кӕнын, ӕрмӕст сӕм сӕ ныййарджытӕй кӕнӕ хистӕртӕй исчи йӕ хъус куы дара, уӕд.

[Рамкӕ 5 фарсыл]

Куыд ис дӕттӕн хуынды гӕххӕтт?

Фӕхонын дӕ кӕй фӕнды, уыдон дӕхимӕ ныффысс. Зӕгъӕм, дӕ бинонты, дӕ хӕстӕджыты, дӕ сыхӕгты, де ’мкусджыты ӕмӕ ӕндӕрты. Хуынды гӕххӕтты фыццаг фарс у рӕсугъд арӕзт, ӕмӕ-иу ӕй афтӕ ратт, цӕмӕй йӕ адӕймаг уына. Зӕрдиагӕй-иу дзур. Сабат ӕмӕ хуыцаубоны хуынды гӕххӕттытӕ куы уарай, уӕд-иу дӕ бон у раттын брошюрӕтӕ дӕр. Стӕй хорз уаид, конгрессы размӕ бонты, хуынды гӕххӕтт кӕмӕн радтам, уыдонӕн уый сӕ зӕрдыл куы ӕрлӕууын кӕниккам ӕмӕ сын куы зӕгъиккам, сӕ бон кӕй у немӕ рацӕуын.