Чырыстийы фӕдыл цу – дӕхи, куыд ӕмбӕлы, афтӕ дар
1. Ацы азы конгрессы темӕ куыд баст у, нӕхи куыд хъуамӕ дарӕм, уыимӕ?
1 Дунедарӕг Стыр Хуыцау Йегъовӕйы Библи ӕвдисы, цыма йӕ уӕлӕ кады дарӕс ис, афтӕмӕй (Пс. 103:1). Йесо ныхӕстӕй ӕмӕ хъуыддӕгтӕй кӕддӕриддӕр кад кодта йӕ Фыдӕн ӕмӕ йын йе ’ппӕт хъуыддӕгтӕн аргъ кодта (Иоан. 17:4). Махӕй алкӕмӕндӕр хорз фадат уыдзӕн Йесойау Йегъовӕйӕн кад кӕнын, тагъд цы облӕстон конгресс уыдзӕн, уым, хуыйны «Чырыстийы фӕдыл цу!».
2. Конгрессы алы бон дӕр уӕм, ууыл кӕй архайӕм, уымӕй Йегъовӕйӕн куыд кад кӕнӕм?
2 Кад кӕнӕм Хуыцауӕн. Нӕ бон у Йегъовӕйӕн кад кӕнын, нӕ уырнындзинад фидар кӕнынӕн цы конгресс бацӕттӕ кодта, уырдӕм куы ӕрбацӕуӕм, уӕд. Дӕ куысты хицауимӕ аныхас кодтай ӕмӕ дӕ хъуыддӕгтӕ афтӕ спълан кодтай, цӕмӕй конгрессы алы бон дӕр уай, уыимӕ майрӕмбоны дӕр? Дӕ хъуыддӕгтӕ афтӕ спълан кодтай, цӕмӕй рагацау ӕрбацӕуай ӕмӕ дӕхицӕн бынат ссарай зарӕг ӕмӕ куывды размӕ? Дӕ бон нӕ уаид, искуыдӕм цӕуыны бӕсты, дӕ хотӕ ӕмӕ де ’фсымӕртимӕ сихор бахӕрын? Конгрессы алы хайы размӕ-иу сӕрдариуӕггӕнӕг ӕфсымӕр куы зӕгъа, цалынмӕ музыкӕ нӕ райдайа уӕдмӕ уӕ бынӕттӕ бацахсут, зӕгъгӕ, уӕд хъуамӕ нӕ ныхас уайтагъд фӕуадзӕм ӕмӕ сбадӕм.
3. Программӕмӕ лӕмбынӕг кӕй хъусдзыстӕм, уымӕй Хуыцауӕн куыд кад кӕндзыстӕм?
3 Конгрессы программӕмӕ лӕмбынӕг кӕй хъусдзыстӕм, уымӕй дӕр кад кӕндзыстӕм нӕ уӕларвон Фыдӕн. Иу облӕстон конгрессы фӕстӕ иу уацхӕссӕг ныффыста, зӕгъгӕ, конгресмӕ чи бакастаид, уый бадис кодтаид, «цы адӕм дзы уыд, уыдон сӕхи куыд хорз дардтой ӕмӕ куыд сабыр хъуыстой. Бӕрӕг уыд, сӕ зӕрдӕмӕ тынг кӕй цӕуы». Стӕй ма ныффыста, зӕгъгӕ, «бирӕ сывӕллӕттӕ дзы уыд... иууылдӕр сӕхи тынг хорз дардтой, ӕмӕ ма суанг Библийы стихтӕ дӕр агуырдтой». Конгрессы рӕстӕг аив нӕу ныхас кӕнын, телефонӕй писмотӕ ӕрвитын, хӕрын кӕнӕ рацу-бацу кӕнын. Сывӕллӕттӕ хъуамӕ бадой сӕ ныййарджытимӕ. Афтӕмӕй сын ныййарджытӕ ӕххуыс кӕндзысты программӕмӕ хъусынӕн (Дык. з. 31:12; Ӕмб. 29:15). Афтӕ куы архайӕм, уӕд бӕрӕг уыдзӕн, иннӕтӕн дӕр ӕмӕ нын цы программӕ бацӕттӕ кодтой, уымӕн дӕр кӕй аргъ кӕнӕм.
4. Конгрессы рӕстӕг, куыд ӕмбӕлы, афтӕ конд цӕмӕн хъуамӕ уӕм?
4 Хуыцауӕн кад кӕнӕм аив дарӕсы кондӕй. Бирӕтӕ бузныг уыдысты, фарон облӕстон конгрессы иу раныхасы нын нӕ зӕрдыл кӕй ӕрлӕууын кодтой, Хуыцауы лӕггадгӕнджытӕ кӕй хъуамӕ архайой сӕ уынд ӕмӕ сӕ кондӕй Йегъовӕйӕн кад кӕнын. Ацы аз дӕр хъуамӕ нӕ хъус лӕмбынӕг ӕрдарӕм ацы хъуыддагмӕ. Нӕ аив дарӕсы кондӕй бӕрӕг вӕййы, Йегъовӕйӕн нӕ царды цы бынат ис ӕмӕ йе ’вдисӕнтӕ кӕй стӕм, уымӕн аргъ кӕнӕм ӕви нӕ. Хъуамӕ кӕддӕриддӕр нӕ дарӕсӕй бӕрӕг уа, «йӕхи Хуыцауӕн кувӕг чи хоны», уыцы адӕмӕй кӕй стӕм (1 Тим. 2:9, 10).
5. Конгрессы цы горӕты уӕм, уым программӕйы фӕстӕ дӕр нӕ дарӕсӕй нӕ бон куыд у Хуыцауы кадджын кӕны?
5 Цымӕ, куыд ӕмбӕлы, афтӕ конд хъуамӕ ӕрмӕст конгрессы рӕстӕг уӕм? Нӕ зӕрдыл дарӕм, бирӕтӕ нӕ плакеткӕтӕм кӕй кӕсдзысты. Хъуамӕ нӕ уынд ӕмӕ нӕ кондӕй иннӕ адӕмӕй хицӕн кӕнӕм. Уымӕ гӕсгӕ, конгрессы фӕстӕ, зӕгъӕм, искуыдӕм хӕрынмӕ куы цӕуӕм, уӕд дӕр хъуамӕ нӕ дарӕсӕй бӕрӕг уа, Хуыцауы лӕггадгӕнджытӕ кӕй стӕм ӕмӕ уыцы горӕтмӕ конгресмӕ кӕй ӕрцыдыстӕм. Хъуамӕ нӕ уӕлӕ ма уа джинстӕ, шортиктӕ ӕмӕ футболкӕтӕ. Афтӕмӕй Йегъовӕйы кадджын кӕндзыстӕм адӕмы астӕу. Йегъовӕйы зӕрдӕ барухс вӕййы, нӕ уынд ӕмӕ нӕ кондӕй куы равдисӕм, йӕ лӕггадгӕнджытӕ кӕй стӕм, уый.
6. Нӕхи куыд ӕмбӕлы, афтӕ куы дарӕм, уӕд уый хорзӕй цы ’рхӕсдзӕн?
6 Хорзырдӕм фӕзындзӕн. Нӕ конгрессты нӕхи куыд ӕмбӕлы, афтӕ куы дарӕм, уӕд нӕ бон уыдзӕн хъусын кӕнын, фадат нын куы фӕзына, уӕд. Нӕ уагахаст нын адӕм ӕнӕбафиппайгӕ нӕ фӕуыдзысты. Иу конгрессы фӕстӕ иу лӕг загъта: «Ахӕм ӕгъдауджын адӕм никуы федтам. Сымах ӕххӕст кӕнут, Хуыцау адӕмӕй цы домы, уый». Нӕхи куыд ӕмбӕлы, афтӕ куы дарӕм, уӕд ӕвдисдзыстӕм, кӕрӕдзийӕн кӕй аргъ кӕнӕм, кӕрӕдзийы кӕй уарзӕм ӕмӕ Йегъовӕйы кӕй кадджын кӕнӕм (1 Пет. 2:12). Афтӕмӕй бӕрӕг уыдзӕн, Хуыцауы ӕфсарм нӕм кӕй ис ӕмӕ бузныг кӕй стӕм, нӕ уӕларвон Фыд нӕ кӕй ахуыр кӕны, уымӕй (Дзут. 12:28). Цӕй уӕдӕ архайӕм ууыл, цӕмӕй нӕ уынд ӕмӕ нӕ кондӕй Хуыцауы кадджын кӕнӕм облӕстон конгрессы, «Чырыстийы фӕдыл цу!», зӕгъгӕ.
[Рамкӕ 5 фарсыл]
Облӕстон конгрессы тыххӕй зӕрдылдаринӕгтӕ
◼ Программӕйы рӕстӕг. Программӕ ӕртӕ боны дӕр райдайдзӕн 9.20. Дуӕрттӕ гом уыдзысты 8.00. сахатӕй. Программӕйы райдианмӕ ма цалдӕр минуты куы хъӕуа, уӕд сӕрдариуӕггӕнӕг ӕфсымӕр сценӕмӕ рацӕудзӕн ӕмӕ сбаддзӕн, райхъуысдзӕн музыкӕ. Уӕд хъуамӕ не ’ппӕт дӕр нӕ бынӕтты сбадӕм, цӕмӕй программӕ ӕнӕкъуылымпыйӕ райдайа. Майрӕмбон ӕмӕ сабаты программӕ фӕуыдзӕн 17.05., хуыцаубоны та – 16.10.
◼ Машинӕты лӕууӕндӕттӕ. Конгресстӕ кӕм фӕцӕуынц, уым вӕййы, машинӕтӕ кӕм фӕхъахъхъӕнынц, ахӕм лӕууӕндӕттӕ. Чи куыд цӕуа, афтӕ йӕ машинӕ ӕвӕрдзӕн афтид бынаты, ӕхца фидын ын нӕ хъӕудзӕн. Лӕууӕндонмӕ машинӕ батӕрӕн уыдзӕн, конгрессы плакеткӕ кӕуыл уа, уыдонӕн. Лӕууӕндӕтты бирӕ бынат кӕй нӕ вӕййы, уымӕ гӕсгӕ машинӕйы дыууӕйӕ кӕнӕ ӕртӕйӕ цӕуыны бӕсты баныхас кӕнут ӕмӕ иу машинӕйыл ацӕут. Машинӕ ӕвӕргӕйӕ хъусут уагдартӕм.
◼ Бадӕн бынӕттӕ. Бынӕттӕ бацахсӕн ис, демӕ иу машинӕйыл чи ӕрцыд кӕнӕ та кӕимӕ цӕрыс, ӕрмӕстдӕр уыдонӕн.
◼ Сихор. Курӕг уӕ стӕм, хӕринаг-иу уемӕ рахӕссут, цӕмӕй уӕ сихорафон конгрессӕй хӕринаг ӕлхӕнынмӕ цӕуын ма хъӕуа. Ис ӕрбахӕссӕн, бандоны бын чи бацӕуа, ахӕм къухыхӕсгӕ холодильник. Конгресмӕ нӕй хӕссӕн авгӕй конд мигӕнӕнтӕ ӕмӕ хъӕбӕр нозт.
◼ Мысайнӕгтӕ. Цӕмӕй ӕфсымӕртӕ облӕстон конгресс бацӕттӕ кӕной, уый тыххӕй бирӕ хӕрдзтӕ бахъӕуы. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй – ныппарӕн сӕ ис ӕппӕтдунеон хъуыддагӕн цы асыкк ис нӕхи Паддзахады залы кӕнӕ та конгрессы.
◼ Ӕнӕнхъӕлӕджы исты куы ’рцӕуа. Конгрессы «Фыццаг ӕххуысы» чи фӕлӕггад кӕны, уыдон дзырдтой, гыццыл ницӕй тыххӕй дӕр-иу сӕм дзыппыхӕсгӕ телефонтӕй кӕй бадзырдтой. Конгрессы рӕстӕг исты куы ’рцӕуа, уӕд хъӕуы уагдартӕй искӕмӕн зӕгъын. Уыдон уайтагъд фӕхабар кӕндзысты «Фыццаг ӕххуысмӕ». Куы хъӕуа, уӕд 03 дӕр адзурдзысты.
◼ Видеокамерӕтӕ ӕмӕ диктофонтӕ. Ахӕм фыссӕн аппаратурӕ нӕй иу кӕнӕн конгрессы электрон кӕнӕ звуко-системӕмӕ, ӕмӕ сӕ хъӕуы афтӕ пайда кӕнын, цӕмӕй макӕй хъыгдарой.
◼ Духитӕ ӕмӕ одеколонтӕ. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы вентиляцийы руаджы. Уымӕ гӕсгӕ хорз уаид, иннӕтыл куы хъуыды кӕниккам, ӕмӕ нӕхиуыл куы нӕ пырх кӕниккам тынг тӕфгӕнаг духитӕ кӕнӕ ӕндӕр исты, цӕмӕй, йӕ улӕфӕнтӕй рынчын чи у, уыдоны ма хъыгдарой (1 Кор. 10:24).
◼ Фылдӕр базонын кӕй фӕнды. Конгрессы бонты нын фадат куы фӕзына хъусын кӕнынӕн ӕмӕ, фылдӕр базонын кӕй фӕнды, ахӕм адӕймагыл куы фембӕлӕм, уӕд хъӕуы спайда кӕнын бланкӕй «Пожалуйста, посети...», зӕгъгӕ (S-43-U). Хъусынгӕнджытӕм хъуамӕ конгрессы рӕстӕджы уа иу кӕнӕ дыууӕ ахӕм бланкы. Уыцы бланктӕ ма хъуамӕ уой конгрессы сӕрдары бюройы дӕр. Бланк раттӕн уыдзӕн конгрессы сӕрдары бюромӕ кӕнӕ та уый фӕстӕ де ’мбырды секретармӕ (Кӕс 2005 азы февралы «Нӕ хъусын кӕныны хъуыддаг», 6 ф.).
◼ Цӕрӕнбынат. Фатеры цӕрыны тыххӕй курдиат дӕтгӕйӕ, уӕ хорзӕхӕй, уӕ зӕрдыл дарут: 1) алыхатт дӕр пайда кӕнут бланкӕй СО-5; 2) цӕрӕнбынаты хайад дын фатерты тыххӕй бланк СО-4 куы радта, уӕд ӕй ӕндӕр искӕмӕн дӕттӕн нӕй; 3) хорз уаид, хуыссӕны цъӕрттӕ ӕмӕ дӕм хӕринаг дӕр куы уаид; 4) хъуамӕ дӕ хъус дарай дӕ сывӕллӕттӕм ӕмӕ сӕ иунӕгӕй ма уадзай; 5) нӕ хотӕ ӕмӕ нӕ не ’фсымӕртӕ кӕй суазӕг кодтой, уымӕй бузныг уӕм, ӕмӕ ма рох кӕнӕм Хъуыддӕгты 20:35 цы фыст ис, уый; 6) кӕд дӕ фатер нал хъӕуы, уӕд ӕнӕмӕнг фехъусын кӕн цӕрӕнбынаты хайадмӕ.