Хъуамӕ кӕрӕдзийы алкӕддӕр тынг уарзӕм

1, 2. а) Апостол Павел афтӕ цӕмӕн загъта, уарзондзинад «ӕппӕтӕй ахсджиагдӕр у», зӕгъгӕ? б) Цавӕр фарстатыл аныхас кӕндзыстӕм?

АПОСТОЛ Павел уырнындзинады, ныфсы ӕмӕ уарзондзинады кой куы кодта, уӕд загъта: «Фӕлӕ дзы ӕппӕтӕй ахсджиагдӕр у уарзондзинад» (1 Кор. 13:13). Цымӕ афтӕ цӕмӕн загъта? Хуыцау нын зӕрдӕ цы ног дунейӕ бавӕрдта, уый куы ралӕууа, уӕд афтӕ нал дзурдзыстӕм, зӕгъгӕ, «мӕн уырны, Хуыцау йӕ зӕрдӕвӕрдтӕ кӕй сӕххӕст кӕндзӕн» кӕнӕ «ныфс мӕ ис, ног дуне кӕй ралӕудзӕн». Нӕхи цӕстӕй йӕ уындзыстӕм. Фӕлӕ нӕ Йегъовӕйы ӕмӕ адӕмы уарзын алкӕддӕр хъӕудзӕн. Уыцы уарзондзинад нын ӕнусӕй-ӕнусмӕ тыхджындӕр кӕндзӕн.

² Уарзондзинад нӕ алкӕддӕр кӕй хъӕудзӕн, уымӕ гӕсгӕ аныхас кӕндзыстӕм ӕртӕ фарстайыл: 1) Кӕрӕдзийы цӕмӕн хъуамӕ уарзӕм? 2) Кӕрӕдзийы кӕй уарзӕм, уый нӕ бон куыд у ӕвдисын? 3) Цы нын баххуыс кӕндзӕн, цӕмӕй кӕрӕдзийы алкӕддӕр уарзӕм?

КӔРӔДЗИЙЫ ЦӔМӔН ХЪУАМӔ УАРЗӔМ?

3. Кӕрӕдзийы цӕмӕн хъуамӕ уарзӕм?

³ Нӕ хоты ӕмӕ не ’фсымӕрты уарзын ахсджиаг цӕмӕн у? Уымӕн ӕмӕ уымӕй бӕрӕг у, ӕцӕг чырыстӕттӕ кӕй стӕм. Йесо йӕ апостолтӕн загъта: «Мӕ ахуыргӕнинӕгтӕ кӕй стут, уый адӕм иууылдӕр уымӕй базондзысты, ӕмӕ уӕ кӕрӕдзийы куы уарзат» (Иоан. 13:35). Уымӕй уӕлдай ма, кӕрӕдзийы кӕй уарзӕм, уый фӕрцы не ’хсӕн ис иудзинад. Павел загъта, уарзондзинады хуызӕн кӕй «ницы иу кӕны ӕмӕ ницы бӕтты кӕрӕдзийыл» (Кол. 3:14). Фӕлӕ ма кӕрӕдзийы ноджыдӕр иу цӕйдӕр тыххӕй хъуамӕ уарзӕм. Апостол Иоанн йе ’мчырыстӕттӕм ныффыста: «Хуыцауы чи уарзы, уый хъуамӕ йе ’фсымӕры дӕр уарза» (1 Иоан. 4:21). Уӕдӕ кӕрӕдзийы куы уарзӕм, уӕд уымӕй бӕрӕг уыдзӕн, Хуыцауы кӕй уарзӕм.

4, 5. Хуыцауы кӕй уарзӕм, уый, иннӕты кӕй уарзӕм, уыимӕ куыд баст у? Ӕрхӕсс цӕвиттон.

⁴ Хуыцауы кӕй уарзӕм, уый тынг баст у, нӕ хоты ӕмӕ не ’фсымӕрты кӕй уарзӕм, уыимӕ. Цӕвиттонӕн ӕрхӕссӕм, буары иннӕ уӕнгтӕ зӕрдӕимӕ куыд баст сты, уый. Дохтыр адӕймагӕн йӕ къухыл пульс куы басгары, уӕд афтӕмӕй базоны, йӕ зӕрдӕ хорз кусы ӕви нӕ. Ацы цӕвиттон нын куыд баххуыс кӕндзӕн, нӕ уарзондзинад тыхджын у ӕви нӕ, уый сбӕрӕг кӕнынӕн?

⁵ Пульсмӕ гӕсгӕ куыд ис зӕрдӕйы тыххӕй цыдӕр базонӕн, афтӕ, иннӕты цас уарзӕм, уымӕй ис базонӕн, Хуыцауы цас уарзӕм, уый. Куы бафиппайӕм, ӕмӕ нӕ хоты ӕмӕ не ’фсымӕрты раздӕрау нал уарзӕм, уӕд уый, гӕнӕн ис, ууыл дзурӕг у, ӕмӕ Хуыцауы дӕр афтӕ тынг нал уарзӕм. Фӕлӕ кӕд ӕдзух ӕвдисӕм, нӕ хоты ӕмӕ не ’фсымӕрты кӕй уарзӕм, уый, уӕд уый ууыл дзурӕг у, ӕмӕ Хуыцауы дӕр тынг уарзӕм.

6. Нӕ хоты ӕмӕ не ’фсымӕрты тынг куы нал уарзӕм, уӕд нӕ уый мӕты цӕмӕн хъуамӕ бафтауа? (1 Иоанны 4:7–9, 11).

⁶ Кӕд нӕ хоты ӕмӕ не ’фсымӕрты тынг нал уарзӕм, уӕд хабар хорз нӕу. Уӕд нын тӕссаг у, Хуыцауӕй кӕй адард уыдзыстӕм, уымӕй. Апостол Иоанн уый хорз бамбарын кодта. Уый загъта: «Кӕй уыны, уыцы ӕфсымӕры чи нӕ уарзы, уымӕн йӕ бон куыд у, кӕй нӕ уыны, уыцы Хуыцауы уарзын?» (1 Иоан. 4:20). Уый махӕн цӕуыл дзурӕг у? Йегъовӕ нӕ райгонд уыдзӕн, «нӕ кӕрӕдзийы [куы] уарзӕм», ӕрмӕстдӕр уӕд. (Бакӕс 1 Иоанны 4:7–9, 11.)

КӔРӔДЗИЙЫ КӔЙ УАРЗӔМ, УЫЙ НӔ БОН КУЫД У ӔВДИСЫН?

7, 8. Кӕрӕдзийы кӕй уарзӕм, уый нӕ бон куыд у ӕвдисын?

⁷ Хуыцауы Ныхасы арӕх ӕмбӕлы ацы фӕдзӕхст, кӕрӕдзийы уарзут, зӕгъгӕ (Иоан. 15:12, 17; Ром. 13:8; 1 Фес. 4:9; 1 Пет. 1:22; 1 Иоан. 4:11). Фӕлӕ уарзондзинад у, зӕрдӕйы чи вӕййы, ахӕм ӕнкъарӕн. Ӕмӕ зӕрдӕ та иу адӕймагӕн дӕр йӕ бон нӕ вӕййы фенын. Уӕдӕ нӕ бон куыд у равдисын, иннӕты кӕй уарзӕм, уый? Уый бӕрӕг уыдзӕн нӕ ныхӕстӕй ӕмӕ нӕ хъуыддӕгтӕй.

⁸ Нӕ хоты ӕмӕ не ’фсымӕрты кӕй уарзӕм, уый нӕ бон у алыхуызӕтты ӕвдисын. Мӕнӕ цалдӕр хъуыддаджы: «кӕрӕдзийӕн, раст цы у, уый дзурут» (Зах. 8:16); «уӕ кӕрӕдзиимӕ хӕларӕй цӕрут» (Мар. 9:50); «кӕрӕдзийӕн кад кӕнынмӕ-иу иу иннӕйы разӕй фӕуӕд» (Ром. 12:10); «уӕ кӕрӕдзийы суазӕг кӕнут» (Ром. 15:7, фип.); «кӕрӕдзийӕн... хатыр кӕнут» (Кол. 3:13); «кӕрӕдзийы уӕргътӕ хӕссут» (Гал. 6:2); «уӕ кӕрӕдзийы ныфсыл ныфс ӕфтаут ӕмӕ кӕрӕдзийы фидар кӕнут» (1 Фес. 5:11); «кӕрӕдзийы тыххӕй кувут» (Иак. 5:16).

9. Ахсджиаг цӕмӕн у иннӕты ныфсыл ныфс ӕфтауын? (Кӕс нывмӕ дӕр.)

⁹ 8-ӕм абзацы кӕй ранымадтам, уыцы фӕдзӕхстытӕй иумӕ ӕркӕсӕм. Павел загъта, «уӕ кӕрӕдзийы ныфсыл ныфс ӕфтаут», зӕгъгӕ. Ахсджиаг цӕмӕн у нӕ уарзондзинад уыцы хъуыддагӕй ӕвдисын? Библи чи ӕмбарын кӕны, иу ахӕм чиныджы фыст ис: «Ацы ран Павел цы дзырдӕй спайда кодта, уый нысан кӕны, тынг зын уавӕры чи ис, уыцы адӕймаджы фарсмӕ балӕууын ӕмӕ йӕ бафидар кӕнын». Уӕдӕ, зын уавӕры чи ис, ахӕм хо кӕнӕ ’фсымӕрӕн йӕ ныфсыл ныфс куы бафтауӕм ӕмӕ йын йӕ зӕрдӕ куы ’рсабыр кӕнӕм, уӕд ын баххуыс кӕнӕм, цӕмӕй та ногӕй йӕ къахыл слӕууа ӕмӕ дарддӕр царды фӕндагыл цӕуа. Афтӕ цал хатты бакӕнӕм, уал хатты равдисӕм, уыцы хойы кӕнӕ уыцы ’фсымӕры кӕй уарзӕм (2 Кор. 7:6, 7, 13).

10. Искӕмӕн тӕригъӕд кӕнын ӕмӕ йын йӕ ныфсыл ныфс ӕфтауын куыд баст сты?

¹⁰ Цы хъӕуы, цӕмӕй-иу нӕ бафӕнда адӕймагӕн йӕ ныфсыл ныфс бафтауын? Хъуамӕ йын тӕригъӕд кӕнӕм ӕмӕ йын йӕ зын нӕ зӕрдӕмӕ айсӕм. Тӕригъӕдгӕнаг адӕймаджы фӕфӕнды, уӕззау уавӕры чи ис, уымӕн йӕ зын фӕрогдӕр кӕнын, цӕмӕй йын фенцондӕр уа. Павел бамбарын кодта, Йегъовӕ дӕр ахӕм кӕй у. Уый загъта, Йегъовӕ кӕй у «тӕригъӕдгӕнаг Фыд ӕмӕ удӕнцойдӕттӕг Хуыцау» (2 Кор. 1:3). Уӕдӕ ахӕм Фыд кӕй у, уымӕ гӕсгӕ йӕ бафӕнды махӕн «не ’ппӕт зындзинӕдты дӕр» удӕнцой раттын ӕмӕ нын нӕ ныфсыл ныфс бафтауын (2 Кор. 1:4). Суадоны донӕй адӕймаг йӕ дойны куыд басӕтты ӕмӕ дзы хъарутӕ куыд бацӕуы, раст афтӕ Йегъовӕ, зын уавӕры чи ис, уыдонӕн удӕнцой ратты ӕмӕ сӕ хъарутӕ бауадзы. Махӕн дӕр нӕ бон у Йегъовӕйау иннӕтӕн тӕригъӕд кӕнын ӕмӕ сын сӕ ныфсыл ныфс ӕфтауын. Уый тыххӕй та нӕ хъӕуы цавӕрдӕр миниуджытӕ нӕ удыхъӕды фидар кӕнын. Цымӕ цавӕр миниуджытӕ?

11. Колоссӕгтӕм 3:12 стихмӕ гӕсгӕ ӕмӕ 1 Петры 3:8 стихмӕ гӕсгӕ ма нӕ цавӕр миниуджытӕ хъӕуы, цӕмӕй иннӕты алкӕддӕр уарзӕм ӕмӕ сын сӕ ныфсыл ныфс ӕфтауӕм?

¹¹ Цы нын баххуыс кӕндзӕн, цӕмӕй кӕрӕдзийы алкӕддӕр уарзӕм ӕмӕ алы бон дӕр кӕрӕдзийы ныфсыл ныфс ӕфтауӕм? Хъуамӕ бацархайӕм, цӕмӕй суӕм хӕларзӕрдӕ, нӕ кӕрӕдзийы ӕфсымӕртау уарзӕм ӕмӕ нӕм кӕрӕдзийы рыст хъара. (Бакӕс Колоссӕгтӕм 3:12; 1 Петры 3:8.) Ацы миниуджытӕ нӕм куы уой ӕмӕ тӕригъӕдгӕнаг куы уӕм, уӕд, зын уавӕры чи ис, уыдонмӕ нӕ бон нӕ уыдзӕн ӕнцад кӕсын. Уайтагъд-иу сӕ фарсмӕ балӕудзыстӕм ӕмӕ-иу сын сӕ ныфсыл ныфс бафтаудзыстӕм. Йесо загъта: «Адӕймагӕн йӕ зӕрдӕ йедзаг цӕмӕй вӕййы, дзургӕ дӕр уый фӕкӕны. Хорз адӕймаг йӕ хорздзинады къӕбицӕй рахӕссы хорздзинӕдтӕ» (Матф. 12:34, 35). Уӕдӕ, ӕххуысхъуаг чи у, уыцы хотӕ ӕмӕ ’фсымӕртӕн сӕ ныфсыл ныфс куы ӕфтауӕм, уӕд уындзысты, кӕй сӕ уарзӕм, уый.

ЦЫ НЫН БАХХУЫС КӔНДЗӔН, ЦӔМӔЙ КӔРӔДЗИЙЫ АЛКӔДДӔР УАРЗӔМ?

12. а) Нӕхи цӕмӕй хъуамӕ хъахъхъӕнӕм ӕмӕ цӕмӕн? б) Цавӕр фарстайыл аныхас кӕндзыстӕм?

¹² Не ’ппӕты дӕр фӕнды, цӕмӕй кӕрӕдзийы алкӕддӕр уарзӕм (1 Иоан. 4:7). Фӕлӕ хъуамӕ нӕ зӕрдыл дарӕм Йесойы ныхӕстӕ. Уый загъта: «Адӕмӕн сӕ фылдӕрӕн сӕ уарзондзинад ӕруазал уыдзӕн» (Матф. 24:12). Йесойы ныхӕстӕ ууыл дзурӕг нӕ уыдысты, ӕмӕ йӕ ахуыргӕнинӕгтӕн дӕр сӕ фылдӕрӕн сӕ уарзондзинад ӕруазал уыдзӕн. Фӕлӕ уӕддӕр хъуамӕ нӕхи хъахъхъӕнӕм ацы дунейы зондахастӕй, кӕннод махӕн дӕр нӕ уарзондзинад ӕруазал уыдзӕн. Нӕ бон куыд у базонын, хотӕ ӕмӕ ’фсымӕрты тынг уарзӕм ӕви нӕ?

13. Нӕ уарзондзинад ӕцӕг у ӕви нӕ, уый цавӕр уавӕрты ӕрцӕуы фӕлвӕрд?

¹³ Зӕгъӕм, ис ахъуыды кӕнӕн, кӕцыдӕр уавӕрты нӕхи куыд фӕдарӕм, ууыл (2 Кор. 8:8). Иу ахӕм уавӕры кой скодта апостол Петр. Уый загъта: «Сӕйраджыдӕр та кӕрӕдзийы афтӕ уарзут, уӕ уарзт артау куыд судза, уымӕн ӕмӕ уарзондзинад бирӕ тӕригъӕдтӕ хатыр кӕны [комк. «ӕмбӕрзы», фип.]» (1 Пет. 4:8). Уӕдӕ хотӕй кӕнӕ ’фсымӕртӕй исчи куы фӕрӕдийы кӕнӕ нӕ куы фӕхъыг кӕны, уӕд фӕлвӕрд ӕрцӕуы, нӕ уарзондзинад ӕцӕг уарзондзинад у ӕви нӕ.

14. 1 Петры 4:8 стихмӕ гӕсгӕ, иннӕты цавӕр уарзтӕй хъуамӕ уарзӕм? Ӕрхӕсс цӕвиттон.

¹⁴ Петры ныхӕстӕм лӕмбынӕгдӕр ӕркӕсӕм. 8-ӕм стихы фыццаг хайы зӕгъы, цавӕр уарзондзинад нӕм хъуамӕ уа – хъуамӕ «артау... судза». Ам Петр цы дзырдӕй спайда кодта, уый комкоммӕ нысан кӕны «ивазын». Стихы дыккаг хайы та бамбарын кодта, ахӕм уарзондзинад-иу нӕ хоты ӕмӕ не ’фсымӕрты тӕригъӕдтӕ кӕй бамбӕрздзӕн. Нӕ цӕстытыл-ма ахӕм ныв ауайын кӕнӕм. Нӕ уарзондзинадыл дыууӕ къухӕй ныххӕцыдыстӕм, цыма, ивӕзгӕ чи кӕны, ахӕм хъуымац у, ӕмӕ йӕ ивазӕм, цалынмӕ хойы кӕнӕ ӕфсымӕры тӕригъӕдтӕ нӕ бамбӕрза, уӕдмӕ – ӕмӕ иу дӕр нӕ, дыууӕ дӕр нӕ, фӕлӕ «бирӕ тӕригъӕдтӕ». Исты куы счъизи уа, уӕд ӕй хъуымацӕй бамбӕрзӕн куыд ис, афтӕ уарзондзинад дӕр бамбӕрзы, кӕнӕ ныххатыр кӕны, иннӕты рӕдыдтытӕ ӕмӕ хъӕндзинӕдтӕ.

15. Нӕ хоты ӕмӕ не ’фсымӕрты тынг куы уарзӕм, уӕд-иу куыд бакӕндзыстӕм? (Колоссӕгтӕм 3:13).

¹⁵ Нӕ хоты ӕмӕ не ’фсымӕрты хъуамӕ афтӕ тынг уарзӕм, цӕмӕй-иу сын сӕ хъӕндзинӕдтӕ ныббарӕм, уый-иу нын тынг зын куы уа, суанг уӕд дӕр. (Бакӕс Колоссӕгтӕм 3:13.) Иннӕтӕн куы хатыр кӕнӕм, уӕд равдисдзыстӕм, бирӕ сӕ кӕй уарзӕм ӕмӕ нӕ кӕй фӕнды Йегъовӕйы зӕрдӕ рухс кӕнын. Цы ма нын баххуыс кӕндзӕн, цӕмӕй-иу иннӕты рӕдыдтытӕ ӕмӕ хъӕндзинӕдтӕ мацӕмӕ ӕрдарӕм ӕмӕ-иу сӕм ма мӕсты кӕнӕм?

16, 17. Цы ма нын баххуыс кӕндзӕн, цӕмӕй иннӕты гыццыл рӕдыдтытӕ мацӕмӕ дарӕм? Ӕрхӕсс цӕвиттон. (Кӕс нывмӕ дӕр.)

¹⁶ Хъуамӕ фылдӕр уынӕм, нӕ хотӕм ӕмӕ не ’фсымӕртӕм хорзӕй цы ис, уый, сӕ хъӕндзинӕдтӕ нӕ, фӕлӕ. Ӕрхӕссӕм ахӕм цӕвиттон. Зӕгъӕм, хотӕ ӕмӕ ’фсымӕртимӕ бадт скодтат. Уӕ рӕстӕг дзӕбӕх арвыстат. Ӕмӕ сын стӕй загътай, цӕй ӕмӕ иумӕ нӕ къам сисӕм, зӕгъгӕ. Систай ӕртӕ къамы, мыййаг дзы искӕцы куы нӕ рауайа, зӕгъгӕ. Уый фӕстӕ къамтӕм куы ’ркастӕ, уӕд дзы иуы федтай, иу ӕфсымӕр дзы мӕстыхуыз кӕй рауад. Уыцы къамӕн куыд бакӕндзынӕ? Сыхалдзынӕ йӕ, уымӕн ӕмӕ ма дӕм ис ноджыдӕр дыууӕ къамы. Ӕмӕ уыцы къамты иууылдӕр худгӕ кӕнынц, уыимӕ уыцы ӕфсымӕр дӕр.

¹⁷ Нӕ зӕрдыл цы бадарӕм, уыдӕттӕ абарӕн ис ахӕм къамтимӕ. Нӕ хотӕ ӕмӕ не ’фсымӕртимӕ цы рӕстӕг арвитӕм, уый арӕхдӕр ӕхсызгонӕй ӕрымысӕм. Фӕлӕ хатт вӕййы афтӕ, ӕмӕ, иумӕ куы вӕййӕм, уӕд нын хо кӕнӕ ’фсымӕр нӕ зӕрдӕ цӕмӕйдӕр фӕриссын кӕны. Уӕд куыд хъуамӕ бакӕнӕм? Хорз нӕ уаид уыцы «къам» сыхалын? (Ӕмб. 19:11; Еф. 4:32). Уыцы ӕвзӕр «къамы» баззади нӕ хойы кӕнӕ не ’фсымӕры гыццыл рӕдыд, ӕмӕ нӕ ахӕм «къам» цӕмӕ хъӕуы? Уыцы адӕймаджы тыххӕй нӕм ис бирӕ хорз мысинӕгтӕ, ӕмӕ хъуамӕ уыцы «къамтӕ» баззайой нӕ зӕрдӕйы.

АБОН УАРЗОНДЗИНАД УӔЛДАЙ ТЫНГ ЦӔМӔН ХЪӔУЫ?

18. Ацы статьяйӕ уарзондзинады тыххӕй цы базыдтам?

¹⁸ Цӕмӕн нӕ фӕнды нӕ кӕрӕдзийы алкӕддӕр уарзын? Куыд загътам, афтӕмӕй, нӕ хоты ӕмӕ не ’фсымӕрты куы фӕуарзӕм, уӕд уымӕй бӕрӕг вӕййы, Йегъовӕйы кӕй уарзӕм. Ӕмӕ сӕ кӕй уарзӕм, уый та цӕмӕй вӕййы бӕрӕг? Иу уый, ӕмӕ-иу сын сӕ ныфсыл ныфс куы ’фтауӕм. Ӕмӕ нын уый уайдзӕн, куы сын тӕригъӕд кӕнӕм, уӕд. Цы нын баххуыс кӕндзӕн, цӕмӕй кӕрӕдзийы алкӕддӕр уарзӕм? Иннӕты рӕдыдтытӕ куы хатыр кӕнӕм, уый нын зын куы уа, суанг уӕд дӕр.

19. Абон уӕлдай ахсджиаг цӕмӕн у нӕ кӕрӕдзийы уарзын?

¹⁹ Абон уӕлдай ахсджиаг цӕмӕн у кӕрӕдзийы уарзын? Уый Петр бамбарын кодта ахӕм ныхӕстӕй: «Тагъд алцӕмӕн дӕр ӕрцӕудзӕн кӕрон». Уымӕ гӕсгӕ чырыстӕттӕн бафӕдзӕхста: «Кӕрӕдзийы афтӕ уарзут, уӕ уарзт артау куыд судза» (1 Пет. 4:7, 8). Ацы фыддунейӕн йӕ кӕрон хӕстӕгӕй-хӕстӕгдӕр кӕны. Ӕмӕ нӕм адӕм цы цӕстӕй кӕсдзысты, уый тыххӕй Йесо загъта: «Мӕ номы тыххӕй [уӕ] ӕппӕт адӕмтӕ дӕр се сӕфт уындзысты» (Матф. 24:9). Цӕмӕй уымӕн бафӕразӕм, уый тыххӕй та не ’хсӕн хъуамӕ уа иудзинад. Ӕмӕ нӕ уӕд Хӕйрӕг нӕ ныддихтӕ кӕндзӕн, куыдфӕнды ма архайа, уӕддӕр, уымӕн ӕмӕ баст стӕм уарзондзинады тӕгтӕй. Уарзондзинады хуызӕн та «ницы иу кӕны ӕмӕ ницы бӕтты кӕрӕдзийыл» (Кол. 3:14; Фил. 2:1, 2).