Нӕ облӕстон конгресстӕ – рӕстдзинадӕн диссаджы ӕвдисӕн
1. Израилӕгтӕ цы бӕрӕгбӕтты ӕмбырд кодтой, уым-иу цавӕр ахсджиаг хъуыддӕгтыл хъуыды кодтой ӕмӕ-иу ныхас кодтой?
1 Раджы заманты израилӕгтӕ афӕдз ӕртӕ хатты стыр бӕрӕгбӕтты ӕмбырд кодтой. Уыцы диссаджы бӕрӕгбӕттӕм хъуамӕ нӕлгоймӕгтӕ цыдаиккой, фӕлӕ-иу арӕх Иерусалиммӕ акодтой сӕ бинонты дӕр (Дык. з. 16:15, 16). Уыцы бӕрӕгбӕтты рӕстӕджы-иу адӕм хъуыды кодтой ӕмӕ ныхас кодтой Хуыцауы хъуыддӕгтыл. Уыцы хъуыддӕгтӕ цавӕр уыдысты? Зӕгъӕм, Йегъовӕ рӕдау ӕмӕ уарзӕгой Хуыцау кӕй у (Дык. з. 15:4, 5). Стӕй ма сӕ бон кӕй у сӕ ныфс дарын, разамынд сын кӕй дӕтдзӕн ӕмӕ сӕ кӕй хъахъхъӕндзӕн, ууыл (Дык. з. 32:9, 10). Израилӕгтӕн ма хъуамӕ сӕ цардӕй бӕрӕг уыдаид, Йегъовӕйы ном кӕй хӕссынц ӕмӕ йын йӕ рӕстаг закъӕттӕ кӕй ӕххӕст кӕнынц (Дык. з. 7:6, 11). Абон махӕн дӕр алы аз дӕр цы облӕстон конгресстӕ вӕййы, уыдонӕн дӕр сӕ нысан у ахӕм.
2. Конгрессы программӕйы фӕрцы Библийы рӕстдзинад ноджы хуыздӕр куыд бамбардзыстӕм?
2 Конгрессы программӕ рӕстдзинад ирддӕр кӕны. Облӕстон конгрессты ӕхсызгонӕй байхъусӕм раныхӕстӕм, бакӕсӕм драмӕтӕм, равдыстытӕм ӕмӕ интервьютӕм, ӕмӕ афтӕмӕй ноджы хуыздӕр бамбарӕм Библийы рӕстдзинад (Иоан. 17:17). Ацы аз нын цы конгресс уыдзӕн, уый бацӕттӕ кӕнынӕн бирӕ куыст цӕуы. Йегъовӕйы организаци цы программӕ цӕттӕ кӕны, уый пайда уыдзӕн, ӕппӕт дунейы дӕр цы хотӕ ӕмӕ ӕфсымӕртӕ ис, уыдонӕн (Матф. 24:45–47). Зӕрдиагӕй дӕ нӕ фӕнды, цытӕ дзы уыдзӕн, уыдӕттӕ фехъусын ӕмӕ фенын?
3. Цы аразын хъӕуы, цӕмӕй нын конгрессы программӕ пайда уа?
3 Кӕй зӕгъын ӕй хъӕуы, конгрессы ӕртӕ боны дӕр куы уӕм ӕмӕ лӕмбынӕг куы хъусӕм, уӕд нын стыр пайда уыдзӕн. Кӕд куыстӕй дӕхи нӕма ракуырдтай, уӕд дӕ хицауимӕ аныхас кӕн. Алы ӕхсӕв дӕр-иу хорз баулӕф, цӕмӕй дӕ бон уа программӕмӕ лӕмбынӕг хъусын. Бирӕтӕн лӕмбынӕг хъусын ӕнцондӕр вӕййы, раныхасы чи рацӕуы, уыцы ӕфсымӕрмӕ куы фӕкӕсынц ӕмӕ раныхас цыбыртӕй куы фӕфыссынц, уӕд. Бацархай, цӕмӕй дӕ телефон дӕхи дӕр ӕмӕ иннӕты дӕр ма хъыгдара. Хорз уаид, программӕйы рӕстӕг куы нӕ ныхас кӕнис, СМС-тӕ куы нӕ фыссис, куы нӕ хӕрис ӕмӕ куы нӕ нуазис.
4. Ныййарджытӕн сӕ бон цы у саразын, цӕмӕй сӕ сывӕллӕттӕ программӕмӕ лӕмбынӕг хъусой?
4 Сабаты азты-иу Халагъудты бӕрӕгбоны рӕстӕг израилӕгтӕ ӕрӕмбырд сты, цӕмӕй-иу Хуыцауы закъонмӕ байхъуыстаиккой. Сӕ сывӕллӕттӕ дӕр-иу уыдысты семӕ, цӕмӕй-иу уыдон дӕр байхъуыстаиккой ӕмӕ ахуыр кодтаиккой (Дык. з. 31:12). Куыд ӕхсызгон вӕййы, конгрессы бинонтӕ иумӕ куы фӕбадынц, программӕйы рӕстӕг сӕ сывӕллӕттӕ куы нӕ фӕфынӕй кӕнынц ӕмӕ лӕмбынӕг куы фӕхъусынц! Хорз уаид, алы изӕр дӕр-иу уӕ фыстытӕм куы ӕркӕсиккат ӕмӕ-иу куы аныхас кӕниккат, программӕйӕ уӕ зӕрдӕмӕ цы фӕцыд, ууыл. Библи куыд дзуры, афтӕмӕй «ӕнӕзонддзинад арф бады сывӕллоны зӕрдӕйы». Уымӕ гӕсгӕ хорз уаид, ныййарджытӕ сӕ хъус куы дариккой сӕ сывӕллӕттӕм, бынтон гыццыл чи нал у, уыдонмӕ дӕр, ӕмӕ сӕ сӕхи бар куы нӕ уадзиккой сихорафон дӕр ӕмӕ гостиницӕйы дӕр (Ӕмб. 22:15; 29:15).
5. Гостиницӕйы нын хорз ӕгъдау куы уа, уӕд рӕстдзинад куыд рӕсугъд кӕндзыстӕм?
5 Нӕ хорз ӕгъдауӕй рӕстдзинад рӕсугъд кӕнӕм. Конгресс кӕм фӕцӕуы, уым нӕ хорз ӕгъдауӕй рӕстдзинад фӕрӕсугъд кӕнӕм (Тит. 2:10). Гостиницӕты кусджытӕн ӕхсызгон вӕййы, цы уагӕвӕрдтӕ дзы ис, уыдон уазджытӕ куы феххӕст кӕнынц, фӕразон куы вӕййынц ӕмӕ сын сӕ фыдӕбонӕн куы фӕаргъ кӕнынц, уӕд (Кол. 4:6). Фарон иу Вефилӕй гостиницӕмӕ бынӕтты тыххӕй куы фӕдзырдтой, уӕд сын администратор загъта: «Ӕхсызгон нын вӕййы, уӕ адӕм нӕ гостиницӕйы куы ӕрлӕууынц, уымӕн ӕмӕ сымах стут ӕгъдауджын адӕм. Стӕй нӕ кусджытимӕ дӕр вӕййут уӕздан, ницы фехалут ӕмӕ ницы асӕттут».
6. Конгресс кӕм цӕуы, уыцы горӕты нӕ дарӕсӕй рӕстдзинад нӕ бон куыд у рӕсугъд кӕнын?
6 Плакеткӕтӕ ныл куы вӕййы, уӕд адӕм базонынц, конгресс кӕй цӕуы ӕмӕ нӕ иннӕ конгресдзаутӕ дӕр базонынц. Конгресс кӕм фӕцӕуы, уыцы горӕты цӕрджытӕ фенынц, плакеткӕтӕ кӕуыл вӕййы, уыдонӕн сӕ дарӕс аив ӕмӕ зӕрдӕмӕдзӕугӕ кӕй вӕййы, ӕмӕ сӕ конд ацы дунейы адӕмы кондӕй кӕй фӕхицӕн кӕны (1 Тим. 2:9, 10). Уымӕ гӕсгӕ хъуамӕ нӕ хъус дарӕм нӕ уынд ӕмӕ нӕ кондмӕ, ӕрмӕст конгрессы нӕ, фӕлӕ гостиницӕ кӕнӕ общежитийы регистраци куы фӕкӕнӕм, уӕд дӕр. Гостиницӕ кӕнӕ общежитимӕ шортикты ӕмӕ футболкӕты куы ӕрцӕуӕм, уӕд уый рӕсугъд нӕ уыдзӕн. Конгресс стадионы куы уа, уӕддӕр нӕ дарӕс хъуамӕ ӕгъдауыл дзурӕг уа. Конгрессы фӕстӕ кафе кӕнӕ ресторанмӕ цӕугӕйӕ нӕ ӕндӕр дарӕс скӕнын куы фӕнда, уӕд хъуамӕ нӕ зӕрдыл дарӕм, конгресдзаутӕ кӕй стӕм ӕмӕ куыдфӕнды конд кӕй ма хъуамӕ уӕм.
7. Конгрессы нын нӕ хотӕ ӕмӕ не ’фсымӕртимӕ цин кӕнынӕн цавӕр хорз фадат вӕййы?
7 Бӕрӕгбӕтты рӕстӕг-иу израилӕгтӕ цин кодтой, ӕндӕр рӕттӕй-иу чи ӕрцыд, уыдонимӕ-иу кӕй фембӕлдысты ӕмӕ-иу кӕй фӕныхӕстӕ кодтой, ууыл, уымӕн ӕмӕ афтӕмӕй кӕрӕдзимӕ ӕнгомдӕр кодтой (Хъуыд. 2:1, 5). Нӕ облӕстон конгрессты хорз рабӕрӕг вӕййы, Йегъовӕйӕн ӕмвӕнд-ӕмзондӕй кӕй лӕггад кӕнӕм. Нӕ «диссаджы дзӕнӕт» нын чи фены, уыдон арӕх дисы бафтынц (Пс. 133:1). Уымӕ гӕсгӕ хуыздӕр уыдзӕн, конгрессы рӕстӕг хӕринаг ӕлхӕнынмӕ куы никуыдӕм цӕуиккам, фӕлӕ-иу немӕ истытӕ куы рахӕссиккам, цӕмӕй-иу, нӕ фарсмӕ цы хотӕ ӕмӕ ӕфсымӕртӕ бада, уыдонимӕ аныхӕстӕ кӕнӕм.
8. Нӕ уавӕртӕ нӕ куы амоной, уӕд нӕ цӕй тыххӕй хъуамӕ фӕнда конгрессы балӕггад кӕнын?
8 Адӕм арӕх тынг бадис кӕнынц, нӕ конгресстӕ уаг ӕмӕ ӕгъдауыл кӕй ацӕуынц, ууыл, уӕлдайдӕр куы базонынц, уымӕн стыр ӕххуыс кӕй фӕвӕййынц барвӕндон лӕггадгӕнджытӕ. Дӕ бон у конгрессы рӕстӕг балӕггад кӕнын? (Пс. 110:3). Арӕх бирӕтӕ ӕгас бинонтӕй дӕр иумӕ балӕггад кӕнынц, цӕмӕй сӕ сывӕллӕтты сахуыр кӕной иннӕтӕн ӕххуыс кӕнын. Ӕфсӕрмыгӕнаг куы уай, уӕд конгрессы рӕстӕг лӕггад кӕнгӕйӕ иннӕ конгресдзаутимӕ базонгӕ уыдзынӕ. Иу хо дзуры: «Конгрессы мӕ бинонтӕ ӕмӕ ме ’мбӕлтты йеддӕмӕ ӕндӕр никӕй зыдтон. Фӕлӕ иннӕтимӕ ӕфснайынмӕ куы ӕрбацыдтӕн, уӕд бирӕ хотӕ ӕмӕ ӕфсымӕртимӕ базонгӕ дӕн. Уый мӕ зӕрдӕмӕ тынг фӕцыди!» Конгрессы искӕимӕ куы базонгӕ уӕм, уӕд нын уый стыр циндзинад ӕрхӕсдзӕн (2 Кор. 6:12, 13). Кӕд конгрессы никуы ӕххуыс кодтай, уӕд хистӕр нӕлгоймӕгтӕм бацу ӕмӕ сын дӕ фӕнды тыххӕй зӕгъ.
9. Адӕмы облӕстон конгресмӕ куыд хондзыстӕм?
9 Иннӕты хон, цӕмӕй рӕстдзинад фехъусой. Ацы хатт дӕр та облӕстон конгрессӕй ӕртӕ къуыри раздӕр уыдзӕн зиу ӕмӕ адӕмы конгресмӕ хондзыстӕм. Хорз уаид, ӕмбырдтӕ сӕ хуынды гӕххӕттытӕ иууылдӕр куы байуариккой. (Кӕс фӕлгӕты «Куыд ис дӕттӕн хуынды гӕххӕтт?») Хуынды гӕххӕттытӕй ма цы баззайа, уыдон-иу конгресмӕ ӕрбахӕссут. Байуарӕн сӕ уыдзӕн, конгресс кӕм цӕуа, уыцы горӕты.
10. Ӕрхӕсс цӕвиттонтӕ, зиуты фӕстӕ чидӕртӕ конгресмӕ кӕй ӕрбацыд, уымӕн.
10 Цымӕ зиуы фӕстӕ облӕстон конгресмӕ исчи ӕрбацӕудзӕн? Цӕвиттон, иу конгресмӕ ӕрбацыд иу къай ӕмӕ сын уагдартӕй иу баххуыс кодта бынӕттӕ ссарынӕн. Уыдон ын загътой, хуынды гӕххӕтт сын кӕй радтой ӕмӕ «сӕм тынг цымыдисаг кӕй фӕкаст». Конгресмӕ бафтыны тыххӕй машинӕйыл фӕцыдысты 320 км фылдӕр! Иу ран та нӕ хо хуынды гӕххӕттытӕ уӕрста хӕдзарӕй-хӕдзармӕ ӕмӕ дзы иу радта иу нӕлгоймагӕн. Хомӕ афтӕ фӕкаст, ӕмӕ уыцы нӕлгоймаджы фӕндыд конгрессы тыххӕй фылдӕр базонын ӕмӕ йемӕ хуынды гӕххӕттыл аныхас кодта. Цалдӕр боны фӕстӕ хо уыцы нӕлгоймаджы йе ’мбалимӕ конгрессы федта, ӕмӕ дзы алкӕмӕдӕр уыди фӕйнӕ ног публикацийы!
11. Облӕстон конгресстӕм цӕмӕн хъуамӕ цӕуӕм?
11 Йегъовӕ йӕ хӕларзӕрдӕйӕ израилӕгтӕн алы аз дӕр цы стыр бӕрӕгбӕттӕ бафӕдзӕхста кӕнын, уыдоны фӕрцы «йын ӕнаиппӕй ӕмӕ рӕстӕй лӕггад кодтой» (Йес. Н. 24:14). Афтӕ мах дӕр, алы аз дӕр облӕстон конгресмӕ кӕй фӕцӕуӕм, уый фӕрцы «рӕстдзинадыл фидар... хӕцӕм». Йегъовӕйы фӕнды, цӕмӕй сӕ ма цух кӕнӕм (3 Иоан. 3). Уӕдӕ, рӕстдзинад чи уарзы, уыдонӕй алкӕмӕндӕр Йегъовӕ раарфӕ кӕнӕд, цӕмӕй йӕ бон суа конгресмӕ ацӕуын ӕмӕ дзы пайда райсын!
[Хицӕнгонд текст 4 фарсыл]
Конгресс кӕм фӕцӕуы, уыцы горӕты нӕ хорз ӕгъдауӕй рӕстдзинад рӕсугъд кӕнӕм
[Хицӕнгонд текст 5 фарсыл]
Облӕстон конгрессӕй ӕртӕ къуыри раздӕр уыдзӕн зиу ӕмӕ адӕмы конгресмӕ хондзыстӕм
[Рамкӕ 3–6 фӕрстыл]
2012 азы облӕстон конгрессы фӕдыл зӕрдылдаринӕгтӕ
◼ Программӕйы рӕстӕг. Программӕ ӕртӕ боны дӕр райдайдзӕн 9.20. Фӕлӕ дуӕрттӕ гом уыдзысты 8.00. Ӕфсымӕр куы фехъусын кӕна, зӕгъгӕ, ныртӕккӕ музыкӕ райхъуысдзӕн, уӕд-иу нӕ бынӕтты сбадӕм, цӕмӕй программӕ ӕнӕкъуылымпыйӕ райдайа. Майрӕмбоны ӕмӕ сабаты программӕ фӕуыдзӕн 16.55, хуыцаубоны та – 15.40.
◼ Машинӕты лӕууӕндӕттӕ. Конгресстӕ кӕм фӕцӕуынц, уым вӕййы, машинӕтӕ кӕм фӕхъахъхъӕнынц, ахӕм лӕууӕндӕттӕ. Чи куыд цӕуа, афтӕ йӕ машинӕ афтид бынаты ӕвӕрдзӕн, ӕхца фидын дзы нӕ хъӕудзӕн. Инвалидтӕн машинӕ ӕвӕрынӕн цы бынат рахицӕн кӕндзысты, уым слӕууыны бар уыдзӕн, йӕ машинӕйыл инвалиды нысан кӕмӕн ис, ӕрмӕстдӕр уыдонӕн. Лӕууӕндӕтты бирӕ бынат кӕй нӕ вӕййы, уымӕ гӕсгӕ хорз уаид, алы машинӕйы дӕр цас цӕуы, уыйбӕрц адӕм-иу сыл куы ӕрбацӕуид.
◼ Бадӕн бынӕттӕ. Бынӕттӕ бацахсӕн ис, кӕимӕ цӕрыс, демӕ иу машинӕйыл чи ӕрбацыд кӕнӕ та Библи кӕимӕ ахуыр кӕныс, ӕрмӕстдӕр уыдонӕн (1 Кор. 13:5).
◼ Сихор. Курӕг уӕ стӕм, хӕринаг-иу уемӕ рахӕссут, цӕмӕй уӕ сихорафон хӕринаг ӕлхӕнынмӕ цӕуын ма хъӕуа. Ис ӕрбахӕссӕн, бандоны бын чи бацӕуа, ӕрмӕст ахӕм къухыхӕсгӕ холодильниктӕ. Конгресмӕ нӕй хӕссӕн авгын мигӕнӕнтӕ.
◼ Мысайнӕгтӕ. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй. Ныппарӕн сӕ ис, нӕхи Паддзахады залы ӕппӕтдунеон хъуыддагӕн цы асыкк ис, уым, кӕнӕ та, конгрессы цы асыччытӕ вӕййы, уыдонӕй искӕцыйы.
◼ Ӕнӕнхъӕлӕджы исты куы ’рцӕуа. Конгрессы рӕстӕг искӕуыл исты куы ’рцӕуа, уӕд хъӕуы уагдартӕй искӕмӕн зӕгъын. Уый уайтагъд фӕхабар кӕндзӕн «Фыццаг ӕххуысмӕ». Уым чи лӕггад кӕны, уыдон дын баххуыс кӕндзысты ӕмӕ куы бахъӕуа, уӕд та 03 дӕр адзурдзысты. Афтӕмӕй, конгрессы «Фыццаг ӕххуысы» чи фӕлӕггад кӕны, уыдонмӕ гыццыл ницӕй тыххӕй дӕр дзыппыхӕсгӕ телефонтӕй нӕ дзурдзыстӕм.
◼ Хостӕ. Кӕд ӕдзух исты хостӕ фӕнуазыс, уӕд хорз уаид, конгресмӕ сӕ демӕ куы рахӕссис, уымӕн ӕмӕ дзы хостӕ нӕ фӕдӕттынц. Хорз уаид, сӕкӕрнизӕй рынчын чи у, уыдон сӕ шприцтӕ куы нӕ ӕппариккой, конгресс кӕм цӕуы, уым бырондӕтты кӕнӕ гостиницӕйы бырондӕтты, уымӕн ӕмӕ, гӕнӕн ис, искӕй къухы фӕныхсой.
◼ Къахыдарӕс. Алы аз дӕр къахыдарӕсы тыххӕй исты бӕллӕхтӕ ӕрцӕуы. Хуыздӕр уаид ахӕм дзабыртӕ скӕнын, цӕмӕй схизӕнтыл, асинтыл ӕмӕ решеткӕйӕ ’мбӕрзт рӕтты цӕуын тӕссаг ма уа.
◼ Сывӕллӕтты коляскӕтӕ ӕмӕ гыццыл тухгӕ бандӕттӕ. Нӕй сӕ хӕссӕн, конгресс кӕм цӕуа, уырдӕм. Фӕлӕ ныййарджытӕн сӕ бон у сӕ сывӕллонӕн ӕрбахӕссын, сӕ фарсмӕ бандоныл чи бацӕудзӕн, ахӕм гыццыл бандон.
◼ Парфюмери. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам ӕмӕ нӕхиуыл куы нӕ пырх кӕниккам тынг тӕфгӕнаг духитӕ, одеколонтӕ, дезодоранттӕ цӕмӕй, аллергийӕ кӕнӕ ӕндӕр низтӕ кӕмӕн ис, уыдоны ма хъыгдарой (1 Кор. 10:24).
◼ Бланк «Пожалуйста, посети этого человека» (S-43). Конгрессы бонты куы фембӕлӕм, Библи хуыздӕр базонын кӕй фӕнды, ахӕм адӕймагыл, уӕд хъӕуы спайда кӕнын бланкӕй S-43. Хъусынгӕнджытӕм хъуамӕ конгрессы рӕстӕджы иу кӕнӕ дыууӕ ахӕм бланкы уа. Дзаг бланктӕ раттӕн уыдзӕн конгрессы литературӕйы хайадмӕ кӕнӕ та уый фӕстӕ де ’мбырды секретармӕ. (Кӕс 2011 азы майы «Нӕ хъусын кӕныны хъуыддаг», 3 ф.)
◼ Кафетӕ ӕмӕ ресторантӕ. Кафеты ӕмӕ ресторанты нӕ уаг ӕмӕ не ’гъдауӕй Йегъовӕйы ном кадджын кӕнӕм. Кӕд ӕмбӕлы, уӕд-иу иу гыццыл ӕхца официантӕн ныууадз.
◼ Гостиницӕтӕ.
1. Цы хъӕуы, уымӕй фылдӕр номыртӕ-иу ма ныззаказ кӕнӕм, стӕй-иу нӕ хъус дарӕм, цӕмӕй дзы, цас ӕмбӕлы, уымӕй фылдӕр адӕм ма цӕра.
2. Кӕд, рагацау цы номыр ныззаказ кодтам, уый нӕ нал хъӕуы, уӕд уый тыххӕй уайтагъд хъӕуы гостиницӕмӕ фӕхабар кӕнын (Матф 5:37).
3. Гостиницӕйы регистраци чи скӕна ӕмӕ кредитон картӕйӕ чи пайда кӕна, уыдоны хъус нӕ фӕнды иу хъуыддагмӕ ӕрдарын. Гостиницӕты арӕх кредитон картӕйӕ раздӕр сисынц ӕхца номыры тыххӕй, афтӕ ма, кӕд, мыййаг, исты зиан ӕрхӕссӕм, уымӕн ӕмӕ ӕндӕр хъуыддӕгтӕн. Уӕ бон уыцы ӕхца нӕ уыдзӕн райсӕн, цалынмӕ уӕ ацыдӕй цалдӕр боны нӕ рацӕуа, уӕдмӕ.
4. Нӕ дзаумӕттӕн-иу тележкӕ райсӕм, цӕттӕ нын куы уой, ӕрмӕстдӕр, уӕд. Куы дзы спайда кӕнӕм, уӕд та-иу ӕй йӕ бынатмӕ фӕхӕццӕ кӕнӕм, цӕмӕй йӕ иннӕтӕ дӕр райсой.
5. Кӕд ӕмбӕлы, уӕд-иу гостиницӕйы кусджытӕн иу гыццыл ӕхца авӕрӕм.
6. Хӕринаг-иу кӕнӕм, бар кӕм ис, ӕрмӕстдӕр уым.
7. Гостиницӕйы чи ’рлӕууы, уыдонӕн аходӕн, къофи ӕмӕ их цас ӕмбӕлы, уымӕй фылдӕр ма домӕм.
8. Гостиницӕйы кусджытимӕ ныхас кӕнгӕйӕ-иу бӕрӕг уӕд, Хуыцауы лӕггадгӕнджытӕ кӕй стӕм, уый. Уыдонӕн бирӕ куыст вӕййы, ӕмӕ нӕ фӕбузныг уыдзысты, фӕлмӕн, фӕразон ӕмӕ ӕрхъуыдыджын куы уӕм, уӕд.
9. Ныййарджытӕ хъуамӕ сӕ сывӕллӕтты иунӕгӕй ма уадзой мадӕр гостиницӕйы, мадӕр бассейны, мадӕр вестибюлы, мадӕр тренажерты залы ӕмӕ афтӕ дарддӕр.
10. Цы цӕрӕнбынӕтты хыгъд нын раттынц, уым фыст вӕййы, гостиницӕйы номыры аргъ иу бонӕн. Кӕд дын уыцы аргъӕй фылдӕр фидын кӕнынц, уӕд-иу фидынмӕ ма фӕтагъд кӕн, фӕлӕ-иу уайтагъд фӕхабар кӕн, конгрессы цӕрӕнбынаты хайадмӕ.
11. Гостиницӕйы истӕмӕй куы фӕтыхсай, уӕд-иу ӕй цӕрӕнбынаты хайадӕн фехъусын кӕн.
◼ Ӕххуыс конгрессы рӕстӕг. Истӕмӕй фӕкӕсын кӕй фӕнды, уыдоны бон у бацӕуын конгрессы «Ӕххуысгӕнджыты хайадмӕ». Сывӕллӕтты бон дӕр у ӕххуыс кӕнын, ӕрмӕст сӕм сӕ ныййарджытӕй кӕнӕ хистӕртӕй исчи йӕ хъус куы дара, уӕд.
[Рамкӕ 6 фарсыл]
Куыд ис дӕттӕн хуынды гӕххӕтт?
Фӕхонын дӕ кӕй фӕнды, уыдон дӕхимӕ ныффысс. Зӕгъӕм, дӕ бинонты, дӕ хӕстӕджыты, дӕ сыхӕгты, де ’мкусджыты ӕмӕ ӕндӕрты. Хуынды гӕххӕтты фыццаг фарс у рӕсугъд арӕзт, ӕмӕ-иу ӕй афтӕ ратт, цӕмӕй йӕ адӕймаг уына. Зӕрдиагӕй-иу дзур. Сабат ӕмӕ хуыцаубоны хуынды гӕххӕттытӕ куы уарай, уӕд дӕ бон уыдзӕн раттын брошюрӕтӕ дӕр. Стӕй хорз уаид, конгрессы размӕ бонты, хуынды гӕххӕтт кӕмӕн радтам, уыдонӕн уый сӕ зӕрдыл куы ӕрлӕууын кӕниккам ӕмӕ сын куы зӕгъиккам, сӕ бон кӕй у немӕ рацӕуын.