Хуыцауӕн кад чи хӕссы, ахӕм уаг ӕмӕ ’гъдау
1. Облӕстон конгрессы рӕстӕг Йегъовӕйы Ӕвдисӕнты цӕй фӕрцы базонынц?
1 Облӕстон конгресмӕ куы фӕцӕуӕм, уӕд нӕ адӕм ӕнцонтӕй базонынц. Конгресстӕ кӕм вӕййы, уыцы горӕттӕй бирӕты бынӕттон хабӕртты фехъусын кӕнынц, зӕгъгӕ, нӕ горӕты Йегъовӕйы Ӕвдисӕнтӕн ис конгресс. Гостиницӕты, кафеты ӕмӕ ресторанты вӕййы бирӕ конгресдзаутӕ, ӕмӕ сӕ бынӕттон цӕрджытӕ базонынц сӕ плакеткӕтӕй. Ацы зӕрдылдаринӕгты фӕрцы нӕ бон уыдзӕн нӕ уаг ӕмӕ не ’гъдауӕй Хуыцауӕн кад хӕссын (1 Пет. 2:12).
2. Конгрессы рӕстӕг нӕ бон куыд у нӕ уӕлӕдарӕсӕй Хуыцауӕн кад хӕссын?
2 Нӕ уӕлӕдарӕс. Кӕй зӕгъын ӕй хъӕуы, конгрессы рӕстӕг нӕ дарӕс хъуамӕ ӕфсармыл дзурӕг уа. Фӕлӕ конгрессы фӕстӕ гостиницӕйы, кафейы, рестораны кӕнӕ дуканийы куы вӕййӕм, уӕд куыд конд вӕййӕм, уый адӕмы зӕрдӕтӕ тынгдӕр бацагайы. Кӕд бӕрӕгбон арӕзт нӕ вӕййӕм, уӕддӕр хъуамӕ нӕ уӕлӕдарӕс уа, чырыстонӕн куыд ӕмбӕлы, афтӕ – ӕфсармыл дзурӕг ӕмӕ аив. Адӕм хъуамӕ уыной, иннӕтӕй кӕй хицӕн кӕнӕм, уый (Ром. 12:2). Стӕй ма хъуамӕ нӕ уӕлӕ уой нӕ плакеткӕтӕ дӕр. Уый фӕрцы нын хъусын кӕнынӕн фылдӕр фадӕттӕ уыдзӕн ӕмӕ-иу иннӕ конгресдзауты дӕр базондзыстӕм.
3. Нӕ бон куыд у фӕразондзинад ӕмӕ уӕздандзинад равдисын?
3 Фӕразондзинад ӕмӕ уӕздандзинад. Ацы дунейы бирӕтӕ сты хиуарзон ӕмӕ хорздзинадӕн нӕ аргъ кӕнынц. Уымӕ гӕсгӕ фӕразон ӕмӕ уӕздан куы уӕм, уӕд иннӕтӕн, зӕгъӕм, гостиницӕйы, кафейы кӕнӕ рестораны кусджытӕн уый уыдзӕн тынг ӕхсызгон (2 Тим. 3:1–5). Конгрессы бынӕттӕ куы ахсӕм кӕнӕ ног публикаци райсынмӕ рады куы лӕууӕм, уӕд хъуамӕ хъуыды кӕнӕм нӕхи пайдайыл нӕ, фӕлӕ иннӕты пайдайыл (1 Кор. 10:23, 24). Фыццаг хатт конгрессы чи уыд, ахӕм нӕлгоймаг загъта: «Уыцы бон конгрессы цы дзырдтой, уыдӕттӕй ӕппындӕр ницы бахъуыды кодтон, фӕлӕ, Йегъовӕйы Ӕвдисӕнтӕ сӕхи куыд дардтой, уый абон дӕр хъуыды кӕнын».
4. Нӕ уавӕртӕм гӕсгӕ нӕ бон куы уа, уӕд конгрессы рӕстӕг цӕмӕн хъуамӕ ӕххуыс кӕнӕм?
4 Цӕттӕ стӕм ӕххуыс кӕнынмӕ. Чырыстӕттӕ бӕрӕг дарынц, хорз хъуыддӕгтӕ аразынмӕ цӕттӕ кӕй сты, уымӕй (Пс. 110:3). Дӕ бон у конгрессы баххуыс кӕнын? Иу конгрессы размӕ ӕфснайынмӕ ’рбацыд 600 ӕфсымӕр ӕмӕ хойы. Конгрессӕн цы агъуыст баххуырстой, уым чи куыста, уыдон загътой: «Ахӕм диссаг нӕ цӕргӕ-цӕрӕнбонты никуыма федтам! Уырнгӕ дӕр нӕ нӕ кодта, уыйбӕрц адӕм ӕфснайынмӕ кӕй ӕрбацыд». Мах зӕрдиагӕй ӕнхъӕлмӕ кӕсӕм 2013 азы облӕстон конгресмӕ – уӕд ӕрмӕст хъусгӕ ӕмӕ ахуыр нӕ кӕндзыстӕм, фӕлӕ ма Хуыцауӕн кад дӕр хӕсдзыстӕм.
[Рамкӕ 3–6 фӕрстыл]
2013 азы облӕстон конгрессы фӕдыл зӕрдылдаринӕгтӕ
◼ Программӕйы рӕстӕг. Программӕ ӕртӕ боны дӕр райдайдзӕн 9.20. Дуӕрттӕ гом уыдзысты 8.00. Ӕфсымӕр куы фехъусын кӕна, зӕгъгӕ, ныртӕккӕ музыкӕ райхъуысдзӕн, уӕд-иу нӕ бынӕтты сбадӕм, цӕмӕй программӕ ӕнӕкъуылымпыйӕ райдайа. Майрӕмбоны ӕмӕ сабаты программӕ фӕуыдзӕн 16.50, хуыцаубоны та – 15.35.
◼ Машинӕты лӕууӕндӕттӕ. Чи куыд цӕуа, афтӕ йӕ машинӕ афтид бынаты ӕвӕрдзӕн, ӕхца фидын дзы нӕ хъӕудзӕн. Чи зоны, лӕууӕндӕтты алкӕй фаг бынат ма уа, уымӕ гӕсгӕ хорз уаид, алы машинӕйы дӕр цас цӕуы, уыйбӕрц адӕм-иу сыл куы ӕрбацӕуид. Инвалидтӕн машинӕ ӕвӕрынӕн цы бынат рахицӕн кӕндзысты, уым слӕууыны бар уыдзӕн, йӕ машинӕйыл инвалиды нысан кӕмӕн ис, ӕрмӕстдӕр уыдонӕн.
◼ Бадӕн бынӕттӕ. Бынӕттӕ бацахсӕн ис, кӕимӕ цӕрыс, демӕ иу машинӕйыл чи ӕрбацыд кӕнӕ та Библи кӕимӕ ахуыр кӕныс, ӕрмӕстдӕр уыдонӕн. Ацӕргӕтӕ ӕмӕ инвалидтӕн цы бынӕттӕ вӕййы, уыдон бирӕ кӕй не сты, уымӕ гӕсгӕ фадат нӕ вӕййы, цӕмӕй сӕ бинонтӕ се ’ппӕт дӕр семӕ сбадой. Уӕ хорзӕхӕй, ахӕм бынӕтты-иу ма сбадут (1 Кор. 13:5).
◼ Сихор. Курӕг уӕ стӕм, хӕринаг-иу уемӕ рахӕссут, цӕмӕй уӕ сихорафон хӕринаг ӕлхӕнынмӕ цӕуын ма хъӕуа. Ис ӕрбахӕссӕн, бандоны бын чи бацӕуа, ӕрмӕст ахӕм къухыхӕсгӕ холодильниктӕ. Конгресмӕ нӕй хӕссӕн авгӕй конд мигӕнӕнтӕ.
◼ Мысайнӕгтӕ. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй.
◼ Хостӕ. Кӕд ӕдзух исты хостӕ фӕнуазыс, уӕд хорз уаид, конгресмӕ сӕ демӕ куы рахӕссис, уымӕн ӕмӕ дзы хостӕ нӕ фӕдӕттынц. Хорз уаид, сӕкӕрнизӕй рынчын чи у, уыдон, конгресс кӕм цӕуы кӕнӕ цы гостиницӕйы ӕрлӕууыдысты, уым бырондӕтты сӕ шприцтӕ куы нӕ ’ппариккой, уымӕн ӕмӕ, гӕнӕн ис, искӕй къухы фӕныхсой.
◼ Къахыдарӕс. Алы аз дӕр къахыдарӕсы тыххӕй, уӕлдайдӕр та бӕрзонд каблукыл чи у, уыдоны тыххӕй исты бӕллӕхтӕ ӕрцӕуы. Хуыздӕр уаид ахӕм дзабыртӕ скӕнын, цӕмӕй схизӕнтыл, асинтыл ӕмӕ решеткӕйӕ ’мбӕрзт рӕтты цӕуын тӕссаг ма уа.
◼ Сывӕллӕтты коляскӕтӕ ӕмӕ гыццыл тухгӕ бандӕттӕ. Нӕй сӕ хӕссӕн, конгресс кӕм цӕуа, уырдӕм. Фӕлӕ ныййарджытӕн сӕ бон у сӕ сывӕллонӕн ӕрбахӕссын, гыццыл сывӕллӕттӕн машинӕйы цы бадӕнтӕ вӕййы, уыдон ӕмӕ сӕ сӕ цуры бандоныл сӕвӕрын.
◼ Парфюмери. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам ӕмӕ нӕхиуыл куы нӕ пырх кӕниккам тынг тӕфгӕнаг духитӕ, одеколонтӕ кӕнӕ дезодоранттӕ, цӕмӕй, аллергия кӕнӕ ӕндӕр ахӕм низтӕ кӕмӕн ис, уыдоны ма хъыгдарой (1 Кор. 10:24).
◼ Бланк «Пожалуйста, посети этого человека» (S-43). Библи хуыздӕр базонын кӕй фӕнды, ахӕм адӕймагыл конгрессы бонты куы фембӕлӕм, уӕд хъӕуы байдзаг кӕнын бланк S-43. Бланктӕ раттӕн уыдзӕн конгрессы литературӕйы хайадмӕ кӕнӕ та, уый фӕстӕ, де ’мбырды секретармӕ.
◼ Кафетӕ ӕмӕ ресторантӕ. Кафеты ӕмӕ ресторанты нӕ уаг ӕмӕ не ’гъдауӕй Йегъовӕйы ном кадджын кӕнӕм. Нӕ уӕлӕдарӕс хъуамӕ уа, чырыстонӕн куыд ӕмбӕлы, ахӕм. Кӕд ӕмбӕлы, уӕд-иу официантӕн иу гыццыл ӕхца ныууадз.
◼ Гостиницӕтӕ.
1. Цас хъӕуы, уымӕй фылдӕр номыртӕ-иу ма ныззаказ кӕнӕм, стӕй-иу нӕ хъус дарӕм, цӕмӕй дзы, цас ӕмбӕлы, уымӕй фылдӕр адӕм ма цӕра.
2. Рагацау цы номыр ныззаказ кодтам, уый нӕ кӕд нал хъӕуы, уӕд уый тыххӕй уайтагъд хъӕуы гостиницӕмӕ фӕхабар кӕнын (Матф 5:37). Стӕй базон, дӕ заказ дын кӕй систой. Заказ ивгӕйӕ сӕм 48 сахатӕй къаддӕр рӕстӕгмӕ куы фӕхабар кӕнай, уӕд дын де ’хца нал ратдзысты.
3. Гостиницӕйы регистраци чи скӕна ӕмӕ кредитон картӕйӕ чи пайда кӕна, уыдоны хъус нӕ фӕнды иу хъуыддагмӕ ӕрдарын. Арӕх гостиницӕты номыры тыххӕй ӕхца кредитон картӕйӕ раздӕр сисынц, стӕй ма, мыййаг, исты зиан куы ӕрхӕссӕм, уымӕн ӕмӕ ӕндӕр хъуыддӕгтӕн. Уӕ бон уыцы ӕхца райсӕн нӕ уыдзӕн, цалынмӕ уӕ ацыдӕй цалдӕр боны нӕ рацӕуа, уӕдмӕ.
4. Нӕ дзаумӕттӕн-иу тележкӕ райсӕм, цӕттӕ нын куы уой, ӕрмӕстдӕр, уӕд. Стӕй-иу ӕй йӕ бынатмӕ фӕхӕццӕ кӕнӕм, цӕмӕй йӕ иннӕтӕ дӕр райсой.
5. Кӕд ӕмбӕлы, уӕд-иу гостиницӕйы кусджытӕн иу гыццыл ӕхца авӕрӕм, нӕ багаж нын куы ӕрбахӕссой кӕнӕ та нын нӕ номер куы бафснайой, уӕд.
6. Хӕринаг-иу кӕнӕм, бар кӕм ис, ӕрмӕстдӕр уым.
7. Гостиницӕйы чи ’рлӕууы, уыдонӕн аходӕн, къофи ӕмӕ их цас ӕмбӕлы, уымӕй фылдӕр ма домӕм.
8. Гостиницӕйы кусджытимӕ ныхас кӕнгӕйӕ-иу бӕрӕг уӕд, Хуыцауы лӕггадгӕнджытӕ кӕй стӕм, уый. Уыдонӕн бирӕ куыст вӕййы, ӕмӕ нӕ фӕбузныг уыдзысты, фӕлмӕн, фӕразон ӕмӕ ӕрхъуыдыджын куы уӕм, уӕд.
9. Ныййарджытӕ хъуамӕ сӕ сывӕллӕтты иунӕгӕй ма уадзой мадӕр гостиницӕйы, мадӕр бассейны, мадӕр вестибюлы, мадӕр тренажерты залы ӕмӕ афтӕ дарддӕр.
10. Цы цӕрӕнбынӕтты хыгъд нын раттынц, уым фыст вӕййы, гостиницӕйы номыры аргъ иу бонӕн. Кӕд дын уыцы аргъӕй фылдӕр фидын кӕнынц, уӕд-иу фидынмӕ ма фӕтагъд кӕн, фӕлӕ-иу уайтагъд фӕхабар кӕн, конгрессы цӕрӕнбынаты хайадмӕ.
11. Гостиницӕйы истӕмӕй куы фӕтыхсай, уӕд-иу ӕй цӕрӕнбынаты хайадӕн фехъусын кӕн.
◼ Ӕххуыс конгрессы рӕстӕг. Истӕмӕй фӕкӕсын кӕй фӕнды, уыдоны бон у бацӕуын конгрессы «Ӕххуысгӕнджыты хайадмӕ». Сывӕллӕтты бон дӕр у ӕххуыс кӕнын, ӕрмӕст сӕм сӕ ныййарджытӕй кӕнӕ хистӕртӕй исчи йӕ хъус куы дара, уӕд.