Йесо рӕзы, Иоанн та ныллӕг кӕны

НӔ ЭРӔЙЫ 30 азы Куадзӕны фӕстӕ Йесо ӕмӕ йӕ ахуыргӕнинӕгтӕ ацыдысты Иерусалимӕй. Ӕрмӕст фӕстӕмӕ Галилеймӕ нӕ, фӕлӕ Иудейы бӕстӕм ӕмӕ уым адӕмӕн аргъуыд дӕттынц. Аргъауӕг Иоанн ныр афӕдзӕй фылдӕр ацы куыст кӕны, фӕлӕ ма уӕддӕр йӕ ахуыргӕнинӕгтӕ йемӕ сты.

Раст зӕгъгӕйӕ, Йесо йӕхӕдӕг нӕ аргъауы, йӕ разамындӕй йӕ ахуыргӕнинӕгтӕ кӕнынц уыцы куыст. Уыцы аргъуыдӕн дӕр ис Иоанны аргъуыды нысаниуӕг: уымӕй иудейтӕ ӕвдисынц, Хуыцауы Закъоны ныхмӕ цы тӕригъӕдтӕ ракодтой, уыдоныл кӕй фӕсмон кӕнынц. Фӕлӕ йӕ райгасы фӕстӕ Йесо йӕ ахуыргӕнинӕгтӕн амоны, цӕмӕй дӕттой аргъуыд ӕндӕр нысанӕн. Абоны чырыстон аргъуыд нысан кӕны Иегъовӕ Хуыцауӕн лӕггад кӕнынӕн хи снывонд кӕнын.

Уӕдӕ Йесойы лӕггаддзинады рӕстӕджы, кӕд Йесо ӕмӕ Иоанн хицӕнтӕй кусынц, уӕддӕр сӕ дыууӕ дӕр ахуыр кӕнынц ӕмӕ аргъуыд дӕттынц сӕ тӕригъӕдтыл ӕрфӕсмонгӕнӕг адӕмӕн. Фӕлӕ Иоанны ахуыргӕнинӕгтӕ Йесомӕ хӕлӕг кӕнынц ӕмӕ Иоаннӕн хъаст кӕнынц: «Равви!.. мӕнӕ Уый аргъауы ӕмӕ иуылдӕр Уымӕ цӕуынц».

Хӕлӕг кӕныны бӕсты Иоанн цин кӕны Йесойы ӕнтыстытыл ӕмӕ йӕ фӕнды, цӕмӕй йӕ ахуыргӕнинӕгтӕ дӕр афтӕ цин кӕной. Иоанн сын сӕ зӕрдыл ӕрлӕууын кодта: «Сымах уӕхӕдӕг мӕнӕн стут ӕвдисӕнтӕ уым, ӕз кӕй загътон: ӕз нӕ дӕн Чырысти, фӕлӕ ӕз ӕрвыст дӕн Уый размӕ». Ӕмӕ уый фӕстӕ пайда кӕны цӕстуынгӕ цӕвиттонӕй: «Чызг куырд кӕмӕн ис, уый у сиахс; сиахсы лымӕн та, лӕугӕйӕ ӕмӕ сиахсмӕ хъусгӕйӕ цин кӕны... Ӕмӕ мӕ ацы циндзинад сӕххӕсти» (НФ).

Иоанн ӕхсӕз мӕйы дӕргъы Йесойы йӕ ахуыргӕнинӕгтимӕ куы зонгӕ кодта, уӕд сиахсы ӕмбалау цин кодта. Уыдонӕй иуӕй-иутӕ систы Йесойы фидӕны уӕларвон чындзы къорды уӕнгтӕ. Уыцы къорды уӕнгтӕ иуылдӕр сты сыгъдӕг удӕй сӕрст чырыстӕттӕ. Иоанны фӕнды, цӕмӕй йӕ ахуыргӕнинӕгтӕ Йесойы фӕдыл ацӕуой, уымӕн ӕмӕ йӕ хӕс уыд Йесойы ӕнтыстджын лӕггаддзинадӕн фӕндаг ӕрцӕттӕ кӕнын. Мӕнӕ куыд ӕмбарын кӕны уый Аргъауӕг Иоанн: «Уымӕн ӕмбӕлы рӕзын, мӕнӕн та ныллӕг кӕнын».

Йесойы равзӕрд, ӕмӕ йын адӕмы ирвӕзындзинады цы нысаниуӕг ис, уый тыххӕй раздӕр Аргъауӕг Иоанны ахуыргӕнинаг, ныр та Йесойы ахуыргӕнинаг, Иоанн фыссы: «Уӕлейӕ Ӕрцӕуӕг у ӕппӕтӕй бӕрзонддӕр... Фыд уарзы Фырты ӕмӕ ӕппӕт дӕр ратта Йӕ къухмӕ. Фыртыл ӕууӕндӕгӕн ис мыггагмӕйы цард; Фыртыл нӕ ӕууӕндӕг та нӕ фендзӕн цард, фӕлӕ Хуыцауы фыдӕхард ис йӕ уӕлӕ».

Аргъауӕг Иоаннӕн йӕ куыст кӕй къаддӕр кӕны, уый куы бамбарын кодта, уӕд ӕй фӕстӕдӕр паддзах Ирод ахӕстоны ныппӕрста. Ирод ракуырдта йе ’фсымӕр Филиппы ус Иродиадӕйы, ӕмӕ цы ӕнӕраст хъуыддаг сарӕзта, уый Иоанн куы раргом кодта, уӕд ӕй ахӕстоны ныппӕрста. Йесо уыцы хабар куы фехъуыста, уӕд Иудейы бӕстӕ ныууагъта ӕмӕ йӕ ахуыргӕнинӕгтимӕ фӕстӕмӕ Галилеймӕ аздӕхт. Иоанны 3:22—4:3; Куыстытӕ 19:4; Матфейы 28:19; 2 Коринфӕгтӕм 11:2; Маркы 1:14; 6:17—20.

▪ Йесойы райгасы агъоммӕ йӕ ахуыргӕнинӕгтӕ йӕ разамындӕй адӕмӕн цы аргъуыд дӕттынц, уымӕн цы нысаниуӕг ис? Йӕ райгасы фӕстӕ аргъуыдӕн та?

▪ Куыд ӕвдисы Иоанн, йӕ ахуыргӕнинӕгты хъастӕн бындур кӕй нӕй?

▪ Иоанны ахӕстоны цӕмӕн ныппӕрстой?