Йегъовӕ нӕ цы «куывдмӕ» хоны, уымӕ цӕттӕ дӕ?
1. Куывд кӕнӕ бадт саразынӕн цы хъӕуы?
1 Куывд кӕнӕ бадт саразынӕн бирӕ фыдӕбон хъӕуы: цы хъӕуы, уыдӕттӕ балхӕнын, хӕринаг ӕрцӕттӕ кӕнын ӕмӕ фынг ӕрӕвӕрын. Алцыдӕр хъӕуы хорз спълан кӕнын. Уымӕй уӕлдай, бадт кӕм уыдзӕн, уыцы бынат дӕр хъуамӕ цӕттӕ уа. Уазджытӕ дӕр хъуамӕ сӕхи бацӕттӕ кӕной, уӕлдайдӕр та дард ранӕй куы цӕуой, уӕд. Уӕдӕ цӕмӕй не ’мбӕлттимӕ ӕмӕ нӕ бинонтимӕ хорз фынгыл фӕминас кӕнӕм, уый тыххӕй хъӕуы бирӕ бафыдӕбон кӕнын, фӕлӕ уый дзӕгъӕлы нӕу. Тагъд ӕнӕхъӕн дунейы Йегъовӕйы Ӕвдисӕнтӕ ӕрӕмбырд уыдзысты, кӕм гыццыл, кӕм стырдӕр къордтӕй, Йегъовӕ сын цы «куывд» ӕрцӕттӕ кодта, уырдӕм – облӕстон конгресмӕ, «Цырддзаст ут!», зӕгъгӕ. Ӕфсымӕртӕ бирӕ фыдӕбон кӕнынц, цӕмӕй программӕ бацӕттӕ кӕной. Не ’ппӕт дӕр хуынд стӕм конгресмӕ. Цӕмӕй уыцы конгресмӕ ацӕуӕм ӕмӕ нын стыр пайда ӕрхӕсса, уый тыххӕй мах дӕр хъуамӕ нӕхи бацӕттӕ кӕнӕм (Ӕмб. 21:5).
2. Цӕмӕй конгресмӕ ацӕуӕм, уый тыххӕй цы саразын хъӕуы?
2 Стыр пайда дын куыд ӕрхӕсса, ууыл бацархай. Дӕ хъуыддӕгтӕ афтӕ спълан кодтай, цӕмӕй конгрессы алы бон дӕр уай? Кӕд хъӕуы, уӕд дӕ куысты хицауӕй дӕхи ракур, цӕмӕй конгресмӕ ацӕуай. Куыд цӕудзынӕ ӕмӕ кӕм цӕрдзынӕ, уый спълан кодтай? Хистӕр нӕлгоймӕгтӕ хъуамӕ ӕркӕсой, ацӕргӕтӕн ӕмӕ рынчынтӕн, стӕй ма фӕкӕсын кӕмӕ хъӕуы, уыдонӕн куыд баххуыс кӕной, уымӕ (Йер. 23:4; Гал. 6:10).
3. Ӕхсӕнадӕмон конгресстӕм хуынд куы нӕ уӕм, уӕд цӕуылнӕ хъуамӕ ацӕуӕм?
3 Иуӕй-иу бӕстӕты уыдзӕн ӕхсӕнадӕмон конгресстӕ. Дӕ зӕрдыл дар, уыцы конгресстӕм хотӕ ӕмӕ ’фсымӕрты фӕсарӕнтӕй кӕй фӕхуыдтой. Уымӕ гӕсгӕ Вефилты ӕфсымӕртӕ ахъуыды кодтой, цас адӕм фӕхондзысты, цӕмӕй алкӕмӕ дӕр бынат ӕрхауа ӕмӕ кӕм цӕра, уый дӕр ын уа. Фӕлӕ уыцы конгресстӕм кӕй нӕ фӕхуыдтой, уыдон куы ацӕуой, уӕд дзы ӕгӕр бирӕ адӕм уыдзӕн.
4. Конгрессы алцыдӕр йӕ афоныл цӕй фӕрцы кӕндзыстӕм?
4 Алцыдӕр афтӕ спълан кӕн, цӕмӕй-иу конгресмӕ алы бон дӕр рагацау ӕрбацӕуай ӕмӕ-иу дӕхицӕн бынат ссарай, цалынмӕ нӕ райдайа, уӕдмӕ. Цалдӕр минуты-иу ссар, цӕмӕй программӕмӕ ӕркӕсай. Афтӕмӕй цӕттӕ уыдзынӕ, цы дзурдзысты, уымӕ хъусынмӕ (Езд. 7:10). Музыкӕ куы райхъуыса, уӕд-иу ӕм байхъус ӕмӕ цӕттӕ у зарӕг азарынмӕ ӕмӕ ’фсымӕры куывдмӕ.
5. Конгресс нӕ бинонтӕн пайда кӕд ӕрхӕсдзӕн?
5 Бинонтӕ иумӕ куы бадой, уӕд ныййарджытӕ уындзысты, сӕ сывӕллӕттӕ программӕмӕ лӕмбынӕг хъусынц ӕви нӕ (Дык. з. 31:12). Хорз уаид, цы стихтӕ кӕсой, уыдон-иу нӕ Библиты куы ссарикам. Раныхӕсты хъуыдытӕ цыбыртӕй куы фыссай, уӕд лӕмбынӕг хъусдзынӕ. Уый фӕстӕ-иу дӕ фыстытӕм куы ӕркӕсай, уӕд-иу раныхӕсты сӕйраг хъуыдытӕ дӕ зӕрдыл ӕрлӕудзысты. Ӕнӕмӕнг куы нӕ хъӕуа, уӕд-иу конгрессы рӕстӕг ма ныхас кӕн, дӕ фарсмӕ чи бада, уыимӕ кӕнӕ-иу дӕ бынатӕй ма сыст. Кӕд дӕм телефон ис, уӕд бацархай, цӕмӕй дын дӕхи дӕр ӕмӕ иннӕты дӕр хъусын ма хъыгдара. Хорз уаид, алы бон дӕр-иу конгрессы фӕстӕ иннӕтимӕ куы ныхас кӕниккам, нӕ зӕрдӕмӕ цы хъуыдытӕ фӕцыдысты, уыдоныл.
6. Нӕ конгрессты нын цы диссаджы фадат вӕййы ӕмӕ дзы куыд спайда кӕнӕм?
6 Облӕстон конгрессты нын хорз фадат вӕййы нӕ хотӕ ӕмӕ не ’фсымӕртыл фӕцин кӕнынӕн (Пс. 133:1–3; Марчы 10:29, 30). Хорз уаид нӕ фарсмӕ чи бады, уыдонимӕ куы базонгӕ уаиккам ӕмӕ сихоры рӕстӕг куы аныхас кӕниккам. Уый тыххӕй-иу хӕринаг немӕ ӕрбахӕссӕм, цӕмӕй нӕ цӕуын макуыдӕм бахъӕуа. Уӕдӕ нын цы фадат ис, уымӕй пайда кӕнӕм ӕмӕ кӕрӕдзи фидар кӕнӕм (Ром. 1:11, 12).
7. Конгрессы ныл цавӕр дарӕс хъуамӕ уа?
7 Уӕлӕдарӕс. Нӕ хъус ӕрдарӕм, Йегъовӕ израилӕгтӕн цы бафӕдзӕхста, уымӕ: хъуамӕ сӕ уӕлӕдарӕсы фӕдджитыл скодтаиккой хаутӕ, хауты сӕрмӕ та-иу ауагътаккой ӕрвхуыз бӕттӕн (Нымӕц. 15:37–41). Уый сын сӕ зӕрдыл лӕууын кодта, иннӕ адӕмтӕй ӕвзӕрст кӕй уыдысты, цӕмӕй Йегъовӕйӕн лӕггад кодтаиккой. Абон дӕр нӕ дарӕс хӕдӕфсарм куы уа, уӕд ацы дунейӕ хицӕн кӕндзыстӕм. Уый фиппайдзысты, чи нӕм кӕса, уыдон дӕр, конгрессы фӕстӕ-иу хӕрынмӕ куы ацӕуӕм, уӕд дӕр. Уымӕ гӕсгӕ лӕмбынӕг хъуыды кӕндзыстӕм, нӕ уӕлӕ цы скӕндзыстӕм, ууыл.
8. Конгресс кӕм уа, уым нӕ бон куыд у хъусын кӕнын?
8 Хъусын кӕнӕм. Конгресс кӕм уа, уым адӕмӕн куыд хъусын кӕндзыстӕм, ууыл-иу рагацау ахъуыды кӕнӕм. Иу ӕфсымӕр йӕ цардӕмбалимӕ конгрессы фӕстӕ ресторанмӕ ацыд. Йӕ плакеткӕмӕ бацамыдта ӕмӕ официанты бафарста: «Ӕвӕццӕгӕн ахӕм плакеткӕтӕ бирӕтыл федтай?». Официант ын загъта, о, зӕгъгӕ, ӕмӕ йӕм диссаг фӕкаст, цӕмӕн сӕ дарынц, уый. Уый фӕрцы ӕфсымӕр йемӕ аныхас кодта ӕмӕ йӕ конгресмӕ фӕхуыдта.
9. Йегъовӕйӕ бузныг кӕй стӕм, уый куыд равдисӕн ис?
9 Кӕд нын раныхӕстӕ, интервьютӕ ӕмӕ равдыстытӕ не ’фсымӕртӕ радзурынц ӕмӕ равдисынц, уӕддӕр нын алы аз дӕр «куывд» нӕ уӕларвон Фыд Йегъовӕ бацӕттӕ кӕны (Ис. 65:13, 14). Бузныг дзы кӕй стӕм, уый равдисдзыстӕм, алы бон дӕр-иу куы ӕрбацӕуӕм ӕмӕ нын цы хӕрзад хӕринӕгтӕ ’рцӕттӕ кодта, уыдонӕй алкӕцыйӕ дӕр нӕхи хорз куы фенӕм ӕмӕ афтӕмӕй нӕ уырнындзинад куы бафидар кӕнӕм, уӕд. Уыцы куывдмӕ дӕхи рагацау бацӕттӕ кодтай?
[Рамкӕ 6 фарсыл]
Зӕрдылдаринӕгтӕ облӕстон конгрессы фӕдыл
◼ Программӕйы рӕстӕг. Программӕ алы бон дӕр райдайдзӕн 9.20. Дуӕрттӕ гом уыдзысты 8.00 сахатӕй. Музыкӕ куы райхъуыса, уӕд-иу нӕ бынӕтты сбадӕм, цӕмӕй программӕ ӕнӕкъуылымпыйӕ райдайа. Сабаты программӕ фӕуыдзӕн 16.55, хуыцаубоны та – 16.00. Ӕхсӕнадӕмон конгресстӕ райдайдзысты цыппӕрӕмы 13.20 ӕмӕ фӕуыдзысты 16.45.
◼ Машинӕты лӕууӕндӕттӕ. Конгресстӕ кӕм фӕцӕуынц, уым вӕййы, машинӕтӕ кӕм фӕхъахъхъӕнынц, ахӕм лӕууӕндӕттӕ. Чи куыд цӕуа, афтӕ йӕ машинӕ афтид бынаты ӕвӕрдзӕн, ӕхца фидын нӕ хъӕудзӕн. Инвалидтӕн машинӕ ӕвӕрынӕн цы бынат рахицӕн кӕндзысты, уым слӕууыны бар уыдзӕн, йӕ машинӕйыл инвалиды нысан кӕмӕн ис, ӕрмӕстдӕр уыдонӕн. Лӕууӕндӕтты бирӕ бынат кӕй нӕ вӕййы, уымӕ гӕсгӕ хорз уаид, алы машинӕйы дӕр цас цӕуы, уыйбӕрц адӕм-иу сыл куы ӕрбацӕуид.
◼ Бадӕн бынӕттӕ. Бынӕттӕ бацахсӕн ис, демӕ иу машинӕйыл чи ӕрбацыд кӕнӕ та кӕимӕ цӕрыс, ӕрмӕстдӕр уыдонӕн.
◼ Сихор. Курӕг уӕ стӕм, хӕринаг-иу уемӕ рахӕссут, цӕмӕй уӕ сихорафон хӕринаг ӕлхӕнынмӕ цӕуын ма хъӕуа. Ис ӕрбахӕссӕн, бандоны бын чи бацӕуа, ӕрмӕст ахӕм къухыхӕсгӕ холодильник. Конгресмӕ нӕй хӕссӕн авгӕй конд мигӕнӕнтӕ.
◼ Мысайнӕгтӕ. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй – ныппарӕн сӕ ис ӕппӕтдунеон хъуыддагӕн цы асыкк ис, уым, нӕхи Паддзахады залы кӕнӕ та конгрессы.
◼ Ӕнӕнхъӕлӕджы исты куы ’рцӕуа. Конгрессы «Фыццаг ӕххуысы» чи фӕлӕггад кӕны, уыдон дзырдтой, гыццыл ницӕй тыххӕй дӕр-иу сӕм дзыппыхӕсгӕ телефонтӕй кӕй бадзырдтой. Конгрессы рӕстӕг искӕуыл исты куы ’рцӕуа, уӕд хъӕуы уагдартӕй искӕмӕн зӕгъын. Уый уайтагъд фӕхабар кӕндзӕн «Фыццаг ӕххуысмӕ». Уым чи лӕггад кӕны, уыдон дын баххуыс кӕндзысты ӕмӕ куы бахъӕуа, уӕд та 03 дӕр адзурдзысты.
◼ Къахы дарӕс. Алы аз дӕр къахы дарӕсы тыххӕй исты бӕллӕхтӕ ӕрцӕуы. Хуыздӕр уаид ахӕм дзабыртӕ скӕнын, цӕмӕй асинтыл ӕмӕ решеткӕйӕ ’мбӕрзт рӕтты цӕуын тӕссаг ма уа.
◼ Видеокамерӕтӕ ӕмӕ диктофонтӕ нӕй иу кӕнӕн конгрессы электрон кӕнӕ звуко-системӕмӕ, ӕмӕ сӕ хъӕуы афтӕ пайда кӕнын, цӕмӕй макӕй хъыгдарой.
◼ Конгресс кӕм цӕуа, уырдӕм нӕй хӕссӕн сывӕллӕттӕн коляскӕтӕ ӕмӕ гыццыл тухгӕ бандӕттӕ. Фӕлӕ ныййарджытӕн сӕ бон у ӕрбахӕссын сывӕллӕттӕн гыццыл бандӕттӕ ӕмӕ сӕ сӕ фарсмӕ бандонмӕ бафидар кӕнын.
◼ Духитӕ ӕмӕ одеколонтӕ. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам ӕмӕ нӕхиуыл куы нӕ пырх кӕниккам тынг тӕфгӕнаг духитӕ, цӕмӕй, йӕ улӕфӕнтӕй рынчын чи у, уыдоны ма хъыгдарой (1 Кор. 10:24).
◼ Фылдӕр базонын кӕй фӕнды. Конгрессы бонты нын фадат куы фӕзына хъусын кӕнынӕн ӕмӕ, фылдӕр базонын кӕй фӕнды, ахӕм адӕймагыл куы фембӕлӕм, уӕд хъӕуы спайда кӕнын бланкӕй «Пожалуйста, посети этого человека», зӕгъгӕ (S-43-U). Хъусынгӕнджытӕм хъуамӕ конгрессы рӕстӕджы иу кӕнӕ дыууӕ ахӕм бланкы уа. Дзаг бланктӕ раттӕн уыдзӕн конгрессы литературӕйы хайадмӕ кӕнӕ та уый фӕстӕ де ’мбырды секретармӕ (Кӕс 2005 азы февралы «Нӕ хъусын кӕныны хъуыддаг», 6 ф.).
◼ Цӕрӕнбынат. Фатеры цӕрыны тыххӕй курдиат дӕтгӕйӕ, уӕ хорзӕхӕй, уӕ зӕрдыл дарут: 1) алы хатт дӕр пайда кӕнут бланкӕй «Заявка на размещение лиц с особыми потребностями» (СО-5); 2) цӕрӕнбынаты хайад дын фатерты тыххӕй бланк СО-4 куы радта, уӕд ӕй ӕндӕр искӕмӕн дӕттӕн нӕй; 3) уӕ хорзӕхӕй, уӕ зӕрдыл дарут, цӕрӕнбынат лӕвӕрд кӕй цӕуы ӕрмӕст конгрессы бонтӕн; 4) дӕ хъус дар дӕ сывӕллӕттӕм ӕмӕ сӕ иунӕгӕй ма уадз; 5) нӕ хотӕ ӕмӕ нӕ не ’фсымӕртӕ кӕй суазӕг кодтой, уымӕй бузныг уӕм, ӕмӕ ма рох кӕнӕм Хъуыддӕгты 20:35 цы фыст ис, уый; 6) кӕд дӕ фатер нал хъӕуы, уӕд ӕнӕмӕнг фехъусын кӕн цӕрӕнбынаты хайадмӕ.