Иегъовӕмӕ ӕнхъӕлмӕ кӕс
1. Конгресс цы хуыйны ӕмӕ афойнадыл цӕмӕн у?
1 «Иегъовӕ у, раст тӕрхон чи кӕны, ахӕм Хуыцау,– фыста Исай.– Амондджын сты, чи йӕм ӕнхъӕлмӕ кӕсы, уыдон се ’ппӕт дӕр» (Ис. 30:18ӕ). Библийы ис, Хуыцау йе знӕгтыл куыд тӕрхон кодта ӕмӕ йӕ иузӕрдион лӕггадгӕнджыты куыд ирвӕзын кодта, бирӕ ахӕм цаутӕ. Уыдонӕй Иегъовӕйы лӕггадгӕнджытӕ абон цӕуыл ахуыр кӕнынц? Нӕхи куыд бацӕттӕ кӕнӕм «Иегъовӕйы стыр ӕмӕ ӕвирхъау бонмӕ»? (Иоил 2:31, 32). Нӕ облӕстон конгресс «Ирвӕзындзинад ӕввахс у!», зӕгъгӕ нӕ сразӕнгард кӕндзӕн, цӕмӕй ацы фарстытыл ахъуыды кӕнӕм ӕмӕ нӕ зӕрдӕтӕм ныккӕсӕм. Уый нын баххуыс кӕндзӕн Иегъовӕмӕ ӕхъӕлмӕ кӕсын.
2. Нӕ облӕстон конгрессы тыххӕй бузныг кӕй стӕм, уый нӕ бон куыд у равдисын?
2 Дӕхи бацӕттӕ кодтай, цӕмӕй конгрессы бонтӕй иу дӕр ма фӕцух кӕнай? Зӕгъӕм, дӕхи куыстӕй ракуырдтай? Ацы хъуыддаджы фӕстӕ ма кӕн. Скув, ӕмӕ уый фӕстӕ дӕ хицаумӕ бацу (Неем. 2:4, 5). Афтӕ ма нӕ афоныл батыхсын хъӕуы, конгресмӕ цӕуыл цӕудзыстӕм, кӕм цӕрдзыстӕм ӕмӕ ӕндӕр ахӕм хъуыддӕгтыл. Нӕхи хорз куы бацӕттӕ кӕнӕм, уӕд равдисдзыстӕм, Иегъовӕйӕ бузныг кӕй стӕм, цы «фынг» нын ӕрцӕттӕ кодта, уый тыххӕй. Хистӕр нӕлгоймӕгтӕ хъуамӕ зӕрдиагӕй батыхсой, конгресмӕ ацӕуынӕн ӕххуыс кӕй хъӕуы, уыдоныл, уӕлдайдӕр та ӕмбырды ацӕргӕ хотӕ ӕмӕ ӕфсымӕртыл (Гал. 6:10).
3. Конгресс кӕм цӕуа, уым Иегъовӕйы адӕм цавӕр миниуджытӕ хъуамӕ ӕвдисой?
3 Нӕ хорз уагахастӕй кад кӕнӕм Хуыцауӕн. Нӕ конгресстӕм бирӕйӕ куы ӕрӕмбырд вӕййӕм, уӕд нӕ адӕм нӕ хорз уагахастӕй базонынц. Уӕдӕ уӕд нӕхи куыд хъуамӕ дарӕм? Конгресс нын кӕм уа, уыцы горӕты уазӕгдзӕрӕнты, хӕрӕндӕтты ӕмӕ ӕндӕр ӕхсӕнадон бынӕтты кӕимӕ ӕмбӕлӕм, уыдон нын хъуамӕ уыной нӕ чырыстон миниуджытӕ, зӕгъӕм, бирӕфӕразондзинад, фӕлмасдзинад, хиуылхӕцындзинад ӕмӕ ӕмбаргӕдзинад (Гал. 5:22, 23; Фил. 4:5). Алчидӕр нӕ хъуамӕ ӕвдиса, «ӕнӕгъдау митӕ [чи] нӕ кӕны, йӕхион [чи] нӕ агуры, мӕсты [чи] нӕ кӕны», ахӕм уарзондзинад. Суанг кӕд истӕуыл фӕтыхстыстӕм, уӕддӕр нӕ фӕнды «алцыдӕр кӕнын Хуыцауы кадӕн» (1 Кор. 10:31; 13:5).
4. Ныййарджытӕн сӕ бон куыд у сӕ сывӕллӕттӕн баххуыс кӕнын, цӕмӕй сӕ уагахастӕй кад кӕной Иегъовӕйӕн?
4 Нӕ фӕсивӕды уагахаст ӕмӕ аив бакаст иу уазӕгдзӕрӕны хицауы зӕрдӕмӕ афтӕ тынг фӕцыдысты, ӕмӕ конгрессы фӕстӕ загъта, зӕгъгӕ йӕ фӕнды, Иегъовӕйы Ӕвдисӕнтӕ алкӕддӕр йӕ уазджытӕ куы уаиккой. Куыд ӕхсызгон вӕййы ахӕм хабӕрттӕ хъусын! Уый ууыл дзурӕг у, ӕмӕ ныййарджытӕ сӕ сывӕллӕтты кӕй ахуыр кӕнынц ӕмӕ сӕм сӕ хъус кӕй дарынц. Раст нӕ уаид, ныййарджытӕ-иу сӕ сывӕллӕтты уазӕгдзӕрӕны уаты иунӕгӕй куы ныууадзиккой. Сывӕллӕттӕм ӕдзух хъӕуы хъус дарын (Ӕмб. 29:15). Уӕдӕ сӕ хорз уагахастӕй кад кӕнӕнт Иегъовӕйӕн ӕмӕ йын йӕ зӕрдӕ рухс кӕнӕнт! (Ӕмб. 27:11).
5. Нӕ бон куыд у Иегъовӕйы нӕ конд ӕмӕ нӕ уындӕй кадджын кӕнын?
5 Хӕдӕфсармдзинадыл дзурӕг конд ӕмӕ уынд. Алчидӕр нӕ конгрессы хъуыддагӕн баххуыс кӕндзӕн, нӕ конд ӕмӕ нӕ уынд ӕнахуыр, ӕнӕгъдау кӕнӕ ӕнӕхъола куы нӕ уой, уӕд. Уый нӕ хъуамӕ рох ма уа, конгресс цы горӕты уа, уырдӕм ӕмӕ фӕстӕмӕ цӕугӕйӕ, конгрессы бынат цӕттӕ кӕнгӕйӕ ӕмӕ программӕмӕ хъусгӕйӕ. Хуыцауы лӕггадгӕнджытӕ кӕй стӕм, уымӕ гӕсгӕ сӕйраджыдӕр хъуамӕ ууыл ма хъуыды кӕнӕм, нӕхицӕн куыд хуыздӕр ӕмӕ ӕнцондӕр уа, фӕлӕ Иегъовӕйы ном ӕмӕ кадыл. Бинонты хистӕр хъуамӕ йӕ хъус дара, цӕмӕй йӕ ус ӕмӕ йӕ цоты конд ӕмӕ уынд кӕддӕриддӕр хӕдӕфсарм ӕмӕ хӕрзӕгъдаудзинадыл дзурӕг уой (1 Тим. 2:9, НТ).
6. Конгрессы рӕстӕджы нӕ бакаст куыд аив вӕййы, улӕфты рӕстӕджы дӕр нын афтӕ аив цӕмӕн хъуамӕ уа?
6 Нӕ бакаст хъуамӕ аив уа уазӕгдзӕрӕны, дуканийы кӕнӕ хӕрӕндоны куы уӕм, уӕд дӕр. Фӕсконгресс, искуыдӕм ӕхсӕвӕр хӕрынмӕ цӕугӕйӕ, скӕнӕн ис, конгрессы ныл цы дзаумӕттӕ вӕййы, уыдон. Нӕ конгрессы плакеткӕ нӕ уӕлӕ куы уа, уӕд нын уый фӕрцы фадат уыдзӕн искӕимӕ аныхас кӕнынӕн (2 Кор. 6:3, 4).
7. Цӕмӕй конгресс алкӕмӕндӕр цин ӕрхӕсса, ӕмӕ алцыдӕр уаг ӕмӕ ӕгъдауыл ацӕуа, уый тыххӕй нӕ бон цы у аразын? (Кӕс фӕлгӕты «Облӕстон конгрессы тыххӕй зӕрдылдаринӕгтӕ». Стӕй ма зӕрдылдаринӕгтӕ 2005 азы апрелы «Нӕ хъусын кӕныны хъуыддаджы», 5 ф.)
7 Исай дзырдта: «Иегъовӕ ӕнхъӕлмӕ кӕсдзӕн, цӕмӕй уӕ йӕ арфӕдзинӕдтӕй схайджын кӕна, ӕмӕ уымӕ гӕсгӕ растдзӕн, цӕмӕй уӕм фӕлмӕнзӕрдӕдзинад равдиса» (Ис. 30:18а). Иегъовӕйӕ йӕ фӕлмӕнзӕрдӕдзинад ӕмӕ йе стыр хорзӕхы тыххӕй бузныг кӕй стӕм, уымӕ гӕсгӕ йӕ хъуамӕ нӕ конгрессты кадджын кӕнӕм нӕ уагахаст, нӕ конд ӕмӕ нӕ уындӕй. Цӕй уӕдӕ облӕстон конгресс «Ирвӕзындзинад ӕввахс у!», зӕгъгӕ, скадджын кӕнӕд нӕ Хуыцауы ӕмӕ нын баххуыс кӕнӕд, цӕмӕй йӕм ӕнхъӕлмӕ кӕсӕм!
[Рамкӕ 5 фарсыл]
Облӕстон конгрессы тыххӕй зӕрдылдаринӕгтӕ
◼ Бадӕн бынӕттӕ. Бынӕттӕ бацахсӕн ис, демӕ иу машинӕйыл чи ӕрцыд кӕнӕ та кӕимӕ цӕрыс, ӕрмӕстдӕр уыдонӕн.
◼ Мысайнӕгтӕ. Облӕстон конгресс бацӕттӕ кӕнын ӕмӕ ауадзынӕн фӕхъӕуы бирӕ ӕхца. Конгрессы тыххӕй бузныг кӕй стӕм, уый равдисдзыстӕм нӕ мысайнӕгтӕй – ныппарӕн сӕ ис ӕппӕтдунеон хъуыддагӕн нӕхи Паддзахады залы кӕнӕ та конгресс кӕм цӕуа, уым.
◼ Цымыдис чи кӕны. Конгрессы бонты нын фадат куы фӕзына хъусын кӕнынӕн ӕмӕ, фылдӕр базонын кӕй фӕнды, ахӕм адӕймагыл куы фембӕлӕм, уӕд хъӕуы спайда кӕнын бланкӕй «Пожалуйста, позаботьтесь...» (S-70). Хъусынгӕнджытӕм хъуамӕ конгрессы рӕстӕджы уа иу кӕнӕ дыууӕ ахӕм бланкы. Уыцы бланктӕ ма хъуамӕ уой конгрессы сӕрдары бюройы дӕр. Кӕй байдзаг кӕнай, уыдон раттӕн уыдзӕн конгрессы сӕрдары бюромӕ кӕнӕ та де ’мбырды секретармӕ, уӕхимӕ куы ӕрыздӕхай, уӕд (Кӕс 2005 азы февралы «Нӕ хъусын кӕныны хъуыддаг», 6 ф.).