Конгрессы фӕдыл зӕрдылдаринӕгтӕ
Программӕйы рӕстӕг. Программӕ ӕртӕ боны дӕр райдайдзӕн 9.20. Дуӕрттӕ гом уыдзысты 8.00. Музыкӕ куы райхъуыса, уӕд-иу нӕ бынӕтты сбадӕм, цӕмӕй-иу программӕ, куыд ӕмбӕлы, афтӕ райдайа. Майрӕмбоны ӕмӕ сабаты программӕ фӕуыдзӕн иу-17.00, хуыцаубоны та – иу-16.00.
Йегъовӕйы «зарӕгӕй кадджын кӕнӕм». Рагзаманты Йегъовӕйы лӕггадгӕнджытӕ Хуыцауы кадджын кодтой зарджытӕй. Ӕмӕ абон дӕр музыкӕ нӕ лӕггады ахсы ахсджиаг бынат (Пс. 28:7). Нӕ регионалон конгрессы райсомы ӕмӕ фӕссихоры программӕ райдайы музыкӕйӕ. Уыцы музыкӕ ӕнӕуи нӕ фӕцӕгъды. Уый фӕрцы нӕ бон у Йегъовӕйы тыххӕй фылдӕр базонын ӕмӕ йын куыд ӕмбӕлы, афтӕ лӕггад кӕнын. Уӕдӕ конгрессы сӕрдариуӕггӕнӕг ӕфсымӕр куы зӕгъа, ныртӕккӕ музыкӕ райхъуысдзӕн, зӕгъгӕ, уӕд-иу мауал ныхас кӕнӕм, фӕлӕ-иу нӕ бынӕтты сбадӕм ӕмӕ-иу музыкӕмӕ хъусӕм. Афтӕмӕй равдисдзыстӕм, Хъахъхъӕнӕн Мӕсыджы Ӕхсӕнады оркестры фыдӕбонӕн кӕй аргъ кӕнӕм. Афӕдз дыууӕ хатты зӕххы алы къуымтӕй не ’фсымӕртӕ ӕмӕ нӕ хотӕ Паттерсонмӕ (штат Нью-Йорк) сӕхи хардзӕй ӕрцӕуынц, цӕмӕй-иу, не ’мбырдты чи фӕцӕгъды, ахӕм рӕсугъд музыкӕ ныффыссой. Музыкӕмӕ лӕмбынӕг куы байхъусӕм, уӕд хъуамӕ Паддзахады зарджытӕй иумӕ Йегъовӕйы скадджын кӕнӕм.
Машинӕты лӕууӕндӕттӕ. Чи куыд цӕуа, афтӕ йӕ машинӕ афтид бынаты ӕвӕрдзӕн, ӕхца фидын дзы нӕ хъӕудзӕн. Чи зоны, лӕууӕндӕтты алкӕй фаг бынат ма уа, ӕмӕ уымӕ гӕсгӕ хорз уаид, алы машинӕйы дӕр цас цӕуы, уыйбӕрц адӕм-иу сыл куы ӕрбацӕуид. Инвалидтӕн машинӕ ӕвӕрынӕн цы бынат рахицӕн кӕндзысты, уым слӕууыны бар уыдзӕн, йӕ машинӕйыл инвалиды нысан кӕмӕн ис, ӕрмӕстдӕр уыдонӕн.
Бадӕн бынӕттӕ. Конгресс кӕм уыдзӕн, уым-иу алы райсом дӕр дуӕрттӕ куы бакӕной, уӕд-иу, уӕ хорзӕхӕй, хуыздӕр бынат бацахсынмӕ ма фӕут, цыма иннӕтимӕ ерыс кӕнут, уыйау. Уӕ хорзӕхӕй, иннӕтыл дӕр хъуыды кӕнут. Иннӕтӕн куыд хуыздӕр уа, ууыл кӕй архайӕм, уымӕй ӕвдисӕм, ӕцӕг чырыстӕттӕ кӕй стӕм, ӕмӕ уый чи уыны, уыдоны дӕр бафӕнды Хуыцауы скадджын кӕнын (Иоан. 13:34, 35; 1 Кор. 13:5; 1 Пет. 2:12). Бынӕттӕ бацахсӕн ис, кӕимӕ цӕрыс, демӕ иу машинӕйыл чи ӕрбацыд кӕнӕ та Библи кӕимӕ ахуыр кӕныс, ӕрмӕстдӕр уыдонӕн. Уӕ хорзӕхӕй, уӕ фарсмӕ бандӕттыл мацы ӕвӕрут, цӕмӕй иннӕтӕ афтид бынӕттӕ уыной. Ацӕргӕтӕн ӕмӕ инвалидтӕн цы бынӕттӕ вӕййы, уыдон бирӕ кӕй не сты, уымӕ гӕсгӕ ӕрмӕстдӕр иу кӕнӕ дыууӕ адӕймагӕн у сӕ бон йемӕ сбадын, цӕмӕй йын ӕххуыс кӕной.
Нӕ уӕлӕдарӕс. Конгрессы рӕстӕг нӕ дарӕс хъуамӕ ӕфсармыл дзурӕг уа, ӕмӕ хъуамӕ ма уӕм, ацы дунейы адӕм цы ӕнахуыр конд вӕййынц, ахӕм конд (1 Тим. 2:9). Гостиницӕмӕ куы ’рцӕуӕм ӕмӕ уырдыгӕй куы цӕуӕм, конгрессы размӕ кӕнӕ йӕ фӕстӕ нӕ рӕстӕг искуы куы ’рвитӕм, уӕд дӕр нӕ уӕлӕдарӕс хъуамӕ уа, чырыстонӕн куыд ӕмбӕлы, афтӕ – ӕфсармыл дзурӕг ӕмӕ аив. Уӕд конгрессы плакеткӕтимӕ сӕрыстырӕй цӕудзыстӕм ӕмӕ нын хъусын кӕнынӕн фадат куы фӕзына, уӕд нӕ фефсӕрмы уыдзыстӕм. Афтӕмӕй нӕ конд ӕмӕ нӕ уындӕй, стӕй нӕ хорз ӕгъдауӕй сыгъдӕгзӕрдӕ адӕмы ӕргом здахдзыстӕм Библийы цардирвӕзынгӕнӕн хабармӕ ӕмӕ Йегъовӕйы зӕрдӕ дӕр рухс кӕндзыстӕм (Соф. 3:17).
Телефонтӕ ӕмӕ планшеттӕ. Программӕйы рӕстӕг телефонтӕн ӕмӕ планшеттӕн сӕ звук хъӕуы ахуыссын кӕнын, цӕмӕй иннӕты ма хъыгдарой. Программӕ видеокамерӕйӕ кӕнӕ ӕндӕр истӕмӕй куы исӕм, уӕд-иу иннӕтыл дӕр хъуыды кӕнӕм ӕмӕ сӕ ма хъыгдарӕм. Стӕй ма иннӕтыл хъуыды кӕндзыстӕм, программӕйы рӕстӕг СМС-тӕ ӕмӕ Интернеты уылты писмотӕ ӕнӕхъуаджы куы не ’рвитӕм, уӕд.
Сихор. Уӕ хорзӕхӕй, хӕринаг-иу уемӕ рахӕссут, цӕмӕй уӕ сихорафон хӕринаг ӕлхӕнынмӕ цӕуын ма бахъӕуа. Ис ӕрбахӕссӕн, бандоны бын чи бацӕуа, ӕрмӕст ахӕм гыццыл сумкӕ-холодильник. Конгресмӕ нӕй хӕссӕн авгӕй конд мигӕнӕнтӕ.
Мысайнӕгтӕ. Конгрессы тыххӕй бузныг кӕй стӕм, уый нӕ бон у равдисын, ӕппӕтдунеон хъуыддагӕн нӕ Паддзахады залы кӕнӕ конгрессы мысайнӕгты асыччы ӕхца куы ныппарӕм, уымӕй.
Хостӕ. Кӕд ӕдзух исты хостӕ фӕнуазыс, уӕд хорз уаид, конгресмӕ сӕ демӕ куы ӕрбахӕссис, уымӕн ӕмӕ дзы хостӕ нӕ фӕдӕттынц. Сӕкӕрнизӕй рынчын чи у, уыдон, конгресс кӕм цӕуы, уым бырондӕтты сӕ шприцтӕ ма ӕппарӕнт, уымӕн ӕмӕ, гӕнӕн ис, искӕй къухы фӕныхсой.
Къахыдарӕс. Уӕ хорзӕхӕй, уӕлдай лӕмбынӕг ут, цӕмӕй мацы фыдбылыз ӕрцӕуа ӕмӕ ма фӕбырат кӕнӕ ма фӕкӕлат. Алы аз дӕр къахыдарӕсы тыххӕй, уӕлдайдӕр та, бӕрзонд каблуктыл чи у, ахӕм къахыдарӕсы тыххӕй, исты бӕллӕхтӕ ӕрцӕуы. Хуыздӕр уаид ахӕм дзабыртӕ скӕнын, цӕмӕй асинтыл хизын ӕмӕ решеткӕйӕ ’мбӕрзт рӕтты цӕуын тӕссаг ма уа.
Сывӕллӕтты коляскӕтӕ ӕмӕ гыццыл тухгӕ бандӕттӕ. Нӕй сӕ хӕссӕн, конгресс кӕм цӕуа, уырдӕм. Фӕлӕ ныййарджытӕн сӕ бон у сӕ сывӕллонӕн ӕрбахӕссын, гыццыл сывӕллӕттӕн машинӕйы чи вӕййы, ахӕм бадӕнтӕ ӕмӕ сӕ сӕ цуры бандоныл сӕвӕрын.
Парфюмери. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам ӕмӕ нӕхиуыл куы нӕ пырх кӕниккам, тынг тӕф чи кӕны, ахӕм духитӕ, одеколонтӕ кӕнӕ дезодоранттӕ, цӕмӕй, аллергийӕ кӕнӕ ӕндӕр ахӕм низтӕ кӕмӕн ис, уыдоны ма хъыгдарой (1 Кор. 10:24).
Бланк «Пожалуйста, посети этого человека» (S-43). Библи хуыздӕр базонын кӕй фӕнды, ахӕм адӕймагыл конгрессы бонты куы фембӕлӕм, уӕд хъӕуы байдзаг кӕнын бланк S-43. Бланктӕ раттӕн уыдзӕн конгрессы литературӕйы хайадмӕ кӕнӕ та уый фӕстӕ де ’мбырды секретармӕ.
Кафетӕ ӕмӕ ресторантӕ. Кафеты ӕмӕ ресторанты нӕ уаг ӕмӕ не ’гъдауӕй Йегъовӕйы ном кадджын кӕнӕм. Нӕ уӕлӕдарӕс хъуамӕ уа, чырыстонӕн цавӕр ӕмбӕлы, ахӕм. Кӕд ӕмбӕлы, уӕд-иу официантӕн иу гыццыл ӕхца ныууадз.
Гостиницӕтӕ.
Цас хъӕуы, уымӕй фылдӕр номыртӕ-иу ма ныззаказ кӕнӕм, стӕй-иу бацархайӕм, цӕмӕй дзы, цас ӕмбӕлы, уымӕй фылдӕр адӕм ма цӕра.
Рагацау цы номыр ныззаказ кодтай, уый дӕ кӕд нал хъӕуы, уӕд уый тыххӕй уайтагъд гостиницӕмӕ фӕхабар кӕн (Матф 5:37). Стӕй базон, дӕ заказ дын кӕй систой. Заказ ивгӕйӕ сӕм 48 сахатӕй къаддӕр рӕстӕгмӕ куы фӕхабар кӕнай, уӕд дын де ’хца нал ратдзысты.
Гостиницӕйы регистраци чи скӕна ӕмӕ кредитон картӕйӕ чи пайда кӕна, уыдон сӕ хъус дарӕнт ацы хъуыддагмӕ: арӕх гостиницӕйы администраци номыры тыххӕй ӕхца кредитон картӕйӕ раздӕр сисы, стӕй ма, мыййаг, исты зиан куы ӕрхӕссӕм, уымӕн ӕмӕ ӕндӕр хъуыддӕгтӕн. Уӕ бон уыцы ӕхца райсын нӕ уыдзӕн, цалынмӕ уӕ ацыдӕй цалдӕр боны нӕ рацӕуа, уӕдмӕ.
Нӕ чемодантӕн-иу тележкӕ райсӕм, цӕттӕ нын куы уой, ӕрмӕстдӕр уӕд. Стӕй-иу ӕй йӕ бынатмӕ фӕхӕццӕ кӕнӕм, цӕмӕй-иу ӕй иннӕтӕ дӕр райсой.
Кӕд ӕмбӕлы, уӕд-иу гостиницӕйы кусджытӕн иу гыццыл ӕхца авӕрӕм, нӕ багаж нын куы ӕрбахӕссой кӕнӕ та нын нӕ номыр куы бафснайой, уӕд.
Хӕринаг-иу кӕнӕм, бар кӕм ис, ӕрмӕстдӕр уым.
Гостиницӕйы аходӕн, къофи ӕмӕ их лӕвар вӕййы, уым чи ӕрлӕууы, ӕрмӕстдӕр уыдонӕн. Уымӕ гӕсгӕ дзы цас ӕмбӕлы, уымӕй фылдӕр хъуамӕ ма исӕм.
Гостиницӕйы кусджытимӕ ныхас кӕнгӕйӕ-иу бӕрӕг уӕд, Хуыцауы лӕггадгӕнджытӕ кӕй стӕм, уый. Уыдонӕн бирӕ куыст вӕййы, ӕмӕ нӕ фӕбузныг уыдзысты, фӕлмӕн, фӕразон ӕмӕ ӕрхъуыдыджын куы уӕм, уӕд.
Ныййарджытӕ хъуамӕ сӕ сывӕллӕтты иунӕгӕй ма уадзой гостиницӕйы, лифты, бассейны, вестибюлы, тренажерты залы ӕмӕ афтӕ дарддӕр.
Цы цӕрӕнбынӕтты хыгъд нын раттынц, уым фыст вӕййы гостиницӕйы номыры аргъ иу бонӕн. Кӕд дын уыцы аргъӕй фылдӕр фидын кӕнынц, уӕд-иу фидынмӕ ма фӕтагъд кӕн, фӕлӕ-иу уайтагъд фӕхабар кӕн, конгрессы цӕрӕнбынаты хайадмӕ.
Гостиницӕйы истӕмӕй куы фӕтыхсай, уӕд-иу ӕй цӕрӕнбынаты хайадӕн фехъусын кӕн.
Ӕххуыс конгрессы рӕстӕг. Истӕмӕй фӕкӕсын кӕй фӕнды, уыдонӕн сӕ бон бацӕуын у конгрессы «Ӕххуысгӕнджыты хайадмӕ». 16 азӕй къаддӕр кӕуыл цӕуы, ахӕм сывӕллӕттӕн дӕр сӕ бон у ӕххуыс кӕнын, ӕрмӕст сӕм кӕд сӕ ныййарджытӕй кӕнӕ сӕ сӕ ныййарджытӕ кӕй бар бакодтой, ахӕм хистӕртӕй исчи, йе та сӕ чи хъомыл кӕны, уыдон сӕ хъус дарынц, уӕд.