Хъуыддаг стыр къахдзӕфтӕй размӕ цӕуы

Йегъовӕйы Ӕвдисӕнтӕн сӕрибарӕй хъусын кӕныны бар куы радтой, уӕд чырыстон аргъуанты сӕргълӕуджытӕ тынг смӕсты сты. Уыдон Джакартӕйы ауагътой семинар ӕмӕ йӕм ӕрбацыди 700 адӕймагӕй фылдӕр – сауджынтӕ ӕмӕ авд протестантон аргъуаны дзырддзӕугӕ адӕймӕгтӕ. Сӕ нысан уыди, цӕмӕй хицауадӕн ногӕй Йегъовӕйы Ӕвдисӕнты хъуыддаг сӕхгӕнын кодтаиккой. Фӕлӕ хицауад не сразы.

Йегъовӕйы Ӕвдисӕнтӕн сӕрибардзинад кӕй радтой, уый бӕстӕйыл куы айхъуыст, уӕд филиалмӕ бирӕтӕ литературӕйы тыххӕй ӕмӕ Библи ахуыр кӕныны тыххӕй ныффыстой. 2003 азы Ӕрымысӕн изӕрмӕ ӕрбацыд 42 000 адӕймагӕй фылдӕр, бӕстӕйы хъусынгӕнджытӕ цас уыди, уымӕй дыууӕ хатты фылдӕр. Джакартӕмӕ та конгресмӕ ӕрбацыд 10 000 адӕймаджы бӕрц. Уым ма уыди иу стыр хицау Дины хъуыддӕгты департаментӕй дӕр. Уымӕ тынг диссаг фӕкаст, ӕрыгӕттӕ дӕр ӕмӕ ацӕргӕтӕ дӕр сӕхи Библиты кӕй кастысты, ныхасырацӕуджытӕ-иу цы стихтӕ кастысты, уыдон.

Индонезийы Йегъовӕйы Ӕвдисӕнтӕн хъусын кӕнын бар кӕй радтой, уый фӕрцы миссионертӕ фӕстӕмӕ ӕрыздӕхтысты. Фыццаг ӕрцыдысты Йозеф ӕмӕ Херавати Нойхардтa (Соломоны сакъадӕхтӕй), Эсӕ ӕмӕ Вилхелминӕ Тархонен, Райнер ӕмӕ Феломенӕ Тайхман (Тайванӕй), Билл ӕмӕ Нинӕ Перри (Японийӕ). Уый фӕстӕ та ӕрцыдысты, Галаады скъола ӕрӕджы каст чи фӕци, уыцы миссионертӕ. Уыдон снысан кодтой Цӕгат Суматрӕмӕ, Калимантанмӕ, Цӕгат Сулавесимӕ ӕмӕ ма ӕндӕр дард рӕттӕм дӕр.

2005 азы филиал ауагъта дыууӕ ног скъолайы. Лӕггад фӕхуыздӕр кӕныны скъолайы (ныр Хуыцауы Паддзахад хъусынгӕнджыты скъола) ахуыргӕнджытӕй иу, Юлианус Бениг, загъта: «Мӕ зӕрдӕмӕ тынг цыди ӕфсымӕрты ахуыр кӕнын, цӕмӕй хуыздӕр арӕхсой иннӕты ахуыр кӕнынмӕ ӕмӕ раныхӕстӕ дзурынмӕ ӕмӕ цӕмӕй фылдӕр пайда хӕссой организацийӕн». Уыцы скъолайы чи ахуыр кодта, уыдонӕй ныр бирӕтӕ лӕггад кӕнынц сӕрмагонд пионертӕй кӕнӕ цӕуӕг цӕстдарджытӕй. Цӕуӕг цӕстдарджытӕн цы скъола ис, уым (ныр Скъола районон цӕстдарджытӕн ӕмӕ сӕ устытӕн) фыццаг къласы цы ӕфсымӕртӕ ахуыр кодтой, уыдоны сӕ хӕстӕ ӕххӕст кӕнынмӕ бацӕттӕ кодтой уымӕй размӕ дӕр, бӕстӕйы хъусын кӕныны бар куы нӕма уыди, уӕд. Фӕлӕ ног скъолайы фӕрцы базыдтой, ныр – бӕстӕйы хорз хабар сӕрибарӕй хъусын кӕныны фадат куы фӕзынд, уӕд – сӕ хӕстӕ куыд хъуамӕ ӕххӕст кӕной, уый. Понсо Прасойо, уыцы скъолайы фыццаг къласы чи ахуыр кодта, уыдонӕй иу, загъта: «Скъола мын тынг баххуыс кодта: ныр иннӕты хуыздӕр ӕмбарын ӕмӕ мӕ хӕстӕм бӕрнондӕр цӕстӕй кӕсын. Уый мӕ ног хъарутӕ бауагъта, ӕмӕ мӕ бафӕндыд, цӕмӕй Хуыцауы хъуыддаджы ноджы фылдӕр аразон».

Хъӕуы бирӕ Паддзахады залтӕ

Индонезийы 25 азы дӕргъы хъусын кӕныны бар куы нӕ уыд, уӕд ӕмбырдтӕн сӕ фылдӕр фембӕлдтӕ уагътой хӕдзӕртты, ӕмӕ-иу уыдон та стыр нӕ уыдысты. Бирӕ ӕмбырдтӕн сӕ бон нӕ уыд сӕхицӕн Паддзахады зал саразын, стӕй кувӕн бынат саразынӕн хицауадӕй бар райсын дӕр тынг зын уыди. Фӕлӕ ӕмбырдтӕм уыйбӕрц ног адӕм цӕуын райдыдта, ӕмӕ хъуыди бирӕ Паддзахады залтӕ. Уымӕ гӕсгӕ филиалы сарӕзтой Паддзахады залтӕ аразыны хайад (ныр проектты ӕмӕ арӕзтады бынӕттон хайад).

Ног программӕмӕ гӕсгӕ Залтӕ аразын райдыдтой сакъадах Ниасыл, провинци Цӕгат Суматрӕйы. Ӕмбырд «Гунунгситоли»-йы рагӕй чи лӕггад кӕны, иу ахӕм ӕфсымӕр, Хаогоаро Геа, радзырдта: «Нӕхи Паддзахады зал нын кӕй уыдзӕн, уый куы фехъуыстам, уӕд нӕ цинӕн кӕрон дӕр нал уыд. Филиал ӕрбарвыста авд барвӕндон кусӕджы, цӕмӕй аразджытӕн разамынд лӕвӕрдтаиккой. Зал арӕзт фӕци 2001 азы». Фаонасохи Лаоли, бынӕттон арӕзтадон комитетӕй, радзырдта: «Раздӕр-иу ӕмбырд кодтам гыццыл хӕдзӕртты, ӕмӕ бынӕттон цӕрджытӕ Йегъовӕйы Ӕвдисӕнтӕм ӕнӕрвӕссон цӕстӕй кастысты. Фӕлӕ нӕ Паддзахады зал арӕзт куы фӕци, уӕд, ӕмбырдтӕм чи цыд, уыдоны нымӕц 20 адӕймагӕй уайтагъд схызт 40 адӕймагмӕ. Афӕдз дӕр нӕма рацыд, афтӕ та сӕ нымӕц фӕфылдӕр 500 проценты! Кӕм цӕрӕм, уым нӕ Паддзахады залӕй рӕсугъддӕр кувӕн бынат нӕй. Ныр Йегъовӕйы Ӕвдисӕнтӕм адӕм бынтон ӕндӕр цӕстӕй кӕсынц».

2006 азы Бандунгы (провинци Ныгуылӕн Явӕ) ӕфсымӕртӕ зӕхх агурын райдыдтой. Уым хъуамӕ сарӕзтаиккой фыццаг Паддзахады зал горӕты. Сингап Панджайтан, арӕзтадон комитеты чи лӕггад кодта, иу ахӕм хистӕр нӕлгоймаг радзырдта: «Ӕнӕхъӕн аз агуырдтам, чи нын сбӕззыдаид, ахӕм зӕххы хай. Фӕлӕ нын цӕмӕй хицауад Зал аразынӕн бар радтаид, уый тыххӕй уал хъуамӕ бар райстаиккам, уыцы зӕххы хайы фарсмӕ чи цард ӕмӕ ӕндӕр диныл хӕст чи уыд, 60 ахӕм адӕймагӕй. 76 адӕймагӕн нӕ курдиат сӕ зӕрдӕмӕ фӕцыд. Уыдонӕй иу уыди, раздӕр нӕ ныхмӕ чи цыд, иу ахӕм дзырддзӕугӕ сылгоймаг. Арӕзтад куы фӕци, уӕд нӕ Зал фенынмӕ фӕхуыдтам нӕ сыхӕгты ӕмӕ Бандунгы мэры. Мэр загъта: „Ацы сыгъдӕг ӕмӕ аив кувӕн бынаты хуызӕн хъуамӕ уой иннӕ аргъуанты кувӕн бынӕттӕ дӕр“». Уыцы 2-уӕладзыгон Паддзахады зал Хуыцауӕн снывонд кодтой 2010 азы.

2001 азӕй фӕстӕмӕ Индонезийы сарӕзтой 100 Паддзахады залӕй фылдӕр, фӕлӕ ма ноджы фылдӕр та хъӕуы саразын.