Дӕ бон у Хуыцауӕн фылдӕр лӕггад кӕнын?
1. Цавӕр «стыр дуар байгом» махӕн?
1 Апостол Павелӕн «стыр дуар [куы] байгом» – фылдӕр лӕггад кӕныны фадат ын куы фӕзынд, уӕд зӕрдиагӕй хъусын кодта хорз хабар, кӕд бирӕтӕ йӕ ныхмӕ уыдысты, уӕддӕр (1 Кор. 16:9). Абон ӕгас дунейы дӕр 642 000 хъусынгӕнӕджы бӕрц бахызтысты «стыр дуарыл» – райдыдтой пионертӕй лӕггад кӕнын.
2. Рӕстӕгӕй-рӕстӕгмӕ хорз цӕмӕн у нӕ уавӕртыл ахъуыды кӕнын?
2 Уавӕртӕ фӕивынц. Кӕд абон нӕ уавӕрты тыххӕй нӕ бон бирӕ лӕггад кӕнын нӕу, уӕддӕр ӕдзух афтӕ нӕ уыдзӕн. Уымӕ гӕсгӕ, хорз уаид, рӕстӕгӕй-рӕстӕгмӕ-иу нӕ уавӕртыл куы хъуыды кӕниккам, ӕмӕ куы не ’нхъӕлмӕ кӕсиккам, нӕ уавӕртӕ зӕрдӕзӕгъгӕ кӕд уыдзысты, уымӕ (Еккл. 11:4). Мыййаг, скъола фӕуд кӕныс? Йе та тагъд дӕ сывӕллон скъоламӕ бацӕудзӕн? Ӕви пенсийы рацӕуинаг дӕ? Ахӕм уавӕрты дын фылдӕр рӕстӕг фӕзындзӕн, цӕмӕй пионерӕй лӕггад кӕнын райдайай. Тынг рынчын чи уыд, иу ахӕм хо сфӕнд кодта пионерӕй лӕггад кӕнын, 89 азы йыл куы цыд, уӕд. Цӕмӕн? Уымӕн ӕмӕ йе ’нӕниздзинад фӕхуыздӕр ӕмӕ афӕдзӕй фылдӕр рынчындонмӕ нал бахауд.
3. Иуӕй-иутӕ цы сарӕзтой, цӕмӕй пионерӕй лӕггад кӕной?
3 Иу хатт Павел сфӕнд кодта ӕфсымӕртӕм Коринфмӕ ацӕуын. Фӕлӕ уый фӕстӕ йӕ пълӕнттӕ фӕивта хорз хабары тыххӕй. Абон дӕр пионерӕй чи лӕггад кӕны, уыдоны сӕ царды бирӕ цыдӕртӕ бахъуыд фӕивын, цӕмӕй пионертӕ суыдаиккой. Иуӕй-иутӕ сӕ цард фӕхуымӕтӕгдӕр кодтой, ӕнӕхъӕн бон нал кусынц, ӕмӕ сӕ ӕнӕмӕнг цы хъӕуы, уый фаг сын ис. Уыдон райгонд сты сӕ лӕггадӕй (1 Тим. 6:6–8). Иуӕй-иу бинонтӕ та сӕ хъуыддӕгтӕ афтӕ спълан кодтой, цӕмӕй ӕрмӕст лӕг куса, усӕн та йӕ бон уа пионерӕй лӕггад кӕнын.
4. Цы саразӕн ис, афтӕ дӕм куы кӕса, ӕмӕ пионеры цал сахаты хъӕуы хъусын кӕны, уыйбӕрц дӕ бон нӕ бауыдзӕн?
4 Ма тагъд кӕн афтӕ хъуыды кӕнынмӕ, дӕ бон кӕй нӕ бауыдзӕн пионерӕй лӕггад кӕнын, уымӕн ӕмӕ тӕрсыс, цал сахаты хъӕуы, уыйбӕрц дӕ бон куы нӕ бауа хъусын кӕнын. Бон дыууӕ сахаты бӕрц йеддӕмӕ хъусын кӕнын нӕ хъӕуы. Кӕд пионерӕй лӕггад кӕнынмӕ дӕ ныфс нӕ хӕссыс, уӕд уал иу-дыууӕ мӕйы ӕххуысгӕнӕг пионерӕй балӕггад кӕн, фӕлӕ дӕхицӕн нысан сӕвӕр – 70 сахаты хъусын кӕнын. Уый фӕрцы дӕхиуыл бавзардзынӕ, пионерӕй лӕггад кӕнын цас цин хӕссы, уый (Пс. 33:9). Пионертимӕ аныхас кӕн. Чи зоны, уыдоны дӕр, ды цы зындзинӕдтимӕ тох кӕныс, ахӕм зындзинӕдты сӕрты хизын бахъӕуы (Ӕмб. 15:22). Йегъовӕмӕ кув, цӕмӕй дӕ бон уа фылдӕр хъусын кӕнын (1 Иоан. 5:14).
5. Пионерӕй лӕггад кӕнын хорз нысан цӕмӕн у?
5 Хорз нысан. Пионерӕй лӕггад кӕнын бирӕ арфӕдзинӕдтӕ хӕссы. Уый фӕрцы райгонддӕр уыдзынӕ, уымӕн ӕмӕ райсынӕй раттын амондджындӕр хъуыддаг у (Ап. хъ. 20:35). Пионерӕй кӕй лӕггад кӕндзынӕ, уый фӕрцы ма, Хуыцауы Ныхас раст чи амоны, ахӕм кусӕг суыдзынӕ (2 Тим. 2:15). Ноджы дын фылдӕр фадӕттӕ уыдзӕн, цӕмӕй фенай, Йегъовӕ дын куыд ӕххуыс кӕны, уый (Ап. хъ. 11:21; Фил. 4:11–13). Уый ма дын баххуыс кӕндзӕн хорз миниуджытыл кусынӕн, зӕгъӕм, фидардзинадыл ӕмӕ уый фӕрцы ноджы феввахсдӕр уыдзынӕ Йегъовӕмӕ (Иак. 4:8). Дӕ бон у «стыр дуарыл бахизын» ӕмӕ пионерӕй лӕггад кӕнын?