Иумӕ ӕмбырд кӕнӕм Иегъовӕйы кадджын кӕнынмӕ
1. Конгресс куыд хуыйны ӕмӕ Иегъовӕ нӕ кады аккаг цӕмӕн у?
1 Иегъовӕмӕ ис ӕгӕрон тых ӕмӕ зонд, йӕ тӕрхӕттӕ сты раст, ӕгасӕй дӕр у уарзондзинад. Сфӕлдисӕг, Царддӕттӕг ӕмӕ Дунедарӕг Стыр Хуыцау кӕй у, уымӕ гӕсгӕ ӕрмӕстдӕр уый у кувыны аккаг (Пс. 35:10; Рарг. 4:11; 15:3, 4). Ацы сӕрды облӕстон конгресс «Кадджын кӕнут Хуыцауы», зӕгъгӕ, бафидар кӕндзӕн мах, цӕмӕй Иегъовӕйы, иунӕг ӕцӕг Хуыцауы, кадджын кӕнӕм (Пс. 85:8—10).
2, 3. Цӕмӕн ис зӕгъӕн, ӕмӕ алцыдӕр хорз куы спълан кӕнӕм, уӕд программӕйӕ нӕхи ницӕмӕй фӕцух кӕндзыстӕм?
2 Хъӕуы хорз пълан кӕнын. Иегъовӕ нын цы монон куывд ӕрцӕттӕ кодта, уымӕй цӕмӕй нӕхи мацӕмӕй фӕцух кӕнӕм, уый тыххӕй нӕ алцыдӕр хъӕуы хорз спълан кӕнын (Еф. 5:15, 16). Бӕлвырд зоныс, конгресмӕ цӕуыл цӕудзынӕ, кӕм цӕрдзынӕ? Куыстӕй кӕнӕ ахуырӕй дӕхи ракуырдтай? Ацы ахсджиаг хъуыддӕгтӕ фӕстагмӕ ма ныууадз. Дӕхи рагацау куы нӕ ракурай, уӕд уыцы цинхӕссӕг бӕрӕгбонӕй гӕнӕн ис исты рауадзай. Махӕй алчидӕр программӕйы алы хайы дӕр хъуамӕ уа.
3 Дӕ разы нысан сӕвӕр конгресмӕ алы бон дӕр рагацау цӕуын. Афтӕмӕй, фыццаг зарӕджы размӕ дӕхицӕн бынат ссардзынӕ ӕмӕ дӕ хъуыдытӕ сараздзынӕ библион зондамындтӕ исынмӕ. Конгресс кӕм цӕуа, уым дуӕрттӕ алы бон дӕр гом уыдзысты 8.00 сахатӕй. Дӕ хорзӕхӕй, дӕ бинонтӕ, кӕнӕ та конгресмӕ кӕимӕ ӕрбацыдтӕ, уыдоны йедтӕмӕ бынӕттӕ ӕндӕр макӕмӕн бацахс.
4. Конгресмӕ нӕ алкӕйдӕр йӕ сихор йемӕ хӕссын цӕмӕн хъӕуы?
4 Улӕфты рӕстӕджы конгрессӕй хӕринӕгтӕ ӕлхӕнынмӕ цӕуыны бӕсты хуыздӕр уаид, алчидӕр йӕ сихор йемӕ куы хӕссид. Афтӕмӕй нӕ тыхсдзынӕ, никуыдӕм тагъд кӕндзынӕ, ӕмӕ дын фылдӕр рӕстӕг уыдзӕн де ’муырнджытимӕ ныхас кӕнынӕн (Пс. 132:1—3). Дӕ хорзӕхӕй, дӕ зӕрдыл бадар, конгресмӕ авгын мигӕнӕнтӕ ӕмӕ хъӕбӕр нозт кӕй нӕй хӕссӕн.
5. Куыд у нӕ бон райдайын нӕ зӕрдӕтӕ конгресмӕ цӕттӕ кӕнын?
5 Хъус ӕмӕ ахуыр кӕн. Ездрӕ рагацау йӕ зӕрдӕ ӕрцӕттӕ кодта Хуыцауы ныхас исынмӕ (Езд. 7:10). Уый йӕ зӕрдӕ сарӕзта Иегъовӕйы амындтӕм (Ӕмб. 2:2). Хӕдзары уӕвгӕйӕ ма нӕ бон у нӕ зӕрдӕтӕ конгресмӕ ӕрцӕттӕ кӕнын, нӕ бинонтимӕ конгрессы темӕйыл куы ахъуыды кӕнӕм ӕмӕ йыл куы аныхас кӕнӕм, уӕд.
6. Цы нын баххуыс кӕндзӕн программӕмӕ лӕмбынӕг хъусынӕн? (Кӕс фӕлгӕты.)
6 Конгрессы рӕстӕджы нӕ гӕнӕн ис бирӕ цыдӕртӕ хъыгдара хъусын. Хъӕлӕба кӕнӕ ма ӕндӕр истӕй аххосӕй гӕнӕн ис ныхасы рацӕуӕгмӕ мауал хъусӕм. Афтӕмӕй ауадздзыстӕм ахсджиаг хъуыдытӕ. Ацы фарсыл фӕлгӕты цы уынаффӕтӕ ис, уыдон нын баххуыс кӕндзысты лӕмбынӕгдӕр хъусынӕн.
7, 8. Иннӕтыл кӕй хъуыды кӕнӕм, уый цӕмӕй уыдзӕн бӕрӕг?
7 Иннӕтыл хъуыды кӕн. Программӕйы рӕстӕджы видеокамерӕйӕ ӕмӕ къамисӕнӕй дӕ бон у исын ӕрмӕстдӕр дӕ бынатӕй, цӕмӕй макӕй хъыгдарай. Дзыппыхӕсгӕ телефонтӕ ӕмӕ пейджертӕн сӕ дзӕнгӕрӕг хъӕуы афтӕ сиу кӕнын, цӕмӕй макӕй тыхсын кӕной. Сӕрмагонд аппаратурӕ нӕй иугӕнӕн конгрессы электрон тыхмӕ кӕнӕ зӕлтыхджындӕргӕнӕн фӕрӕзтӕм.
8 Куыд тынг ӕнхъӕлмӕ кӕсӕм, Иегъовӕйы кадджын кӕнынмӕ та иумӕ кӕд ӕрӕмбырд уыдзыстӕм! Цӕй уӕдӕ программӕйӕ иу хай дӕр ма рауадзӕм, лӕмбынӕг хъусӕм ӕмӕ цы базонӕм, уымӕй царды пайда кӕнӕм ӕмӕ афтӕмӕй Иегъовӕйы кадджын кӕнӕм (Дык. з. 31:12).
[Рамкӕ 3 фарсыл]
Программӕмӕ хъусгӕйӕ...
▪ хъуыды кӕн раныхӕсты сӕргӕндтыл.
▪ кӕс Библийы стихтӕм.
▪ фысс цыбыр фиппаинӕгтӕ.
▪ нысан кӕн, цӕуыл дӕ хъӕуы кусын.
▪ фӕлхат кӕн, цы базыдтай, уый.