«Адӕмы... ӕрӕмбырд кӕн»
1. Нӕ облӕстон ӕмӕ ӕхсӕнадӕмон конгресстӕ израилӕгты диссаджы ӕмбырды хуызӕн цӕмӕй сты?
1 Израилӕгтӕ Египетӕй куы рацыдысты, уый хӕдфӕстӕ Йегъовӕ Моисейӕн загъта, цӕмӕй адӕмы Синайы хохы цур ӕрӕмбырд кодтаид, цӕмӕй йын йӕ ныхӕстӕ фехъуыстаиккой, тӕрсын дзы сахуыр уыдаиккой ӕмӕ сӕ цотӕн дӕр йӕ фӕндӕгтӕ бацамыдтаиккой (Дык. з. 4:10–13). Уыцы бон сӕ зӕрдыл куыннӕ бадардтаиккой ӕмӕ сӕ уырнындзинад дӕр куыннӕ бафидар уыдаид! Иннӕ цалдӕр мӕйы дӕргъы Йегъовӕйы адӕм облӕстон ӕмӕ ӕхсӕнадӕмон конгресстӕм ӕмбырд кӕндзысты, цӕмӕй сӕ Йегъовӕ ахуыр кӕна. Цы хъуамӕ саразӕм, цӕмӕй нын конгресс фылдӕр пайда ӕрхӕсса?
2. Цы хъуамӕ саразӕм, цӕмӕй конгресмӕ цӕттӕ уӕм?
2 «Цӕттӕ уӕм». Йегъовӕ израилӕгтӕн загъта, цӕмӕй Синайы хохы цур уыцы ахсджиаг ӕмбырдмӕ цӕттӕ уыдаиккой (Рац. 19:10, 11). Уӕдӕ облӕстон конгресмӕ дӕр хъуамӕ хорз цӕттӕ уой, программӕйы чи архайдзӕн, ӕрмӕст уыдон нӕ, фӕлӕ алчидӕр. Зӕгъӕм, бирӕты хъӕудзӕн куыстӕй сӕхи ракурын. Чи зоны дӕ уавӕр дӕр у Неемийы уавӕры хуызӕн. Уый уыд паддзах Артаксерксы сӕндар. Фӕндыд ӕй Иерусалиммӕ ацӕуын ӕмӕ горӕты къултӕ амайынмӕ фӕкӕсын, фӕлӕ зыдта, уый гӕнӕн кӕй ис, ӕмӕ йӕ паддзах ма ауадза. Нееми Хуыцаумӕ скуывта ӕмӕ фӕныфсджындӕр, стӕй паддзахӕн йӕ курдиаты тыххӕй уӕзданӕй загъта. Уый йӕ ауагъта ӕмӕ ма йын суанг арӕзтадӕн ӕххуыс дӕр бакодта! (Неем. 2:1–9). Куыстӕй дӕхи куы ракурай, уӕд ма дӕ хъӕудзӕн ахъуыды кӕнын, цӕуыл цӕудзынӕ ӕмӕ кӕм цӕрдзынӕ, ууыл дӕр. Ӕххуыс кӕй хъӕуы, уыдонӕй алкӕмӕндӕр хистӕр нӕлгоймӕгтӕ ӕхсызгонӕй баххуыс кӕндзысты. Дӕ хъуыддӕгтӕ афтӕ спълан кӕн, цӕмӕй-иу алы бон дӕр рагацау бацӕуай ӕмӕ цӕттӕ уай, «цы фехъусай, уымӕ дӕ хъус уӕлдай лӕмбынӕг дарынмӕ» (Дзут. 2:1).
3. Цы нын баххуыс кӕндзӕн, цӕмӕй нӕ зӕрдӕтӕ программӕмӕ бацӕттӕ кӕнӕм?
3 Цӕттӕ кӕнынмӕ ма хауы ноджыдӕр иу ахсджиаг хъуыддаг – нӕ зӕрдӕтӕ бацӕттӕ кӕнӕм, цӕмӕй хъусӕм ӕмӕ ахуыр кӕнӕм (Езд. 7:10). Конгрессы программӕ рагацау ӕвӕрд уыдзӕн нӕ сайты. Фыст дзы уыдзысты раныхӕсты нӕмттӕ ӕмӕ сӕ сӕйраг стихтӕй иу-дыууӕ. Хорз уаид нӕ конгрессы размӕ сӕм нӕ бинонты ахуыры рӕстӕг куы ӕркӕсиккам. Хъусынгӕнджытӕй чидӕртӕ сӕхӕдӕг программӕ принтерыл рауадзынц ӕмӕ дзы конгрессы рӕстӕг ахсджиаг хъуыдытӕ цыбыртӕй фӕфыссынц.
4. Ныййарджытӕн конгрессы рӕстӕг сӕ бон куыд у сӕ сывӕллӕтты ахуыр кӕнын?
4 Уӕ цоты ахуыр кӕнут. Синайы хохы цур ӕмбырдӕн йӕ нысӕнттӕй иу уыди, цӕмӕй израилӕгтӕ сӕ цоты дӕр ахуыр кодтаиккой (Дык. з. 4:10). Облӕстон конгресс дӕр ныййарджытӕн ахӕм диссаджы фадат у. Программӕйы рӕстӕг ныййарджытӕ хъуамӕ сӕ сывӕллӕтты сӕ фарсмӕ сбадын кӕной, цӕмӕй лӕмбынӕг хъусой. Конгрессы фӕстӕ алы изӕр дӕр ӕмӕ, фӕстӕдӕр та бинонты ахуыры рӕстӕг, бинонтӕн сӕ бон у программӕйыл иумӕ ныхас кӕнын.
5. Облӕстон конгресмӕ куы ацӕуӕм, уӕд нын цы пайда уыдзӕн?
5 Синайы хохы цур цы диссаджы ӕмбырд уыд, уый израилӕгтӕн баххуыс кодта, цӕмӕй саргъ кодтаиккой, Хуыцауы адӕм кӕй уыдысты, уыцы стыр кадӕн (Дык. з. 4:7, 8). Тагъд цы облӕстон конгресс уыдзӕн, уымӕн дӕр йӕ нысан ахӕм у. Ӕртӕ боны мидӕг нын фадат уыдзӕн, цӕмӕй Сайтаны дунейы тӕссаг ӕдзӕрӕг быдырӕй ацӕуӕм ӕмӕ нын нӕ хотӕ ӕмӕ не ’фсымӕртимӕ цы «дзӕнӕт» ис, уым нӕ уырнындзинад бафидар кӕнӕм (Ис. 35:7–9). Йегъовӕйы бон ӕрхӕстӕг кӕны. Уӕдӕ нын алы аз дӕр цы фадат вӕййы, уымӕй нӕхи ма фӕцух кӕнӕм ӕмӕ кӕрӕдзи бафидар кӕнӕм (Дзут. 10:24, 25).