Раздӕр пионерӕй лӕггад кодтай?
1. Бирӕтӕн цавӕр диссаджы фадат ис, фӕлӕ иуӕй-иутӕ алыхуызон аххосӕгты тыххӕй куыд бакодтой?
1 Бирӕ азты дӕргъы мингай хъусынгӕнджытӕн ис диссаджы фадат – ӕххӕстрӕстӕг пионертӕй лӕггадгӕнгӕйӕ амонынц ӕмӕ хъусын кӕнынц хорз хабар (Хъуыд. 5:42). Фӕлӕ иуӕй-иутӕ алыхуызон аххосӕгты тыххӕй пионертӕй нал лӕггад кӕнынц. Кӕд ды дӕр раздӕр пионер уыдтӕ, уӕд дӕ уавӕртӕм ногӕй не ’ркастӕ? Кӕд, мыййаг, дӕ бон у, ӕмӕ та пионертӕм ӕрбаиу уай?
2. Раздӕр пионерӕй чи лӕггад кодта, уыдоны сӕ уавӕртыл цӕмӕн хъӕуы ахъуыды кӕнын?
2 Уавӕртӕ ивынц. Чи зоны, дӕ уавӕр фӕивта ӕмӕ, пионерӕй цӕй тыххӕй нал уыди дӕ бон лӕггад кӕнын, уыцы аххосаг нал ис. Мыййаг, пионерӕй уый тыххӕй нал лӕггад кодтай, ӕмӕ дын зын уыд алы мӕй 90 сахаты хъусын кӕнын? Уӕд, чи зоны, дӕ бон суа ногӕй лӕггад кӕнын, уымӕн ӕмӕ ныр хъӕуы 70 сахаты хъусын кӕнын. Науӕд дӕ, чи зоны, ныр дӕ куыстыл уыйбӕрц рӕстӕг хардз кӕнын нал хъӕуы кӕнӕ дын дӕ бинонты раз уыйбӕрц хӕстӕ нал ис. Йе ’нӕниздзинады тыххӕй ӕххӕстрӕстӕг чи нал лӕггад кодта, иу ахӕм хо ногӕй пионер сси, 89 азы йыл куы цыди, уӕд! Афӕдзӕй фылдӕр рынчындонмӕ нӕ бахауд ӕмӕ уӕд ахъуыды кодта, зӕгъгӕ, ныр мӕ бон у ногӕй пионерӕй лӕггад кӕнын.
3. Бинонтӕн сӕ бон куыд у кӕрӕдзийӕн ӕххуыс кӕнын, цӕмӕй сӕ иу пионерӕй лӕггад кӕна?
3 Чи зоны, дӕхӕдӕг пионер нӕ уыдтӕ, фӕлӕ уӕ бинонтӕй чидӕр уыд пионер ӕмӕ ныр нал у, зӕгъӕм, ацӕргӕ ныййарӕгмӕ йӕ кӕсын кӕй хъӕуы, уый тыххӕй (1 Тим. 5:4, 8). Кӕд хабар афтӕ у, уӕд дӕуӕн кӕнӕ уӕ бинонтӕй искӕмӕн йӕ бон нӕу, ӕмӕ йын истӕмӕй баххуыс кӕнат? Хорз нӕ уаид, ууыл иумӕ куы аныхас кӕниккат? (Ӕмб. 15:22). Бинонтӕ сӕ кӕрӕдзийӕн куы ’ххуыс кӕной, цӕмӕй сӕ иу пионерӕй лӕггад кӕна, уӕд зӕгъӕн ис, ӕмӕ сӕ алчидӕр ацы хъуыддаджы архайы.
4. Кӕд нырма дӕ бон нӕу пионерӕй лӕггад кӕнын, уӕд цы ис бакӕнӕн?
4 Кӕд дӕ уавӕртӕ нӕма амонынц, цӕмӕй та пионерӕй лӕггад кӕнай, уӕд дӕ къухтӕ ма ӕруадз. Дӕ зӕрдӕйы ахӕм фӕнд кӕй ис, уый Йегъовӕйӕн ӕхсызгон у (2 Кор. 8:12). Пионерӕй лӕггадгӕнгӕйӕ цӕуыл сахуыр дӕ, уымӕй ныр дӕр уацамынды пайда кӕн. Йегъовӕмӕ кув дӕ фӕндоны тыххӕй ӕмӕ дӕ хъус дар дӕ царды уавӕртӕм, кӕд дзы, мыййаг, исты фӕивӕн ис (1 Иоан. 5:14). Гӕнӕн ис, иу бон дын Йегъовӕ «лӕггад кӕнынӕн стыр дуар байгом» кӕна ӕмӕ та уыцы циндзинад банкъарай – ӕххӕстрӕстӕг пионерӕй лӕггад кӕнай! (1 Кор. 16:9).