Ӕмбӕлгӕ чи кӕны, уыдонӕн сӕ бон куыд у раст уынаффӕ рахӕссын?

1, 2. Иуӕй-иу чырыстӕттӕ, ӕмбӕлгӕ куы кодтой, уыцы рӕстӕджы тыххӕй цы загътой?

ДЫУУӔ адӕймаджы ӕмбӕлгӕ куы фӕкӕнынц, уӕд вӕййынц тынг амондджын, ӕмӕ сын уыцы рӕстӕг циндзинад ӕрхӕссы. Ӕмӕ бирӕтӕ ууыл сразы уыдзысты. Кӕд ныртӕккӕ искӕимӕ ӕмбӕлыс, уӕд уӕ куыннӕ фӕнды, цӕмӕй-иу уыцы рӕстӕг ӕхсызгонӕй ӕрхъуыды кӕнат. Хо Ци́он цӕры Эфиопийыa. Уый загъта: «Мӕ цардӕмбалимӕ ӕмбӕлын куы райдыдтам, уӕд тынг амондджын уыдыстӕм. Ахсджиаг фарстатыл-иу ныхас кодтам, стӕй-иу худгӕ дӕр бирӕ фӕкодтам. Мӕ цинӕн кӕрон дӕр нӕ уыд, уымӕн ӕмӕ ссардтон, тынг кӕй уарзын ӕмӕ мӕн дӕр чи уарзы, ахӕм адӕймаджы».

² Ӕфсымӕр Але́ссио цӕры Нидерландты. Уый та загъта: «Мӕ бинойнагимӕ куы ’мбӕлдыстӕм, уӕд уый тынг хорз рӕстӕг уыд. Фӕлӕ нын зындзинӕдтӕ дӕр уыди». Ацы статьяйы аныхас кӕндзыстӕм, ӕмбӕлгӕ чи кӕны, уыдон цавӕр зындзинӕдтыл сӕмбӕлынц, Библийӕ сын цавӕр уагӕвӕрдтӕ баххуыс кӕндзысты ӕмӕ сын нӕ бон куыд у ӕххуыс кӕнын.

ӔМБӔЛГӔ ЧИ КӔНЫ, УЫДОНӔН СӔ НЫСАН ЦЫ ВӔЙЙЫ?

3. Ӕмбӕлгӕ чи кӕны, уыдонӕн сӕ нысан цы вӕййы? (Ӕмбисӕндтӕ 20:25).

³ Лӕппу ӕмӕ чызг ӕмбӕлгӕ куы фӕкӕнынц, уӕд сын уый циндзинад фӕхӕссы. Фӕлӕ уыцы хъуыддагмӕ уӕлӕнгай цӕстӕй кӕсӕн нӕй, уымӕн ӕмӕ сӕ хъӕудзӕн ахсджиаг уынаффӕ рахӕссын. Гӕнӕн ис, аскъуыддзаг кӕной сӕ цард кӕй баиу кӕндзысты. Ӕмӕ уӕд сӕ чындзӕхсӕвы бон Йегъовӕйы раз кӕрӕдзийӕн дзырд ратдзысты, цӕрӕнбонты кӕрӕдзи кӕй уарздзысты ӕмӕ кӕрӕдзийӕн кӕй кад кӕндзысты. Исты дзырд раттыны размӕ фӕхъӕуы тынг лӕмбынӕг ахъуыды кӕнын. (Бакӕс Ӕмбисӕндтӕ 20:25.) Ӕмӕ уый хауы, адӕймаг йӕ цардӕмбалӕн цы дзырд ратты, уымӕ дӕр. Дыууӕ адӕймаджы ӕмбӕлын куы райдайынц, уӕд кӕрӕдзийы хуыздӕр базонынц. Ӕмӕ уый фӕрцы сӕ бон вӕййы бамбарын, кӕрӕдзийӕн цардӕмбӕлттӕн сбӕздзысты ӕви нӕ. Чи зоны сӕ бафӕнда сӕ цард баиу кӕнын, чи зоны та аскъуыддзаг кӕной, кӕй нал ӕмбӕлдзысты. Кӕд ахӕм уынаффӕ рахӕссой, зӕгъгӕ, нал ӕмбӕлдзыстӕм, уӕд уый ууыл дзурӕг нӕ уыдзӕн, ӕмӕ раст нӕ бакодтой. Фӕлӕ ууыл дзурӕг уыдзӕн, ӕмӕ сӕ нысан сӕ къухы бафтыд – ӕмбӕлгӕ кӕй кодтой, уый фӕрцы бамбӕрстой, сӕ цард баиу кӕнын сӕ хъӕуы ӕви нӕ.

4. Дыууӕ адӕймаджы ӕмбӕлын цӕмӕн райдайынц, уый нӕ зӕрдыл цӕмӕн хъуамӕ дарӕм?

⁴ Бинонтӕ скӕнын кӕй фӕнды, уыцы чырыстӕттӕ хъуамӕ сӕ зӕрдыл дарой: дыууӕ адӕймаджы ӕмбӕлын уый тыххӕй райдайынц, цӕмӕй бамбарой, кӕрӕдзийӕн цардӕмбӕлттӕн сбӕздзысты ӕви нӕ. Уый сӕ рох куы нӕ уа, уӕд, сӕ цард баиу кӕнын кӕимӕ нӕ хъавынц, ахӕм адӕймагимӕ ӕмбӕлын нӕ райдайдзысты. Фӕлӕ, дыууӕ адӕймаджы ӕмбӕлын цӕмӕн райдайынц, уый сӕ зӕрдыл хъуамӕ дарой чырыстӕттӕ иууылдӕр. Зӕгъӕм, иуӕй-иутӕ афтӕ фӕхъуыды кӕнынц, ӕмӕ кӕд хо ӕмӕ ’фсымӕр ӕмбӕлынц, уӕд хъуамӕ ӕнӕмӕнг сӕ цард баиу кӕной. Ахӕм хъуыдытӕ, цардӕмбал кӕмӕн нӕй, уыцы чырыстӕттыл, гӕнӕн ис, куыд бандавой? Иугонд Штаттӕй иу ӕнӕцыд хо, Мели́ссӕ, загъта: «Хо ӕмӕ ’фсымӕр ӕмбӕлгӕ куы фӕкӕнынц, уӕд иуӕй-иутӕ уыдоны кой йеддӕмӕ ӕндӕр ницӕй кой фӕкӕнынц ӕмӕ фенхъӕлмӕ кӕсынц, сӕ цард кӕд баиу кӕндзысты, уымӕ. Ӕмӕ кӕд чидӕртӕ бамбарынц, кӕрӕдзийӕн цардӕмбӕлттӕн кӕй не сбӕздзысты, уӕддӕр дарддӕр фембӕлынц, цӕмӕй иннӕты ма фӕфыдӕнхъӕл кӕной. Иннӕтӕ та уыдӕттӕ уынгӕйӕ искӕимӕ ӕмбӕлыны койӕ дӕр баризынц».

КӔРӔДЗИЙЫ ХУЫЗДӔР БАЗОНУТ

5, 6. Ӕмбӕлгӕ чи кӕны, уыдон кӕрӕдзийы тыххӕй цы хъуамӕ зоной? (1 Петры 3:4).

⁵ Кӕд искӕимӕ ӕмбӕлыс, уӕд дын цы баххуыс кӕндзӕн, цӕмӕй бамбарай, уыцы адӕймаг дын хорз цардӕмбал уыдзӕн ӕви нӕ? Уӕ кӕрӕдзийы хорз базонут. Кӕй зӕгъын ӕй хъӕуы, нырмӕ дӕр уыцы адӕймаджы тыххӕй цыдӕртӕ базыдтай. Фӕлӕ дӕ ныр та хъӕуы базонын, йӕ «зӕрдӕйы цы ис, уый». (Бакӕс 1 Петры 3:4.) Хъуамӕ йӕ хуыздӕр базонай, зӕгъӕм, йӕ уырнындзинад фидар у ӕмӕ Йегъовӕйы тынг уарзы ӕви нӕ, цавӕр адӕймаг у, цавӕр зондахаст ын ис. Рӕстӕг куы рацӕуа, уӕд хъуамӕ дӕ бон уа дзуапп раттын ахӕм фарстатӕн: «Ацы адӕймаг мын хорз цардӕмбал уыдзӕн? (Ӕмб. 31:26, 27, 30; Еф. 5:33; 1 Тим. 5:8). Хорз ӕмбал мын уыдзӕн ӕмӕ мӕ уарздзӕн, стӕй йын ӕз дӕр хорз ӕмбал уыдзынӕн ӕмӕ йӕ уарздзынӕн? Нӕ бон уыдзӕн кӕрӕдзийы хъӕндзинӕдтӕн быхсын? (Ром. 3:23)»b. Дӕ зӕрдыл дар: ахсджиагдӕр уый нӕу, цас ӕмхуызон стут, фӕлӕ цавӕрдӕр хъуыддаджы фӕдыл уӕ хъуыды куы фӕхицӕн кӕны кӕнӕ иуы зӕрдӕмӕ иу цыдӕр куы фӕцӕуы, иннӕйы зӕрдӕмӕ та – ӕндӕр цыдӕр, уӕд уын цас хорз фӕуайы кӕрӕдзийы хъуыдыйӕн аргъ кӕнын.

⁶ Кӕимӕ ӕмбӕлыс, уыцы адӕймаджы тыххӕй ма ноджыдӕр цы хъуамӕ базонай? Цалынмӕ дӕ зӕрдӕйы тыхджын ӕнкъарӕнтӕ нӕ фӕзынд, уӕдмӕ дӕ, гӕнӕн ис, бафӕнда йемӕ ахсджиаг фарстатыл аныхас кӕнын, зӕгъӕм, цавӕр нысӕнттӕ йын ис, ууыл. Фӕлӕ цымӕ ис аныхас кӕнӕн, адӕймаг алкӕмӕн кӕй нӕ фӕдзуры, ахӕм фарстатыл дӕр, зӕгъӕм, ӕнӕниздзинадыл, ӕхцаимӕ баст зындзинӕдтыл кӕнӕ уыл кӕддӕр цавӕрдӕр ӕвзӕр хабар кӕй ӕрцыд ӕмӕ уӕ зӕрдӕйы хъӕдгӕмттӕ кӕй баззад, ууыл? Ӕнӕмӕнг нӕу, цӕмӕй уыцы фарстатыл, куыддӕр ӕмбӕлын райдайат, афтӕ аныхас кӕнат. (Абар Иоанны 16:12.) Кӕд дӕм афтӕ кӕсы, ӕмӕ уыдӕттыл ныхас кӕнын нырма раджы у, уӕд-иу уый тыххӕй ӕргом зӕгъ. Фӕлӕ, рӕстӕг куы рацӕуа, уӕд дӕ уыдӕтты тыххӕй уӕддӕр хъӕудзӕн радзурын. Уӕ кӕрӕдзийы тыххӕй ахӕм хабӕрттӕ куы зонат, уӕд уӕ бон уыдзӕн раст уынаффӕ рахӕссын.

7. Ӕмбӕлгӕ чи кӕны, уыдонӕн сӕ бон куыд у кӕрӕдзийы хуыздӕр базонын? (Кӕс рамкӕ дӕр «Кӕрӕдзийӕ дард куы цӕрат».) (Кӕс нывтӕм дӕр.)

⁷ Куыд ис базонӕн, кӕимӕ ӕмбӕлыс, уый ӕцӕгӕй цавӕр адӕймаг у, уый? Ӕргом ныхас кӕнут, кӕрӕдзимӕ-иу фарстатӕ дӕттут ӕмӕ-иу кӕрӕдзимӕ лӕмбынӕг байхъусут (Ӕмб. 20:5; Иак. 1:19). Иумӕ истытӕ куы аразат, уӕд уын ӕнцондӕр уыдзӕн аныхас кӕнын, зӕгъӕм, искуы иумӕ куы абадат ӕмӕ исты куы ахӕрат, иумӕ куы тезгъо кӕнат кӕнӕ та куы хъусын кӕнат. Кӕрӕдзи ма хуыздӕр базондзыстут, уӕ рӕстӕг уӕ бинонтимӕ ӕмӕ уе ’мбӕлттимӕ куы ӕрвитат, уӕд дӕр. Уымӕй уӕлдай ма-иу иумӕ алыхуызон хъуыддӕгтӕ аразут, цӕмӕй фенай, адӕймаг алыхуызон уавӕрты ӕмӕ алыхуызон адӕмимӕ йӕхи куыд дары, уый. А́свин у Нидерландтӕй. Йӕ бинойнаг Али́сийӕимӕ куы ’мбӕлдысты, уӕд уыдон дӕр афтӕ кодтой. Асвин загъта: «Кӕрӕдзийы хуыздӕр кӕй фӕрцы базыдтаиккам, ахӕм хъуыддӕгтӕ арӕзтам. Арӕх-иу уыдӕттӕ хуымӕтӕг цыдӕртӕ уыдысты, зӕгъӕм, иумӕ-иу хӕринаг скодтам кӕнӕ-иу хӕдзары куыстытӕ иумӕ кодтам. Уый фӕрцы-иу федтам кӕрӕдзийы хорз миниуджытӕ ӕмӕ хъӕндзинӕдтӕ».

8. Ӕмбӕлгӕ чи кӕны, уыдон иумӕ Библи куы иртасой, уӕд сын уый цы пайда ӕрхӕсдзӕн?

⁸ Кӕрӕдзийы ма хуыздӕр базондзыстут, иумӕ Библи куы иртасат, уӕд. Уӕ цард куы баиу кӕнат, уӕд-иу уӕ хъӕудзӕн бинонты ахуырӕн рӕстӕг рахицӕн кӕнын, цӕмӕй уӕ бинонты царды Йегъовӕ алкӕддӕр фыццаг бынаты уа (Еккл. 4:12). Ӕмӕ ныр дӕр уӕ бон нӕ уаид Библи иумӕ иртасын? Кӕй зӕгъын ӕй хъӕуы, бинонтӕ нӕма стут ӕмӕ ’фсымӕр хойӕн йӕ сӕрыхицау нӕма у. Фӕлӕ иумӕ Библи куы иртасат, уӕд базондзыстут, алкӕмӕн дӕр уӕ йӕ уырнындзинад фидар у ӕви нӕ. Иугонд Штаттӕй иу къай, Макс ӕмӕ Ла́йзӕ, бафиппайдтой, уый ма ноджыдӕр хорз цӕмӕн у. Макс загъта: «Ӕмбӕлын куы райдыдтам, уӕд нӕ публикациты райдыдтам иртасын статьятӕ ӕмбӕлыны, цард баиу кӕныны ӕмӕ бинонты царды тыххӕй. Уый фӕрцы-иу аныхас кодтам, ӕнцон дзурӕн кӕуыл нӕу, ахӕм ахсджиаг фарстатыл».

НОДЖЫДӔР МА ЦӔУЫЛ ФӔХЪӔУЫ АХЪУЫДЫ КӔНЫН?

9. Хо ӕмӕ ’фсымӕр цӕуыл хъуамӕ ахъуыды кӕной, ӕмбӕлгӕ кӕй кӕнынц, уый тыххӕй кӕмӕн радзурдзысты, уый скъуыддзаг кӕнгӕйӕ?

⁹ Ӕмбӕлгӕ кӕй кӕнут, уый тыххӕй уӕ бон кӕмӕн у радзурын? Уый уӕхи хъӕуы аскъуыддзаг кӕнын. Ӕмбӕлын кӕй райдыдтат, уый тыххӕй, гӕнӕн ис, радзурат ӕрмӕстдӕр цалдӕр адӕймагӕн (Ӕмб. 17:27). Уый фӕрцы уӕхи бахиздзыстут дзӕгъӕл рафӕрс-бафӕрсӕй. Фӕлӕ йӕ ӕппындӕр куы никӕмӕн зӕгъат, уӕд та-иу уемӕ ничи уыдзӕн ӕмӕ ӕдзух иунӕгӕй уыдзыстут. Ӕмӕ уый та тӕссаг у. Уӕдӕ, зондыл дзурӕг уыдзӕн, хорз уынаффӕ уын чи ратта кӕнӕ уын ӕндӕр истӕмӕй чи баххуыс кӕна, уыдонӕн куы зӕгъат, кӕй ӕмбӕлут, уый (Ӕмб. 15:22). Зӕгъӕм, уӕ бон у уый тыххӕй радзурын уӕ бинонтӕй искӕмӕн, фӕлтӕрдджын хотӕн ӕмӕ ’фсымӕртӕн кӕнӕ та хистӕр нӕлгоймӕгтӕн.

10. Ӕмбӕлгӕ чи кӕны, уыдонӕн сӕ бон цы у аразын, цӕмӕй сӕ уагахастӕй Йегъовӕйы кадджын кӕной? (Ӕмбисӕндтӕ 22:3).

¹⁰ Уӕ бон цы у аразын, цӕмӕй уӕ уагахастӕй Йегъовӕйы кадджын кӕнат? Уӕ зӕрдӕйы ӕнкъарӕнтӕ цас тыхджындӕр кӕной, уыйас уӕ тынгдӕр фӕнддзӕн кӕрӕдзийыл узӕлын. Цы уын баххуыс кӕндзӕн, цӕмӕй, Йегъовӕйы зӕрдӕмӕ цы нӕ цӕуы, ахӕмӕй мацы саразат? (1 Кор. 6:18). Ӕнӕгъдау цӕуылдӕрты-иу ма ныхас кӕнут, хибар ран-иу дыууӕйӕ ма баззайут, стӕй карз нозтӕй бӕрц зонут (Еф. 5:3). Уыдӕтты тыххӕй, гӕнӕн ис, уӕ буары монцтӕ стыхджын уой, ӕмӕ уын зындӕр уыдзӕн, раст цы у, уый аразын. Уӕдӕ-иу ӕдзух ныхас кӕнут, уӕ бон цы у аразын, цӕмӕй бӕрӕг уа, Йегъовӕйы уагӕвӕрдтӕм куыдфӕндыйы цӕстӕй кӕй нӕ кӕсут ӕмӕ кӕрӕдзийӕн дӕр кӕй кад кӕнут. (Бакӕс Ӕмбисӕндтӕ 22:3.) Дави́т ӕмӕ А́лмаз цӕрынц Эфиопийы. Уыдон загътой: «Фембӕлдыстӕм-иу, бирӕ адӕм кӕм уыд, ахӕм рӕтты кӕнӕ-иу не ’мбӕлттӕй искӕй немӕ ракодтам. Машинӕйы кӕнӕ хӕдзары иунӕгӕй никуы баззадыстӕм. Уый фӕрцы нӕхи бахызтам, фӕрӕдийынӕй нын тӕссаг кӕм уыд, ахӕм уавӕртӕй».

11. Ӕмбӕлгӕ чи кӕны, уыдон кӕрӕдзийыл куыд узӕлдзысты, уый скъуыддзаг кӕнгӕйӕ цӕуыл хъуамӕ ахъуыды кӕной?

¹¹ Ӕмбӕлгӕ чи кӕны, уыдонӕн сӕ бон у кӕрӕдзийыл узӕлын? Кӕрӕдзи куы бауарзат, уӕд, чи зоны, аскъуыддзаг кӕнат, кӕй уын ӕмбӕлы кӕрӕдзийыл баузӕлын дӕр, ӕрмӕст уе ’фсарм куыд нӕ фесафат. Фӕлӕ хъуамӕ уе ’нкъарӕнты рохтыл хӕцат, кӕннод уӕ буары монцтӕ стыхджын уыдзысты, ӕмӕ уын зын уыдзӕн, иннӕ адӕймаг ӕцӕгӕй цавӕр у, ууыл хъуыды кӕнын (Сол. з. 1:2; 2:6). Уымӕй уӕлдай ма, кӕрӕдзийыл куы узӕлат, уӕд, гӕнӕн ис, уӕхиуыл ма фӕхӕцат ӕмӕ, Йегъовӕйы зӕрдӕмӕ цы нӕ цӕуы, ахӕмӕй исты саразат (Ӕмб. 6:27). Уӕдӕ, куыддӕр ӕмбӕлын райдайат, афтӕ-иу Библийы уагӕвӕрдтыл аныхас кӕнут ӕмӕ-иу баныхас кӕнут, цы уын ӕмбӕлдзӕн ӕмӕ уын цы не ’мбӕлдзӕн аразын (1 Фес. 4:3–7)c. Ахъуыды-иу кӕнут ахӕм фарстатыл: «Кӕм цӕрӕм, уым адӕм цы цӕстӕй ракӕсдзысты, кӕрӕдзийыл кӕй узӕлӕм, уымӕ? Нӕ дыууӕйӕ иуӕн йе ’нкъарӕнтӕ не стыхджын уыдзысты ӕмӕ йын зын нӕ уыдзӕн йӕ буары рохтыл хӕцын?»

12. Ӕмбӕлгӕ чи кӕны, уыдон кӕрӕдзийы куы нӕ бамбарой, уӕд-иу цӕуыл хъуамӕ ахъуыды кӕной?

¹² Кӕрӕдзийы куы нӕ бамбарат, уӕд-иу цы хъуамӕ саразат? Кӕд хатгай кӕрӕдзийы нӕ бамбарут, уӕд уый ууыл дзурӕг у, ӕмӕ хъуамӕ мауал ӕмбӕлат? Нӕ, уый афтӕ нӕу. Ӕмбӕлгӕ чи кӕны, уыдонӕн хатт се ’хсӕн цыдӕр рауайы. Бинонтӕ амондджын ӕмӕ ӕнгом вӕййынц, лӕг ӕмӕ ус кӕрӕдзи куы фӕнымайынц ӕмӕ сӕ иу иннӕйы хъуыдыйӕн куы фӕаргъ кӕны, уӕд. Ныр зындзинӕдты сӕрты куыд хизут, уымӕй бӕрӕг у, фидӕны дӕр уын уайдзӕн сӕ сӕрты хизын ӕви нӕ. Ахъуыды-иу кӕнут ахӕм фарстатыл: «Нӕ бон вӕййы сабырӕй аныхас кӕнын? Нӕ рӕдыдтытыл басӕттӕм ӕмӕ фӕархайӕм, цӕмӕй-иу афтӕ мауал бакӕнӕм? Ӕнцондзырд стӕм? Цӕттӕ вӕййӕм хатыр ракурынмӕ ӕмӕ кӕрӕдзийӕн ныххатыр кӕнынмӕ?» (Еф. 4:31, 32). Фӕлӕ кӕд ӕдзух хыл ӕмӕ быцӕу фӕкӕнут, уӕд, ӕвӕццӕгӕн, уӕ цард куы баиу кӕнат, уӕд дӕр уавӕр нӕ фӕивдзӕн. Кӕд ӕй ӕмбарыс, ӕмӕ дын ацы адӕймаг хорз цардӕмбал нӕ уыдзӕн, уӕд уӕ дыууӕйӕн дӕр хуыздӕр уыдзӕн, куы нал ӕмбӕлатd.

13. Хо ӕмӕ ’фсымӕрӕн цы баххуыс кӕндзӕн, цас хъуамӕ ӕмбӕлой, уый аскъуыддзаг кӕнынӕн?

¹³ Цас рӕстӕг хъуамӕ ӕмбӕлат? Адӕймаг уынаффӕ тагъд-тагъдӕй куы рахӕссы, уӕд уый арӕх хорзӕй ницӕмӕ ӕркӕны (Ӕмб. 21:5). Уӕдӕ хъуамӕ фаг рӕстӕг ӕмбӕлат, цӕмӕй кӕрӕдзийы хорз базонат. Фӕлӕ кӕд кӕрӕдзийы хорз базыдтат, уӕд абон-райсом мауал кӕнут. Библийы фыст ис: «Бирӕ ӕнхъӕлмӕ кӕсын адӕймагӕн зӕрдӕниз у» (Ӕмб. 13:12). Уымӕй уӕлдай, кӕрӕдзийы зӕрдӕмӕ цас тынгдӕр цӕуат ӕмӕ иумӕ рӕстӕг цас арӕхдӕр ӕрвитат, уыйас уын, гӕнӕн ис, зындӕр уа уӕ буары рохтыл хӕцын (1 Кор. 7:9). Цас ма хъуамӕ ӕмбӕлат, ууыл хъуыды кӕныны бӕсты-иу ахъуыды кӕн: «Кӕимӕ ӕмбӕлын, уыцы адӕймаджы тыххӕй ма цы хъуамӕ базонон, цӕмӕй раст уынаффӕ рахӕссон?»

НӔ БОН КУЫД У, ӔМБӔЛГӔ ЧИ КӔНЫ, УЫДОНӔН ӔХХУЫС КӔНЫН?

14. Нӕ бон куыд у, ӕмбӕлгӕ чи кӕны, уыдонӕн ӕххуыс кӕнын? (Кӕс нывмӕ дӕр.)

¹⁴ Кӕд дӕ зонгӕтӕй исчи ӕмбӕлы, уӕд сын дӕ бон куыд у ӕххуыс кӕнын? Ис сӕ фӕхонӕн иумӕ исты ахӕрынмӕ, бинонты ахуырмӕ кӕнӕ та сӕ искуыдӕм улӕфынмӕ фӕхонӕн (Ром. 12:13). Уый фӕрцы сын уыдзӕн фадат, цӕмӕй кӕрӕдзийы ноджы хуыздӕр базоной. Дӕ бон нӕ уаид семӕ тезгъо кӕнынмӕ ацӕуын кӕнӕ сӕ машинӕйыл искуыдӕм цӕуын куы хъӕуа, уӕд семӕ ацӕуын йе та сӕ хӕдзармӕ фӕхонын, цӕмӕй иунӕгӕй ма уой? (Гал. 6:10). Алисийӕ ӕмӕ Асвин дӕр хотӕ ӕмӕ ’фсымӕртӕй бузныг сты, афтӕ сын кӕй ӕххуыс кодтой. Алисийӕ загъта: «Хотӕ ӕмӕ-иу нӕ ’фсымӕртӕ сӕхимӕ фӕхуыдтой. Афтӕмӕй-иу иунӕгӕй дӕр нӕ уыдыстӕм ӕмӕ-иу нӕ бон уыд хибарӕй аныхас кӕнын дӕр». Кӕд дын хо ӕмӕ ’фсымӕр загътой, цӕмӕй семӕ искуыдӕм ацӕуай, уӕд уый ууыл дзурӕг у, ӕмӕ дыл ӕууӕндынц, ӕмӕ уымӕн аргъ кӕн. Лӕмбынӕг у, цӕмӕй сӕ бынтон иунӕгӕй ма ныууадзай. Фӕлӕ-иу ӕдзух сӕ уӕлхъус дӕр ма лӕуу, цӕмӕй сӕ бон уа хибарӕй аныхас кӕнын (Фил. 2:4).

15. Ӕмбӕлгӕ чи кӕны, уыдонӕн ма стыр ӕххуыс цы уыдзӕн? (Ӕмбисӕндтӕ 12:18).

¹⁵ Уымӕй уӕлдай ма хъуамӕ хъуыды кӕнӕм, цы дзурӕм, ууыл. Куы хъӕуа, уӕд-иу хъуамӕ нӕхиуыл фӕхӕцӕм ӕмӕ хъусӕй фӕлӕууӕм. (Бакӕс Ӕмбисӕндтӕ 12:18.) Чи зоны, базыдтам, чидӕр кӕимӕдӕр ӕмбӕлын кӕй райдыдта ӕмӕ нӕ тынг фӕнды, цӕмӕй йӕ иннӕтӕн дӕр радзурӕм. Фӕлӕ, чи зоны, сӕхи фӕнды уый тыххӕй иннӕтӕн радзурын. Уымӕй уӕлдай, хъуамӕ сӕ кой ма кӕнӕм ӕмӕ, ӕрмӕст сӕхимӕ чи хауы, уыцы фарстаты фӕдыл цы уынаффӕтӕ рахастой, уыдонмӕ фаутӕ ма хӕссӕм (Ӕмб. 20:19; Ром. 14:10; 1 Фес. 4:11). Стӕй сӕ хъуамӕ ма рафӕрс-бафӕрс кӕнӕм, зӕгъгӕ, уӕ цард кӕд баиу кӕндзыстут. Хо Эли́з ӕмӕ йӕ сӕрыхицау загътой: «Чидӕртӕ-иу нӕ афарстой, чындзӕхсӕв уын кӕд уыдзӕн, зӕгъгӕ. Ӕмӕ-иу фӕкуыддӕр стӕм, уымӕн ӕмӕ нӕхӕдӕг ууыл ныхас дӕр нӕма кодтам».

16. Хо ӕмӕ ’фсымӕр куы аскъуыддзаг кӕной, кӕй нал ӕмбӕлдзысты, уӕд уымӕ цы цӕстӕй хъуамӕ кӕсӕм?

¹⁶ Фӕлӕ, зӕгъӕм, хо ӕмӕ ’фсымӕр аскъуыддзаг кодтой, кӕй нал ӕмбӕлдзысты. Уӕд хъуамӕ нӕхи сӕ хъуыддӕгты ма тъыссӕм ӕмӕ макӕй фарс хӕцӕм (1 Пет. 4:15). Хо Лия загъта: «Кӕддӕр иу ӕфсымӕримӕ ӕмбӕлдтӕн. Фӕлӕ стӕй аскъуыддзаг кодтам, кӕй нал ӕмбӕлдзыстӕм. Ӕмӕ мӕ хъустыл ӕруад, чидӕртӕ нӕ кой кӕй кодтой. Афтӕ цӕмӕн бакодтам, уый тыххӕй иутӕ иу цыдӕр дзырдтой, иннӕтӕ – ӕндӕр цыдӕр. Уый мын тынг зын уыди». Статьяйы райдианы куыд загътам, афтӕмӕй кӕд хо ӕмӕ ’фсымӕр аскъуыддзаг кодтой, кӕй нал ӕмбӕлдзысты, уӕд уый ӕнӕмӕнг ууыл дзурӕг нӕу, ӕмӕ раст уынаффӕ нӕ рахастой. Арӕхдӕр уый ууыл дзурӕг вӕййы, ӕмӕ сӕ нысан сӕ къухы бафтыд – бамбӕрстой, сӕ цард баиу кӕнын сӕ хъӕуы ӕви нӕ. Фӕлӕ уӕддӕр, гӕнӕн ис, хо ӕмӕ ’фсымӕр зӕрдӕрыст бавзарой ӕмӕ сӕхимӕ иунӕг кӕсой. Уымӕ гӕсгӕ-иу хъуамӕ сӕ фарсмӕ балӕууӕм (Ӕмб. 17:17).

17. Ӕмбӕлгӕ чи кӕны, уыдон дарддӕр дӕр цы хъуамӕ аразой?

¹⁷ Уӕдӕ куыд базыдтам, афтӕмӕй, ӕмбӕлгӕ чи фӕкӕны, уыдонӕн зындзинӕдтӕ дӕр вӕййы, фӕлӕ уыимӕ амондджын дӕр вӕййынц. Хо Дже́ссикӕ загъта: «Хъуыди нӕ тынг бацархайын, цӕмӕй кӕрӕдзийы хорз базыдтаиккам. Фӕлӕ цы тыхтӕ ӕмӕ цы рӕстӕг бахардз кодтам, уыдон уый аргъ уыдысты!» Кӕд ныртӕккӕ искӕимӕ ӕмбӕлыс, уӕд дарддӕр дӕр архайут, цӕмӕй кӕрӕдзийы хорз базонат. Афтӕ куы кӕнат, уӕд уӕ нысан уӕ къухы бафтдзӕн – раст уынаффӕ рахӕсдзыстут!