Хъусӕм ӕмӕ ахуыр кӕнӕм
1. Цӕмӕй облӕстон конгрессы хъусӕм ӕмӕ ахуыр кӕнӕм, уый тыххӕй нӕ фӕразондзинад цӕмӕн хъӕуы?
1 Тагъд райдайдзысты 2013 азы облӕстон конгресстӕ. Ӕфсымӕртӕ бирӕ бафыдӕбон кодтой, цӕмӕй бацӕттӕ кодтаиккой, ӕгас дунейы дӕр Йегъовӕйы Ӕвдисӕнтӕн пайда чи уыдзӕн, ахӕм программӕ. Дӕ хъуыддӕгтӕ афтӕ спълан кодтай, цӕмӕй ӕртӕ боны дӕр программӕмӕ байхъусай? Конгресс цалдӕр боны кӕй вӕййы, уымӕ гӕсгӕ фӕхъӕуы фӕразондзинад, цӕмӕй-иу лӕмбынӕг хъусӕм. Уымӕй уӕлдай ма бафӕллайӕм конгресмӕ цӕугӕйӕ кӕнӕ ӕндӕр цӕйдӕр тыххӕй. Цы нын баххуыс кӕндзӕн, цӕмӕй конгрессы программӕмӕ лӕмбынӕг хъусӕм ӕмӕ ахуыр кӕнӕм? (Дык. з. 31:12).
2. Нӕ бон куыд у нӕ зӕрдӕ конгресмӕ бацӕттӕ кӕнын?
2 Конгрессы размӕ. Нӕ сайты www.jw.org вӕййы облӕстон конгрессы программӕйы раныхӕстӕн сӕ нӕмттӕ ӕмӕ сӕ сӕйраг стихтӕ. Кӕд дӕм Интернет ис, уӕд ӕм дӕ бон у рагацау ӕркӕсын, цӕмӕй конгресмӕ дӕ зӕрдӕ бацӕттӕ кӕнай (Езд. 7:10). Уӕ бинонты ахуыры рӕстӕг уӕ бон у уыцы программӕйыл аныхас кӕнын, цӕмӕй уе ’ппӕты дӕр тынгдӕр бафӕнда конгресмӕ ацӕуын.
3. Цы нын баххуыс кӕндзӕн, цӕмӕй лӕмбынӕг хъусӕм?
3 Конгрессы рӕстӕг. Кӕд гӕнӕн ис, уӕд-иу программӕйы размӕ туалетмӕ бацӕут. Дӕ телефон-иу ахуыссын кӕн, цӕмӕй дӕм программӕйы рӕстӕг мачи дзура кӕнӕ смс-тӕ ма ’рвита ӕмӕ сӕ дӕхӕдӕг дӕр ма фыссай. Кӕд цӕйдӕр тыххӕй дӕ бон нӕу дӕ телефон ахуыссын кӕнын, уӕд ын йӕ звук ахуыссын кӕн, цӕмӕй иннӕты ма бахъыгдара, куы дӕм дзурой, уӕд. Планшетӕй дӕр афтӕ пайда кӕн, цӕмӕй иннӕты хъусын ма хъыгдара. Программӕйы рӕстӕг ма хӕр ӕмӕ ма нуаз (Еккл. 3:1). Раныхас кӕмӕн уыдзӕн, уыцы ӕфсымӕрмӕ-иу кӕс ӕмӕ-иу Библийӕ стих куы кӕса, уӕд-иу ӕй ды дӕр байгом кӕн. Раныхӕсты хъуыдытӕ-иу цыбыртӕй афысс.
4. Ныййарджытӕн сӕ бон куыд у сӕ сывӕллӕттӕн баххуыс кӕнын, цӕмӕй уыдон дӕр хъусой ӕмӕ ахуыр кӕной?
4 Мах фӕнды, цӕмӕй нӕ сывӕллӕттӕ дӕр программӕмӕ хъусой ӕмӕ ахуыр кӕной. Ӕмбисӕндты 29:15 фыст ис: «Сывӕллоны йӕхи бар куы ауадзай, уӕд йӕ мады фӕхудинаг кӕндзӕн». Уымӕ гӕсгӕ хорз уаид, бинонтӕ-иу иумӕ куы сбадиккой, цӕмӕй ныййарджытӕн сӕ бон уа сӕ сывӕллӕттӕм сӕ хъус дарын. Афтӕмӕй сывӕллӕттӕ нӕ ныхӕстӕ кӕндзысты, смс-тӕ нӕ фысдзысты ӕмӕ дзӕгъӕл рацу-бацу нӕ кӕндзысты, фӕлӕ программӕмӕ хъусдзысты. Кӕд нырма гыццылтӕ сты ӕмӕ алцыдӕр не ’мбарынц, уӕддӕр ахуыр кӕндзысты лӕмбынӕг хъусын ӕмӕ ӕнцад бадын.
5. Хорз цӕмӕн у, программӕ-иу уӕ зӕрдыл куы ’рлӕууын кӕнат, ӕмӕ уӕ бон куыд у уый аразын?
5 Алы бон дӕр программӕйы фӕстӕ. Рагацау-иу схуыссут, цӕмӕй хорз баулӕфат. Конгрессы цы фехъуыстат, уыдӕттӕ-иу уӕ зӕрдыл куы ’рлӕууын кӕнат, уӕд сӕ хуыздӕр бахъуыды кӕндзыстут. Уымӕ гӕсгӕ хорз уаид, алы изӕр дӕр-иу уӕ бинонтимӕ иумӕ программӕйыл цалдӕр минуты куы аныхас кӕниккат. Уе ’мбӕлттимӕ ресторан кӕнӕ кафемӕ куы цӕуат, уӕд уӕ бон у уӕ фыстытӕ уемӕ ахӕссын, цӕмӕй аныхас кӕнат, уӕ зӕрдӕмӕ тынгдӕр чи фӕцыд, цалдӕр ахӕм хъуыдыйыл. Конгрессы фӕстӕ уӕ бинонты ахуыры рӕстӕг уӕ бон у аныхас кӕнын, цы фехъуыстат, уымӕй куыд спайда кӕндзыстут, ууыл. Стӕй ма уӕ бон у алы къуыри дӕр рӕстӕг хицӕн кӕнын, цӕмӕй-иу ӕркӕсат, конгрессы кӕй райстам, уыцы ног публикацитӕм.
6. Конгресмӕ ӕнӕуи ӕрбацӕуын фаг цӕуылнӕ у? Бамбарын ӕй кӕн.
6 Куывды фынгӕй куы нӕ бахӕрӕм, уӕд нын уыцы хӕринӕгтӕ ӕппындӕр ницы пайда уыдзысты. Уый зӕгъӕн ис, Йегъовӕ нын кӕй ӕрцӕттӕ кодта, уыцы куывды тыххӕй дӕр – облӕстон конгрессы тыххӕй. Уӕдӕ программӕйӕ иу хай дӕр ма фӕцух кӕнӕм, лӕмбынӕг-иу хъусӕм ӕмӕ, цы фехъуыстам, уымӕй нӕ царды пайда кӕнӕм.